OʻZBEKISTON RESPUBLIKASI

PREZIDENTINING

QARORI

17.07.2015 y.

N PQ-2371

OʻZBEKISTON RESPUBLIKASI

DAVLAT MUSTAQILLIGINING YIGIRMA

TOʻRT YILLIK BAYRAMIGA TAYYoRGARLIK

KOʻRISh VA UNI OʻTKAZISh TOʻGʻRISIDA

Xalqimiz asrlar davomida intilib yashagan va kurashgan, mustaqillik degan bebaho ne’matning qadr-qimmatini teran idrok etish, oʻtgan davr mobaynida bosib oʻtgan ogʻir va mashaqqatli, ayni vaqtda sharafli yoʻlimiz, keng koʻlamli islohotlarimiz, qoʻlga kiritgan ulkan yutuqlarimizning tub mohiyati va ahamiyatini yurtimiz va jahon jamoatchiligiga yetkazish, sodda qilib aytganda, biz kecha kim edigu bugun kim boʻlganimizni anglash, vatandoshlarimizni yangi marralar sari ruhlantirish, biz uchun eng ulugʻ, eng aziz ayyom boʻlmish Mustaqillik bayramini yuksak darajada oʻtkazish maqsadida:

1. Oʻzbekiston Respublikasi davlat mustaqilligining yigirma toʻrt yillik bayramiga tayyorgarlik koʻrish va uni oʻtkazish boʻyicha respublika komissiyasining tarkibi ilovaga* muvofiq tasdiqlansin.

2. Respublika komissiyasi bir hafta muddatda "Betakrorimsan, yagonasan, ona Vatanim - Oʻzbekistonim!" degan ezgu gʻoyani oʻzida mujassam etgan tashkiliy-amaliy, madaniy-ma’naviy hamda targʻibot-tashviqot ishlari dasturini ishlab chiqsin.

3. Mazkur dasturni ishlab chiqishda quyidagi ustuvor yoʻnalishlarga alohida e’tibor qaratish tavsiya etilsin:

mustaqillik biz uchun milliy davlatchiligimizni, oʻzligimiz, insoniy haq-huquq va qadr-qimmatimizni tiklash, urf-odat va an’analarimizni, muqaddas islom dinimizni, buyuk ajdodlarimizning tabarruk nomlarini ulugʻlash, sogʻlom va barkamol yangi avlodni shakllantirish boʻyicha ilgari tasavvur ham qilib boʻlmaydigan beqiyos imkoniyatlar ochib berganini keng aks ettirish;

Oʻzbekiston oʻz vaqtida sobiq mustabid tuzumning ma’muriy-buyruqbozlik tizimidan, biryoqlama rivojlangan nochor iqtisodiyotdan, "shok terapiyasi" kabi noma’qul modellardan butunlay voz kechib, mashhur besh tamoyilga asoslangan oʻz taraqqiyot yoʻlini qat’iy tanlab olgani va dunyoda "oʻzbek modeli" sifatida e’tirof etilgan ushbu rivojlanish strategiyasining real natijalarini aniq tahlillar orqali ochib berish;

yaqin oʻtmishda qoloq agrar respublika boʻlgan, iqtisodiyotining asosini paхtachilik va paхtani qayta ishlash korхonalari tashkil etgan Oʻzbekistonning bugungi kunda sanoati tez sur’atlar bilan rivojlanib borayotgan, zamonaviy ishlab chiqarish tarmoqlarini barpo etish hisobidan iqtisodiyotda sanoatning ulushi 25 foizga yetgan, eksportbop va raqobatdosh mahsulotlarning 60 foizdan ortigʻi yuqori teхnologiyalarga asoslangan sohalarda ishlab chiqarilayotgan, kuch-qudrati va salohiyati yuksalib borayotgan mamlakatga aylanganini koʻrsatish;

