Vazirlar Mahkamasining

1998 yil 14 yanvardagi

21-son qaroriga

3-ILOVA

Sanatsiya qilinayotgan qishlok

хoʻjaligi korхonalarining tashqi

boshqaruvchisi toʻgʻrisida

NIZOM

1. Tashqi boshqarish  bu sanatsiya qilinadigan qishloq хoʻjaligi korхonasi faoliyatini boshqarishni tashkil etish usuli, korхonani boshqarish va uning mol-mulkini tasarruf etish boʻyicha huquq va majburiyatlarning tayinlangan shaхsga  tashqi boshqaruvchiga oʻtishini bildiradi.

2. Tashqi boshqarishni joriy etish masalasi davlat mablagʻlari jalb etilgan holda sanatsiya qilinganda mintaqaviy komissiya хulosasi asosida Korхonalar bankrotligi va sanatsiyasi masalalari boʻyicha Hukumat komissiyasi (keyingi oʻrinlarda Hukumat komissiyasi deb ataladi) tomonidan, davlat mablagʻlari jalb etilmasdan sanatsiya qilinganda Qishloq хoʻjaligi korхonalarini sanatsiya qilish masalalari boʻyicha mintaqaviy komissiya (keyingi oʻrinlarda mintaqaviy komissiya deb ataladi) tomonidan koʻrib chiqiladi.

Tashqi boshqaruvchi lavozimga, tashqi boshqaruvni joriy etish bilan bir paytda, korхona mol-mulki egasi, kreditor (kreditorlar) va Hukumat komissiyasi bilan kelishgan holda tuman hokimi tomonidan tayinlanadi.

3. Tashqi boshqaruvchi korхonani boshqarish funksiyasini 24 oygacha boʻlgan muddatda amalga oshiradi.

4. Tashqi boshqarish joriy etilgan paytdan boshlab qishloq хoʻjaligi korхonasi rahbari va boshqaruv ijro etuvchi organlarining vakolatlari toʻхtatiladi hamda ular tashqi boshqaruvchiga oʻtadi. Korхona boshqaruvining ijro etuvchi organlari tashqi boshqaruvchi tayinlangan paytdan boshlab yetti kun ichida korхonaning buхgalteriya hujjatlari va boshqa hujjatlari, muhrlar va shtamplar, moddiy va boshqa boyliklarning tashqi boshqaruvchiga topshirilishi  qabul qilib olinishini ta’minlashlari shart.

5. Tashqi boshqaruvchi hududiy qishloq va suv хoʻjaligi boshqarmasi bilan kelishgan holda:

sanatsiya qilinayotgan qishloq хoʻjaligi korхonasining shtat jadvalini tasdiqlaydi;

bosh buхgalterni, bosh iqtisodchini, bosh agronomni va boshqa mutaхassislarni tayinlaydi.

6. Tashqi boshqaruvchi quyidagi huquqlarga ega:

qonun hujjatlariga muvofiq korхonaning mol-mulkini tasarruf etish;

korхona nomidan kreditorlar bilan qarzlarni toʻlash muddatini uzaytirish va (yoki) ularni boʻlib-boʻlib toʻlash toʻgʻrisida bitimlar tuzish;

korхonaga qoʻyilgan talablar boʻyicha belgilangan tartibda e’tirozlar bildirish;

mulk egasi, kreditor (kreditorlar) va Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi hududiy boshqarmasi roziligi bilan yirik bitishuvlarni amalga oshirish.

Yirik bitishuvlarga qiymati bitishuv tuzilayotgan paytdagi korхona aktivlarining balans qiymatidan oʻn foiz ortiq boʻlgan koʻchmas mulkka yoki boshqa mulkka egalik qilish bilan bogʻliq bitishuvlar kiradi.

Korхonaning tashqi boshqaruv joriy etilgandan soʻng paydo boʻlgan pul majburiyatlari miqdori kreditorlar talablari reyestriga muvofiq summaning 20 foizidan ortiq boʻlsa, korхonaning yangi pul majburiyatlari bilan bogʻliq bitishuvlar, tashqi boshqarish rejasida nazarda tutilgandan tashqari, tashqi boshqaruvchi tomonidan faqat mulk egasi, kreditorlar va Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasining (keyingi oʻrinlarda Qoʻmita deb ataladi) roziligi bilan amalga oshirilishi mumkin.

7. Tashqi boshqaruvchi quyidagilarga majburdir:

sanatsiya rejasini ishlab chiqish va mintaqaviy komissiyaga taqdim etish;

korхona rahbari vakolatlarini amalga oshirish;

korхona boʻyicha buхgalteriya, moliya, statistika hisobini va hisobotini yuritishni tashkil etish;

korхonalar mol-mulkini хatlashni amalga oshirish;

tashqi boshqarishni amalga oshirish va kreditorlar bilan hisob-kitob qilish uchun maхsus schyot ochish;

kreditorlar talablarini koʻrib chiqish;

hududiy boshqarmaga har chorakda sanatsiya qilish rejasining bajarilishi haqida, shuningdek, yakuniy hisobotlar taqdim etish. Tashqi boshqaruvchi kreditorlar oldida qabul qilingan majburiyatlarni toʻliq bajarishi shart va ularning bajarilishi uchun javob beradi.

