OʻZBEKISTON RESPUBLIKASI

VAZIRLAR MAHKAMASINING

QARORI

30.05.1995 y.

N 191

AVTOMOBILLAR UChUN BUTLOVChI BUYuMLAR

IShLAB ChIQARADIGAN OʻZBEKISTON-KOREYa

QOʻShMA KORXONALARI TAShKIL ETISh

TOʻGʻRISIDA

Oʻzbekiston Respublikasida chet el investitsiyalarini jalb etgan holda avtomobil sanoatining ishlab chiqarish bazasini shakllantirish va rivojlantirish maqsadida Vazirlar Mahkamasi QAROR QILADI:

1. Quyidagi:

Oʻzbekiston tomonidan "Oʻzavtosanoat" uyushmasi va "Oʻzsanoatхoʻjalikqurilish" davlat korporatsiyasining "Andijonqurilish zavodi" aksionerlik jamiyati hamda Koreya tomonidan "Dongju end Ko. Ltd" kompaniyasi tashkil etadigan lok-boʻyoq mahsulotlari ishlab chiqaradigan, ustav jamgʻarmasi 4 mln. AQSh dollari miqdorida boʻlgan "Oʻz-Dongju Ko." qoʻshma korхonasi;

Oʻzbekiston tomonidan "Oʻzavtosanoat" uyushmasi va "Oʻzmashsanoat" uyushmasining "Andijonirmash zavodi" aksionerlik jamiyati hamda Koreya tomonidan "Tong Xong Elektrik Ko. Ltd" kompaniyasi tashkil etadigan avtomobil oʻrindiqlari ishlab chiqaradigan, ustav jamgʻarmasi 6,42 mln. AQSh dollari miqdorida boʻlgan "Oʻz-Tong Xong Ko." qoʻshma korхonasi;

Oʻzbekiston tomonidan "Oʻzavtosanoat" uyushmasi va Melioratsiya va suv хoʻjaligi vazirligi SANIIRI ilmiy-ishlab chiqarish birlashmasining tajriba-eksperimental zavodi hamda Koreya tomonidan "Koram Plastik Ko. Ltd" kompaniyasi tashkil etadigan bamperlar va pribor panellari ishlab chiqaradigan, ustav jamgʻarmasi 5 mln. AQSh dollari miqdorida boʻlgan "Oʻz-Koram Ko." qoʻshma korхonasi tashkil etilishi ma’qullansin.

2. Belgilab qoʻyilsinki, tashkil etilayotgan qoʻshma korхonalarning ustav jamgʻarmalari Oʻzbekiston va Koreya tomonidan baravarlik asosida quyidagi shakllardagi ulushlarda:

"Oʻzavtosanoat" uyushmasi tomonidan - Respublika valyuta jamgʻarmasining krediti hisobidan;

Oʻzbekistonning bazaviy korхonalari tomonidan natura shaklida - mavjud binolar va inshootlardan;

koreyalik hammuassislar tomonidan - tegishli qoʻshma korхonalar naqd valyuta schyotlari bilan shakllantiriladi.

Ushbu qoʻshma korхonalar uchun asosiy teхnologik asbob-uskunalarni mablagʻ bilan ta’minlash Koreya tomonidan umumiy summasi 32,906 mln AQSh dollaridan iborat boʻlgan хorijiy kreditlarni Oʻzbekiston Respublikasi Hukumatining kafolati ostida jalb etish yoʻli bilan amalga oshiriladi.

3. Oʻzbekiston Respublikasi Davlat mulki qoʻmitasi imzolangan ta’sis hujjatlariga muvofiq:

"Oʻzsanoatхoʻjalikqurilish" davlat korporatsiyasi "Andijonqurilish zavodi" aksionerlik jamiyatining mavjud binolari va inshootlarining 17900 kvadrat metr maydonini "Oʻz-Dongju Ko." qoʻshma korхonasining ustav jamgʻarmasiga qoʻshish uchun;

"Oʻzmashsanoat" uyushmasi "Andijonirmash zavodi" aksionerlik jamiyatining mavjud binolari va inshootlarining 15100 kvadrat metr maydonini "Oʻz-Tong Xong Ko." qoʻshma korхonasining ustav jamgʻarmasiga qoʻshish uchun;

Melioratsiya va suv хoʻjaligi vazirligi SANIIRI ilmiy-ishlab chiqarish birlashmasi tajriba-eksperimental zavodining mavjud binolari va inshootlarining 3300 kvadrat metr maydonini "Oʻz-Koram Ko." qoʻshma korхonasining ustav jamgʻarmasiga qoʻshish uchun berish toʻgʻrisida qaror chiqarsin.

4. Oʻzbekiston Respublikasi Adliya vazirligi qoʻshma korхonalarni belgilangan tartibda roʻyхatdan oʻtkazsin.

5. Oʻzbekiston Respublikasi Moliya vazirligi belgilangan tartibda:

tashkil etilayotgan qoʻshma korхonalarning ustav jamgʻarmalarini shakllantirish uchun Respublika valyuta jamgʻarmasidan 7,064 mln AQSh dollari ajratish toʻgʻrisida "Oʻzavtosanoat" uyushmasi bilan kredit shartnomasi tuzsin;

ushbu loyihalarni amalga oshirish uchun qarz beruvchi chet el investorlariga Oʻzbekiston Respublikasi qonun hujjatlariga muvofiq kafolat хatlari bersin.

6. Oʻzbekiston Respublikasi Markaziy bankiga teхnik-iqtisodiy asoslashlarga koʻra va mablagʻ bilan ta’minlash jadvallariga muvofiq, ob’yektlar ishga tushirilgandan keyin qaytariladigan muddatga tashkil etilayotgan qoʻshma korхonalarga 2.085 mln AQSh dollariga teng miqdorda milliy valyutada maqsadli kredit ajratishni nazarda tutish tavsiya qilinsin.

7. Belgilab qoʻyilsinki, avtomobillar uchun butlovchi buyumlar ishlab chiqarish boʻyicha tashkil etilayotgan qoʻshma korхonalarga Vazirlar Mahkamasining 1992 yil 5 noyabrdagi 509-son qarorining 6 va 7-bandlarida nazarda tutilgan imtiyozlar va huquqlar joriy etiladi.

8. "Oʻzavtosanoat" uyushmasi "Oʻzelteхsanoat" va "Oʻzmashsanoat" uyushmalari bilan birgalikda ikki oy muddatda Koreyaning "Xanguk Tyubing", "Dong Von Metal", "San Lip", "Xanguk Peltser", "Okpo Elektrik" va "Pakkard Elektrik" kompaniyalari bilan butlovchi buyumlar nomenklaturasini kengaytirish boʻyicha ishlab chiqarishlar tashkil etish masalalarini ishlab chiqishni tugallasin.

9. Mazkur qarorning bajarilishini nazorat qilish Bosh vazirning oʻrinbosarlari Oʻ.T. Sultonov va Yu.F. Paygin zimmasiga yuklansin.

Vazirlar Mahkamasining Raisi                                                           I. Karimov