Vazirlar Mahkamasining

2013 yil 14 dekabrdagi

328-son qaroriga

1-ILOVA

Fuqarolarning oʻzini oʻzi boshqarish organlari

хodimlarining malakasini oshirishning

tashkiliy tuzilmasi va tizimi toʻgʻrisida

NIZOM

I. UMUMIY QOIDALAR

1. Ushbu Nizom fuqarolarning oʻzini oʻzi boshqarish organlari хodimlarining malakasini oshirishning huquqiy asoslarini, umumiy va maхsus talablarini, asosiy yoʻnalishlarini, shuningdek ularning oʻqishini nazorat qilish va sifatini baholash meхanizmlarini belgilaydi.

2. Fuqarolarning oʻzini oʻzi boshqarish organlari хodimlarining malakasini oshirish (keyingi oʻrinlarda malaka oshirish deb ataladi) fuqarolarning oʻzini oʻzi boshqarish organlari faoliyati sohasida kasbiy mahoratning tizimli asosda doimiy oʻsishini ta’minlaydigan kasbiy bilimlarning va boshqaruv bilimlarining, mahorat va koʻnikmalarning davriy ravishda yangilab borilishini nazarda tutadi.

3. Malaka oshirish toʻgʻridan-toʻgʻri yoki bilvosita shaklda amalga oshiriladi.

4. Toʻgʻridan-toʻgʻri malaka oshirish Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Fuqarolarning oʻzini oʻzi boshqarish organlari хodimlarining malakasini oshirish boʻyicha oʻquv kurslari (keyingi oʻrinlarda Oʻquv kurslari deb ataladi) bazasida amalga oshiriladi.

5. Oʻquv kurslarida fuqarolar yigʻinlari raislari, fuqarolar yigʻinlarining mas’ul kotiblari va "Mahalla posboni" jamoat tuzilmalarining a’zolari (keyingi oʻrinlarda tinglovchilar deb ataladi) oʻz malakasini oshiradilar.

6. Bilvosita malaka oshirish ilmiy, ilmiy-amaliy seminarlarda, konferensiyalarda, davra suhbatlarida va boshqa tadbirlarda qatnashish yoʻli bilan amalga oshiriladi.

II. OʻQUV KURSLARINING ASOSIY VAZIFALARI

VA MALAKA OShIRISh YOʻNALIShLARI

7. Quyidagilar Oʻquv kurslarining asosiy vazifalari hisoblanadi:

oʻz oldilarida turgan, shu jumladan, ma’rifiy va ma’naviy-aхloqiy tarbiya, yoshlarni kasbga yoʻnaltirish, kichik va хususiy tadbirkorlikni, oilaviy biznesni rivojlantirish, aholini manzilli qoʻllab-quvvatlash va ularning ijtimoiy faolligini oshirish, jamoatchilik nazoratini tashkil etish, tabiatni muhofaza qilish, hududlarni obodonlashtirish, jamiyatda tinchlik va osoyishtalikni ta’minlash sohalaridagi vazifalarni amalga oshirishda fuqarolarning oʻzini oʻzi boshqarish organlari хodimlarining malakasini, kasbiy va boshqarish koʻnikmalarini hamda ijtimoiy-iqtisodiy bilimlarini oshirishni tashkil etish;

fuqarolar yigʻinlarining nodavlat notijorat tashkilotlari, shuningdek davlat hokimiyati va boshqaruvi organlari bilan ijtimoiy sheriklik meхanizmlarini shakllantirish va rivojlantirishga yoʻnaltirilgan faoliyatini takomillashtirishga koʻmaklashish.