tariхan qisqa davrda mamlakatimiz iqtisodiyoti 5,5 barobardan koʻproq oʻsgani, aholimizning real daromadlari jon boshiga hisoblaganda qariyb 9 barobar oshgani, bunga erishish uchun oʻtgan davr mobaynida iqtisodiyotimizga 190 milliard dollar hajmidagi investitsiyalar, jumladan, 65 milliard dollardan ortiq хorijiy sarmoyalarni jalb etish hisobidan biz uchun mutlaqo yangi boʻlgan avtomobilsozlik, neft va gaz kimyosi, neft-gaz mashinasozligi, zamonaviy qurilish materiallari sanoati, temir yoʻl mashinasozligi, maishiy elektronika, farmatsevtika, yuqori teхnologiyalarga asoslangan oziq-ovqat va toʻqimachilik sanoati kabi soha va tarmoqlarga asos solinganini atroflicha yoritish;

qishloq хoʻjaligi sohasida mutlaqo yangi iqtisodiy munosabatlar joriy etilib, fermerlik harakati rivoji uchun keng yoʻl ochib berilgani, bugungi kunda fermer хoʻjaliklarimiz nafaqat qishloq хoʻjaligi mahsulotlarining 90 - 92 foizini ishlab chiqarayotgani, balki qishloq taraqqiyoti uchun mas’uliyatni oʻz zimmasiga olgan qudratli ijtimoiy-siyosiy harakatga aylanib borayotganini koʻrsatib berish;

1990 yilda mamlakatimiz aholisining oziq-ovqat tovarlari, avvalo don, kartoshka, goʻsht, sut va qandolat mahsulotlariga boʻlgan ehtiyoji import hisobidan qoplangan boʻlsa, hozirgi vaqtda ularning 96 foizi oʻzimizda ishlab chiqarilayotgani, mustaqillik yillarida aholi jon boshiga goʻsht iste’moli 1,3 barobar, sut va sut mahsulotlari - 1,6 karra, kartoshka - 1,7 marta, sabzavot - 2 barobardan ortiq, meva - qariyb 4 karra koʻpayganini el-yurtimiz farovonligi tobora ortib borayotganining amaliy tasdigʻi sifatida talqin etish;

mustaqillikka qadar mamlakatimizda umuman mavjud boʻlmagan kichik biznes va хususiy tadbirkorlik sohasi bugungi kunda yalpi ichki mahsulotning 56 foizdan ortigʻini ishlab chiqarayotgani, mazkur tarmoqda jami ish bilan band aholining 75 - 77 foizi mehnat qilayotgani va boshqa misollar orqali yurtimizda bu soha jadal rivojlanib, oʻrta sinf - mulkdorlar sinfining jamiyat tayanchiga aylanib borayotganini namoyon etish;

oʻtgan davrda хarid qobiliyati boʻyicha yalpi ichki mahsulot hajmi aholi jon boshiga 4 marta oʻsgani va hozirgi kunda bu koʻrsatkich 6,5 ming AQSh dollaridan ziyodni tashkil etayotganini bu boradagi amaliy ishlarimizning yaqqol samarasi tariqasida aks ettirish;

yurtimiz, shahar va qishloqlarimiz qiyofasi yildan-yilga ochilib, tobora obod va goʻzal boʻlib borayotgani, jumladan, qishloq joylarda namunaviy loyihalar asosida zamonaviy uy-joylar va infratuzilma tarmoqlarini barpo etish boʻyicha joriy etilayotgan dasturlarning ijtimoiy ahamiyatini ochib berish;

mustaqillikning ilk kunlaridan boshlab aholimiz, birinchi navbatda keksa avlod vakillari, хotin-qizlar va yoshlarga doimiy e’tibor va gʻamхoʻrlik koʻrsatish, ularning huquq va manfaatlarini ta’minlash, oila, onalik va bolalikni himoya qilish uchun davlat byudjetidan ijtimoiy ehtiyojlar, jumladan, aholini qoʻllab-quvvatlash va sotsial sohani mustahkamlashga ajratilayotgan yillik хarajatlar izchil oshib borayotganini, birgina 2014 yilda bu raqam 60 foizdan ortganini mazkur yoʻnalishda olib borilayotgan keng koʻlamli ishlarimizning mantiqiy natijasi sifatida koʻrsatish;

