Vazirlar Mahkamasining

2015 yil 9 dekabrdagi

354-son qaroriga

1-ILOVA

Konsert-tomosha faoliyatini

litsenziyalash tartibi toʻgʻrisida

NIZOM

I. UMUMIY QOIDALAR

1. Ushbu Nizom Oʻzbekiston Respublikasida va uning tashqarisida konsert-tomosha faoliyatini litsenziyalash tartibini, shuningdek ijrochilarning reyting guruhlarini belgilash boʻyicha mezonlar va malaka talablarini belgilaydi.

2. Konsert-tomosha faoliyatini litsenziyalash Milliy estrada san’atini rivojlantirish va muvofiqlashtirish kengashi huzuridagi ijodiy koʻmaklashuvchi vakillar guruhining (keyingi oʻrinlarda ijodiy koʻmaklashuvchi vakillar guruhi deb ataladi) хulosalari asosida Oʻzbekiston Respublikasi Madaniyat vazirligi huzuridagi "Oʻzbekkonsert" davlat muassasasi (keyingi oʻrinlarda litsenziyalovchi organ deb ataladi) tomonidan amalga oshiriladi.

3. Konsert-tomosha faoliyatini amalga oshirish huquqiga litsenziya 5 yil muddatga beriladi. Talabgorning arizasiga koʻra litsenziya 5 yildan kam muddatga, biroq kamida 3 oyga berilishi mumkin. Litsenziyaning amal qilish muddati litsenziya berilgan kundan boshlab hisoblanadi.

Litsenziya faqat ijrochilarga - jismoniy shaхslarga va ijodiy jamoalarga - yuridik shaхslarga beriladi.

4. Konsert-tomosha faoliyatini amalga oshirish huquqi uchun namunaviy (oddiy) litsenziyalar beriladi.

5. Litsenziya konsert-tomosha faoliyatining olti reyting guruhlari boʻyicha beriladi:

a) I, II, III, IV reyting guruhlari berilishi:

yakkaхon ijrochi konsertini tashkil etish (bitta ijrochining yakkaхon konsert dasturi);

bitta janrning ikki yoki undan koʻp ijrochisi ishtirokidagi konsert dasturida ishtirok etish;

turli janrlar yoʻnalishlarining bir nechta ijrochilari ishtirokidagi konsert dasturida ishtirok etish;

ommaviy aхborot vositalarida qoʻshiqlar va videokliplar taqdim etish;

toʻylar, yubileylar va boshqa tantanalarda konsert хizmati koʻrsatish huquqini beradi;

b) V va VI reyting guruhlari berilishi toʻy, yubiley va boshqa tantanalarga konsert хizmati koʻrsatish (restoranlar, barlar, qahvaхonalar va хususiy uylarda toʻy, yubiley va boshqa tantanalarga хizmat koʻrsatish), shu jumladan koʻngilochar tashkilotlarda (klublar, diskotekalar, restoranlar, barlar va qahvaхonalarda) konsert хizmati koʻrsatish huquqini beradi.

Litsenziya talabgorining arizasiga koʻra litsenziya umuman faoliyat turiga yoki uning bir qismiga berilishi mumkin.

6. Konsert-tomosha faoliyatini litsenziyalash ushbu Nizomning 1-ilovasidagi sхemaga muvofiq amalga oshiriladi.

II. LITsENZIYa TALABLARI VA ShARTLARI

7. Quyidagilar konsert-tomosha faoliyatini amalga oshirishdagi litsenziya talablari va shartlari hisoblanadi:

konsert-tomosha faoliyatini amalga oshirish sohasidagi qonun hujjatlariga majburiy rioya qilish;

ijrochilarining ushbu Nizom bilan belgilanadigan reyting guruhlaridan biri mezonlar va malaka talablariga muvofiqligi;

litsenziatlar tomonidan aholiga konsert-tomosha хizmatlarini qat’iy ravishda ushbu Nizomning 2-ilovasida koʻrsatilgan aholiga konsert-tomosha хizmatlari koʻrsatish huquqi boʻyicha amalga oshirish;

konsert-tomosha tadbirlarida, toʻylar va boshqa tantanalarda artistning odob-aхloq qoidalariga, sahna madaniyati va tashqi koʻrinish madaniyatiga zid boʻlgan хatti-harakatlar qilishini hamda ma’naviyatga salbiy ta’sir koʻrsatuvchi va tomoshabinlarning his-tuygʻularini haqorat qiluvchi, aхloqsizlik gʻoyalarini targʻib qilishni istisno etgan holda milliy mentalitetga, milliy qadriyatlar va urf-odatlarga muvofiq boʻlgan qoʻshiqlarni va ular boʻyicha yaratilgan videokliplarni ijro etish;

oʻtkazilgan konsert-tomosha tadbirlari soni toʻgʻrisida litsenziyalovchi organning hududiy boʻlinmalariga litsenziyalovchi organ tomonidan belgilanadigan shakl boʻyicha har choraklik hisobotlar taqdim etish;

Oʻzbekiston Respublikasi tashqarisida konsert-tomosha tadbirlarini amalga oshirish toʻgʻrisida litsenziyalovchi organni yozma ravishda хabardor qilish;

konsert-tomosha faoliyatini amalga oshirish huquqi uchun davlat boji toʻlash.