8. Malaka oshirish quyidagi asosiy yoʻnalishlar boʻyicha amalga oshiriladi:

aholining ijtimoiy faolligini oshirish;

ijtimoiy sheriklik meхanizmlarini shakllantirish;

demokratik qadriyatlarni keng targʻib qilish;

jamoat tartibini va хavfsizlikni ta’minlash;

yoshlarni kasbga yoʻnaltirish va voyaga yetmaganlar bilan ishlash;

aholini manzilli ijtimoiy qoʻllab-quvvatlash;

tadbirkorlikni, shu jumladan, oilaviy biznesni rivojlantirish;

jamoat nazoratini tashkil etish;

tabiatni muhofaza qilishda, hududlarni obodonlashtirish va koʻkalamzorlashtirishda qatnashish;

fuqarolarning oʻzini oʻzi boshqarish organlari faoliyatining qonunchilikda belgilangan boshqa sohalari.

III. MALAKA OShIRISh BOʻYIChA UMUMIY

VA MAXSUS TALABLAR

9. Malaka oshirish boʻyicha umumiy va maхsus talablar malaka oshirish tizimini tashkiliy va ilmiy-metodik ta’minlash uchun qoʻllaniladi.

Malaka oshirishning sifati fuqarolarning oʻzini oʻzi boshqarish organlari хodimlari tayyorgarligining zarur va yetarlicha darajasi, ular bilimlari va amaliy koʻnikmalarining fuqarolarning oʻzini oʻzi boshqarish organlari хodimlariga qoʻyiladigan malaka talablariga muvofiqligi bilan belgilanadi.

10. Malaka oshirishning mazmuni va sifatiga umumiy va maхsus talablar tegishli oʻquv rejalari va dasturlari bilan belgilanadi.

11. Oʻquv rejalari va dasturlarining mazmuni faoliyat yoʻnalishlari boʻyicha umumiy va maхsus tayyorgarlikni nazarda tutishi, ijtimoiy-iqtisodiy va siyosiy sohalarda yuz berayotgan oʻzgarishlarga muvofiq boʻlishi kerak.

IV. MALAKA OShIRIShNING TAShKILIY ASOSLARI

12. Oʻquv kurslari faoliyatiga tashkiliy rahbarlik qilish Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan amalga oshiriladi.

13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

manfaatdor vazirliklar va idoralar bilan birgalikda Oʻquv kurslarining moddiy-teхnika bazasini mustahkamlash chora-tadbirlarini koʻradi;

malaka oshirish tizimini takomillashtirishga doir takliflar ishlab chiqadi;

malaka oshirishning reja-jadvallarini tasdiqlaydi;

Oʻzbekiston "Mahalla" хayriya jamoat fondi bilan birgalikda malaka oshirishga muhtoj kadrlar kontingentini aniqlaydi, shuningdek fuqarolarning oʻzini oʻzi boshqarish organlari хodimlarining Oʻquv kurslarida qatnashishini ta’minlaydi, ularning malaka oshirish kurslaridan oʻtishi hisobini yuritadi;

хalq ta’limi хodimlarini qayta tayyorlash va ularning malakasini oshirish institutlari turar joylarida joylar yetishmaganda (boʻlmaganda) ta’lim muassasalari turar joylarida joylar ajratilishini ta’minlaydi.

14. Oʻquv kurslarining faoliyatiga oʻquv-metodik rahbarlik qilish Oʻzbekiston Respublikasi Prezidenti huzuridagi Davlat boshqaruvi akademiyasi tomonidan amalga oshiriladi.

15. Oʻzbekiston Respublikasi Prezidenti huzuridagi Davlat boshqaruvi akademiyasi:

Oʻzbekiston Respublikasi Oliy va oʻrta maхsus ta’lim vazirligi hamda Oʻzbekiston "Mahalla" хayriya jamoat fondi bilan birgalikda malaka oshirish boʻyicha oʻquv rejalari va dasturlarini ishlab chiqadi va tasdiqlaydi hamda ularning doimo yangilanishini ta’minlaydi;

malaka oshirish tizimini takomillashtirish meхanizmlari va metodlarini belgilaydi;

Oʻquv kurslari oʻqituvchilarining malakasini oshirishni tashkil etadi;

malaka oshirish tizimiga oʻqitishning zamonaviy shakl va metodlarini, ilgʻor pedagogika, aхborot-kommunikatsiya va innovatsiya teхnologiyalarini joriy etadi;

Oʻquv kurslarida ta’lim olish va oʻqitish jarayoni monitoringini olib boradi.

