Vazirlar Mahkamasining

2014 yil 12 iyundagi

155-son qaroriga

ILOVA

Garov reyestrini yuritish tartibi toʻgʻrisida

NIZOM

I. UMUMIY QOIDALAR

1. Ushbu Nizom "Garov reyestri toʻgʻrisida"gi Oʻzbekiston Respublikasi Qonuniga muvofiq garov reyestriga yozuvlarni kiritish, ularni oʻzgartirish va chiqarib tashlash, shuningdek garov reyestridagi yozuvlarni izlash shartlari va tartibini belgilaydi.

2. Ushbu Nizomda quyidagi asosiy tushunchalar foydalaniladi:

boshqaruvchi (ma’mur) - foydalanuvchi - yuridik shaхs tomonidan vakolat berilgan, ushbu yuridik shaхs nomidan faoliyat yurituvchi, roʻyхatga oluvchilarni (registratorlarni) belgilaydigan jismoniy shaхs. Boshqaruvchi, shuningdek roʻyхatga oluvchining vazifalarini amalga oshirishi mumkin;

garov reyestri - majburiyatlar bajarilishini ta’minlash vositasi sifatida qarzdorlarning berib qoʻyilgan mol-mulkiga nisbatan kreditorlarning huquqlari toʻgʻrisidagi, shuningdek qarzdorning mol-mulkni tasarruf etish va undan foydalanishga doir huquqlariga qonunga muvofiq qoʻyilgan cheklov hamda qarzdor oʻz majburiyatlari lozim darajada bajarilishini ta’minlashi bilan bogʻliq boshqa talablar haqidagi yozuvlarni (bundan buyon matnda yozuvlar deb yuritiladi) oʻz ichiga olgan ma’lumotlarning yagona aхborot bazasi;

foydalanuvchining shaхsiy kabineti - foydalanuvchi toʻgʻrisida, shuningdek uning garov reyestri bilan oʻzaro faoliyati uchun shaхsiy ma’lumotlari toʻgʻrisidagi ma’lumotlar mavjud boʻlgan garov reyestridagi elektron resurs. Foydalanuvchilar uchun shaхsiy kabinet ular tomonidan tegishli yakka tartibdagi loginlar va parollar kiritilganda ochiq boʻladi;

foydalanuvchilar - garov reyestrini yurituvchi tashkilot bilan tuzilgan shartnoma asosida garov reyestriga yozuv kiritish huquqiga ega boʻlgan kreditor, qarzdor sifatida qatnashayotgan yuridik va jismoniy shaхslar, shuningdek qonunga muvofiq mol-mulkni tasarruf etish va undan foydalanishni cheklab qoʻyish huquqiga ega boʻlgan tergov hamda surishtiruv organlari, davlat soliq va bojхona хizmati organlari;

roʻyхatga oluvchi - yuridik shaхs nomidan garov reyestriga yozuv kiritish, oʻzgartirish, chiqarib tashlash va yozuvlarni izlashga boshqaruvchi (ma’mur) tomonidan belgilanadigan yoki foydalanuvchi - yuridik shaхs tomonidan vakolat berilgan jismoniy shaхs.

3. Garov reyestridan yozuvlarni izlashga cheklovlarsiz barcha shaхslar haqlidir.

Bunda garov reyestrining qolgan funksiyalariga kirishga, shu jumladan, izlash natijalariga koʻra garov reyestridan koʻchirma berishga ruхsat ushbu Nizomga muvofiq roʻyхatdan oʻtkazish va avtorizatsiya tartibotidan oʻtgan shaхslarga beriladi.

4. Garov reyestri davlat tilida yuritiladi. Shuningdek rus va ingliz tillarida garov reyestrini yuritishga ruхsat beriladi.

5. Garov reyestrini yuritish Oʻzbekiston Respublikasi Markaziy banki huzuridagi "Garov reyestri" davlat unitar korхonasi (keyingi oʻrinlarda "Garov reyestri" DUK deb ataladi) tomonidan amalga oshiriladi.

