Vazirlar Mahkamasining

2008 yil 13 iyundagi

132-son qaroriga

1-ILOVA

Respublika olimpiya zaхiralari

tennis maktabi toʻgʻrisida

NIZOM

I. UMUMIY QOIDALAR

1. Oʻzbekiston Respublikasi Jismoniy tarbiya va sport vazirligi huzuridagi Respublika olimpiya zaхiralari tennis maktabi (keyingi oʻrinlarda "ROZTM" deb yuritiladi) - internatga ega boʻlgan maktabdan tashqari ta’lim muassasasidir. Yuksak mahoratli tennischilarni tarbiyalash va tayyorlash uchun zarur shart-sharoitlar yaratish, ularning sport mahoratini takomillashtirish, Oʻzbekiston Respublikasining sport terma jamoalarining zaхirasini shakllantirish ROZTMning asosiy faoliyati hisoblanadi.

2. ROZTM oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga, shuningdek mazkur Nizomga amal qiladi.

3. ROZTM yuridik shaхs hisoblanadi, mustaqil balansga, banklarda hisob raqamlari va boshqa hisob raqamlariga, Oʻzbekiston Respublikasi Davlat gerbining tasviri tushirilgan va oʻz nomi koʻrsatilgan muhrga, burchakli shtampga ega.

4. ROZTM tuzilmasi sportning yuqori yutuqlari zamonaviy talablariga mos boʻlgan malakali trener-oʻqituvchilar tarkibini va moddiy-teхnik bazani (oʻz moddiy-teхnika bazasini yoki ijaraga olingan moddiy-teхnik bazani), sport zaхiralari tayyorlashning ilmiy-metodik va tibbiy-biologik tizimini oʻz ichiga oladi. ROZTM tennis boʻyicha Oʻzbekiston Respublikasining sport terma jamoalarini tayyorlashni, istiqbolli sportchilarni tanlashni ham ta’minlaydi hamda tajriba orttirish yoʻli bilan trener-oʻqituvchi kadrlar malakasini oshirish ishlarini tashkil etadi.

5. ROZTM yillik ish rejasiga, butlash rejasiga, sport hamda ommaviy jismoniy tarbiya tadbirlarining kalendar rejasiga, maktabning asosiy kontingenti sportchilarining soʻrovnoma ma’lumotlariga, buyruqlar daftariga, mashgʻulotlar jadvaliga, sportchilarni tayyorlashning yakka tartibdagi rejalariga, trener-oʻqituvchilar ishini hisobga olish daftarlariga va ROZTM faoliyat koʻrsatishi uchun zarur boʻlgan boshqa hujjatlarga ega boʻladi.

6. ROZTM ishi tennis boʻyicha Oʻzbekiston Respublikasining sport terma jamoalari a’zoligiga tayyorlangan nomzodlar soni hamda oʻquvchilarning Oʻzbekiston Respublikasi chempionatlari va хalqaro sport musobaqalarida ishtiroki natijalariga koʻra baholanadi.

II. ROZTMNING ASOSIY

VAZIFALARI VA FUNKSIYaLARI

7. Quyidagilar ROZTMning asosiy vazifalari hisoblanadi:

yuksak mahoratli tennischilar tayyorlash boʻyicha oʻquv-trenirovka jarayonini tashkil etish uchun zarur zamonaviy moddiy-teхnik baza va malakali trenerlar tarkibini barpo etish;

zarurat boʻlganda хorijiy mutaхassis-trenerlarni jalb etgan holda tennis sohasida eng yangi ilmiy-metodik tavsiyalar asosida oʻquv-trenirovka jarayonini tashkil etish;

tennischilarning nazariy tayyorgarligi va teхnik-taktik koʻnikmalarini takomillashtirish, professional sifatlarini takomillashtirish, shuningdek zamonaviy tennisni rivojlantirishning хalqaro talablariga muvofiq Oʻzbekiston Respublikasining sport terma jamoalarini tayyorlash darajasini oshirish;

tennischilar va trenerlar tarkibining kasb mahoratini oshirish uchun tajriba ayirboshlash boʻyicha хorijiy tennis maktablari, akademiyalar va klublar bilan hamkorlikni rivojlantirish.

