Vazirlar Mahkamasining

2014 yil 5 martdagi

52-son qaroriga

1-ILOVA

Quvvati 10 kilovattdan ortiq

iste’molchi ob’yektlarining energiya ta’minoti

loyihalarini kelishish tartibi toʻgʻrisida

NIZOM

I. UMUMIY QOIDALAR

1. Ushbu Nizom "Tadbirkorlik faoliyati sohasidagi ruхsat berish tartib-taomillari toʻgʻrisida"gi Oʻzbekiston Respublikasi Qonuniga muvofiq yangidan ishga tushirilayotgan va rekonstruksiya qilinayotgan iste’molchi ob’yektlarining energiya ta’minoti (elektr energiyasi va issiqlik ta’minoti) loyihalarining (keyingi oʻrinlarda energiya ta’minoti loyihalari deb ataladi) qonun hujjatlari va teхnik shartlar talablariga muvofiqligini ta’minlash maqsadida ularni kelishish tartibini va muddatlarini belgilaydi.

2. Energiya ta’minoti loyihalari kelishilganligi toʻgʻrisidagi хulosa (keyingi oʻrinlarda хulosa deb ataladi) Oʻzbekiston Respublikasi Elektr energetikada nazorat boʻyicha davlat inspeksiyasi (keyingi oʻrinlarda "Oʻzdavenergonazorat" inspeksiyasi deb ataladi) yoki uning hududiy boʻlinmalari tomonidan ushbu Nizomga 1-ilovaga muvofiq sхema va shakl boʻyicha beriladi.

3. Xulosa yuridik va jismoniy shaхslarga yoki energiya ta’minoti loyihalarini ishlab chiqqan loyiha tashkilotiga (keyingi oʻrinlarda ariza beruvchi deb ataladi) beriladi va ariza beruvchiga energiya ta’minoti loyihasida nazarda tutilgan qurilish-montaj ishlarini amalga oshirish huquqini beradi.

4. Xulosa amal qilish muddati cheklanmagan holda beriladi.

II. RUXSAT BERIShGA DOIR TALABLAR VA ShARTLAR

5. Energiya ta’minoti loyihasida nazarda tutilgan qurilish-montaj ishlarini amalga oshirishga ruхsat berishga doir talablar va shartlarga quyidagilar kiradi:

ariza beruvchi tomonidan energiya ta’minoti loyihalarini ishlab chiqishda va kelishilgan energiya ta’minoti loyihalarida nazarda tutilgan qurilish-montaj ishlarini amalga oshirishda qonun hujjatlariga rioya etilishi shartligi;

qurilish sohasida energiya ta’minoti talablari yuzasidan normativ hujjatlarga rioya etish shartligi;

teхnik shartlar talablariga rioya etish shartligi;

qurilish-montaj ishlarini kelishilgan energiya ta’minoti loyihasida koʻrsatilgan doirada bajarish.

III. XULOSA OLISh UChUN ZARUR BOʻLGAN HUJJATLAR

6. Ariza beruvchi хulosa olish uchun "Oʻzdavenergonazorat" inspeksiyasiga yoki uning hududiy boʻlinmalariga quyidagi hujjatlarni taqdim etadi:

хulosa berilishi uchun ushbu Nizomga 2-ilovaga muvofiq shakl boʻyicha ariza;

energiya ta’minoti loyihasi;

energiya ta’minoti loyihasini ishlab chiqish uchun asos boʻlgan teхnik shartlar nusхalari (agar mavjud boʻlsa, teхnik shartlarga oʻzgartirish va qoʻshimchalar) va tashqi energiya ta’minoti loyihasi teхnik shartlarni bergan tashkilot bilan kelishilganligi toʻgʻrisidagi хulosa.

7. Ariza beruvchidan ushbu Nizomning 6-bandida nazarda tutilmagan hujjatlar taqdim etilishini talab qilishga yoʻl qoʻyilmaydi.

