Oʻzbekiston Respublikasi Vazirlar Mahkamasining 30.12.2002 y. 519-son "Oʻzbekiston Respublikasining 16 yoshga toʻlmagan fuqarosi guvohnomasini rasmiylashtirish va berish tartibi toʻgʻrisidagi nizomni tasdiqlash haqida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
30.12.2000 y.
N 519
OʻZBEKISTON RESPUBLIKASINING
16 YoShGA TOʻLMAGAN FUQAROSI
GUVOHNOMASINI RASMIYLAShTIRISh
VA BERISh TARTIBI TOʻGʻRISIDAGI
NIZOMNI TASDIQLASh HAQIDA
16 yoshga toʻlmagan Oʻzbekiston Respublikasi fuqarolarining chet elga vaqtincha chiqishlari tartibini soddalashtirish maqsadida Vazirlar Mahkamasi QAROR QILADI:
1. Quyidagilar:
Oʻzbekiston Respublikasining 16 yoshga toʻlmagan fuqarosi guvohnomasini rasmiylashtirish va berish tartibi toʻgʻrisidagi Nizom 1-ilovaga muvofiq;
Oʻzbekiston Respublikasining 16 yoshga toʻlmagan fuqarosi guvohnomasi namunasi 2-ilovaga* muvofiq tasdiqlansin.
2. Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasi Oʻzbekiston Respublikasi Ichki ishlar vazirligining buyurtmanomasiga koʻra Oʻzbekiston Respublikasining 16 yoshga toʻlmagan fuqarolari guvohnomalari tayyorlab berilishini ta’minlasin.
3. Oʻzbekiston Respublikasi Moliya vazirligi Oʻzbekiston Respublikasining 16 yoshga toʻlmagan fuqarolari guvohnomalarini tayyorlash uchun zarur pul mablagʻlari ajratsin.
4. Oʻzbekiston Respublikasining 16 yoshga toʻlmagan fuqarosi guvohnomasini berganlik uchun eng kam oylik ish haqining 30 foizi miqdorida davlat boji undiriladi.
5. Oʻzbekiston Respublikasining 16 yoshga toʻlmagan fuqarolarining chet elga chiqishlari masalalarini koʻrib chiqish va hal etish Oʻzbekiston Respublikasi Prezidentining 1999 yil 26 fevraldagi PF-2240-son* Farmoni bilan tashkil etilgan Qoraqalpogʻiston Respublikasi Vazirlar Kengashi, viloyatlar hokimliklari huzuridagi maхsus komissiyalarga yuklansin.
6. Manfaatdor vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda oʻz me’yoriy hujjatlarini mazkur qarorga muvofiqlashtirsinlar.
7. Mazkur qarorning bajarilishini nazorat qilish Ichki ishlar vaziri Z.Almatov, Tashqi ishlar vaziri A.Komilov, Qoraqalpogʻiston Respublikasi Vazirlar Kengashi Raisi, viloyatlar hokimlari zimmasiga yuklansin.
Oʻzbekiston Respublikasining Bosh vaziri Oʻ. Sultonov
*) Oʻzbekiston Respublikasi Prezidentining "Toshkent shahri va Toshkent viloyatida pasport tizimi qoidalarini takomillashtirish chora-tadbirlari toʻgʻrisida" 2011 yil 22 sentyabrdagi PF-4364-son Farmoni bilan Toshkent shahri va Toshkent viloyati hokimliklari huzuridagi maхsus komissiyalar tugatilgan.
*) 2-ilova rus tilidagi matnda berilgan.
”Oʻzbekiston Respublikasi qonun хujjatlari toʻplami", 2000 y. 12-son
"Oʻzbekiston Respublikasi Hukumati qarorlari toʻplami", 2000 y., 12-son, 84-modda