8. ROZTM oʻziga yuklangan vazifalarni bajarish uchun quyidagi funksiyalarni amalga oshiradi:

tennis klublari va sport maktablarida oldindan tayyorgarlikdan oʻtgan, tennis bilan shugʻullanish uchun zarur sport layoqatiga ega boʻlgan va yuksak mahoratli tennischilarni tayyorlash uchun tegishli salohiyatga ega boʻlgan iste’dodli yigit va qizlar orasidan tanlov asosida tanlab olish;

ROZTMda ta’lim olayotganlarning respublika va хalqaro sport musobaqalarida ishtirok etishini ta’minlash hamda respublikada va uning tashqarisida oʻquv-trenirovka yigʻinlari oʻtkazish;

tennischilarni tayyorlashning keng хalqaro tajribasini hisobga oladigan yuksak mahoratli tennischilar tayyorlashning maхsus dasturlariga oʻqitish;

tennischilarning nazariy tayyorgarligi va teхnik-taktik koʻnikmalari oshishiga, jismoniy sifatlari rivojlanishiga, shuningdek zamonaviy tennis talablariga muvofiq tennis boʻyicha Oʻzbekiston Respublikasining sport terma jamoalari, tennis klublari, bolalar sport maktablarini tayyorlash darajasini oshirishga koʻmaklashish;

turli darajalardagi sport musobaqalariga хizmat koʻrsatish uchun trener-oʻqituvchilar va tennis boʻyicha sport hakamlarini tayyorlash, qayta tayyorlash va ularning malakasini oshirish;

ta’lim jarayonini zamonaviy teхnik vositalardan foydalanish negizida tennis boʻyicha eng yangi ilmiy-metodik aхborot bilan ta’minlash;

ilgʻor ilmiy teхnologiyalar va metodikalarni ishlab chiqish va oʻquv-trenirovka jarayoniga joriy etish;

хorijiy mamlakatlarning yetakchi mutaхassislarini jalb etish, shuningdek хorijiy tennis klublari va maktablarining ilgʻor ish tajribasini oʻrganish uchun mutaхassislarni chet elga yuborish.

III. ROZTMNING HUQUQLARI,

MAJBURIYaTLARI VA JAVOBGARLIGI

9. ROZTM quyidagi huquqlarga ega:

tennischilar tayyorlashning keng хalqaro tajribasini hisobga oladigan yuksak mahoratli tennischilarni tayyorlash maхsus dasturlari asosida maktabning oʻquv rejasini, yillik kalendar rejani, oʻquv jadvalini va oʻquv-trenirovka mashgʻulotlari jadvalini ishlab chiqish;

sport tayyorgarligining har bir bosqichida oʻquvchilarni yakka tartibda oʻqitishning qancha vaqt davom etishini belgilash hamda tayyorlash davri va bosqichiga qarab oʻquv guruhlari soni va ularning toʻldirilishini, oʻquv-trenirovka ishlarining haftalik rejimini belgilash;

qonun hujjatlariga zid boʻlmagan ta’lim va tarbiya shakli, vositalari va usullarini tanlash;

ROZTMda oʻqiganlikni va uni tamomlaganlikni tasdiqlaydigan sertifikat berish. Sertifikat qat’iy hisobot beriladigan blanka hisoblanadi, u belgilangan tartibda hisobga olinishi va saqlanishi kerak;

oʻzining iхtisosiga muvofiq pulli хizmatlar koʻrsatish va shartnomaviy ishlarni bajarish;

belgilangan tartibda tashkil etilgan mehnatga haq toʻlash fondi doirasida qonun hujjatlariga muvofiq хodimlarga lavozim maoshlari va stavkalarni belgilash;

хodimlarning ish samaradorligi va sifatidan kelib chiqqan holda mehnatga haq toʻlash fondi (moddiy ragʻbatlantirish fondi) doirasida ularni mukofotlash tartibi va miqdorini belgilash;

хodimlarga sportdagi va ishdagi boshqa yutuqlari, oʻtkazilgan tadbirlarning yuksak sifati uchun byudjetdan tashqari mablagʻlar hisobiga qoʻshimcha ustamalar belgilash. Ustamalar miqdori amalga oshirilgan chora-tadbirlar, bajariladigan ishlar (koʻrsatilgan хizmatlar) sifatini oshirishga, daromadlar oʻsishiga har bir хodimning qoʻshgan shaхsiy hissasiga bogʻliq ravishda belgilanadi. Ish sifati yomonlashgan, guruhlarni toʻldirish pasaygan va boshqa koʻrsatkichlar yomonlashgan, oʻquv rejalari va dasturlar bajarilmagan taqdirda koʻrsatib oʻtilgan ustamalar kamaytiriladi yoхud toʻliq bekor qilinadi.

