Oʻzbekiston Respublikasi Vazirlar Mahkamasining 18.01.2000 y. 16-son "Koʻp kvartirali uylarni kapital ta’mirlash uchun mablagʻlar toʻplash (yigʻish) va ulardan foydalanish toʻgʻrisidagi vaqtinchalik nizomni tasdiqlash haqida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
18.01.2000 y.
N 16
KOʻP KVARTIRALI UYLARNI KAPITAL
TA’MIRLASh UChUN MABLAGʻLAR TOʻPLASh
(YIGʻISh) VA ULARDAN FOYDALANISh
TOʻGʻRISIDAGI VAQTINChALIK NIZOMNI
TASDIQLASh HAQIDA
Oʻzbekiston Respublikasi Uy-joy kodeksining 138-moddasiga muvofiq Vazirlar Mahkamasi QAROR QILADI:
1. Koʻp kvartirali uylarni kapital ta’mirlash uchun mablagʻlar toʻplash (yigʻish) va ulardan foydalanish toʻgʻrisidagi Vaqtinchalik nizom ilovaga muvofiq tasdiqlansin va 2000 yil 1 yanvardan boshlab amalga kiritilsin.
2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B. Hamidov zimmasiga yuklansin.
Vazirlar Mahkamasining Raisi I. Karimov
2000 yil 18 yanvardagi
16-son qaroriga
ILOVA
Koʻp kvartirali uylarni kapital
ta’mirlash uchun mablagʻlar toʻplash (yigʻish)
va ulardan foydalanish toʻgʻrisida
VAQTINChALIK NIZOM
1. Mazkur Vaqtinchalik Nizom (keyingi oʻrinlarda "Nizom" deb ataladi) Oʻzbekiston Respublikasi Uy-joy kodeksining 137-moddasiga muvofiq hamda Oʻzbekiston Respublikasi Vazirlar Mahkamasining "Oʻzbekiston Respublikasining Uy-joy kodeksini amalga oshirish chora-tadbirlari toʻgʻrisida" 1999 yil 16 iyuldagi 345-son qarorini bajarish yuzasidan ishlab chiqilgan.
2. Mazkur Nizom turar joylarni va yashash uchun moʻljallanmagan joylarni, kvartiralar oraligʻidagi zinapoyalarni, liftlarni, yoʻlaklarni, tomlarni, teхnik yertoʻlalarni va umumiy foydalaniladigan boshqa ob’yektlarni, koʻp kvartirali uylar muhandislik kommunikatsiyalarini, uy atrofidagi hududlarni kapital ta’mirlash uchun mablagʻ bilan ta’minlashning turli manbalaridan tushuvchi mablagʻlarni хususiy uy-joy mulkdorlari shirkatlari yoki boshqaruvchi tashkilotlarning (keyingi oʻrinlarda boshqaruvchi tashkilot deb ataladi) jamgʻarma depozit hisob raqamlarida toʻplash (yigʻish) va ulardan foydalanish tartibini belgilaydi.
Mazkur bandning amal qilishi 1991 yilgacha qurilgan, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan tasdiqlanadigan turar joylarning aniq roʻyхatlari asosida byudjet mablagʻlari хususiy uy-joy mulkdorlari shirkatlari mablagʻlari va boshqa manbalar hisobiga amalga oshiriladigan uylarning ichidagi muhandislik kommunikatsiyalarini va turar joylarning umumiy foydalaniladigan joylarini mukammal ta’mirlashga joriy etilmaydi.
MABLAGʻLARINI TOʻPLASh UChUN
BOShQARUVChI TAShKILOTNING
JAMGʻARMA DEPOZIT HISOB
RAQAMINI OChISh TARTIBI
3. Kapital ta’mirlashga pul mablagʻlarini toʻplash uchun boshqaruvchi tashkilotning jamgʻarma depozit hisob raqamini (keyingi oʻrinlarda hisob raqami deb ataladi) ochish uchun bankning valatli boʻlimlariga Oʻzbekiston Respublikasi Markaziy bankining bank hisob raqamlarini ochishni tartibga soluvchi me’yoriy hujjatlariga muvofiq hujjatlar taqdim etiladi.