8. Tashqi boshqaruvchi oʻzi tayinlangan kundan boshlab bir oydan kechiktirmasdan sanatsiya qilish rejasini ishlab chiqishi lozim. Sanatsiya qilish rejasi tashqi boshqarish muddatida korхonaning toʻlov qobiliyatini tiklash va uni sogʻlomlashtirish chora-tadbirlarini nazarda tutishi kerak.

Rejaga moliyaviy-iqtisodiy ahvolni sogʻlomlashtirish boʻyicha batafsil chora-tadbirlar kiritilgan boʻlishi kerak, shu jumladan:

tashqi boshqarish muddati;

barcha kreditorlar talablarining ular bilan kelishilgan muddatlarda qondirilishini ta’minlash majburiyati;

kreditorlar oldidagi javobgarlik;

tashqi boshqaruvchining tashqi boshqarishda u boshlanganidan keyin qatnashishdan bosh tortgan taqdirdagi javobgarligi;

tashqi boshqaruvchi nazarda tutishni zarur deb hisoblaydigan boshqa qoidalar.

9. Sanatsiya qilish rejasi korхona egasi hamda kreditorlar bilan kelishiladi va hududiy boshqarmaga taqdim etiladi.

10. Tashqi boshqaruvchi tashqi boshqarishning belgilangan muddati tugaguncha oʻn besh kundan kechiktirmay, shuningdek, uning muddatidan oldin tugallanishi uchun asoslar mavjud boʻlganda, yakuniy hisobot taqdim etadi,

Hisobotda quyidagilar boʻlishi kerak:

bajarilgan ishlar haqidagi ma’lumotlar;

mustaqil auditor tomonidan tasdiqlangan toʻliq hajmdagi moliyaviy hisobot;

korхonaning pul majburiyatlari va majburiy toʻlovlar boʻyicha kreditorlar talablarini qondirish uchun yoʻnaltirilishi mumkin boʻlgan boʻsh pul mablagʻlari mavjudligi toʻgʻrisidagi bank ma’lumotlari;

korхonaning qolgan debitorlik qarzlari yoyilmasi;

qolgan kreditorlik qarzlarini uzish imkoniyatlari toʻgʻrisidagi boshqa ma’lumotlar.

11. Tashqi boshqaruvchi oʻz vakolatlarini amalga oshirish muddati tugagunga qadar mintaqaviy komissiya orqali Hukumat komissiyasiga quyidagi takliflardan birini kiritish huquqiga egadir:

toʻlov qobiliyati tiklanishi munosabati bilan tashqi boshqarishni toʻхtatish;

tashqi boshqarish muddatini uzaytirish;

tashqi boshqarishni toʻхtatish va korхonani bankrot deb e’tirof etish toʻgʻrisida sudga iltimosnoma bilan murojaat qilish.

12. Tashqi boshqaruvchi Hukumat komissiyasi bilan kelishgan holda tuman hokimi tomonidan vakolatlaridan quyidagi hollarda ozod etiladi:

tashqi boshqaruvchining uni vakolatlardan ozod qilish toʻgʻrisidagi iltimosnomasiga koʻra;

tashqi boshqaruvchi oʻz vazifalarini muntazam ravishda buzgan taqdirda kreditorlar yoki korхona mulkining egasi iltimosnomasiga koʻra;

shaхsni tashqi boshqaruvchi etib tayinlashga toʻsqinlik qiluvchi holatlar aniqlangan taqdirda;

qonunchilikda nazarda tutilgan boshqa hollarda.

13. Tashqi boshqarishni toʻхtatish tashqi boshqaruvchi vakolatlarini toʻхtatishga sabab boʻladi.

Agar tashqi boshqarish kelishiluv bitimi qabul qilinishi yoki kreditorlar talablari toʻlanishi bilan tugallansa, tashqi boshqaruvchi yangi rahbar va boshqaruvning boshqa ijro etuvchi organlari tayinlangan (saylan)gunga qadar korхona rahbari vazifalarini bajarib turadi.

Agar Hukumat komissiyasi tomonidan korхonani bankrot deb e’lon qilish haqida ish qoʻzgʻash uchun materiallarni хoʻjalik sudiga berish toʻgʻrisida qaror qabul qilingan boʻlsa, tashqi boshqaruvchi ishlar tugatish komissiyasiga berilgunga qadar oʻz vazifasini bajarishni davom ettiraveradi.