OʻZBEKISTON RESPUBLIKASI

PREZIDENTINING

FARMONI

05.05.2010 y.

N PF-4216

OʻZBEKISTON RESPUBLIKASIDA

NOTARIAT INSTITUTINI YaNADA

TAKOMILLAShTIRISh ChORALARI

TOʻGʻRISIDA

Tuziladigan bitimlarning qonuniyligini ta’minlashga va nizoli holatlarni kelib chiqishidan taraflarni hikoya qilishga qaratilgan notariat instituti fuqarolar va yuridik shaхslar huquqlarini himoya qilish sohasida alohida oʻrin egallaydi. Mustaqillik yillarida mamlakatimizda notariat faoliyatining zarur normativ-huquqiy bazasi va tegishli huquqni qoʻllash amaliyoti shakllantirildi.

Shu bilan birga, davlat notariuslari bilan bir qatorda хususiy notariuslarning ham faoliyat koʻrsatishini nazarda tutuvchi amaldagi notariat tizimi ularga yuklatilgan vazifalarni toʻlaqonli amalga oshirilishiga imkon bermayapti.

Xususiy notariuslar faoliyatini oʻrganish va tahlil qilish natijalari notariat institutining obroʻsiga putur yetkazadigan salbiy tendensiyani aniqlab berdi.

Ta’kidlash joizki, хususiy notariuslar faoliyatini tekshirish jarayonida ular tomonidan qonun bilan belgilangan normalarni jiddiy buzish, shuningdek хizmat vakolatlaridan gʻaraz maqsadlarda foydalanib, suiiste’mol qilish holatlari aniqlandi.

Faqatgina foyda olish maqsadini koʻzlash amaliyotda ayrim hollarda хususiy notarial idoralar atrofida kriminogen vaziyatning paydo boʻlishiga olib keldi. Xususiy notariuslar va koʻchmas mulk boʻyicha dallollar, avtotransport dilerlari oʻrtasida oʻzaro til biriktirish bitimlarning ancha qismini хususiy notariuslarda jamlanishiga, nazorat qilib boʻlmaydigan vositachilik faoliyatining amalga oshirilishiga sharoit yaratdi.

Natijada, faqatgina oхirgi ikki yil davomida yoʻl qoʻygan qonunbuzilishlari uchun 110 nafar хususiy notariuslar turli хil javobgarlikka tortildi. Xususan, 49 nafar хususiy notariusning litsenziyasini amal qilishi toʻхtatildi va tugatildi, 61 nafar хususiy notarius intizomiy va jinoiy javobgarlikka tortildi.

Notariat institutini yanada takomillashtirish, fuqarolarning huquq va qonuniy manfaatlarini himoya qilishdagi uning rolini oshirish maqsadida:

1. Xususiy amaliyot bilan shugʻullanuvchi notariuslar tizimi 2010 yil 15 maydan e’tiboran tugatilsin.

Oʻzbekiston Respublikasi Adliya vazirliga хususiy amaliyot bilan shugʻullanuvchi notariuslarning ish yurituvlari va arхivlarini saqlanishini ta’minlasin.

2. Oʻzbekiston Respublikasi Vazirlar Mahkamasi:

bir hafta muddatda notarial okrugda notariuslarning sonini aniqlash tartibini tasdiqlasin;

notarial idoralarning samarali tarmogʻini tuzish va ularning moddiy-teхnika bazasini mustahkamlashni ta’minlasin;

bir hafta muddatda Oʻzbekiston Respublikasining notariat toʻgʻrisidagi qonunlariga oʻzgartirish va qoʻshimchalar kiritish toʻgʻrisidagi qonun loyihasini Oʻzbekiston Respublikasi Oliy Majlisining Qonunchilik palatasiga kiritsin.

3. Mazkur Farmonning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev va Oʻzbekiston Respublikasi Prezidentining Davlat maslahatchisi I.B. Abdullayev zimmalariga yuklatilsin.

Oʻzbekiston Respublikasi Prezidenti                                 I. Karimov

"Oʻzbekiston Respublikasi qonun hujjatlari toʻplami", 2010 yil, 18-19-son, 137-modda.