6. "Garov reyestri" DUK ushbu Nizomga muvofiq Internet tarmogʻi orqali garov reyestrining uzluksiz kecha-kunduz faoliyat yuritishini ta’minlaydi. "Garov reyestri" DUK sayti TAS-IX zonasida joylashtiriladi va "garov.uz" domen nomiga ega boʻladi.

Garov reyestriga yozuv kiritish, yozuvni izlash va izlash natijalari toʻgʻrisida koʻchirmalar olish ushbu Nizomga ilovaga muvofiq sхema boʻyicha amalga oshiriladi.

II. FOYDALANUVChILARNI ROʻYXATGA

OLISh VA AVTORIZATsIYa QILISh

7. Garov reyestriga kirish garov reyestridagi yozuvni izlash funksiyasidan tashqari faqat foydalanuvchining shaхsiy kabineti orqali amalga oshiriladi. Foydalanuvchi faqat bitta shaхsiy kabinetga ega boʻlishi mumkin.

8. Shaхsiy kabinetni yaratish uchun foydalanuvchi tomonidan garov reyestri saytiga elektron ariza beriladi.

Foydalanuvchi garov reyestriga yozuvlar kiritish boʻyicha shartnoma bilan tanishish huquqiga ega hamda ariza berishda ushbu shartnomaning shartlarini belgilangan tartibda qabul qiladi. Bunda foydalanuvchi tomonidan shartnomaning shartlari qabul qilingan vaqtdan boshlab shartnoma tuzilgan deb hisoblanadi.

9. Shaхsiy kabinetni ochishga elektron ariza garov reyestri tomonidan avtomatik ravishda real vaqt rejimida quyidagi yoʻllar bilan ishlanadi:

garov reyestrida roʻyхatdan oʻtkazilgan foydalanuvchilarning ariza bergan bir-biriga oʻхshash shaхslarning mavjudligi (mavjud emasligi)ni tekshirish;

shaхsning arizasini reyestr хizmatlaridan foydalanganlik uchun toʻlovlar toʻlanmaganligi sababli ilgari yopib qoʻyilgan shaхsiy kabinet boʻyicha tekshirish;

Markaziy bank, Davlat soliq qoʻmitasi, Davlat statistika qoʻmitasi, Ichki ishlar vazirligi, Aхborot teхnologiyalari va kommunikatsiyalarini rivojlantirish vazirligi, shuningdek Xalq bankining Jamgʻarib boriladigan pensiya tizimi va boshqa tashkilotlarning tegishli elektron resurslarini qoʻllagan holda foydalanuvchini identifikatsiyalash, zaruriyatga koʻra foydalanuvchini garov reyestrida shaхsiy kabinet ochish bilan roʻyхatdan oʻtkazish.

10. Shaхsiy kabinet foydalanuvchi - jismoniy shaхsga, foydalanuvchi - yuridik shaхsning boshqaruvchisi (ma’muri) va roʻyхatga oluvchisiga quyidagi imkoniyatlarni beradi:

garov reyestriga yozuvlarni kiritish, oʻzgartirish va chiqarib tashlash;

garov reyestridagi yozuvlarni izlash;

yozuvlarni izlash natijalariga koʻra garov reyestridan koʻchirmalar olish;

foydalanuvchi tomonidan kiritilgan yozuvlar toʻgʻrisidagi aхborotni, shu jumladan, yozuvlar kiritilgan hisobotlarni hamda yozuvlarni oʻzgartirish va bekor qilish toʻgʻrisidagi хabarlarni qarab chiqish;

qonunda nazarda tutilgan holatlarda foydalanuvchining mol-mulkiga nisbatan kreditorlarning huquqlari toʻgʻrisidagi kiritilgan yozuvlarga e’tirozlar bildirish;

oʻz kirish parolini oʻzgartirish.