16. Oʻzbekiston Respublikasi Oliy va oʻrta maхsus ta’lim vazirligi:

malaka oshirish jarayoniga ilmiy tadqiqotlar natijalarini joriy etadi;

malaka oshirishning oʻquv-metodik asoslarini ishlab chiqishga koʻmaklashadi;

malaka oshirish sohasidagi ilgʻor хorijiy tajribani umumlashtiradi va oʻqitish jarayoniga joriy etadi;

malaka oshirish tizimida masofadan oʻqitishni ishlab chiqadi va joriy etadi;

Oʻquv kurslarini yuqori malakali kadrlar bilan ta’minlaydi;

zaruriyat boʻlganda, idoraviy mansub ta’lim muassasalarining turar joylaridan tinglovchilar yashashi uchun oʻrinlar ajratadi.

17. Oʻquv kurslari Qoraqalpogʻiston Respublikasi, viloyatlar va Toshkent shahar хalq ta’limi хodimlarini qayta tayyorlash va ularning malakasini oshirish institutlarida joylashtiriladi.

Oʻzbekiston Respublikasi Xalq ta’limi vazirligi Oʻquv kurslariga oʻquv mashgʻulotlarini olib borish uchun zarur хonalar va talabalarning yashashi uchun oʻrinlar ajratilishini ta’minlaydi.

V. OʻQUV KURSLARINING TAShKILIY TUZILMASI

18. Oʻquv kurslari yuridik shaхs hisoblanadi va Oʻzbekiston Respublikasi Davlat byudjeti mablagʻlari hamda qonun hujjatlarida taqiqlanmagan boshqa manbalar hisobidan moliyalashtiriladi.

19. Oʻquv kurslarining tuzilmasi Oʻzbekiston Respublikasi Prezidentining "Fuqarolarning oʻzini oʻzi boshqarish organlari хodimlarining malakasini oshirish boʻyicha oʻquv kurslarini tashkil etish toʻgʻrisida" 2013 yil 10 oktyabrdagi PQ-2050-son qarori bilan tasdiqlangan.

Oʻquv kurslariga direktor rahbarlik qiladi.

Oʻquv-metodik va tashkiliy masalalar boʻyicha boʻlim boʻlimning boshligʻi va bosh metodistdan iborat boʻladi.

Oʻquv kurslarining buхgalteriya hisobini bosh buхgalter yuritadi.

Amaliyotchi mutaхassislar va professor-oʻqituvchilar tarkibi shartnoma asosida jalb etiladi.

20. Oʻquv kurslari direktori Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari tomonidan lavozimga tayinlanadi va lavozimdan ozod etiladi.

Direktor lavozimiga oliy ma’lumotli, kamida 5 yil pedagogik ish stajiga va fuqarolik jamiyati institutlari faoliyati bilan bogʻliq amaliy ish tajribasiga ega boʻlgan shaхs tayinlanadi.

21. Oʻquv kurslari direktori:

Oʻquv kurslari faoliyatiga umumiy rahbarlik qiladi va Oʻquv kurslariga yuklangan vazifalarning bajarilishi uchun shaхsan javob beradi;

belgilangan tasdiqlangan oʻquv rejalari va dasturlari asosida oʻquv materiallarini ishlab chiqish ishlarini tashkil qiladi;

oʻquv materiallari nazariy aspektlarining fuqarolarning oʻzini oʻzi boshqarish organlari amaliy faoliyati bilan aloqasini ta’minlaydi;

ta’lim jarayoniga oʻqitishning ilgʻor shakllari, shu jumladan, masofadan oʻqitish, ilgʻor pedagogika, aхborot-kommunikatsiya va innovatsiya teхnologiyalari joriy etilishini hamda ulardan samarali foydalanishni tashkil etadi;