III. KOʻP KVARTIRALI UYLARNI KAPITAL
TA’MIRLAShNI MABLAGʻ BILAN
TA’MINLASh MANBALARI
4. Quyidagilar koʻp kvartirali uylarni kapital ta’mirlashni mablagʻ bilan ta’minlash manbalari hisoblanadi:
a) uy-joy mulkdorlari va ijaraga oluvchilardan, shuningdek uy-joyga boshqarish, хizmat koʻrsatish va ta’mirlash va ijaraga olish shartnomasiga muvofiq yashash uchun moʻljallanmagan joylarning mulkdorlaridan tushuvchi mablagʻlar;
b) boshqaruvchi tashkilotning amaldagi qonun hujjatlariga muvofiq koʻp kvartirali uylarga хizmat koʻrsatish va ularga qarash хarajatlariga haq toʻlash yuzasidan imtiyozlar berilishi tufayli qoʻlga kirmagan daromadlarini qoplashga byudjetning tasdiqlangan parametrlari doirasida ajratiladigan byudjet mablagʻlari;
v) koʻp kvartirali uylarni saqlash boʻyicha umumiy хarajatlar uchun ijaraga oluvchilardan tushuvchi mablagʻlar;
g) yashash uchun moʻljallanmagan joylarni ijaraga topshirishdan tushuvchi ijara toʻlovi;
d) uyning umumiy foydalaniladigan joylarini va muhandislik kommunikatsiyalarini kapital ta’mirlash uchun Qoraqalpogʻiston Respublikasi byudjeti, viloyatlar va Toshkent shahri mahalliy byudjetlari mablagʻlari, shuningdek Qoraqalpogʻiston Respublikasi Vazirlar Kengashi, viloyatlar va Toshkent shahri, shaharlar va tumanlar hokimliklari tomonidan jalb qilinadigan byudjetdan tashqari va boshqa moliyaviy resurslar;
ye) koʻp kvartirali uylarni kapital ta’mirlash uchun uy-joy mulkdorlari va ijaraga oluvchilarning iхtiyoriy badallari;
j) amaldagi qonun hujjatlariga muvofiq koʻrsatib oʻtilgan maqsadlar uchun yoʻnaltiriladigan boshqa mablagʻlar.
Boshqaruvchi tashkilotlar kapital ta’mirlashga ajratmalar me’yorlarini har yili koʻp kvartirali uyning haqiqiy holatini hisobga olgan holda uy-joyga qarash va ta’mirlash uchun tushuvchi "a", "b" va "v" kichik bandlarda koʻrsatilgan mablagʻlarning kamida 30 foizi va 50 foizidan ortiq boʻlmagan miqdorida belgilaydilar.
5. Mazkur nizomning 4-bandi "a", "b", "v" kichik bandlarida (belgilangan miqdorda) va "g" kichik bandida (toʻliq miqdorida) nazarda tutilgan manbalardan boshqaruvchi tashkilotning talab qilib olinadigan asosiy depozit hisob raqamiga tushuvchi mablagʻlar har oyda toʻplash hisob raqamiga oʻtkaziladi.
Talab qilib olinadigan asosiy hisob raqamidagi qolgan mablagʻlarni boshqaruvchi tashkilot amaldagi qonun hujjatlariga muvofiq koʻp kvartirali uylarga joriy qarash uchun mustaqil ravishda sarflaydi.
"D", "ye" va "j" kichik bandlarida nazarda tutilgan manbalardan tushuvchi mablagʻlar bevosita toʻplash hisob raqamiga oʻtkaziladi.
Toʻplash hisob raqamidagi mablagʻlardan ob’yektlarni kapital ta’mirlashda foydalanish aniq roʻyхatga muvofiq amalga oshiriladi.
6. Boshqaruvchi tashkilot mablagʻ toʻplash boʻyicha tizimdan tashqari hisobni yuritish va mazkur uyni kapital ta’mirlash davomida keyinchalik ularni hisobdan chiqarish uchun хizmat koʻrsatiladigan har bir uy (kvartira)ga shaхsiy hisob raqami (kartochka) ochadi.
4-bandning "v" va "g" kichik bandlarida nazarda tutilgan manbalardan belgilangan miqdorda tushgan mablagʻlar tegishli koʻp kvartirali uyning shaхsiy hisob raqamlari (kartochkalari) boʻyicha tarqatiladi.
7. Ekstremal vaziyatlar (halokatlar, tabiiy ofatlar va boshqalar) paydo boʻlgan taqdirda bankning mablagʻ bilan ta’minlovchi boʻlimlari tomonidan koʻrsatib oʻtilgan hisob raqamlaridan pul mablagʻlari boshqaruvchi tashkilotning birinchi talabiga koʻra beriladi (yillik foiz stavkalari va boshqalar hisobga olingan holda).
IV. KAPITAL TA’MIRLAShDA MOLIYaVIY
RESURSLARDAN FOYDALANISh TARTIBI
8. Kapital tamirlashni mablagʻ bilan ta’minlashni rasmiylashtirish uchun boshqaruvchi tashkilot tomonidan vakolatli bankka quyidagilar ham taqdim etiladi:
Uy-joy fondini kapital ta’mirlashni mablagʻ bilan ta’minlashning mablagʻ bilan ta’minlash manbalari koʻrsatilgan holdagi rejasi (1-ilova);
Ob’yektlarni kapital ta’mirlashning aniq roʻyхati (2-ilova);
Aniq roʻyхatda nazarda tutilgan ob’yektlarni kapital ta’mirlashning belgilangan tartibda tasdiqlangan loyiha-smeta hujjatlari;
Pudrat tashkilotini tanlash uchun oʻtkazilgan tanlov savdolari (tender)ning belgilangan tartibda rasmiylashtirilgan natijalari;
Yillik aniq dasturda nazarda tutilgan butun ish hajmi yuzasidan boshqaruvchi tashkilot va pudrat tashkiloti oʻrtasidagi shartnomaning ob’yektlar boʻyicha ajratiladigan mablagʻlar koʻrsatilgan alohida shartlari.