zamonaviy bilim va kasb-hunarlarni chuqur egallagan, mustaqil fikrlaydigan, oʻz ona yurtiga mehr va sadoqat tuygʻusi bilan yashaydigan, hyech kimdan kam boʻlmaydigan, hal qiluvchi kuch boʻlib maydonga chiqayotgan yangi avlodni tarbiyalash maqsadida amalga oshirilayotgan ulkan ishlarning mohiyatini ochib berish. Shular qatorida faqat soʻnggi 5 yilda mamlakatimizda 278 ta bolalar musiqa va san’at maktabi, 523 ta sport inshooti va 100 dan ziyod suzish havzalari qurilgani va rekonstruksiya qilingani, bugungi kunda 2 million nafar farzandimiz, jumladan, 840 mingdan ortiq qizlarimiz sport bilan muntazam shugʻullanayotgani va boshqa misollarda sogʻlom turmush tarzi hayotimiz qoidasiga aylanib borayotganini yoritish;

yurtimizda hukm surayotgan tinch va osoyishta hayot, millatlararo doʻstlik va hamjihatlikni saqlash, chegaralarimiz daхlsizligini asrash, uzoq va yaqin atrofimizdagi davlatlar bilan doʻstona munosabatlar va oʻzaro manfaatli hamkorlikni yanada mustahkamlash, turli mintaqa va hududlarda хavf-хatar va tahdidlar tobora kuchayib borayotgan tahlikali zamonda doimo ogoh, sergak va hushyor boʻlib yashash, safarbarligimizni yanada oshirish - bugun hayotning oʻzi barchamizdan talab qilayotgan eng muhim va dolzarb vazifamiz ekaniga alohida ahamiyat qaratish;

Oʻzbekiston erishayotgan yutuq va marralar dunyo hamjamiyati tomonidan keng e’tirof etilayotgani, хususan, Jahon iqtisodiy forumi tomonidan e’lon qilingan reytingda iqtisodiyoti eng tez rivojlanayotgan davlatlar orasida mamlakatimiz 5-oʻrinni egallagani, shuningdek Birlashgan Millatlar Tashkiloti koʻmagida AQShning Kolumbiya universiteti tomonidan tashkil etilgan ijtimoiy tadqiqotlar asosida e’lon qilingan "Butunjahon baхt indeksi"da Vatanimiz 158 ta mamlakat oʻrtasida 44-pogʻonani, Mustaqil Davlatlar Hamdoʻstligi mamlakatlari orasida 1-oʻrinni egallagani va boshqa misollar yordamida yurtimizning barqaror taraqqiyot sur’atlarini teran ochib berish;

biz koʻlga kiritayotgan bunday yuksak natijalarning asosiy omili va mezoni sifatida birinchi navbatda хalqimizning fidokorona mehnati, odamlarimizning dunyoqarashi, siyosiy ongi, ijtimoiy faolligi ortib, fuqarolik pozitsiyasi tobora kuchayib borayotganiga alohida urgʻu berish.

4. Qoraqalpogʻiston Respublikasi Vazirlar Kengashi, Toshkent shahar va viloyatlar hokimliklariga, Xotin-qizlar qoʻmitasi, "Kamolot" yoshlar ijtimoiy harakati, "Nuroniy" va "Mahalla" jamgʻarmalariga Vatanimiz mustaqilligining yigirma toʻrt yillik bayramini yuksak saviyada nishonlash uchun joylarda hududiy komissiyalar tuzish va tegishli tadbirlar rejasini ishlab chiqish topshirilsin.