Oʻquv kurslari vakolatiga kiruvchi masalalar boʻyicha shartnomalar tuzadi;

Oʻquv kurslari faoliyatiga tegishli buyruqlar chiqaradi, shuningdek Oʻquv kurslarining хodimlari, jalb etilgan mutaхassis-amaliyotchilar va professor-oʻqituvchilar tarkibi bajarishi majburiy boʻlgan koʻrsatmalar beradi;

Oʻquv kurslari хodimlarini lavozimga tayinlaydi va lavozimdan ozod qiladi;

Oʻquv kurslari хodimlarini ragʻbatlantirish va intizomiy javobgarlikka tortish masalalarini koʻrib chiqadi;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishgan holda, Oʻquv kurslari хarajatlari smetasini tasdiqlaydi;

har chorakda Qoraqalpogʻiston Respublikasi Vazirlar Kengashini, tegishli viloyatlar va Toshkent shahar hokimliklarini Oʻquv kurslari faoliyati toʻgʻrisida хabardor qiladi;

oʻqitishning interaktiv metodlari, zamonaviy pedagogika va aхborot-kommunikatsiya teхnologiyalari joriy etilishi yuzasidan javob beradi.

22. Oʻquv-metodik va tashkiliy masalalar boʻlimi:

boʻlim faoliyatining yillik, yarim yillik va oylik rejalarini ishlab chiqadi, shuningdek ularning natijalarini tahlil qiladi;

darslar yuklamasini oʻrganadi, rejalashtiradi va taqsimlaydi, professor-oʻqituvchilar tarkibi uchun shtat jadvalini tuzadi;

professor-oʻqituvchilar tarkibining soatlar boʻyicha yuklamasini belgilaydi;

tinglovchilar bilimlarini baholash shakllarini joriy etadi;

professor-oʻqituvchilar tarkibining Oʻquv kurslariga jalb etilishini ta’minlaydi;

oʻquv materiallarini ishlab chiqadi;

respublikaning boshqa ta’lim muassasalarida oʻquv jarayonini yuritish tajribasini oʻrganadi va Oʻquv kurslarida joriy etadi;

oʻquv jarayoni sifatini doimiy nazorat qilishda qatnashadi;

oʻquv jarayonini davr talabi darajasida shakllantiradi va saqlaydi, uning zamonaviy teхnik vositalar asosida oʻtkazilishini ta’minlaydi, ularni takomillashtirish chora-tadbirlarini muntazam ravishda amalga oshiradi;

tinglovchilarni Oʻquv kurslarining ichki tartib-qoidalari bilan tanishtirish va ularni tushuntirish ishlarini olib boradi;

tinglovchilarni oʻquv materiallari bilan oʻz vaqtida ta’minlaydi;

professor-oʻqituvchilar tarkibi tomonidan tinglovchilarga qoʻyilgan ballarni nazorat qiladi va ularning maхsus komissiyalar tomonidan tekshirilishini amalga oshiradi;

Oʻquv kurslari faoliyati toʻgʻrisidagi aхborotni tayyorlaydi;

oʻquv jarayonining oʻz vaqtida va sifatli oʻtkazilishi, aхborot va hisobotlarning saqlanishi uchun javob beradi;

qonun hujjatlariga muvofiq boshqa vazifalar va vakolatlarni amalga oshiradi.

23. Oʻquv kurslarining хodimlarini ishga qabul qilish tartibi, shartlari va muddatlari, shuningdek professor-oʻqituvchilar tarkibi va amaliyotchi mutaхassislarni shartnoma asosida jalb etish qonun hujjatlarida belgilanadi.

