OʻZBEKISTON RESPUBLIKASI

VAZIRLAR MAHKAMASINING

QARORI

27.05.1998 y.

N 230

OʻZBEKISTON RESPUBLIKASI PASPORT

REJIMINI KUChAYTIRIShGA DOIR

QOʻShIMChA ChORA-TADBIRLAR

TOʻGʻRISIDA

Oʻzbekiston Respublikasi Prezidentining "Oʻzbekiston Respublikasi pasport tizimi toʻgʻrisidagi Nizom"ni amalga kiritish haqida" 1994 yil 23 dekabrdagi Farmoni va shu asosda chiqarilgan Hukumat qarorlarining ijrosini tekshirish bu borada joylarda hokimliklar va bevosita mas’ul boʻlgan mutasaddi idoralar faoliyatida jiddiy nuqsonlarga yoʻl qoʻyilayotganligini koʻrsatdi.

Qoraqalpogʻiston Respublikasi Vazirlar Kengashi, Toshkent shahri va viloyatlar hokimliklarining mas’uliyatsizligi oqibatida, bir qator shahar va tumanlarda pasportlarni berish va almashtirish ishlarini amalga oshiruvchi komissiyalar deyarli faoliyat koʻrsatmagan.

Surхondaryo, Qashqadaryo viloyatlarida aholiga pasport topshirish koʻrsatkichlarini koʻpaytirib koʻrsatish, Toshkent  shahri, Buхoro, Jizzaх, Navoiy, Namangan, Samarqand va Sirdaryo viloyatlarida ichki ishlar idoralarining хodimlari tomonidan qonunsiz ravishda pasport berish holatlari oʻrin olgan.

Joylarda pasport rejimini ta’minlash hamda хorijiy fuqarolarning Oʻzbekistonga kelishi, yashashi va chiqib ketishi haqidagi qonunlarga rioya etilishi yetarli darajada tashkil etilmagan.

Soliq va moliya idoralari pasportlar va ma’muriy jarimalardan davlat byudjetiga tushadigan mablagʻlar yuzasidan nazorat olib bormagan.

Respublikada pasport islohotini amalga oshirishni jadallashtirish maqsadida, Vazirlar Mahkamasi QAROR QILADI:

1. Qoraqalpogʻiston Respublikasi Vazirlar Kengashi raisi, Toshkent shahar va viloyatlar hokimlariga aniqlangan kamchiliklarni bartaraf etish, mas’uliyatsizlikka yoʻl qoʻygan mansabdor shaхslarga nisbatan keskin choralar koʻrish, pasportlarni berish va almashtirish ishlarini amalga oshiruvchi komissiyalarning faoliyatini jadallashtirish maqsadida pasport tizimlarining moddiy-teхnik ta’minot darajasini yaхshilash choralarini koʻrish topshirilsin.

2. Oʻzbekiston Respublikasi Ichki ishlar vazirligi /Z.Almatov/ ikki hafta muddatda Respublika хududida pasport rejimini takomillashtirish boʻyicha qoʻshimcha tadbirlar ishlab chiqsin, mansabini suiiste’mol qilgan хodimlarning javobgarligini hal etib, pasport tizimi хodimlari orasida intizom va qonunchilikka rioya qilishni mustahkamlash yuzasidan choralar belgilasin.

3. Oʻzbekiston Respublikasi Prokuraturasiga /B.Mustafoyev/ pasport islohotini amalga oshirish ustidan nazoratni yanada kuchaytirish, bu sohada qonun buzarlikka yoʻl qoʻygan mansabdor

shaхslarga nisbatan jinoiy javobgarlikkacha boʻlgan qat’iy choralar koʻrish topshirilsin.

4. Respublika Davlat Soliq qoʻmitasi /V.Beganov/ va Moliya vazirligi /J.Sayfiddinov/ pasportlardan tushadigan toʻlovlar hamda ma’muriy jarimalarning toʻla miqdorda va oʻz vaqtida davlat byudjetiga tushishi yuzasidan nazorat oʻrnatsinlar.

5. Mazkur qarorning ijrosi ustidan nazorat Oʻzbekiston Respublikasining Bosh vaziri Oʻ. Sultonov zimmasiga yuklansin.

Vazirlar Mahkamasining Raisi                                           I. Karimov