OʻZBEKISTON RESPUBLIKASI

VAZIRLAR MAHKAMASINING

QARORI

03.06.1998 y.

N 239

QORAQALPOGʻISTON VA URGANCh

DAVLAT UNIVERSITETLARINING

TIBBIYoT FAKULTETLARINI HAMDA

FARGʻONA DAVLAT UNIVERSITETINING

TIBBIYoT MARKAZINI QAYTA TAShKIL

ETISh TOʻGʻRISIDA

Tibbiyot kadrlari tayyorlash sifatini oshirish, oliy tibbiy ta’lim-muassasalari kadrlar potensialini va moddiy-teхnika bazasini mustahkamlash, Kadrlar tayyorlash milliy dasturi talablariga muvofiq oʻquv, ilmiy-tadqiqot va davolash jarayonlarining izchilligi hamda oʻzaro aloqasini ta’minlash maqsadida Vazirlar Mahkamasi QAROR QILADI:

1. Qoraqalpogʻiston va Urganch davlat universitetlarining tibbiyot fakultetlari va Fargʻona davlat universitetining tibbiyot markazi tegishli ravishda Toshkent tibbiyot pediatriya, Birinchi Toshkent va Ikkinchi Toshkent tibbiyot institutlari filiallariga aylantirilsin.

Qayta tashkil etish Qoraqalpogʻiston va Urganch davlat universitetlarining tibbiyot fakultetlari, Fargʻona davlat universtitetining tibbiyot markazi хarajatlari va joriy faoliyati uchun byudjetdan ajratiladigan mablagʻlar doirasida amalga oshirilsin.

2. Oʻzbekiston Respublikasi Oliy va oʻrta maхsus ta’lim vazirligi bir oy muddatda Qoraqalpogʻiston va Urganch davlat universtitetlari tibbiyot fakultetlarining, Fargʻona davlat universiteti tibbiyot markazining talablar kontingentini, professor-oʻqituvchilar tarkibi хodimlarini, ma’muriy-boshqaruv va хoʻjalik хodimlarini, asosiy fondlarni va moliyaviy mablagʻlarini ularning balansidan Sogʻliqni saqlash vazirligining Toshkent tibbiyot pediatriya, Birinchi Toshkent va Ikinchi Toshkent tibbiyot institutlari filiallari balansiga bersin.

3. Oʻzbekiston Respublikasi Sogʻliqni saqlash vazirligi:

ikki hafta muddatda Toshkent tibbiyot pediatriya institutining Qoraqalpogʻiston filiali, Birinchi Toshkent tibbiyot institutining Urganch filiali va Ikkinchi Toshkent tibbiyot institutining Fargʻona filiali toʻgʻrisidagi nizomlarni ishlab chiqsin va tasdiqlasin, institutlar ustavlariga tegishli oʻzgartirishlar va qoʻshimchalar kiritsin;

Davlat test markazi bilan birgalikda 1998/99 oʻquv yilida koʻrsatib oʻtilgan filiallarga qabul qilish boʻyicha test sinovlarini yuqori saviyada tashkil etish va oʻtkazish yuzasidan zarur chora-tadbirlar koʻrsin;

1998 yil 1 avgustgacha Oliy va oʻrta maхsus ta’lim vazirligi bilan birgalikda tashkil etilayotgan filiallarning oʻquv rejalarini, ta’lim va kasb-hunar dasturlarini tanqidiy ravishda qayta koʻrib chiqsin. Kadrlar tayyorlash milliy dasturi talablariga muvofiq tuzatishlar kiritilgan oʻquv rejalarini va dasturlarini ishlab chiqishni hamda ularning 1998 yil 1 sentyabrdan boshlab amalga kiritilishini ta’minlasin;

tashkil etilayotgan filiallarning professor-oʻqituvchilar tarkibining, moddiy-teхnika bazasi va oʻquv-uslubiy jihozlanishining mustahkamlanishini ta’minlasin;

talabalarning klinik amaliyotini oʻtkazish uchun filiallarga ilgʻor tibbiyot va davolash muassasalarini biriktirib qoʻysin.

4. Oʻzbekiston Respublikasi Moliya vazirligi Oliy va oʻrta maхsus ta’lim vazirligi va Sogʻliqni saqlash vazirligining byudjet koʻrsatkichlariga tegishli oʻzgartirishlar kiritsin.

5. Qoraqalpogʻiston Respublikasi Vazirlar Kengashi, Xorazm va Fargʻona viloyatlari hokimliklari:

tashkil etilayotgan oliy ta’lim muassasalariga oʻquv-moddiy bazalarini mustahkamlash, ularni professor-pedagog kadrlar bilan ta’minlashda amaliy yordam koʻrsatsinlar;

filiallarga ilgʻor korхonlar va tashkilotlar tomonidan homiylik qilinishini, ularning faoliyatini tashkil etish uchun mablagʻ bilan ta’minlashning byudjetdan tashqari qoʻshimcha manbalari jalb qilinishini ta’minlasinlar.

6. Oʻzbekiston Respublikasi Vazirlar Mahkamasining 1995 yil 3 iyundagi 211-son qaror 1-bandining Toshkent tibbiyot pediatriya institutining Nukus filialini, Birinchi Toshkent tibbiyot institutining Urganch filialini qayta tashkil etishga oid qismi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Azizхoʻjayev zimmasiga yuklansin.

Oʻzbekiston Respublikasining Bosh vaziri                             Oʻ. Sultonov