OʻZBEKISTON RESPUBLIKASINING

KONSTITUTsIYaVIY

QONUNI

09.04.2012 y.

N OʻRQ-320

DAVLAT HOKIMIYaTI VAKILLIK

ORGANLARIGA    VA    OʻZBEKISTON

RESPUBLIKASI PREZIDENTINING

NAVBATDAGI SAYLOVI TOʻGʻRISIDA

Qonunchilik palatasi tomonidan 2012 yil 6 martda qabul qilingan

Senat tomonidan 2012 yil 23 martda ma’qullangan

Ushbu Qonun Oliy Majlis, Oʻzbekiston Respublikasi Prezidenti, mahalliy davlat hokimiyati vakillik organlariga navbatdagi saylovga tayyorgarlik koʻrish va uni saylov qonunchiligiga, saylovchilarning хohish-irodasiga toʻliq muvofiq tarzda oʻtkazishda Oʻzbekiston Respublikasi Konstitutsiyasining prinsiplari va talablariga soʻzsiz rioya etilishini ta’minlash maqsadida hamda хalqaro huquqning umume’tirof etilgan prinsiplari va normalarini hisobga olgan holda qabul qilinmoqda.

Bunda saylov jarayonini amalga oshirish hamda hokimiyatning vakillik va ijro etuvchi tarmoqlarini shakllantirishda siyosiy partiyalarning faol ishtirok etishi uchun tashkiliy va huquqiy jihatdan maqbul shart-sharoitlar yaratish muhim ahamiyat kasb etadi.

1-modda. Oʻzbekiston Respublikasi Oliy Majlisining Qonunchilik palatasiga hamda Qoraqalpogʻiston Respublikasi Joʻqorgʻi Kengesiga, viloyatlar, tumanlar, shaharlar davlat hokimiyati vakillik organlariga navbatdagi saylov Oʻzbekiston Respublikasi Konstitutsiyasining 117-moddasida belgilangan muddatda - 2014 yil dekabr oyi uchinchi oʻn kunligining birinchi yakshanbasida oʻtkazilsin.

2-modda. Oʻzbekiston Respublikasi Prezidentining navbatdagi saylovi 2015 yilning birinchi yarmida - Oʻzbekiston Respublikasi Markaziy saylov komissiyasi Oʻzbekiston Respublikasi Oliy Majlisining Qonunchilik palatasiga saylov yakunlari boʻyicha qaror chiqargan kundan e’tiboran 90 kun oʻtgandan keyingi birinchi yakshanbada, "Oʻzbekiston Respublikasi Prezidenti saylovi toʻgʻrisida"gi Qonunga toʻliq muvofiq holda oʻtkazilsin.

3-modda. Oʻzbekiston Respublikasining 2002 yil 4 aprelda qabul qilingan "Referendum yakunlari hamda davlat hokimiyati tashkil etilishining asosiy prinsiplari toʻgʻrisida"gi 350-II-sonli Konstitutsiyaviy Qonuni (Oʻzbekiston Respublikasi Oliy Majlisining Aхborotnomasi, 2002 yil, N 4-5, 60-modda; Oʻzbekiston Respublikasi Oliy Majlisi palatalarining Aхborotnomasi, 2008 yil, N 12, 637-modda; 2011 yil, N 12/1, 344-modda) 3-moddasining ikkinchi qismi chiqarib tashlansin.

4-modda. Ushbu Qonun rasmiy e’lon qilingan kundan e’tiboran kuchga kiradi.

Oʻzbekiston Respublikasining Prezidenti                      I. Karimov

Oʻzbekiston Respublikasi Oliy Majlisi palatalarining Aхborotnomasi, 2012 yil, 4-son, 104-modda