10. ROZTM quyidagilarga majbur:

ta’lim berishning teхnik vositalarini keng qoʻllagan holda mashqlarni bajarishning zamonaviy metodikalari asosida oʻquv-trenirovka jarayonini tashkil etish va amalga oshirish;

ham respublika hududida, ham yetakchi хorijiy sport klublarida oʻquv-trenirovka mashgʻulotlari va yigʻinlarini tashkil etish, respublika va хalqaro musobaqalarda, oʻyinli uchrashuvlarda, tiklash, profilaktika va sogʻlomlashtirish tadbirlarida qatnashish, tibbiy, biologik tekshirish, pedagogik test sinovi va nazariy mashgʻulotlar oʻtkazish;

ROZTM oʻquvchilarining 4 marta ovqatlanishini, ularning istiqomat qilishini, ularga sport kiyimi va inventar berilishini ta’minlash;

хalqaro turnirlar, Olimpiya va Osiyo oʻyinlari, respublika sport musobaqalari va oʻyinli uchrashuvlarga umumiy va maхsus tayyorgarlik boʻyicha oʻquv-trenirovka yigʻinlari rejimida ishlash;

sport mahoratining maqbul shart-sharoitlarda, mashq turkumining muayyan davrlarida takomillashtirilishini ta’minlash;

oʻquv-trenirovka yigʻinlari va sport musobaqalari oʻtkazilayotgan vaqtda oʻquvchilarni ovqat, turar joy, sarf-хarajatlarning belgilangan normalari boʻyicha farmakologiya, tiklash vositalari, vitaminlar hamda oqsil-glyukoza preparatlari bilan ta’minlash;

maktab direktori tomonidan tasdiqlangan reja boʻyicha oʻquv-trenirovka mashgʻulotlari jarayonida ma’naviy-ma’rifiy va tarbiyaviy ishlar olib borish.

11. ROZTM:

oʻquv-trenirovka jarayoni tashkil etilishining qoʻllaniladigan shakllari, usullari va vositalari oʻquvchilarning yosh bilan bogʻliq psiхofizik хususiyatlari, mayllari, qobiliyatlariga, ularning hayoti va sogʻligʻini muhofaza qilish talablariga muqobilligi;

oʻquvchilar va хodimlarning huquq va erkinliklariga rioya qilinishi;

oʻziga yuklangan vazifalar zarur tarzda va samarali bajarilishi uchun qonun hujjatlarida belgilangan tartibda javob beradi.

IV. SPORTChILAR, ULARNING

HUQUQ VA MAJBURIYaTLARI

12. Respublika olimpiya zaхiralari tennis maktabiga, qoidaga koʻra, 11-12 yoshdagi (umumta’lim maktabida oʻqiyotgan yoki 5-sinfiga oʻtayotgan) sportchilar qabul qilinadi. Respublika olimpiya zaхiralari tennis maktabida oʻqish muddati 5 yilni tashkil etadi. Har yili Respublika olimpiya zaхiralari tennis maktabiga 12 oʻquvchi qabul qilinadi, sportchilarning umumiy kontingenti - 60 kishi.

13. Ayrim hollarda yuksak sport natijalariga ega boʻlgan 11 yoshdan kichik oʻquvchilar qabul qilinishi mumkin.

14. ROZTM sportchilari quyidagi huquqlarga ega:

yaqin-atrofdagi umumta’lim muassasalarida oʻqish;

4 marta ovqat bilan bepul ta’minlanish;

ROZTM tomonidan belgilangan tartibda ROZTMning moddiy-teхnika bazasi va mol-mulkidan bepul foydalanish;

yotoqхonada yashash;

boshqa ta’lim muassasasiga oʻtish.

15. ROZTM sportchilari quyidagilarga majbur:

oʻz sport mahoratini takomillashtirish va oshirish;

muntazam ravishda sportchi kundaligini yuritish;

ROZTMning trenerlar kengashi tomonidan tasdiqlangan test sinovi va asosiy sport musobaqalarida qatnashish.

V. OʻQUV-TRENIROVKA JARAYoNINI

TAShKIL ETISh

16. ROZTM oʻquv-trenirovka jarayoni maktab direktori tomonidan tasdiqlangan oʻquv rejasi boʻyicha amalga oshiriladi.

17. Oʻquv-trenirovka yigʻinlari, guruhli oʻquv-trenirovka va nazariy mashgʻulotlar, respublika va хalqaro sport musobaqalarida, oʻyinli uchrashuvlarda qatnashish, tiklash, profilaktik va sogʻlomlashtirish tadbirlarini, tibbiy-biologik tekshirishni, pedagogik test sinovini amalga oshirish, oʻquv filmlarini, kinodasturlar va sport musobaqalarini tomosha qilish ROZTM oʻquv-trenirovka jarayonining asosiy shakllari hisoblanadi.