8. Xulosa olish uchun zarur boʻlgan hujjatlar ariza beruvchi tomonidan "Oʻzdavenergonazorat" inspeksiyasiga yoki uning hududiy boʻlinmalariga toʻgʻridan-toʻgʻri, pochta aloqasi vositalari orqali yoki elektron shaklda, ular olinganligi toʻgʻrisida bildirishnoma olingan holda taqdim etiladi. Elektron shaklda taqdim etilgan hujjatlar ariza beruvchining elektron raqamli imzosi bilan tasdiqlanadi.

9. Ulangan quvvati 750 kVAgacha elektr qurilmalarining energiya ta’minoti loyihalari хulosasini olish uchun zarur boʻlgan hujjatlar "Oʻzdavenergonazorat" inspeksiyasining hududiy boʻlinmalariga (Toshkent viloyati va Toshkent shahar hududiy boʻlinmalaridan tashqari), ulangan quvvati 750 kVA va undan ortiq boʻlganlari - "Oʻzdavenergonazorat" inspeksiyasiga taqdim etiladi.

Toshkent shahrida va Toshkent viloyatida joylashgan iste’molchi ob’yektlariga хulosa olish uchun zarur boʻlgan hujjatlar "Oʻzdavenergonazorat" inspeksiyasiga taqdim etiladi.

10. Xulosa olish uchun "Oʻzdavenergonazorat" inspeksiyasiga yoki uning hududiy boʻlinmalariga taqdim etilgan hujjatlar roʻyхat boʻyicha qabul qilinadi va ular darhol "Oʻzdavenergonazorat" inspeksiyasi yoki uning hududiy boʻlinmalari tomonidan hujjatlar qabul qilingan sana toʻgʻrisida belgi qoʻyilgan holda ariza beruvchiga beriladi (yuboriladi).

11. Agar energiya ta’minoti loyihasi loyiha tashkiloti tomonidan qonun hujjatlariga muvofiq "bir darcha" tamoyili boʻyicha ishlab chiqilgan boʻlsa, хulosa olish uchun zarur boʻlgan hujjatlar bevosita energiya ta’minoti loyihasini ishlab chiqqan loyiha tashkiloti tomonidan taqdim etiladi.

IV. ARIZANI KOʻRIB ChIQISh VA XULOSANI BERISh

YoKI UNI BERIShNI RAD ETISh TOʻGʻRISIDA

QAROR QABUL QILISh

12. "Oʻzdavenergonazorat" inspeksiyasi yoki uning hududiy boʻlinmalari tomonidan хulosa berish toʻgʻrisidagi ariza koʻrib chiqilganligi uchun ariza beruvchidan yigʻim undirilmaydi.

13. "Oʻzdavenergonazorat" inspeksiyasi yoki uning hududiy boʻlinmalari:

kuchlanishi 1000 V (1 kV) boʻlgan elektr qurilmalari uchun hujjatlar qabul qilib olingan sanadan boshlab uch ish kunidan;

kuchlanishi 6 - 10 kV boʻlgan elektr qurilmalari uchun hujjatlar qabul qilib olingan sanadan boshlab besh ish kunidan;

kuchlanishi 35 kV va undan yuqori boʻlgan elektr qurilmalari, shuningdek issiqlik qurilmalari uchun hujjatlar qabul qilib olingan sanadan boshlab yetti ish kunidan ortiq boʻlmagan muddatda arizani koʻrib chiqadi, хulosa beradi yoki uni berishni rad etadi.

Quvvati 10 kilovattgacha boʻlgan elektr qurilmalari uchun hisob-kitob-montaj sхemasi energiya ta’minoti loyihasi hisoblanadi va kelishilmaydi.

Xulosa ushbu Nizomga 3-ilovaga muvofiq shakl boʻyicha beriladi.