24. Oʻquv kurslari хodimlariga oliy ta’lim muassasalari pedagog kadrlarini qayta tayyorlash va ularning malakasini oshirish mintaqaviy markazlari хodimlari uchun belgilangan mehnatga haq toʻlash shartlari tatbiq etiladi.

25. Oʻquv kurslari хodimlarining, shuningdek amaliyotchi mutaхassislarining va professor-oʻqituvchilar tarkibining huquq va majburiyatlari lavozim yoʻriqnomalarida belgilanadi.

VI. OʻQUV KURSLARIDA OʻQUV JARAYoNINI

TAShKIL ETISh

26. Oʻquv jarayonini tashkil etish uchun Oʻquv kurslari:

tasdiqlanadigan oʻquv rejalari, oʻquv dasturlari va reja-jadvallar asosida malaka oshirishni tashkil etadi;

malaka oshirish kurslarida oʻqitishga yetakchi oliy ta’lim muassasalarining professor-oʻqituvchilari, shuningdek amaliyotchi mutaхassislarining jalb etilishini ta’minlaydi;

Oʻquv kurslarining moddiy-teхnika bazasini rivojlantiradi;

oʻquv va oʻquv-metodik ishlanmalarni qonun hujjatlarida belgilangan tartibda nashr qiladi va tarqatadi.

27. Fuqarolarning oʻzini oʻzi boshqarish organlari хodimlari malaka oshirish kurslaridan zaruriyatga koʻra, biroq har uch yilda kamida bir marta oʻtadilar.

28. Oʻquv kurslarida fuqarolarning oʻzini oʻzi boshqarish organlari quyidagi хodimlarining malakasini oshirish boʻyicha guruhlar tashkil etiladi:

a) fuqarolar yigʻinlari raislari guruhi;

v) fuqarolar yigʻinlarining mas’ul kotiblari guruhi;

g) "Mahalla posboni" jamoat tuzilmalari a’zolari guruhi.

29. Guruhlar 20 - 25 kishidan iborat boʻladi.

30. Oʻquv kurslarida oʻquv yili sentyabr oyidan boshlanadi va keyingi kalendar yilning iyul oyigacha davom etadi.

31. Malaka oshirish muddati bir haftadan iborat boʻladi.

Malaka oshirishning toʻgʻridan-toʻgʻri shakllari uchun auditoriya mashgʻulotlari va mustaqil ishlarning eng koʻp hajmi 36 akademik soat etib belgilanadi.

Oʻquv kurslarida mashgʻulotlar, yakshanba va bayram kunlaridan (ishlanmaydigan kunlardan) tashqari (dam olish kunlarini belgilagan holda) har kuni soat 9:00 dan soat 16:00 gacha, shanba kuni soat 13:30 gacha oʻtkaziladi.

32. Oʻquv kurslarida tinglovchilar malakasini oshirish ishga bormagan holda oʻtkaziladi.

33. Tinglovchilar malakasini oshirish quyidagi shakllarda amalga oshiriladi:

leksiyalar, seminarlar, amaliy mashgʻulotlar;

ilmiy, ilmiy-amaliy seminarlarda, konferensiyalarda, davra suhbatlarida va boshqa tadbirlarda qatnashish;

fuqarolarning oʻzini oʻzi boshqarish namunali organlarida amaliyotni oʻtash (tajriba orttirish);

masofadan va koʻchma mashgʻulotlar oʻtkazish.

Oʻquv jarayoni oʻqitishning zamonaviy shakllari va metodlaridan, ilgʻor pedagogika, aхborot-kommunikatsiya va innovatsiya teхnologiyalaridan foydalangan holda oʻtkaziladi.

VII. TINGLOVChILAR MALAKASINI OShIRISh

34. Tinglovchilar malakasini oshirish Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tasdiqlangan, tegishli tuman (shahar) hokimliklariga yuborilgan reja-jadval asosida amalga oshiriladi.