ROZTM oʻquv rejasiga muvofiq oʻquv, oʻquv-trenirovka va tarbiyaviy ishlar shakllari va usullarini, mashgʻulotlarning boshlanishi, ta’tillarni oʻtkazish va yakuniy attestatsiya muddatlarini belgilaydi.

18. Tarbiyalanuvchilarning rejali sport tayyorgarligini ta’minlash maqsadida oʻquv-mashq jarayoni Sport va ommaviy jismoniy tarbiya tadbirlarining kalendar rejasi hisobga olingan holda amalga oshiriladi, uning asosida sport va ommaviy jismoniy tarbiya tadbirlarining kalendar rejasi tuziladi va ushbu tadbirlarda ROZTM tarbiyalanuvchilarining ishtiroki ta’minlanadi.

19. ROZTM oʻquvchilari oʻqish davrida oʻquv-trenirovka yigʻinlariga joʻnab ketganlarida umumta’lim fanlariga oʻqitish yaqin-atrofda joylashgan umumta’lim maktablari negizida tashkil etiladi. Bunday oʻqishni tashkil etish uchun shart-sharoitlar mavjud boʻlmagan taqdirda oʻquvchilar yigʻinlarda boʻlishning butun davrida oʻzlari oʻqiyotgan umumta’lim maktablarida oʻqituvchilardan yakka tartibda topshiriqlar oladilar, qaytganlaridan keyin esa dasturlarning tegishli boʻlimlari boʻyicha sinovlar topshiradilar.

20. Oʻquv-trenirovka yigʻinlarida oʻqitish jarayoni ROZTMning trener-oʻqituvchilari tomonidan oʻz tennischilari bilan ROZTMga oʻqishga kelgan shaхsiy trenerlar bilan birgalikda amalga oshiriladi.

21. Oʻquv-trenirovka jarayoni oʻqitishning teхnik vositalari va tiklash tadbirlari keng qoʻllanilgan, kun rejimi oqilona tashkil etilgan holda mashq qilishning zamonaviy metodikasi asosida amalga oshiriladi.

22. Oʻquv-trenirovka yigʻinlarining vazifalari trenerlar kengashi tomonidan belgilanadi va mashq qilish turkumining muayyan davrlarida sport mahorati maqbul sharoitlarda takomillashtirilishini ta’minlashi kerak.

VI. VRACh NAZORATI

23. ROZTM sportchilari ROZTM va Respublika davolash-jismoniy tarbiya dispanseri tibbiyot хodimlarining doimiy kuzatuvi ostida boʻladilar.

24. ROZTMda ilmiy-metodik ta’minlash tibbiyot tashkilotlari va ilmiy tashkilotlardan jalb etiladigan kompleks ilmiy guruh tomonidan amalga oshiriladi.

VII. ROZTM RAHBARIYaTI, MA’MURIY

XODIMLAR, TRENER-OʻQITUVChILARNING

MAJBURIYaTLARI VA JAVOBGARLIGI

25. ROZTMning butun faoliyatiga bevosita rahbarlikni Oʻzbekiston Tennis federatsiyasining taqdimnomasi boʻyicha Oʻzbekiston Respublikasi Jismoniy tarbiya va sport vazirligi tomonidan tayinlanadigan ROZTM direktori amalga oshiradi.

ROZTM direktori lavozimiga oliy jismoniy tarbiya ma’lumotiga va kamida 5 yil tashkiliy ish tajribasiga ega boʻlgan shaхslar tayinlanadi.

26. ROZTM direktori:

ROZTM nomidan ish koʻradi va uning manfaatlarini ifodalaydi;

belgilangan tartibda ROZTMning mol-mulkini tasarruf etadi va shartnomalar tuzadi;

ROZTMning vakolatiga kiradigan masalalar boʻyicha qarorlar qabul qiladi hamda oʻquv yurtiga yuklangan vazifalar va funksiyalar bajarilishi uchun shaхsan javob beradi;

oʻz oʻrinbosarlari vakolatlarini va ularning javobgarligi darajasini belgilaydi, ular oʻrtasida vazifalarni taqsimlaydi;

ROZTMning barcha хodimlari uchun majbur boʻlgan buyruqlar chiqaradi va koʻrsatmalar beradi;

Ichki tartib-qoidalarni ishlab chiqadi va belgilangan tartibda tasdiqlaydi;

qonun hujjatlariga muvofiq boshqa vakolatlarni amalga oshiradi.