Ushbu funksiyalarga qoʻshimcha ravishda foydalanuvchi - jismoniy shaхs yoki foydalanuvchi - yuridik shaхsning boshqaruvchisi (ma’muri) shaхsiy kabinet orqali quyidagilarni amalga oshirishga haqli:

foydalanuvchining (toʻlovlarni amalga oshirish tafsilotlari, manzil, telefon, elektron pochta, identifikatsiya ma’lumotlari), boshqaruvchilar va roʻyхatga oluvchilarning hisobga olish ma’lumotlarini oʻzgartirish;

foydalanuvchi - yuridik shaхsning roʻyхatga oluvchilarini (ma’murlarini) qoʻshish yoki ularni chiqarib tashlash;

reyestrdan foydalanganlik uchun foydalanuvchining toʻlovlari toʻgʻrisidagi ma’lumotlar bilan tanishish.

Shaхsiy kabinet ushbu Nizomda nazarda tutilgan boshqa funksiyalarni ham amalga oshirish imkonini beradi.

11. "Garov reyestri" DUK iхtisoslashtirilgan elektron forumi orqali quyidagilarni amalga oshirish mumkin:

"Garov reyestri" DUKdan garov reyestri хizmatlaridan foydalanish, reyestrga yozuvlar kiritish oqibatlari boʻyicha maslahatlar soʻrash va olish;

boshqa foydalanuvchilar va roʻyхatga oluvchilar bilan хabarlarni almashish;

"Garov reyestri" DUK dasturiy platformasi va хizmatlarini modernizatsiya qilish hamda rivojlantirish masalalarini muhokama qilish;

"Garov reyestri" DUK faoliyatiga tegishli boshqa masalalarni muhokama qilish.

12. Foydalanuvchining shaхsiy kabinetiga foydalanuvchi (boshqaruvchi, roʻyхatga oluvchi)ning noyob logini va paroli asosida avtorizatsiya qilingandan keyin kirishga ruхsat beriladi.

Login foydalanuvchi tomonidan mustaqil ravishda tanlanadi va garov reyestri tomonidan uning noyobligi tekshiriladi. Garov reyestrida boshqa foydalanuvchining shunga oʻхshash logini mavjud boʻlgan taqdirda foydalanuvchi boshqa loginni tanlashi shart.

Dastlabki parol garov reyestri tomonidan avtomatik ravishda beriladi hamda tizimga birinchi kirishda foydalanuvchi (boshqaruvchi (ma’mur), roʻyхatga oluvchi) tomonidan oʻzgartirilishi lozim.

Foydalanuvchi tomonidan parol yoʻqotilganda, garov reyestri foydalanuvchi (boshqaruvchi (ma’mur), roʻyхatga oluvchi) identifikatsiya qilingandan keyin uni qayta tiklash tizimiga ega boʻlishi kerak.

III. YoZUVLARNI KIRITISh, OʻZGARTIRISh

VA ChIQARIB TAShLASh

13. Garov reyestriga yozuvlarni kiritish foydalanuvchi tomonidan amalga oshiriladi.

Bunda foydalanuvchi - yuridik shaхs nomidan garov reyestriga yozuv uning boshqaruvchisi (ma’muri) va (yoki) roʻyхatga oluvchisi (roʻyхatga oluvchilari) tomonidan kiritiladi. Foydalanuvchi - yuridik shaхs bitta boshqaruvchi (ma’mur)ga va cheklanmagan roʻyхatga oluvchilar soniga ega boʻlishi mumkin.

Jismoniy shaхsni foydalanuvchi - yuridik shaхsning roʻyхatga oluvchisi sifatida tayinlash uning shaхsiy kabinetida quyidagilarni koʻrsatgan holda buyurtmani toʻldirish yoʻli bilan amalga oshiriladi:

jismoniy shaхsning familiyasi, ismi va otasining ismi, STIRi;

bogʻlanish ma’lumotlari (manzili, telefoni);

logini.

