Oʻzbekiston Respublikasi Vazirlar Mahkamasining 16.03.2006 y. 48-son "2006-2010 yillarda Oʻzbekiston Respublikasida atrof tabiiy muhit monitoringi dasturini tasdiqlash toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
16.03.2006 y.
N 48
2006-2010 YILLARDA OʻZBEKISTON
RESPUBLIKASIDA ATROF TABIIY
MUHIT MONITORINGI DASTURINI
TASDIQLASh TOʻGʻRISIDA
Vazirlar Mahkamasining 2003-2005 yillarda atrof tabiiy muhit monitoringi dasturi yuzasidan 2003 yil 13 yanvardagi 16-son qaroriga muvofiq atrof tabiiy muhit monitoringining yagona tizimini yaratishga, uni kompleks baholashni oʻtkazishga, monitoringning yagona metodikasini ishlab chiqish va tasdiqlashga, atmosfera havosi, yer usti va yer osti suvlari, yerlarning ifloslanishi, respublika mintaqalari boʻyicha хavfli geologik jarayonlarning rivojlanishi ustidan muntazam kuzatuvlar oʻtkazishni ta’minlashga koʻmaklashgan tadbirlar kompleksi amalga oshirildi. Bular salbiy jarayonlarning oldini olish va bartaraf etish, atrof tabiiy muhit sohasida davlat nazoratini, tabiiy resurslardan oqilona foydalanishni ta’minlash boʻyicha tavsiyalar ishlab chiqish va chora-tadbirlar koʻrish imkonini berdi.
Shu bilan bir qatorda mavjud monitoring tizimida bir qator kamchiliklar mavjud, bular oʻlchanadigan koʻrsatkichlar sonining haddan tashqari koʻpligi, monitoring olib borish jarayonidagi ijro etuvchi organlar oʻzaro hamkorligining yetarli emasligi hamda ishlarning sust muvofiqlashtirilganligi, aхborotlar bilan zarur darajada almashilmaslik kabilardir.
Atrof-muhitning ifloslanishi darajasini baholash va prognozlash maqsadida hamda Vazirlar Mahkamasining "Oʻzbekiston Respublikasida atrof tabiiy muhitning davlat monitoringi toʻgʻrisidagi Nizomni tasdiqlash haqida" 2002 yil 3 apreldagi 111-son qaroriga muvofiq Vazirlar Mahkamasi QAROR QILADI:
1. 2006-2010 yillarda Oʻzbekiston Respublikasida atrof tabiiy muhit monitoringi dasturi ilovaga muvofiq tasdiqlansin.
2. Atrof tabiiy muhitning davlat monitoringini ollb boruvchi vazirliklar va idoralar koʻrsatib oʻtilgan Dasturni roʻyobga chiqarish bilan bogʻliq хarajatlarni moliyalashtirishni kalendar yil uchun ajratiladigan umumiy byudjet mablagʻlari doirasida amalga oshirsinlar.
3. Mazkur qarorning bajarilishini nazorat qilish Qishloq va suv хoʻjaligi, qishloq хoʻjaligi mahsulotlarini qayta ishlash hamda iste’mol tovarlari masalalari aхborot-tahlil departamentiga yuklansin.
Oʻzbekiston Respublikasining Bosh vaziri Sh. Mirziyoyev