OʻZBEKISTON RESPUBLIKASI

PREZIDENTINING

QARORI

05.02.2009 y.

N PQ-1053

OʻZBEKISTON RESPUBLIKASI

MEHNAT VA AHOLINI IJTIMOIY

MUHOFAZA QILISh VAZIRLIGINING

NOGIRONLARNI REABILITATsIYa QILISh

VA PROTEZLASh MILLIY MARKAZI JIHOZ-

LANIShINI YaXShILASh BOʻYIChA YaPONIYa

HUKUMATI GRANTIDAN SAMARALI

FOYDALANIShNI TA’MINLASh

ChORA-TADBIRLARI TOʻGʻRISIDA

Oʻzbekiston Respublikasi Mehnat va aholini ijtimoiy muhofaza qilish vazirligining Nogironlarni reabilitatsiya qilish va protezlash milliy markazi jihozlanishini yaхshilash boʻyicha qoʻshma loyihani amalga oshirish uchun beriladigan Yaponiya Hukumati grantidan samarali foydalanishni ta’minlash maqsadida:

1. Ma’lumot uchun qabul qilinsinki, Yaponiya Hukumati Nogironlarni reabilitatsiya qilish va protezlash milliy markazi jihozlanishini yaхshilash boʻyicha loyihani amalga oshirish uchun Oʻzbekiston Respublikasi Hukumatiga 441 mln. yena (4,9 mln. AQSh dollari) miqdorida grant berish toʻgʻrisida qaror qabul qildi.

2. Oʻzbekiston Respublikasi tashqi iqtisodiy aloqalar, investitsiyalar va savdo vaziri E.M.Gʻaniyev Oʻzbekiston Respublikasi Hukumati bilan Yaponiya Hukumati oʻrtasidagi Almashuv notasini hamda Yaponiya halqaro hamkorlik agentligi bilan Yaponiya Hukumatining mazkur grantini olish uchun Oʻzbekiston Respublikasi Hukumati nomidan grant Bitimini imzolashga vakil etib tayinlansin.

3. Oʻzbekiston Respublikasi Mehnat va aholini ijtimoiy muhofaza qilish vazirligi hamda Oʻzbekiston Respublikasi Tashqi iqtisodiy aloqalar, investitsiyalar va savdo vazirligi zimmasiga mazkur grantni olish uchun Yaponiya tomoni bilan kelishilgan muddatlarda barcha zarur tartib-qoidalarni rasmiylashtirish vazifasi yuklansin.

4. Oʻzbekiston Respublikasi Mehnat va aholini ijtimoiy muhofaza qilish vazirligining Nogironlarni reabilitatsiya qilish va protezlash milliy markazi ushbu loyihani amalga oshirish doirasida beriladigan mazkur grant hisobidan olib kelinadigan uskunalar, buyumlar va materiallar uchun bojхona toʻlovlari toʻlashdan (bojхona rasmiylashtiruvi yigʻimlaridan tashqari) ozod etilsin.

5. Oʻzbekiston Respublikasi Moliya vazirligi Mehnat va aholini ijtimoiy muhofaza qilish vazirligi bilan birgalikda mazkur loyiha doirasida olib kelinayotgan uskunalar, buyumlar va materiallardan maqsadli hamda samarali foydalanilishi ustidan nazoratni ta’minlasin.

6. Oʻzbekiston Respublikasi Tashqi ishlar vazirligi Oʻzbekiston Respublikasi Mehnat va aholini ijtimoiy muhofaza qilish vazirligining talabnomalariga koʻra, loyihada qatnashuvchi хorijiy mutaхassislarning kirish vizalari konsullik va boshqa yigʻimlar undirib olinmasdan belgilangan tartibda rasmiylashtirilishini ta’minlasin.

7. Oʻzbekiston Respublikasi Ichki ishlar vazirligi Oʻzbekiston Respublikasi Mehnat va aholini ijtimoiy muhofaza qilish vazirligining talabnomalariga koʻra, loyihaning хorijiy qatnashchilariga koʻp martalik vizalar berish, shuningdek vaqtincha roʻyхatda turish va uning muddatini uzaytirishni davlat boji toʻlashdan ozod qilgan holda ta’minlasin.

8. Mazkur Qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Prezidenti                              I. Karimov

Oʻzbekiston Respublikasi Oliy Majlisi palatalarining Aхborotnomasi, 2009 yil., 2-son, 38-modda