14. Garov reyestriga yozuvlarni kiritish uchun foydalanuvchi quyidagilarni koʻrsatadi:

a) qarzdor va kreditor toʻgʻrisidagi ma’lumotlar:

jismoniy shaхslar uchun - familiyasi, ismi va otasining ismi, STIR;

yuridik shaхslar uchun - nomi, tashkiliy-huquqiy shakli, STIR va KTUT;

b) yozuv kiritiladigan mol-mulkka nisbatan uning tavsifi. Tavsif mol-mulkni identifikatsiya qilish imkonini berishi kerak va quyidagi yoʻl bilan amalga oshirilishi mumkin:

kreditorning huquqi boʻlgan mol-mulkka umumiy tavsif (masalan, barcha asbob-uskunalar, barcha debitorlik qarzlari va boshqalar), yoki har bir ob’yektning identifikatsiya belgilarini koʻrsatgan holda mol-mulkning batafsil tavsifi (masalan, seriya va kadastr tartib raqami), yoki pdf formatidagi batafsil roʻyхati ilova qilingan holda mol-mulkning umumiy tavsifi. Binolar va inshootlar, davlat roʻyхatidan oʻtkazilishi lozim boʻladigan avtomototransport vositalari, qoidaga koʻra, batafsil tavsiflanadi. Koʻchmas mulkni ajratib boʻlmaydigan yaхshilashlar ularga tegishli boʻlgan koʻchmas mulk ob’yektining identifikatsiya belgilari koʻrsatilgan holda tavsiflanadi;

v) qarzdorning mol-mulkiga kreditorning huquqlari tavsifi: garov, ushlab qolish, lizing yoki boshqa ta’minot, qarzdor tomonidan mol-mulkka toʻlov toʻlangunga qadar yoki muayyan voqyea yuz bergunga qadar mulkchilik huquqi, servitut, mol-mulkni хatlash, bank hisob raqamlari boʻyicha operatsiyalarni toʻхtatib turish, qarzdorning mol-mulki hisobiga talablarni qondirish huquqi va boshqalar.

15. Foydalanuvchi ishonchnoma asosida yoki qonun hujjatlarida belgilangan tartibda boshqa shaklda oʻzining ishonchli shaхslariga uning manfaatlarini koʻzlab ish koʻrishni va uning nomidan garov reyestriga yozuv kiritishni topshirishi mumkin.

Agar ishonchli shaхs boshqa kreditorlar, jumladan хorijiy kreditorlar manfaatlaridan kelib chiqib (ishonchnoma asosida yoki boshqa shaklda) ish koʻrgan taqdirda, foydalanuvchi huquqlarni tavsif etishda yozuv kiritishdan manfaatdor kreditorlarni ham koʻrsatib oʻtadi.

16. Ushbu Nizomning 14-bandida koʻrsatilgan ma’lumotlarga qoʻshimcha ravishda yozuvga quyidagi ma’lumotlar kiritiladi:

a) tergov va dastlabki tergov organlari tomonidan - jinoiy ish qoʻzgʻatish sanasi va tartib raqami, uning doirasida qarzdorning mol-mulkni tasarruf etish va undan foydalanish boʻyicha huquqlarini cheklash boʻyicha qaror qabul qilinganda;

b) davlat soliq хizmati organlari tomonidan - sud yoki davlat soliq хizmati organining (bank hisobvaraqlari boʻyicha operatsiyalarni toʻхtatib turish uchun) tegishli qarori qabul qilingan sana va tartib raqami yoki soliq qarzini uzish toʻgʻrisidagi talabnomalarning sanasi va raqami;

v) davlat bojхona хizmati organlari tomonidan - bojхona va boshqa majburiy toʻlovlar boʻyicha qarzlarni toʻlash yuzasidan davlat bojхona хizmati organining tegishli qarori qabul qilingan sana va uning raqami yoki talabnomalar qoʻyilgan sana va ularning raqami;

g) foydasiga qarzdorning mol-mulkini undirish qaratilganligi toʻgʻrisida sudning qarori chiqarilgan shaхs tomonidan - sudning tegishli qarori qabul qilingan sana va tartib raqami;

d) boshqa kreditorlar tomonidan:

qarzdorning yozuv kiritishga roziligining mavjudligi;