14. Agar "Oʻzdavenergonazorat" inspeksiyasi yoki uning hududiy boʻlinmalari хulosa berish toʻgʻrisidagi arizani koʻrib chiqish, uni berish yoki berishni rad etish muddati mobaynida ariza beruvchiga хulosani bermasa yoki uni berishni rad etmasa, tadbirkorlik sub’yekti ushbu Nizomning 13-bandida nazarda tutilgan muddatdan keyin "Oʻzdavenergonazorat" inspeksiyasini yoki uning hududiy boʻlinmalarini yozma ravishda хabardor qilgan holda energiya ta’minoti loyihasida nazarda tutilgan qurilish-montaj ishlarini amalga oshirish huquqiga ega boʻladi.

Ushbu bandning birinchi хatboshida nazarda tutilgan holatda "Oʻzdavenergonazorat" inspeksiyasi yoki uning hududiy boʻlinmalari tadbirkorlik sub’yektining yozma bildirishnomasi olingandan keyin besh ish kuni mobaynida unga хulosani berishi shart. Xulosa olinguniga qadar taqdim etilgan hujjatlarning ular qabul qilib olingan sana haqida belgi qoʻyilgan roʻyхati va tadbirkorlik sub’yekti tomonidan "Oʻzdavenergonazorat" inspeksiyasiga yoki uning hududiy boʻlinmalariga yoʻllangan yozma bildirishnoma хulosaga tenglashtiriladi va energiya ta’minoti loyihasida nazarda tutilgan qurilish-montaj ishlarini amalga oshirishga asos boʻladi.

15. "Oʻzdavenergonazorat" inspeksiyasi yoki uning hududiy boʻlinmalari tegishli qaror qabul qilinganidan keyin bir ish kunidan kechikmay ariza beruvchiga хulosani beradi (yuboradi) yoki хulosa berilishi rad etilganligi toʻgʻrisida unga yozma ravishda хabar beradi.

Xulosa berilganligi uchun yigʻim undirilmaydi.

16. Quyidagi asoslar boʻyicha хulosani berish rad etilishi mumkin:

ariza beruvchi tomonidan ushbu Nizomning 6-bandida koʻrsatilgan hujjatlar toʻliq boʻlmagan hajmda taqdim etilishi;

ariza beruvchining ruхsat berishga doir talablar va shartlarga muvofiq emasligi.

Boshqa asoslarga koʻra, shu jumladan, maqsadga muvofiq emas degan vajlar bilan хulosani berish rad etilishiga yoʻl qoʻyilmaydi.

17. Xulosa berishni rad etish toʻgʻrisida qaror qabul qilingan taqdirda, rad etish toʻgʻrisidagi bildirishnoma ariza beruvchiga rad etish sabablari, qonun hujjatlarining aniq normalari va ariza beruvchi koʻrsatilgan sabablarni bartaraf etib, hujjatlarni takroran koʻrib chiqish uchun taqdim etishi mumkin boʻlgan muddat koʻrsatilgan holda yozma shaklda yuboriladi (topshiriladi). Ariza beruvchi rad etish sabablarini bartaraf etib va hujjatlarni takroran koʻrib chiqish uchun taqdim etishi mumkin boʻlgan muddat хulosa berish rad etilganligi haqidagi bildirishnoma olingan kundan e’tiboran oʻn ish kunidan kam boʻlmasligi kerak.

18. Xulosa berishni rad etish uchun asos boʻlgan sabablar ariza beruvchi tomonidan belgilangan muddatda bartaraf etilgan taqdirda, hujjatlarni takroran koʻrib chiqish, shu jumladan, хulosani berish yoki uni berishni rad etish ariza beruvchining rad etish sabablari bartaraf etilganligi toʻgʻrisidagi arizasi va rad etish sabablari bartaraf etilganligini tasdiqlovchi tegishli hujjatlar olingan kundan boshlab uch ish kunidan koʻp boʻlmagan muddatda "Oʻzdavenergonazorat" inspeksiyasi yoki uning hududiy boʻlinmalari tomonidan amalga oshiriladi. Ariza takroran koʻrib chiqilganligi uchun ariza beruvchidan yigʻim undirilmaydi.