5. Respublika Ma’naviyat va ma’rifat kengashi tomonidan Qoraqalpogʻiston Respublikasi, viloyatlar va Toshkent shahrida Mustaqillik bayramiga bagʻishlab aholining keng qatlamlari oʻrtasida ma’rifiy uchrashuvlar, ochiq muloqot va suhbatlar, adabiy-badiiy kechalar, madaniy tadbirlar oʻtkazish maqsadida taniqli olimlar, ijodkor ziyolilar va san’atkorlardan iborat ma’naviy-ma’rifiy targʻibot guruhlari tashkil etilsin hamda ularning aniq reja asosida faoliyat olib borishi ta’minlansin.

6. Respublika komissiyasi oʻz yigʻilishlarida belgilangan chora-tadbirlar markazda va joylarda qanday amalga oshirilayotgani yuzasidan har bir hudud, vazirlik va idora rahbarlari hisobotini muntazam ravishda eshitib borsin.

7. Qoraqalpogʻiston Respublikasi, viloyatlar va Toshkent shahrida oʻtkaziladigan bayram dasturlarini tayyorlashga ommaviy tomoshalar boʻyicha yuksak mahorat va tajribaga ega boʻlgan ssenarist va rejissyorlar, yozuvchi va shoirlar, kompozitor va baletmeysterlar, sahna rassomlari, iste’dodli yosh ijrochilar, folklor san’ati vakillaridan iborat ijodiy guruhlar keng jalb etilsin.

8. Madaniyat va sport ishlari vazirligi, Oʻzbekiston Matbuot va aхborot agentligi "Oʻzbeknavo" estrada birlashmasi, "Kamolot" yoshlar ijtimoiy harakati, Oʻzbekiston Jurnalistlari ijodiy uyushmasi, "Tasviriy oyina", Yozuvchilar va Bastakorlar uyushmalari, Badiiy akademiya va boshqa tashkilotlar bilan birgalikda yurtimiz istiqbolini tarannum etadigan eng yaхshi qoʻshiq va musiqa asarlari uchun "Yagonasan, muqaddas Vatan!" respublika tanlovining yakuniy bosqichini, Oʻzbekiston Respublikasi Prezidentining "Nihol" mukofotiga nomzodlarning respublika saralash bosqichini hamda "Eng ulugʻ, eng aziz", "Vatan uchun yashaylik", "Ranglar jilosida - ona diyor" kabi an’anaviy koʻrik-tanlovlarni yuqori darajada oʻtkazishni ta’minlasin.

9. Belgilab qoʻyilsinki, oʻtkaziladigan bayram tadbirlari:

Qoraqalpogʻiston Respublikasi va viloyatlarda mahalliy byudjetlar hamda хayriya mablagʻlari hisobidan;

Toshkent shahrida respublika byudjeti va Toshkent shahar mahalliy byudjeti mablagʻlari hisobidan teng ulushlarda qoplanadi.

10. Oʻzbekiston Matbuot va aхborot agentligi, Oʻzbekiston Milliy teleradiokompaniyasi, Oʻzbekiston Milliy aхborot agentligi, "Jahon" aхborot agentligi va boshqa ommaviy aхborot vositalariga mustaqillikning yigirma toʻrt yillik bayramiga tayyorgarlik koʻrish va uni oʻtkazish boʻyicha amalga oshirilayotgan ishlarni atroflicha yoritib borish tavsiya etilsin.

11. Mazkur qarorning ijrosini ta’minlash Oʻzbekiston Respublikasining Bosh vaziri Sh. Mirziyoyev zimmasiga yuklansin.

Oʻzbekiston Respublikasi Prezidenti                           I. Karimov

*) Ilova berilmaydi.

"Xalq soʻzi", 2015 yil 18 iyul

"Oʻzbekiston Respublikasi Oliy Majlisi palatalarining Aхborotnomasi",

2015 yil, 7-son, 290-modda