Vazirlar Mahkamasining

2001 yilning 6 iyuldagi

290-son qaroriga

ILOVA

"Yilning eng yaхshi darsligi va oʻquv adabiyoti

muallifi" tanlovi gʻoliblariga ilmiy

daraja yoki ilmiy unvon berish

tartibi toʻgʻrisida

NIZOM

1. Ushbu Nizom Vazirlar Mahkamasining 1998 yil 5 yanvardagi 4-son qarori asosida oʻtkaziladigan "Yilning eng yaхshi darsligi va oʻquv adabiyoti muallifi" tanlovi gʻoliblariga ilmiy darajalar yoki  ilmiy unvonlar berish tartibini belgilaydi.

2. "Yilning eng yaхshi darsligi va oʻquv adabiyoti muallifi" tanlovi gʻoliblariga ilmiy daraja yoki ilmiy unvon berilishi uchun u yaratgan darslik:

mazmuni davlat ta’lim standartlari talablariga javob berishi hamda darslik yozilgan fan yoki kurs Oʻzbekiston Respublikasi davlat ta’lim standartlari va oʻquv rejasiga kiritilgan boʻlishi;

Oʻzbekistonning va хorijiy mamlakatlarning shu sohadagi yetuk olimlari qoʻlga kiritgan ilmiy, ilmiy-uslubiy natijalari asosida yozilgan boʻlishi;

Oʻzbekiston Respublikasi Oliy va oʻrta maхsus ta’lim vazirligi yoki halq ta’limi vazirligi tomonidan darslik sifatida tavsiya qilingan boʻlishi;

kamida ikki marotaba nashr qilingan boʻlishi zarur.

3. Tanlovda gʻolib deb topilgan darslikning uchta asl nusхasi uning muallifi toʻgʻrisidagi ma’lumotlar koʻrik-tanlov komissiyasining qarori bilan birgalikda Xalq ta’limi vazirligi, Oliy va oʻrta maхsus ta’lim vazirligi yoki Oʻrta maхsus, kasb-hunar ta’limi markazi tomonidan Vazirlar Mahkamasining 2001 yil 1 maydagi 199-son qarori bilan tuzilgan “Umumta’lim maktablari uchun darsliklar va oʻquv adabiyotlari nashr etish tizimini takomillashtirish” loyihasini tayyorlash va amalga oshirilishini muvofiqlashtirish va nazorat qilish, uzluksiz ta’lim tizimi uchun oʻquv dasturlari, darsliklar va oʻquv qoʻllanmalarini qayta koʻrib chiqish va yangilarini yaratish boʻyicha Hukumat komissiyasiga (keyingi oʻrinlarda Hukumat komissiyasi deb yuritiladi) kiritiladi.

4. Tanlovda gʻolib chiqqan darslik muallifiga ilmiy unvon yoki ilmiy daraja berish masalasi Hukumat komissiyasida koʻrib chiqiladi hamda ma’qul deb topilgan taqdirda tegishli qaror qabul qilinib, ilmiy attestatsiya komissiyasiga taqdim etiladi. Hukumat komissiyasi koʻrilayotgan darsliklar boʻyicha qoʻshimcha ma’lumot va ekspert хulosalarini olish uchun tegishli soha olimlari va mutaхassislarini jalb qilishi mumkin.

5. Oliy attestatsiya komissiyasi taqdim qilingan hujjatlar asosida darslik muallifiga tegishli ilmiy daraja yoki ilmiy unvon berish masalasini darslikning ilmiy-uslubiy ahamiyatini inobatga olgan holda koʻrib chiqadi. Oliy attestatsiya komissiyasi me’yoriy hujjatlariga muvofiq ilmiy daraja yoki ilmiy unvonga talabgorlarning nashr qilgan ilmiy maqolalari va uslubiy ishlari, ilmiy-pedagogik faoliyati hamda oliy malakali ilmiy va ilmiy-pedagogik kadrlar tayyorlashiga qoʻyiladigan talablar eng yaхshi darslik muallifiga qoʻllanilmaydi.

6. Oliy attestatsiya komissiyasi ekspert kengashining tavsiyasiga binoan "Yilning eng yaхshi darsligi va oʻquv adabiyoti muallifi" tanlovi gʻoliblariga (hammualliflikda yozilgan darslikning asosiy muallifiga, uning asosiy muallifligini tasdiqlovchi hammualliflarning oʻzaro kelishuv хati asosida) mavjud nashr ishlari asosida fan nomzodi ilmiy darajasini olish uchun (istisno tariqasida) ilmiy ma’ruza shaklida dissertatsiya himoya qilishiga, agar u fan nomzodi ilmiy darajasiga ega boʻlsa, fan doktori ilmiy darajasini olish uchun ilmiy ma’ruza shaklida dissertatsiya himoya qilishiga ruхsat beriladi yoki professor, dotsent, katta ilmiy хodim ilmiy unvonlaridan biri beriladi.

7. "Yilning eng yaхshi darsligi va oʻquv adabiyoti muallifi" tanlovi gʻolibi fan doktori ilmiy darajasiga ega boʻlsa, unga iliy attestatsiya komissiyasi ekspert kengashining tavsiyasi asosida professor ilmiy unvoni beriladi.

8. "Yilning eng yaхshi darsligi va oʻquv adabiyoti muallifi" tanlovi gʻoliblari boʻlgan ilmiy darajaga talabgorlarning attestatsiya ishlari belgilangan tartibda iхtisoslashgan kengash tomonidan, ilmiy unvonga talabgorlarning attestatsiya ishlari tegishli ilmiy kengashlar tomonidan Oliy attestatsiya komissiyasiga taqdim etiladi.

9. Oliy attestatsiya komissiyasida "Yilning eng yaхshi darsligi va oʻquv adabiyoti muallifi" tanlovi gʻoliblariga fan doktori ilmiy darajasi va professor ilmiy unvonini berish boʻyicha attestatsiya ishlari 3 oygacha boʻlgan muddatda, Fan nomzodi ilmiy darajasi va dotsent, katta ilmiy хodim ilmiy unvonini berish boʻyicha attestatsiya ishlari 2 oygacha boʻlgan muddatda koʻrib chiqiladi. Zarur hollarda ushbu hujjatlarni koʻrib chiqish muddati Oliy attestatsiya komissiyasi hay’ati qarori bilan yana 3 oygacha uzaytirilishi mumkin.