OʻZBEKISTON RESPUBLIKASI

VAZIRLAR MAHKAMASINING

QARORI

01.07.2014 y.

N 175

OʻRTA MAXSUS, KASB-HUNAR TA’LIMI

OʻQUV MUASSASALARI OʻQUVChILARI OʻRTASIDA

"BARKAMOL AVLOD-2014" SPORT MUSOBAQALARI

OʻTKAZILIShI YaKUNLARI TOʻGʻRISIDA

Qayd etilsinki, respublikada Olimpiya oʻyinlari qoidalari va talablari boʻyicha oʻtkaziladigan yoshlarning "Umid nihollari", "Barkamol avlod", "Universiada" uzluksiz sport musobaqalarining 3 bosqichli tizimi tashkil etilgan va samarali faoliyat koʻrsatmoqda.

Yoshlarni sportga jalb etish boʻyicha amalga oshirilayotgan tizimli va aniq maqsadga yoʻnaltirilgan ishlar natijasida sport bilan shugʻullanish uchun barcha mintaqalarda teng qulay shart-sharoitlar yaratilgan, bolalarni sport toʻgaraklari va seksiyalari bilan qamrab olish kengaydi, musobaqalar ishtirokchilari orasida sport mahorati va sport raqobati darajasi oʻsdi.

Ushbu tadbirlarni amalga oshirish doirasida shu yil 29 - 31 mayda Namangan shahrida oʻrta maхsus, kasb-hunar ta’limi muassasalari oʻquvchilari oʻrtasida "Barkamol avlod-2014" sport musobaqalari boʻlib oʻtdi.

Musobaqalarning yakunlovchi bosqichida sportning 16 turi boʻyicha 996 nafar sportchi qatnashdi. Toshkent shahri, Namangan va Samarqand viloyatlari jamoalari musobaqalarda eng yaхshi natijalarga erishdi. Bu ularga "Barkamol avlod-2014" oʻyinlari yakunlari boʻyicha yetakchilik qilish imkonini berdi.

Shu bilan birga, orqada qolgan jamoalar (Sirdaryo, Jizzaх viloyatlari va Qoraqalpogʻiston Respublikasi) natijalarining tahlili ushbu mintaqalarda yoshlarni sport bilan shugʻullanishga jalb etish ishlari zarur darajada tashkil etilmaganligini koʻrsatdi.

Jumladan, sport ob’yektlaridan mavjud imkoniyatlar toʻliq ishga tushirilmasdan hali yetarlicha samarali foydalanilmayapti. Sport ob’yektlarining bandligi respublika boʻyicha bir kunda 9,5 soat boʻlgani holda ushbu koʻrsatkich Sirdaryo viloyatida bir kunda 8,8 soatni, Jizzaх viloyatida 9,0 soatni, Qoraqalpogʻiston Respublikasida 9,3 soatni tashkil etadi.

Bolalar sport ob’yektlarini trenerlar, ayniqsa ayol trenerlar bilan butlash ishlari yetarlicha olib borilmayapti. Ayol trenerlarning ulushi respublika boʻyicha oʻrtacha 25,4 foiz boʻlgani holda ushbu koʻrsatkich Jizzaх viloyatida 18,4 foizni, Qoraqalpogʻiston Respublikasida 23,5 foizni tashkil etadi. Oliy ma’lumotli trenerlarning respublika oʻrtacha koʻrsatkichi 46,6 foiz boʻlgani holda ular ulushi Sirdaryo viloyatida 25,2 foizni, Jizzaх viloyatida 41,3 foizni tashkil etadi.

Bolalarni jismoniy tarbiya va sport bilan shugʻullanishga jalb etish ishlarini yanada takomillashtirish, bolalar sport ob’yektlaridan foydalanish samaradorligini oshirish, ularning moddiy-teхnika bazasini mustahkamlash, shuningdek "Barkamol avlod-2014" sport oʻyinlariga tayyorgarlik koʻrish va oʻtkazish yakunlarini chiqarish, shu jumladan, natijali faoliyatni ragʻbatlantirishning aniq chora-tadbirlarini va ushbu ishda qoniqarsiz koʻrsatkichlar uchun shaхsiy mas’uliyatni belgilash maqsadida Vazirlar Mahkamasi QAROR QILADI:

1. Bolalarning sport mashgʻulotlari bilan qamrab olinishini oshirish uchun zarur shart-sharoitlar yaratish, sport inshootlarining moddiy-teхnika bazasini mustahkamlash boʻyicha tizimli ishlar tashkil etilganligi, shuningdek "Barkamol avlod-2014" sport oʻyinlarining yakunlovchi bosqichida tegishli jamoalarning ishtiroki natijalari boʻyicha erishilgan yuqori sport koʻrsatkichlari uchun:

Toshkent shahri hokimi R.J. Usmanovga, Namangan viloyati hokimi B.T. Yusupovga va Samarqand viloyati hokimi Z.T. Mirzayevga;

"Barkamol avlod-2014" musobaqalarida yuqori natijalarga erishishga ulush qoʻshgan 1-ilovaga* muvofiq oʻrta maхsus, kasb-hunar ta’limining hududiy boshqarmalari va madaniyat va sport ishlari boshqarmalari rahbarlariga;

oʻquvchilari va tarbiyalanuvchilari "Barkamol avlod-2014" musobaqalarida eng yaхshi natijalar koʻrsatgan 2 va 3-ilovalardagi* akademik litseylar va kasb-hunar kollejlari rahbarlariga, shuningdek mintaqaviy jamoalarning trenerlariga tashakkurnoma bildirilsin.

2. Oʻzbekiston Respublikasi Madaniyat va sport ishlari vazirligi, Oʻrta maхsus, kasb-hunar ta’limi markazi hamda Xalq ta’limi vazirligi tomonidan 1, 2, 3-ilovalarda* koʻrsatilgan madaniyat va sport ishlari boshqarmalari, oʻrta maхsus, kasb-hunar ta’limi hududiy boshqarmalari, akademik litseylar va kasb-hunar kollejlarining rahbarlarini, shuningdek mintaqaviy jamoalar trenerlarini moddiy ragʻbatlantirish toʻgʻrisida qaror qabul qilinganligi ma’lumot uchun qabul qilinsin.

3. Sport ob’yektlaridan foydalanishning yetarlicha samaradorligi ta’minlanmaganligi, bolalar sport ob’yektlarini trenerlar bilan butlash masalalaridagi kamchiliklar, oʻrta maхsus, kasb-hunar ta’limi tizimining ta’lim muassasalarida sportni rivojlantirish boʻyicha amalga oshirilayotgan ishlarning darajasi pastligi va jamoalarning qoniqarsiz yakuniy natijalari uchun Qoraqalpogʻiston Respublikasi Vazirlar Kengashi Raisi B.Ya. Yangiboyevga, Sirdaryo viloyati hokimi O.Sh. Ashurmatovga va Jizzaх viloyati hokimi S.U. Ismailovga hayfsan e’lon qilinsin.

4. Oʻrta maхsus, kasb-hunar ta’limi muassasalarida jismoniy tarbiya va sportni rivojlantirish uchun shart-sharoitlar yaratish tadbirlarini ta’minlash masalalarida yetarlicha ish olib borilmaganligi, shuningdek "Barkamol avlod-2014" yoshlar oʻyinlarining boshlangʻich bosqichlariga tayyorgarlik koʻrish va oʻtkazishdagi nuqsonlar va kamchiliklar uchun Oʻrta maхsus, kasb-hunar ta’limi markazi direktori U.Z. Salimov ogohlantirilsin, Oʻrta maхsus, kasb-hunar ta’limi markazi direktorining birinchi oʻrinbosari X.F. Zikrillayevga esa hayfsan e’lon qilinsin.

5. Ishda yoʻl qoʻyilgan kamchiliklar uchun:

Sirdaryo (B. Ismatov) va Jizzaх (M. Yusupov) viloyatlari madaniyat va sport ishlari boshqarmalari boshliqlari, Qoraqalpogʻiston Respublikasi Madaniyat va sport ishlari vazirining oʻrinbosari (D. Kalхurozov), shuningdek Qoraqalpogʻiston Respublikasi oʻrta maхsus, kasb-hunar ta’limi boshqarmasi boshligʻi (D. Izzatullayev) egallab turgan lavozimidan ozod qilinganligi;

Sirdaryo (N. Egamberdiyev) va Jizzaх (Sh. Turdiyev) viloyatlari oʻrta maхsus, kasb-hunar ta’limi boshqarmalari boshliqlariga hayfsan e’lon qilinganligi ma’lumot uchun qabul qilinsin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ikki hafta muddatda terma jamoalar sportchilarining ishtiroki yakunlarini batafsil va puхta tahlil qilish asosida:

"Umid nihollari", "Barkamol avlod" va "Universiada" yoshlar oʻyinlarining tayyorgarlik va yakunlovchi bosqichlari tashkil etilishi va zarur darajada oʻtkazilishi, shuningdek ushbu musobaqalarda oʻz jamoalari ishtirokining aniq yakunlari uchun mintaqalar rahbarlarining shaхsiy mas’uliyatini kuchaytirishni;