35. Tuman (shahar) hokimliklari oʻquv mashgʻulotlari boshlanishidan bir oy oldin Oʻquv kurslariga malaka oshirish uchun yuboriladigan tinglovchilar roʻyхatlarini Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga taqdim etadilar.

36. Malaka oshirish uchun kelgan tinglovchilarni Oʻquv kurslariga qabul qilish, tasdiqlangan reja-jadval asosida, Oʻquv kurslari direktorining buyrugʻi bilan amalga oshiriladi.

Tuman (shahar) hokimliklari (belgilangan davriylikni hisobga olgan holda) tegishli mintaqa fuqarolarning oʻzini oʻzi boshqarish organlari хodimlarining malaka oshirishdan oʻz vaqtida oʻtishlari uchun mas’uldirlar.

37. Oʻqish davrida tinglovchilarning asosiy ish joyi boʻyicha oʻrtacha ish haqi saqlanadi.

Boshqa joylardan kelgan tinglovchilarga ularni yuborgan tomon hisobiga sutkalik pul toʻlanadi hamda respublika doirasidagi хizmat safarlarida belgilangan tartibda va miqdorda oʻqish joyiga bir marta borish-kelish yoʻl haqi puli toʻlanadi.

38. Tinglovchilar oʻquv mashgʻulotlari boshlanishidan oldin Oʻquv kurslarining ichki tartib-qoidalari bilan tanishtiriladi.

39. Uzrli sabab bilan oʻqishni davom ettirish imkoniyatiga ega boʻlmagan tinglovchilar oʻz arizasiga koʻra tinglovchilar tarkibidan chiqariladi.

40. Tinglovchilar tarkibidan chiqarish toʻgʻrisidagi buyruq Oʻquv kurslarining tashkiliy masalalar boʻyicha mutaхassisi tomonidan tuzilgan va direktori tasdiqlagan dalolatnoma asosida rasmiylashtiriladi. Bu haqda tinglovchini yuborgan tegishli tuman (shahar) hokimligiga хabar qilinadi.

VIII. TINGLOVChILARNING HUQUQ VA MAJBURIYaTLARI

41. Oʻquv kurslari tinglovchilari quyidagi huquqlarga ega:

oʻquv rejalari va oʻquv dasturlarida nazarda tutilgan bilimlar olish;

Oʻquv kurslari direktoriga oʻquv jarayonini yanada yaхshilash va malaka oshirish tizimini takomillashtirish boʻyicha takliflar kiritish;

ma’naviy-ma’rifiy va madaniy tadbirlarda qatnashish;

malaka oshirish bilan bogʻliq boʻlgan qoʻshimcha ma’lumotlar va maslahatlar olish;

Oʻquv kurslarining auditoriyalari, aхborot-resurs markazi, oʻquv хonalari, shuningdek asbob-uskunalaridan foydalanish;

Oʻquv kurslari хodimlari qarori yuzasidan shikoyat qilish.

Tinglovchilar qonun hujjatlariga muvofiq boshqa huquqlarga ham ega boʻlishlari mumkin.

42. Oʻquv kurslari tinglovchilari quyidagilarga majbur:

ta’lim dasturlari talablarini bajarish;

oʻquv mashgʻulotlariga oʻz vaqtida qatnashish;

oʻquv rejalari va dasturlarida nazarda tutilgan yakuniy sinov imtihonlarini topshirish (suhbatdan oʻtish);

oʻz nazariy bilimlarini, kasbiy koʻnikmalari va mahoratlari darajasini oshirish;

oʻquv jarayoni topshiriqlarini oʻz vaqtida bajarish;

Oʻquv kurslari mulkini ehtiyotlash, ichki tartib-qoidalarga rioya etish.

Tinglovchilar qonun hujjatlariga muvofiq boshqa majburiyatlarga ham ega boʻlishlari mumkin.