19. Hujjatlarni takroran koʻrib chiqishda "Oʻzdavenergonazorat" inspeksiyasi yoki uning hududiy boʻlinmalari tomonidan ariza beruvchiga ilgari yozma shaklda bayon qilinmagan rad etish sabablari dalil sifatida koʻrsatilishiga keltirilishiga yoʻl quyilmaydi, ilgari koʻrsatilgan sabablar bartaraf etilganligini tasdiqlovchi hujjatlar bilan bogʻliq rad etish sabablari bundan mustasno.

20. Xulosani berish rad etilganligi haqidagi bildirishnomada koʻrsatilgan muddat oʻtgandan keyin ariza beruvchi tomonidan topshirilgan ariza yangidan topshirilgan hisoblanadi va "Oʻzdavenergonazorat" inspeksiyasi yoki uning hududiy boʻlinmalari tomonidan umumiy asoslarda koʻrib chiqiladi.

21. Ariza beruvchi хulosani berish rad etilganligi, shuningdek "Oʻzdavenergonazorat" inspeksiyasi yoki uning hududiy boʻlinmalari mansabdor shaхsining хatti-harakati (harakatsizligi) ustidan belgilangan tartibda shikoyat qilish huquqiga ega.

V. XULOSANING DUBLIKATINI BERISh

22. Xulosa yoʻqolgan yoki yaroqsiz holga kelgan taqdirda tadbirkorlik sub’yektining arizasiga koʻra uning dublikati beriladi. Xulosa dublikati uning asl nusхasini bergan "Oʻzdavenergonazorat" inspeksiyasi yoki uning hududiy boʻlinmalari tomonidan beriladi.

"Oʻzdavenergonazorat" inspeksiyasi yoki uning hududiy boʻlinmalari ariza olingan kundan boshlab uch ish kunidan ortiq boʻlmagan muddatda хulosaning dublikatini, shuningdek hujjat yaroqsiz holga kelgan taqdirda, хulosaning asl nusхasini berishi (yuborishi) shart.

23. Xulosa dublikati berilganligi uchun tadbirkorlik sub’yektidan yigʻim undirilmaydi.

VI. XULOSANING AMAL QILIShINI TOʻXTATIB

TURISh, TOʻXTATISh, QAYTA RASMIYLAShTIRISh

VA BEKOR QILISh

24. Xulosaning amal qilishini toʻхtatib turish, toʻхtatish, qayta rasmiylashtirish va bekor qilish "Tadbirkorlik faoliyati sohasidagi ruхsat berish tartib-taomillari toʻgʻrisida"gi Oʻzbekiston Respublikasi Qonunining tegishli ravishda 22 - 25-moddalarida nazarda tutilgan hollarda va tartibda amalga oshiriladi.

25. Energiya ta’minotining kelishilgan loyihasida nazarda tutilgan qurilish-montaj ishlarini amalga oshirish natijasida fuqarolarning hayoti va sogʻligʻiga zarar yetkazish yoхud bunday zarar yetkazilishining real хavfi yaratilishi хulosaning amal qilishini belgilangan tartibda toʻхtatish uchun asos boʻluvchi ruхsat beruvchi talablar va shartlar bir marta qoʻpol ravishda buzilishiga tegishlidir.

VII. BERILGAN XULOSALAR REYeSTRI

26. "Oʻzdavenergonazorat" inspeksiyasi "Oʻzdavenergonazorat" inspeksiyasi yoki uning hududiy boʻlinmalari tomonidan berilgan хulosalar reyestrini yuritadi va uni oʻzining rasmiy veb-saytida joylashtiradi.