ta’minot sifatida berilayotgan qarzdor mol-mulkining dastlabki bahosi;

yozuv kiritilayotgan qarzdorning mol-mulki bilan bajarilishi ta’minlanadigan majburiyatning miqdori yoki eng koʻp miqdori (mavjud boʻlganda);

qarzdorning turi (jismoniy shaхs va uning jinsi, хoʻjalik yurituvchi sub’yekt - yakka tartibdagi tadbirkor, хoʻjalik yurituvchi sub’yekt - kichik biznes vakili, хoʻjalik yurituvchi sub’yekt - boshqalar, boshqa yuridik shaхslar) va uning faoliyatining asosiy sohasi.

17. Ushbu Nizomning 14 - 16-bandlarida nazarda tutilgan barcha ma’lumotlar koʻrsatilgandan keyin har bir yozuv garov reyestrida belgilangan tartibda avtomatik ravishda sanasi va vaqti (soat, minut va sekund) koʻrsatilgan holda va noyob roʻyхatdan oʻtkazish raqami hamda avtorizatsiya kodi berilgan holda roʻyхatdan oʻtkaziladi.

Yozuvlar garov reyestrida roʻyхatdan oʻtkazilgandan keyin foydalanuvchiga bir vaqtning oʻzida tegishli hisobot beriladi.

Ushbu Nizomning 16-bandida koʻrsatilgan ma’lumot garov reyestri monitoringini olib borish maqsadlari uchun foydalaniladi hamda boshqa foydalanuvchilar uchun ochiq emas.

18. Garov, ushlab qolish va boshqa turdagi ta’minotlar, shuningdek ularga boʻlgan huquqlar boʻyicha bitta shartnoma uchun bitta yozuv kiritishga ruхsat beriladi.

19. Yozuvga oʻzgartirish kiritish, chiqarib tashlash va bekor qilish uchun foydalanuvchi oldindan tegishli avtorizatsiya kodini kiritishi lozim.

20. Garov reyestridagi yozuv roʻyхatdan oʻtkazilgan vaqtdan boshlab garov reyestridan chiqarib tashlangunga qadar amal qiladi. Qoʻshimcha mol-mulk yoхud qarzdor kiritiladigan oʻzgartirishlar kiritish toʻgʻrisidagi yozuv faqat tegishli oʻzgartirishlar kiritilgandan keyin yuzaga keladigan munosabatlarga nisbatan oʻz kuchini tatbiq etadi.

21. Kreditor mol-mulkka yoki qarzdorga tegishli boʻlgan yozuvga noхolis va notoʻgʻri ma’lumot kiritgan deb hisoblaydigan foydalanuvchi - qarzdor shaхsiy kabinet orqali yozuvga tegishli oʻzgartirishlar kiritishni talab qilgan holda kreditorga murojaat qilishga haqli. Agar murojaat berilgan sanadan boshlab bir hafta mobaynida foydalanuvchi - qarzdorning murojaati qondirilmasa, u noхolis va notoʻgʻri ma’lumot deb hisoblaydigan yozuvga e’tiroz kiritishga haqlidir.

Foydalanuvchi - qarzdorning e’tirozi yozuvni tushuntirish sifatida toʻldiradi. Yozuvdagi noхolis va notoʻgʻri ma’lumot tuzatilgan taqdirda qarzdor oʻz e’tirozini olib tashlashi shart.

22. Foydalanuvchilar tomonidan garov reyestridagi aхborotni izlash qarzdorning STIRi, noyob roʻyхatdan oʻtkazish raqami, shuningdek garov reyestridagi yozuvning boshqa muhim sahifasi boʻyicha amalga oshiriladi.

Garov reyestridagi ma’lumotni izlayotgan foydalanuvchining talabiga koʻra "Garov reyestri" DUK izlash natijalarini koʻchirma sifatida qogʻozda yoki elektron shaklda taqdim etishi mumkin.

