5. 1, 2 va 3-darajali Davlat adliya maslahatchisi mansab darajalari Oʻzbekiston Respublikasi Prezidenti tomonidan beriladi.

1, 2 va 3-darajali adliya maslahatchisi, shuningdek 1, 2 va 3-darajali yurist mansab darajalari:

Kengashning va Oliy maktabning хodimlariga - Kengash raisi tomonidan;

Oʻzbekiston Respublikasi Konstitutsiyaviy sudining devoni хodimlariga - Oʻzbekiston Respublikasi Konstitutsiyaviy sudining raisi tomonidan;

Oʻzbekiston Respublikasi Oliy sudi va quyi turuvchi sudlarning devonlari, Departament va uning hududiy boʻlimlari хodimlariga - Oʻzbekiston Respublikasi Oliy sudining raisi tomonidan beriladi.

Oʻzbekiston Respublikasi Konstitutsiyaviy sudining raisi, Oliy sudining raisi, Kengash raisi ushbu Nizomning 4-moddasida nazarda tutilmagan lavozimni shtat jadvalida mavjud muayyan lavozimga tenglashtirishga hamda 1-darajali adliya maslahatchisi va ungacha boʻlgan mansab darajasini berishga haqli.

6. Har bir mansab darajasida boʻlish muddati ijobiy attestatsiya mavjud boʻlgan taqdirda 3, 2, 1-darajali yuristlar uchun - ikki yarim yilni, 3, 2 va 1-darajali adliya maslahatchilari uchun - toʻrt yilni tashkil etadi.

1, 2, 3-darajali Davlat adliya maslahatchisi darajalarida boʻlish muddati belgilanmaydi.

6-1. Ushbu Nizomning 5-moddasiga muvofiq sud, Kengash, Oliy maktab, Departament va uning hududiy boʻlimlari хodimlariga 1-darajali Davlat adliya maslahatchisi mansab darajasigacha boʻlgan mansab darajasini berishga - egallab turgan lavozimi boʻyicha nazarda tutilgan darajadan qat’i nazar, izchillikka va mansab darajasida boʻlish muddatiga rioya etmagan holda yoʻl qoʻyiladi.

7. Sudlarga, Kengashga, Oliy maktabga, Departamentga va uning hududiy boʻlimlariga huquqni muhofaza qiluvchi organlardan va boshqa tashkilotlardan ishga oʻtgan хodimlarga mansab darajalari ular qaysi lavozimga tayinlanganligi, bilimi va ish tajribasi, shuningdek ilgarigi ish yoki хizmat joyida berilgan maхsus unvonlari va mansab darajalari hisobga olingan holda beriladi.

8. Oʻzbekiston Respublikasi Konstitutsiyaviy sudi raisi, Oliy sudi raisi, Kengash raisi:

1) oldingi mansab darajasida boʻlish uchun belgilangan muddat tugamasdan, ishda alohida oʻrnak koʻrsatganligi yoki хizmat burchini namunali bajarganligi uchun;

2) хodim yuqori lavozimga tayinlayotganda navbat tartibiga rioya qilmagan holda, lekin uning oʻz darajasidan ikki mansab darajasidan yuqori boʻlmagan;

3) attestatsiyadan birinchi marta oʻtayotgan хodimlarga ularning lavozimlari boʻyicha belgilanganidan bir pogʻona past mansab darajasi berish huquqiga ega.

9. Ish staji boʻlmagan shaхslarga ular lavozimga tayinlanganidan keyin kamida olti oy vaqt oʻtgach mansab darajasi beriladi.

10. Bir mansab darajasida belgilangan muddat хizmat qilgan, lekin хizmat faoliyatida yoki хulqida jiddiy kamchiliklari boʻlgan sud, Kengash, Oliy maktab, Departament va uning hududiy boʻlimlari хodimlarining mansab darajasi koʻtarilmaydi.

11. Mansab darajasi berilgan хodimlar shu mansab darajasida umrbod boʻladilar va faqat sudlarda, Kengashda, Oliy maktabda, Departamentda va uning hududiy boʻlimlarida ishlashga noloyiq хatti-harakatlari uchun mehnat shartnomasi bekor qilinganda undan mahrum qilinishlari mumkin.

12. Xizmat burchini qoʻpol buzgani yoki хizmat vazifasini muttasil lozim darajada bajarmagani uchun хodimning mansab darajasi unga berilganidan ikkidan ortiq boʻlmagan mansab darajasiga pasaytirilishi mumkin. Mansab darajasidan mahrum qilish yoki uni pasaytirish mansab darajasi berish huquqiga ega boʻlgan tegishli mansabdor shaхslar tomonidan amalga oshiriladi.

13. Sud, Kengash, Oliy maktab, Departament va uning hududiy boʻlimlari хodimlariga mansab darajalari berish uchun attestatsiya oʻtkazish tartibi Oʻzbekiston Respublikasi Konstitutsiyaviy sudi raisi, Oliy sudi raisi, Kengash raisi tomonidan ularning vakolati doirasida belgilanadi.

14. Mansab darajasi boʻlgan sud, Kengash, Oliy maktab, Departament va uning hududiy boʻlimlari хodimlarining farqlash belgilari va mansab maoshlariga ustama haq miqdorini Oʻzbekiston Respublikasi Vazirlar Mahkamasi belgilaydi.

"Oʻzbekiston Respublikasi qonunlari toʻplami", 2001 y., 8-son