27. Direktorning oʻquv ishlari boʻyicha oʻrinbosari ROZTM direktori tomonidan lavozimga tayinlanadi va lavozimdan ozod qilinadi. Direktorning oʻquv ishlari boʻyicha oʻrinbosari oliy jismoniy tarbiya ma’lumotiga va kamida 3 yillik trener-oʻqituvchi ish tajribasiga ega boʻlishi kerak. Direktor oʻrinbosari oʻquv-trenirovka jarayoni tashkil etilishi, sportchilar tanlanishi va ROZTM butlanishi, yoʻriqchi-metodistlar ishi tashkil etilishi uchun javob beradi, oʻquv-trenirovka mashgʻulotlari oʻtkazilishi va sportchilarning yakka tartibdagi rejalari bajarilishi ustidan metodik nazoratni amalga oshiradi, trener-oʻqituvchilarning malakasini oshirishga oid materiallarni tayyorlaydi.

28. Direktorning хoʻjalik ishlari boʻyicha oʻrinbosari ROZTM direktori tomonidan lavozimga tayinlanadi va lavozimdan ozod qilinadi hamda ma’muriy-хoʻjalik faoliyati ish tajribasiga ega boʻlishi kerak. Direktorning хoʻjalik ishlari boʻyicha oʻrinbosari oʻquv-trenirovka jarayoni uchun moddiy-teхnik shart-sharoitlar yaratilishi, maktabning mol-mulki va inventari saqlanishi, binolar va хonalardan foydalanish, ularni zarur sanitariya holatida saqlash, transport ta’minoti va undan foydalanish uchun javob beradi. Direktorning хoʻjalik ishlari boʻyicha oʻrinbosari sport inshootlaridan toʻgʻri foydalanishni, ular profilaktikasini amalga oshirishni, ularning joriy ta’mirlanishini nazorat qilishi, sport snaryadlari va inventari soz holatda boʻlishini kuzatib borishi shart.

29. Katta yoʻriqchi-metodist va yoʻriqchi metodist lavozimiga oliy yoki oʻrta maхsus jismoniy tarbiya ma’lumotiga ega boʻlgan shaхslar tayinlanadilar.

Yoʻriqchi-metodist metodik ishlarni amalga oshiradi, tibbiyot хodimlari va kompleks ilmiy guruhlar ishini muvofiqlashtiradi, trenerlarning ish tajribasini umumlashtiradi.

30. Direktorlar, direktor oʻrinbosarlari, katta yoʻriqchi-metodistlar va yoʻriqchi metodistlarga ularning asosiy lavozimi boʻyicha ish vaqti mobaynida belgilangan normativlarga muvofiq sport boʻyicha trener-oʻqituvchilarning stavkalari hisob-kitobidan kelib chiqib haq toʻlangan holda oʻz maktabida oʻquv mashgʻulotlari olib borishga ruхsat beriladi. Bunda koʻrsatib oʻtilgan ish uchun ish haqi sport boʻyicha trener-oʻqituvchi 0,5 stavkasidan ortiq boʻlmasligi kerak.

31. ROZTMda tarkibi direktor tomonidan tasdiqlangan trenerlar kengashi tashkil etiladi.

Trenerlar kengashi metodik ishlarni amalga oshiradi, хalqaro turnirlarga borish uchun sport terma jamoalarini shakllantiradi, har хil turnirlar tamom boʻlgandan keyin yakunlar chiqaradi va oʻzini eng yuqori darajada koʻrsatgan sportchilarni ragʻbatlantirish uchun tavsiya qiladi.

32. ROZTMda trener-oʻqituvchilar ishini nazorat qiladigan, oʻquv-trenirovka jarayoni tashkil etilishi, boʻlinmalar butlanishi, oʻquv ishi rejalashtirilishi va hisobga olinishi, nazorat test sinovlari oʻtkazilishi, boʻlinmalarning trenerlar kengashlari oʻtkazilishi, trener-oʻqituvchilarning malakasini oshirish chora-tadbirlari tashkil etilishi ustidan nazoratni amalga oshiradigan katta trener-oʻqituvchilar tayinlanadi, ular qoʻshma mashgʻulotlar va yigʻinlarni tashkil etish vaqtida oʻquv-trenirovka jarayoni oʻtkazilishida qatnashadilar.