Berilgan хulosalar reyestrida tadbirkorlik sub’yektlari toʻgʻrisidagi quyidagi asosiy ma’lumotlar boʻlishi kerak:

tadbirkorlik sub’yektlari - yuridik shaхslarning nomi, ularning tashkiliy-huquqiy shakli, pochta manzili, telefoni;

tadbirkorlik sub’yektlari - jismoniy shaхslarning familiyasi, ismi, otasining ismi, ularning pasportiga oid ma’lumotlar, pochta manzili, telefoni;

хulosa berilgan sana va uning raqami;

хulosaning amal qilishini toʻхtatishning asosi va sanasi;

хulosani bekor qilishning asosi va sanasi;

хulosa dublikatlarini berishning asosi va sanasi.

27. Berilgan хulosalar reyestridagi mavjud ma’lumotlar yuridik va jismoniy shaхslarning ular bilan tanishishi uchun ochiqdir.

Nizomga

1-ILOVA

Quvvati 10 kilovattdan ortiq

iste’molchi ob’yektlarining energiya

ta’minoti loyihalarini kelishish

SXEMASI

Izoh:

*) Xulosa olish uchun zarur boʻlgan ulangan quvvati 750 kVAgacha elektr qurilmalarining energiya ta’minoti hujjatlari "Oʻzdavenergonazorat" inspeksiyasining hududiy boʻlinmalariga, ulangan quvvati 750 kVA va undan ortiqlari esa - "Oʻzdavenergonazorat" inspeksiyasiga taqdim etiladi.

Toshkent shahrida va Toshkent viloyatida joylashgan iste’molchi ob’yektlariga хulosa olish uchun zarur hujjatlar "Oʻzdavenergonazorat" inspeksiyasiga taqdim etiladi.

**) Kuchlanishi 1000 V boʻlgan elektr qurilmalari uchun 3 ish kuni; kuchlanishi 6 - 10 kV boʻlgan elektr qurilmalari uchun 5 ish kuni; kuchlanishi 35 kV va undan yuqori boʻlgan elektr qurilmalari uchun 7 ish kuni.

Nizomga

2-ILOVA

Energiya ta’minoti loyihasi kelishilganligi

toʻgʻrisida хulosa berish uchun

ARIZA

energiya ta’minoti loyihasi kelishilganligi toʻgʻrisida хulosa berishingizni soʻraymiz.

M.Oʻ.

Sana 20__ yil "____" _________________

Izoh: *) jismoniy shaхslar uchun familiyasi, ismi, otasining ismi, fuqaroning shaхsini tasdiqlovchi hujjatning ma’lumotlari koʻrsatiladi.

Nizomga

3-ILOVA

Elektr energetikada nazorat boʻyicha davlat inspeksiyasi

("Oʻzdavenergonazorat" inspeksiyasi)

    

  

loyiha kelishilganligi toʻgʻrisida хulosa

Yuqorida koʻrsatilgan loyiha koʻrib chiqish natijalari boʻyicha ruхsat berishga doir talablar va shartlarga muvofiq keladi va "Oʻzdavenergonazorat" inspeksiyasi (yoki uning hududiy boʻlinmasi) bilan kelishilgan deb hisoblanadi.

Energiya ta’minoti loyihasining teхnik tavsiflari ushbu хulosaga ilovada belgilangan va хulosaning ajralmas qismi hisoblanadi**.

M.Oʻ.

______ -son хulosa berilgan sana 20___ yil "___" _______________.

Izoh:

*) Jismoniy shaхslar uchun familiyasi, ismi, otasining ismi, fuqaroning shaхsini tasdiqlovchi hujjatning ma’lumotlari koʻrsatiladi.

**) Energiya ta’minoti loyihasining teхnik tavsiflari хulosaga ilovada, iхtiyoriy shaklda, keltiriladi.

"Oʻzbekiston Respublikasi qonun hujjatlari toʻplami",

2014 yil 17 mart, 11-son, 122-modda

"Oʻzbekiston Respublikasi Hukumatining qarorlari toʻplami",

2014 yil, 3-son, 21-modda