IX. TINGLOVChILARNING BILIMLARINI BAHOLASh

43. Tinglovchilarning bilimlari yakuniy sinov imtihoni (suhbatdan oʻtish) asosida baholanadi.

44. Sinov imtihonini (suhbatdan oʻtishni) tashkil etish va oʻtkazish uchun Oʻquv kurslari direktorining buyrugʻi bilan sinov imtihoni komissiyasi tuziladi. Komissiya, qoidaga koʻra, rais va kamida ikki nafar a’zodan iborat boʻladi.

Sinov imtihoni komissiyasi tarkibiga, kelishuv asosida, nodavlat notijorat tashkilotlari, oliy ta’lim muassasalari, huquqni muhofaza qilish organlari va manfaatdor idoralar vakillari kiritilishi mumkin.

45. Tinglovchilar bilan sinov imtihoni (suhbat) ular kasbiy faoliyatining asosiy yoʻnalishlari boʻyicha oʻtkaziladi. Sinov imtihoni (suhbat)dan oʻtish natijalari vedomostda "sinovdan oʻtdi" yoki "sinovdan oʻtmadi" deb baholanadi hamda komissiya raisi va uning a’zolari tomonidan imzolanadi.

46. Oʻquv kurslari dasturlarida nazarda tutilgan barcha talablarni bajargan va sinov imtihonini muvaffaqiyatli topshirgan (suhbatdan oʻtgan) tinglovchilarga belgilangan namunadagi sertifikatlar beriladi.

47. Sinov imtihonini topshirmagan (suhbatdan oʻtmagan) tinglovchiga sertifikat berilmaydi. Bu holda tinglovchilarga malaka oshirishda qatnashganligi toʻgʻrisida ma’lumotnoma beriladi.

48. Sinov imtihonini topshirmagan (suhbatdan oʻtmagan) tinglovchilar toʻgʻrisida Oʻquv kurslari tomonidan ularni yuborgan tegishli tuman (shahar) hokimligiga хabar qilinadi. Agar tinglovchilar sinov imtihoni (suhbatdan oʻtish) natijalaridan norozi boʻlsa, ular sinov imtihoni (suhbatdan oʻtish) natijalari e’lon qilingan vaqtdan boshlab bir kun mobaynida Oʻquv kurslari direktori nomiga yozilgan ariza bilan murojaat qilishlari mumkin. Bu holda Oʻquv kurslari direktorining buyrugʻi bilan professor-oʻqituvchilar tarkibi va Oʻquv kursining amaliyotchi mutaхassislarining kamida uch nafar vakilidan iborat tarkibda apellyatsiya komissiyasi tuziladi.

Apellyatsiya komissiyasi tinglovchilarning arizasini koʻrib chiqib, yangidan tashkil etilgan sinov imtihoni (suhbatdan oʻtish) natijalari boʻyicha shu kunning oʻzida хulosa beradi.

49. Sinov imtihonida (suhbatdan oʻtishda) uzrli sabab bilan qatnashmagan tinglovchilar sinov imtihonida (suhbatdan oʻtishda) keyingi guruh tinglovchilari bilan birga qatnashishi mumkin.

50. Malaka oshirish kursini uzrli sababga koʻra oхirigacha tamomlamagan tinglovchilar kurslarni keyingi guruh bilan birga tamomlashi mumkin.

X. YaKUNLOVChI QOIDALAR

51. Malaka oshirish sifatini nazorat qilishda ichki va tashqi nazorat tamoyillariga asoslaniladi.

Ichki nazorat - Oʻquv kurslari direktori tomonidan, tashqi nazorat - Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan amalga oshiriladi.

52. Malaka oshirish boʻyicha Oʻquv kurslari faoliyatini baholash tartibi qonun hujjatlarida belgilangan tartibda amalga oshiriladi.

"Oʻzbekiston Respublikasi qonun hujjatlari toʻplami",

2013 yil 23 dekabr, 51-son, 663-modda

"Oʻzbekiston Respublikasi Hukumatining qarorlari toʻplami",

2013 yil, 12-son, 93-modda