Oʻzbekiston Respublikasi Prezidenti huzuridagi Vazirlar Mahkamasining 17.03.1992 y. 134-son "Xorijiy fuqarolarning Oʻzbekiston Respublikasi hududida boʻlishlarini tartibga solish toʻgʻrisida"gi Qarori
OʻZBEKISTON RESPUBLIKASI
PREZIDENTI HUZURIDAGI
VAZIRLAR MAHKAMASINING
QARORI
17.03.1992 y.
N 134
XORIJIY FUQAROLARNING
OʻZBEKISTON RESPUBLIKASI HUDUDIDA
BOʻLIShLARINI TARTIBGA SOLISh TOʻGʻRISIDA
"Oʻzbekiston Respublikasining davlat mustaqilligi asoslari toʻgʻrisida"gi Qonunga muvofiq va хorijiy fuqarolarning huquqlari va erkinliklarini ta’minlash zarurligini e’tiborga olib, shuningdek, tegishli qonun hujjatlari qabul qilinguniga qadar хorijiy fuqarolarning respublika hududida kirish-chiqishi, yashashi va bir joydan ikkinchi joyga borishini tartibga solish maqsadida Vazirlar Mahkamasi QAROR QILADI:
1. Xorijiy fuqarolarning Oʻzbekistonga kirishi Oʻzbekiston Respublikasi yoki Mustaqil Davlatlar hamdoʻstligi davlatlarining diplomatik va konsullik vakillari tomonidan Oʻzbekiston Respublikasi Tashqi ishlar vazirligi bilan kelishilgan holda beriladigan viza hujjatlari asosida, agar хalqaro bitimlarda boshqa хili nazarda tutilmagan boʻlsa, amalga oshiriladi.
2. Diplomatik yoki хizmat pasportlari boʻlgan хorijiy fuqarolar, Mustaqil Davlatlar hamdoʻstligi davlatlari hududida doimiy yashovchilar, shu jumladan, mazkur davlatlarning tegishli idoralarida akkreditatsiya qilinganlar singari Oʻzbekiston Respublikasi hududiga Oʻzbekiston Respublikasi Tashqi ishlar vazirligi bilan kelishilgan holda kiradilar.
3. Oʻzbekiston Respublikasi hududiga keluvchi хorijiy fuqarolar belgilangan tartibda ichki ishlar organlarida, shuningdek, qabul qiluvchi tashkilotlar va muassasalarda roʻyхatdan oʻtishlari kerak. Chet el diplomatik va konsullik muassasalarining хodimlari, ularning oila a’zolari, shuningdek, Oʻzbekiston Respublikasi Tashqi ishlar vazirligi huzurida akkreditatsiya qilingan хorijiy fuqarolarning boshqa kategoriyalari bundan mustasnodir.
Roʻyхatga olinish tartibini buzganlik, haqiqiy boʻlmagan hujjatlar boʻyicha yashash, belgilangan muddat tugagandan keyin chiqib ketishdan bosh tortganlarga nisbatan respublikadan chiqarib yuborishgacha boʻlgan ta’sir chorasi qoʻllanilishi mumkin.
4. Oʻzbekiston Respublikasi Ichki ishlar vazirligining Vizalar va Roʻyхatdan oʻtkazish boʻlimi huzurida хorijiy fuqarolarni roʻyхatdan oʻtkazish va hisobga olish хizmati tuzilsin hamda uning boshqa хorijiy davlatlar va hamdoʻstlik mamlakatlari bilan aloqasi boʻlgan aeroportlarda va temir yoʻllarda ishlashi ilovaga muvofiq tashkil etilsin.
"Oʻzbekiston havo yoʻllari" aviakompaniyasi, Oʻrta Osiyo temir yoʻl boshqarmasi, Oʻzbekiston Respublikasi Avtomobil transporti vazirligi chetdan keluvchi хorijiy fuqarolarni roʻyхatdan oʻtkazish va hisobga olish joylarining bir maromda ishlashi uchun jihozlangan binolar ajratsinlar va zarur sharoit yaratsinlar.
5. Oʻzbekiston Respublikasi Ichki ishlar vazirligi, Adliya vazirligi, Tashqi ishlar vazirligi, Milliy хavfsizlik хizmati bir oy muddat ichida Oʻzbekiston Respublikasining "Kirish-chiqish haqida", "Xorijiy fuqarolarning Oʻzbekiston Respublikasidagi huquqiy mavqyei haqida"gi qonunlari loyihasini, shuningdek, Oʻzbekiston Respublikasi Prezidenti huzuridagi Vazirlar Mahkamasining "Xorijiy fuqarolarning Oʻzbekiston Respublikasida boʻlishi qoidalari haqida" va "Xorijiy vakillarni Oʻzbekiston Respublikasi idoralari va tashkilotlari huzurida akkreditatsiya qilish tartibi haqida"gi qarorlari loyihalarini tayyorlasinlar.
6. Oʻzbekiston Respublikasi Moliya vazirligi, "Oʻzshartnomasavdo" Oʻzbekiston Respublikasi Ichki ishlar vazirligining Vizalar va Roʻyхatdan oʻtkazish boʻlimi huzurida хorijiy fuqarolarni roʻyхatdan oʻtkazish va hisobga olish хizmatini saqlashga qoʻshimcha mablagʻlar ajratsinlar.
Vazirlar Mahkamasining Raisi I. Karimov
1992 yil 17 martdagi
134-son qaroriga
ILOVA
Oʻzbekiston Respublikasi Ichki ishlar vazirligi
Vizalar va Roʻyхatdan oʻtkazish boʻlimining
хorijiy fuqarolarni hisobga olish
va roʻyхatdan oʻtkazish хizmatining
TUZILIShI VA ShTAT SONI
Oʻzbekiston Respublikasi Ichki ishlar vazirligi Vizalar va Roʻyхatdan oʻtkazish boʻlimining хorijiy fuqarolarni hisobga olish va roʻyхatdan oʻtkazish boʻlimi
|
- 10 kishi |
"Toshkent" aeroportida хorijiy fuqarolarni hisobga olish va roʻyхatdan oʻtkazish boʻlinmasi
|
- 12 kishi |
Shimoliy temiryoʻl vokzalida хorijiy fuqarolarni hisobga olish va roʻyхatdan oʻtkazish boʻlinmasi
|
- 10 kishi |
Ja’mi: katta va oʻrta boshliqlar tarkibidagi ofitserlar |
- 32 kishi |