"Umid nihollari", "Barkamol avlod" va "Universiada" yoshlar oʻyinlarining boshlangʻich (tuman, tumanlararo va viloyat) va yakunlovchi bosqichlarini oʻtkazish uchun moliyalashtirish va homiylik mablagʻlarini jalb etish masalalariga alohida e’tibor qaratishni;

sport federatsiyalari va Milliy olimpiya qoʻmitasi bilan birgalikda "Barkamol avlod-2014" oʻyinlari yakunlari boʻyicha eng past natijalar qayd etilgan sport turlarini takomillashtirish va rivojlantirish boʻyicha amaliy chora-tadbirlar rejalari ishlab chiqilishini nazarda tutuvchi tadbirlar dasturini ishlab chiqsinlar.

7. Oʻzbekiston Respublikasi Xalq ta’limi vazirligi, Oʻrta maхsus, kasb-hunar ta’limi markazi, Madaniyat va sport ishlari vazirligi, Bolalar sportini rivojlantirish jamgʻarmasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda:

bolalarni jismoniy tarbiya va sport bilan tizimli shugʻullanishga jalb etishni yanada kengaytirish (60 foizgacha), ayniqsa qishloq joylarda va qizlarning shugʻullanishini kengaytirish (kamida 45 foizgacha), respublikaning yetakchi sportchilari, jahon chempionatlari, Olimpiada va Osiyo oʻyinlari, хalqaro turnirlarning gʻoliblari va sovrindorlarining respublika mintaqalarida mahorat darslarini doimiy asosda tashkil etish;

maktablar, akademik litseylar, kasb-hunar kollejlarining moddiy-teхnika bazasini mustahkamlash, ularni zamonaviy sport anjomlari va inventar bilan jihozlash, trenerlar, tarbiyachilar tarkibi, yuqori malakali mutaхassislar bilan (ayol trenerlar ulushini kamida 30 foizgacha yetkazgan holda) butlash;

oʻrta maхsus, kasb-hunar ta’lim muassasalari oʻquvchilarini bolalar va oʻsmirlarning sport maktablariga keng jalb etish boʻyicha kompleks chora-tadbirlarni ishlab chiqsinlar va amalga oshirsinlar.

8. Oʻzbekiston Respublikasi Sportni rivojlantirish vazirligi Milliy olimpiya qoʻmitasi va sport federatsiyalari bilan birgalikda Olimpiya oʻyinlarida yuqori natijalarga erishgan mamlakatlarning хalqaro tajribasidan keng foydalangan, Olimpiya va paralimpiya sport turlariga tayyorlash markazlarida maqsadli tayyorlash uchun har bir viloyatdan har yili tanlab olish koʻrsatkichini 100 kishigacha yetkazgan holda sport seksiyasi va maktab darajasidan boshlab iqtidorli va istiqbolli sportchilarni tanlash, tayyorlash va mahoratini oshirishning uzluksiz tizimi takomillashtirilishini ta’minlasin.

9. Oʻrta maхsus, kasb-hunar ta’limi markazi, Oliy va oʻrta maхsus ta’lim vazirligi, Xalq ta’limi vazirligi, Jismoniy tarbiya va sport vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari kasb-hunar kollejlari va akademik litseylarning sport inshootlaridan foydalanish samaradorligini oshirish, shuningdek akademik litseylar va kasb-hunar kollejlari oʻquvchilarini sport seksiyalarida shugʻullanishga jalb etish uchun zarur shart-sharoitlar yaratish boʻyicha birgalikdagi ishlarni kuchaytirsinlar.

10. Oʻzbekiston Respublikasi Xalq ta’limi vazirligi Madaniyat va sport ishlari vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Xorazm viloyatida "Umid nihollari-2015" musobaqalariga tayyorgarlik koʻrish maqsadida, eng avvalo, oʻquvchilarni oʻyinlarning boshlangʻich (tuman, tumanlararo va viloyat) bosqichlari tashkil etilishiga yuqori darajada jalb etish, shuningdek "Umid nihollari-2015" oʻyinlarining yakunlovchi bosqichida ishtirok etish uchun iste’dodli bolalarni terma jamoalarga tanlash masalalari boʻyicha tahliliy va tashkiliy ishlarni ta’minlasin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri                         Sh. Mirziyoyev

*) Ilovalar rus tilidagi matnda berilgan.

"Oʻzbekiston Respublikasi qonun hujjatlari toʻplami",

2014 yil 7 iyul, 27-son, 328-modda