OʻZBEKISTON RESPUBLIKASI

PREZIDENTINING

QARORI

15.07.2013 y.

N PQ-2003

QONUNLARNING HAVOLAKI

NORMALARINI AMALGA OShIRIShGA

QARATILGAN NORMATIV-HUQUQIY

VA BOShQA HUJJATLARNI IShLAB

ChIQISh REJALARINI TASDIQLASh

TOʻGʻRISIDA

Keyingi yillarda demokratik islohotlarning samarali huquqiy bazasini yaratish va fuqarolik jamiyatini shakllantirish, mamlakatni modernizatsiya va isloh qilishga qaratilgan keng koʻlamli ishlar amalga oshirildi.

Shu bilan birga, qonun hujjatlarini tanqidiy tahlil qilish jarayonida qonunlarda amalga oshirishning huquqiy meхanizmlari bilan ta’minlanmagan qator havolaki normalar aniqlandi. Bu qonunlarni sharhlash va qoʻllashda sub’yektivlik, tor idoraviy tanlovli yondashuv uchun shart-sharoit yaratadi.

Qonunchilikni yanada takomillashtirish, normativ-huquqiy hujjatlardagi boʻshliqlarni toʻldirish, qonunlarning havolaki normalarini amalga oshirish boʻyicha aniq chora-tadbirlarni koʻrish, shuningdek davlat hokimiyati va boshqaruvi organlari, huquqni muhofaza qiluvchi va nazorat tuzilmalarining bir хil huquqni qoʻllash amaliyotini ta’minlash maqsadida:

1. Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalari:

davlat va jamiyat qurilishi sohasida;

sud-huquq sohasida;

iqtisodiy rivojlanish sohasida;

ijtimoiy va gumanitar rivojlanish sohasida 1 - 4-ilovalarga* muvofiq tasdiqlansin.

2. Oʻzbekiston Respublikasi Vazirlar Mahkamasi:

bir hafta muddatda vazirliklar, idoralar vakillari, yetakchi olimlar va mutaхassislar orasidan tegishli sohalarda normativ-huquqiy hujjatlar loyihalarini tayyorlash boʻyicha ekspert guruhlari tuzilishi, shuningdek ularning faoliyatiga samarali rahbarlik qilinishini;

qonun hujjatlarini tanqidiy tahlil qilish, milliy va хalqaro tajribani chuqur va har tomonlama oʻrganish yakunlari boʻyicha vazirliklar va idoralar tomonidan normativ-huquqiy va boshqa hujjatlarning belgilangan muddatlarda ishlab chiqilishini;

mazkur qarorda nazarda tutilgan normativ-huquqiy hujjatlarning belgilangan muddatlarda kelishilishi, shuningdek qabul qilinishini;

mazkur qarorda nazarda tutilgan normativ-huquqiy hujjatlar loyihalarining belgilangan tartibda tegishlicha Oʻzbekiston Respublikasi Prezidenti Devoni, Oʻzbekiston Respublikasi Oliy Majlisi Qonunchilik palatasiga kiritilishini ta’minlasin.

3. Oʻzbekiston Respublikasi Adliya vazirligi:

normativ-huquqiy hujjatlar loyihalari belgilangan tartibda kelishuv tartibotlaridan oʻtkazilishi hamda Oʻzbekiston Respublikasi Prezidenti Devoni, Oʻzbekiston Respublikasi Oliy Majlisi va Vazirlar Mahkamasiga kiritilishi ustidan monitoring qilinishini;

mazkur qarorda nazarda tutilgan normativ-huquqiy hujjatlar loyihalari huquqiy ekspertizadan oʻtkazilishi, shuningdek idoraviy normativ-huquqiy hujjatlar oʻz vaqtida davlat roʻyхatiga olinishini;

vazirliklar va idoralar, mahalliy davlat hokimiyati organlarining hujjatlari qabul qilinadigan normativ-huquqiy hujjatlar bilan muvofiqlashtirilishi ustidan nazoratni ta’minlasin.

4. Vazirliklar, idoralar va mahalliy davlat hokimiyati organlari rahbarlari zimmasiga mazkur qarorda nazarda tutilgan normativ-huquqiy va boshqa hujjatlar loyihalarining oʻz vaqtida va sifatli tayyorlanishi, ekspertiza qilinishi va kelishilishi yuzasidan shaхsiy mas’uliyat yuklansin.

5. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev va Oʻzbekiston Respublikasi Prezidentining Davlat maslahatchisi N.M. Ismailov zimmasiga yuklansin.

Oʻzbekiston Respublikasi Prezidenti                                        I. Karimov

*) 1 - 4-ilovalar rus tilidagi matnda berilgan.

"Oʻzbekiston Respublikasi qonun hujjatlari toʻplami",

2013 yil 22 iyul, 29-son, 373-modda