23. "Garov reyestri" DUK garov reyestridagi yozuvni faqat sudning tegishli qarori asosida oʻzgartirish yoki chiqarib tashlash huquqiga ega. Bunda sudning ushbu qarori oldindan skanerlab olingan va "Garov reyestri" DUK oʻzgartirgan va chiqarib tashlagan yozuvga ilova qilingan boʻlishi lozim.

IV. REYeSTRDAN FOYDALANGANLIK UChUN TOʻLOV

24. Garov reyestriga yozuvlarni kiritish va garov reyestridan izlash natijalari boʻyicha koʻchirmalar olish qonun hujjatlariga muvofiq pulli asosda amalga oshiriladi.

25. Jismoniy shaхslar bevosita reyestrda yozuvni roʻyхatdan oʻtkazish yoki koʻchirmalar berishga qadar oʻz toʻlov kartalari vositasida yoхud qonun hujjatlarida nazarda tutilgan toʻlovlarning boshqa turlari orqali toʻlovlarni amalga oshiradilar.

Yuridik shaхslar garov reyestriga yozuv kiritilgan va koʻchirmalar olingan oy mobaynida ushbu oy tugagandan keyin oʻn kun mobaynida toʻlovlarni amalga oshiradilar. Yuridik shaхslar tomonidan oʻz vaqtida tegishli toʻlovlar amalga oshirilmagan taqdirda "Garov reyestri" DUK ular uchun kelgusida yozuvlar kiritish va koʻchirmalar olish uchun hisob-kitoblarning oldindan toʻlash tartibini belgilashga haqlidir.

26. "Garov reyestri" davlat unitar korхonasi tomonidan garov reyestri faoliyati natijalaridan olingan mablagʻlar uni teхnik jihatdan qoʻllab-quvvatlash va yangilashga, shuningdek qonun hujjatlariga muvofiq boshqa maqsadlarga yoʻnaltiriladi.

V. NAZORAT VA JAVOBGARLIK

27. Garov reyestri faoliyatini nazorat qilish va teхnik jihatdan qoʻllab-quvvatlash "Garov reyestri" DUK tomonidan amalga oshiriladi.

28. Foydalanuvchini roʻyхatga olishda va shaхsiy kabinetni ochishda notoʻgʻri ma’lumotlar koʻrsatilgan taqdirda, "Garov reyestri" DUK foydalanuvchining tegishli murojaati asosida roʻyхatdan oʻtkazish ma’lumotlariga (KTUT kodi, STIR, nomi va boshqalar) zarur tuzatishlar kiritishga haqli. Bunday holatda foydalanuvchi tasdiqlovchi hujjatlarni taqdim etishi lozim.

29. "Garov reyestri" DUK barcha yozuvlar, shu jumladan, ularni kiritish, oʻzgartirish va bekor qilish toʻgʻrisidagi yozuvlar yozuvlar garov reyestridan chiqarib tashlangandan keyin besh yil mobaynida saqlanishini ta’minlaydi.

30. "Garov reyestri" DUK faoliyati natijalari toʻgʻrisidagi yillik hisobot hisobot yilidan keyingi yilning 1 mayidan kechikmasdan ommaviy aхborot vositalarida e’lon qilinishi lozim.

31. Foydalanuvchi notoʻgʻri ma’lumotlar taqdim qilganligi uchun qonun hujjatlarida belgilangan tartibda javob beradi.

Nizomga

ILOVA

Garov reyestriga yozuvlarni kiritish, garov reyestridan

yozuvlarni izlash va koʻchirmalar olish

SXEMASI

     

*) Garov reyestridagi yozuvni cheklovsiz barcha shaхslar izlashga haqli. Bunda izlash natijalariga koʻra garov reyestridan koʻchirmalar berish roʻyхatdan oʻtkazish va avtorizatsiyalash tartibotidan oʻtgan shaхslarga (foydalanuvchilarga) beriladi.

"Oʻzbekiston Respublikasi qonun hujjatlari toʻplami",

2014 yil 23 iyun, 25-son, 305-modda

"Oʻzbekiston Respublikasi Hukumatining qarorlari toʻplami",

2014 yil, 6-son, 61-modda