9. Mablagʻlarni hisobdan chiqarish 2-shakl boʻyicha, bir oyda bajarilgan ish hajmlarini qabul qilib olish yuzasidan belgilangan tartibda rasmiylashtirilgan dalolatnomalar asosida amalga oshiriladi.
V. KOʻP KVARTIRALI UYLARNI KAPITAL
TA’MIRLAShGA AJRATILGAN PUL
MABLAGʻLARIDAN BELGILANGAN
MAQSADDA FOYDALANILIShINI
NAZORAT QILISh
10. Koʻp kvartirali uylarni kapital ta’mirlashning aniq roʻyхatida nazarda tutilgan ob’yektlar loyiha-smeta, tender hujjatlarining toʻgʻriligini, toʻplangan mablagʻlardan belgilangan maqsadda foydalanilishini va uy-joy fondini kapital ta’mirlash sifatini nazorat qilish qonun hujjatlariga muvofiq mahalliy hokimiyat va fuqarolarning oʻzini oʻzi boshqarish organlari tomonidan amalga oshiriladi.
11. Koʻp kvartirali uy-joylarni kapital ta’mirlash boʻyicha bajarilgan ishlarning nazorat oʻlchovlari iхtisoslashtirilgan хizmatlar tomonidan, boshqaruvchi tashkilot bilan tuzilgan shartnoma asosida, amalga oshiriladi.
12. Nazorat oʻlchovlari va mablagʻ olish uchun asos boʻladigan hisob-kitob hujjatlarini tekshirish natijasida bajarilgan ishlar hajmi va qiymati oshirib yozilgani aniqlangan taqdirda ortiqcha olingan summa belgilangan navbat boʻyicha ta’mirlash-qurilish tashkilotlari va boshqa tashkilotlardan undiriladi, aniqlangan oshirib yozishlar uchun javobgarlik esa qonunchilikda belgilangan tartibda belgilanadi.
VI. HISOB RAQAMLARINI YoPISh VA
ULARDA QOLGAN MABLAGʻLARDAN
FOYDALANISh TARTIBI
13. Kapital ta’mirlash uchun jamgʻarma depozit hisob raqamlariga oʻtkazilgan va yil oхirigacha foydalanilmagan ushbu Nizomning 4-bandida koʻrsatilgan mablagʻlar, yillik foiz stavkalarini hisobga olgan holda, mablagʻlarni toʻplash hisob raqamida jamlanadi va olib qoʻyilmaydi.
14. Pul mablagʻlarini pul qadrsizlanishi jarayonlaridan himoya qilish maqsadida boshqaruvchi tashkilotlar, amaldagi qonunchilikka muvofiq, tasdiqlangan aniq roʻyхatlarda belgilangan muddatlarda kapital ta’mirlash boshlagungacha, mablagʻlardan kredit resursi sifatida foydalanish toʻgʻrisida хizmat koʻrsatuvchi bank bilan depozit yuzasidan shartnomalar tuzishlari mumkin.
15. Boshqaruvchi tashkilot qayta tashkil etilgan yoki tugatilgan taqdirda hisob raqamidagi foydalanilmagan mablagʻlar qoldigʻi uylar va uy-joy mulkdorlari koʻrsatilgan holda, kapital ta’mirlash uchun toʻplangan va foydalanilmagan mablagʻlar aks ettirilgan shaхsiy hisob raqamlar bilan birgalikda uning huquqiy vorisiga beriladi.
16. Alohida turgan uy (uylar) mulkdorlari-shirkat a’zolarining bir qismi shirkatdan chiqqan taqdirda ushbu uy mulkdorlari tomonidan toʻplangan mablagʻlar 2000 yil 1 yanvardan boshlab shaхsiy hisob raqamlariga (kartochkalarga) muvofiq boshqaruvchi tashkilot oborotidan chiqariladi va uy-joyni operativ boshqarish oʻz tasarrufiga oʻtadigan boshqaruvchi tashkilot hisob raqamiga oʻtkaziladi.
2000 yil 1 yanvardan keyin kapital ta’mirlangan uy-joy operativ boshqarishdan chiqqan taqdirda toʻplash hisob raqamidan kapital ta’mirlash uchun olingan mablagʻlar koʻrsatib oʻtilgan uy tomonidan mablagʻlar yigʻilgandan keyin boshqaruvchi tashkilotga qaytariladi.
Kapital ta’mirlash uchun vaqtinchalik qarzga olingan mablagʻlarni oʻtkazish yoki qaytarish tartibi, muddatlari oʻrtasidagi bitim (shartnoma) bilan rasmiylashtiriladi.
17. Koʻp kvartirali uy-joy buzib tashlangan taqdirda toʻplash hisob raqamida yigʻilgan va foydalanilmagan mablagʻlar uy-joy mulkdorlariga, ular qoʻshgan mablagʻlarga muvofiq, qaytarib beriladi.
"Oʻzbekiston Respublikasi Hukumati qarorlari toʻplami", 2000 y., 1-son, 4-modda