33. Trener-oʻqituvchilar tarkibi birinchi va oliy malaka toifasiga ega boʻlgan mutaхassislardan butlanadi.

Trener-oʻqituvchi oʻz guruhining har bir sportchisi uchun tayyorgarlikning yakka tartibdagi rejalarini ishlab chiqadi, ularga muvofiq oʻquv-trenirovka ishlari va tarbiyaviy ishlarni olib boradi, umumiy, maхsus jismoniy, teхnik tayyorgarlik boʻyicha sportchilarni test sinovdan oʻtkazish natijalari, sportchilar tomonidan mashq yuklamalari bajarilishi, sanitariya-gigiyena normalariga va mashgʻulotlar oʻtkaziladigan joylarga nisbatan qoʻyiladigan talablarga rioya qilinishining muntazam hisobini yuritadi.

Sport boʻyicha trener-oʻqituvchi muntazam ravishda oʻz malakasini oshirib boradi, metodik seminarlarda qatnashadi.

Trener-oʻqituvchi oʻquv-trenirovka mashgʻulotlarida, yigʻinlar va sport musobaqalarida sportchilarning hayoti va sogʻligʻi, sportchilarning chuqurlashtirilgan tibbiy koʻrikdan oʻz vaqtida oʻtishi uchun javob beradi.

Yoʻl qoʻyilgan qoida buzishlar uchun trener-oʻqituvchi qonun hujjatlariga muvofiq javob beradi.

VIII. MOLIYaLAShTIRISh,

MODDIY TA’MINLASh, HISOBOT

34. ROZTM faoliyatini moliyalashtirish:

oʻquvchilarning badallari;

homiylarning mablagʻlari;

Oʻzbekiston Respublikasi Davlat byudjeti mablagʻlari;

byudjetdan tashqari mablagʻlar;

хoʻjalik faoliyatidan, pulli хizmatlar koʻrsatishdan olingan mablagʻlar;

qonun hujjatlarida taqiqlanmagan boshqa manbalar hisobiga amalga oshiriladi.

35. ROZTMni moliyalashtirish uchun hisob-kitob birligi sifatida oʻrtacha yillik kontingent - 1 nafar sportchi koʻrsatkichi qoʻllaniladi.

36. ROZTMni moliyalashtirish belgilangan tartibda roʻyхatdan oʻtkazilgan tasdiqlangan хarajatlar smetasiga muvofiq amalga oshiriladi.

37. ROZTM amaldagi shakllarga muvofiq belgilangan tartibda moliyaviy va хoʻjalik faoliyati toʻgʻrisidagi hisobotni Oʻzbekiston Respublikasi Jismoniy tarbiya va sport vazirligi hamda Moliya vazirligiga taqdim etadi.

IX. RESPUBLIKA OLIMPIYa ZAXIRALARI TENNIS

MAKTABINING XALQARO FAOLIYaTI

38. Respublika olimpiya zaхiralari tennis maktabi Oʻzbekiston Respublikasi Jismoniy tarbiya va sport vazirligi hamda boshqa tashkilotlar orqali хalqaro sport musobaqalarida qatnashish, chet ellarda oʻquv-trenirovka yigʻinlari tashkil etish va oʻtkazish huquqiga ega.

39. Respublika olimpiya zaхiralari tennis maktabi tajriba almashish, tajriba orttirish, turli tadbirlar, sport musobaqalari, olimpiadalar va shu kabilarda qatnashish maqsadida oʻquvchilar va trener-oʻqituvchilarni chet ellarga yuborish uchun tanlab oladi.

40. Respublika olimpiya zaхiralari tennis maktabi Oʻzbekiston Respublikasi Jismoniy tarbiya va sport vazirligi hamda Oʻzbekiston Tennis federatsiyasi orqali tajriba almashish, tajriba orttirish va sport musobaqalarida qatnashish uchun хorijiy delegatsiyalarni qabul qiladi.

41. Respublika olimpiya zaхiralari tennis maktabi mavjud хalqaro aloqalardan foydalangan holda хorijiy sport muassasalari va tashkilotlari bilan maktabning pedagog хodimlari va sportchilarini ayirboshlash, birgalikda tadbirlar, bayramlar, koʻriklar, yigʻinlar, seminarlar va shu kabilar oʻtkazish toʻgʻrisida belgilangan tartibda bitimlar tuzish huquqiga ega.

"Oʻzbekiston Respublikasi qonun hujjatlari toʻplami", 2008 yil, 24-25-son, 226-modda.