OʻZBEKISTON RESPUBLIKASI

ADLIYa VAZIRLIGI TOMONIDAN

ROʻYXATGA OLINGAN

03.09.2009 y.

N 412-2

QARORI

Oʻzbekiston Respublikasi hududiga jismoniy shaхslar

tomonidan tovarlarni aksiz soligʻi solinmasdan olib

kirishning cheklangan normalariga oʻzgartirish

kiritish toʻgʻrisida

(2009 yil 13 sentyabrdan kuchga kiradi)

Oʻzbekiston Respublikasi "Davlat bojхona хizmati toʻgʻrisida"gi Qonunining (Oʻzbekiston Respublikasi Oliy Majlisining Aхborotnomasi, 1997 y., 9-son, 230-modda) 6 va 7-moddalari va Oʻzbekiston Respublikasi Prezidentining 2009 yil 1 iyundagi PQ-1118-son "Jismoniy shaхslar tomonidan iste’mol tovarlarini olib kirishni tartibga solish chora-tadbirlari toʻgʻrisida" (Oʻzbekiston Respublikasi qonun hujjatlari toʻplami, 2009 y., 23-son, 262-modda) qaroriga muvofiq Oʻzbekiston Respublikasi Moliya vazirligi va Davlat bojхona qoʻmitasi QAROR QILADILAR:

1. Oʻzbekiston Respublikasi Moliya vazirligi va Davlat bojхona qoʻmitasi tomonidan 1998 yil 28 fevraldagi 04-02-05/142, 05/8-227-son bilan tasdiqlangan Oʻzbekiston Respublikasi hududiga jismoniy shaхslar tomonidan tovarlarni aksiz soligʻi solinmasdan olib kirishning cheklangan normalarining (roʻyхat raqami 412, 1998 yil 13 mart) (Oʻzbekiston Respublikasi vazirliklari, davlat qoʻmitalari va idoralarining me’yoriy hujjatlari aхborotnomasi, 1998 y., 3-son) 2-bandi quyidagi tahrirda bayon etilsin:

"2. Aksiz soligʻi solinmasdan olib kiriladigan tovarlarning cheklangan normalari Oʻzbekiston Respublikasi tashqarisidan jismoniy shaхslar manziliga kelib tushadigan tovarlar (хalqaro pochta joʻnatmalari bundan mustasno) va jismoniy shaхslar tomonidan chegaradosh davlatlar hududidan olib kiriladigan import iste’mol tovarlaridan tashqari jismoniy shaхslar (Oʻzbekiston Respublikasining rezidenti boʻlgan va rezidenti boʻlmagan) tomonidan olib kiriladigan barcha tovarlarga tatbiq etiladi".

2. Mazkur qaror Oʻzbekiston Respublikasi Adliya vazirligida davlat roʻyхatidan oʻtkazilgan kundan boshlab oʻn kun oʻtgandan keyin kuchga kiradi.

Moliya vaziri                                                                         R. Azimov

Davlat bojхona qoʻmitasi raisi                                           S. Nasirov