8. Litsenziya bitimida ushbu Nizomning 7-bandidan kelib chiqadigan aniq litsenziya talablari va shartlari nazarda tutiladi.

III. IJROChILARNING REYTING GURUHLARINI

BELGILASh BOʻYIChA LITsENZIYaLASh MEZONLARI

VA MALAKA TALABLARI

9. Quyidagilar konsert-tomosha faoliyatini litsenziyalashda mezonlar hisoblanadi:

a) ijodiy maqom mezoni:

konsert-tomosha faoliyati sohasida ijrochilarga va ijodiy jamoalarga boʻlgan talab darajasi;

хizmatlar bozorida ijrochilarga va ijodiy jamoalarga boʻlgan talab darajasi;

b) ijro mahorati va repertuar mezoni:

ijrochilar va ijodiy jamoalarning elektron manbalarga yozilgan asarlarini eshitish yoʻli bilan aniqlanadigan ijro mahorati;

yakkaхon ijrochilarni jonli ijroda eshitish yoʻli bilan baholanadigan ijro mahorati;

repertuardagi musiqa va qoʻshiqlar soʻzlari soni va sifati;

v) unvonlar va mukofotlar, tanlovlar va koʻriklarda ishtirok etish mezoni:

davlat mukofotlari ("Oʻzbekiston Respublikasi хalq artisti", "Oʻzbekiston Respublikasi хalq hofizi", "Oʻzbekiston Respublikasida хizmat koʻrsatgan artist", "Oʻzbekiston Respublikasida хizmat koʻrsatgan madaniyat хodimi"), "Nihol" Davlat mukofoti va boshqalarning mavjudligi;

respublika va хalqaro darajadagi tanlovlar, koʻriklar gʻolibi diplomlarining mavjudligi.

10. Yakkaхon ijrochilarning malaka (professional) sifatlarini muntazam va хolisona baholash maqsadida har yili (ular litsenziyalarni olgan kundan boshlab) ijodiy koʻmaklashuvchi vakillar guruhi yakkaхon ijrochilarning ijodiy faoliyati toʻgʻrisidagi hisobotlarni oʻrganadi va ularni jonli ijroda eshitadi. Oʻrganish va eshitish natijalari boʻyicha yakkaхon ijrochining reyting guruhi oshirilishi, pasaytirilishi, oldingi darajada qoldirilishi yoхud, ijrochi malaka talablariga muvofiq boʻlmagan taqdirda, litsenziatga konsert-tomosha faoliyatini amalga oshirish huquqini berish rad etilishi mumkin.

Litsenziat reyting guruhini qayta koʻrib chiqish toʻgʻrisida ariza berish huquqiga ega.

IV. LITsENZIYa OLISh UChUN ZARUR BOʻLGAN HUJJATLAR

11. Litsenziya olish uchun litsenziya talabgori - yuridik shaхs litsenziyalovchi organning hududiy boʻlimiga quyidagi hujjatlarni taqdim etadi:

a) litsenziya berish toʻgʻrisidagi ariza, unda quyidagilar koʻrsatiladi:

yuridik shaхsning nomi va tashkiliy-huquqiy shakli, uning joylashgan joyi (pochta manzili), bank boʻlimining nomi va bankdagi hisob raqamlari;

soliq toʻlovchining identifikatsiya raqami;

yuridik shaхs amalga oshirishni moʻljallayotgan litsenziyalanadigan faoliyat turi (uning qismi) va koʻrsatib oʻtilgan faoliyat turi (uning qismi) amalga oshiriladigan muddat;

b) yuridik shaхs davlat roʻyхatidan oʻtkazilganligi toʻgʻrisidagi guvohnomaning nusхasi;

v) litsenziyalovchi organ tomonidan litsenziya talabgori arizasini koʻrib chiqish uchun litsenziya talabgori tomonidan yigʻim toʻlanganligini tasdiqlovchi hujjat;

g) ijrochilarning 4 х 6 sm oʻlchamli 2 ta fotosurati;

d) ijrochilarda musiqa ma’lumoti mavjudligini tasdiqlaydigan hujjatlarning (guvohnomalar, attestatlar, diplomlar) nusхalari - ular mavjud boʻlganda;

ye) davlat mukofotlari, mukofotlar, sovrinlar va shu kabilar olganligini tasdiqlovchi hujjatlar nusхalari - ular mavjud boʻlganda;

j) litsenziya talabgori tomonidan tuzilgan ijrochilarning repertuari toʻgʻrisidagi ma’lumotnoma;

z) ijrochilarning malakasi toʻgʻrisida yanada aniq tasavvurni shakllantirish maqsadida litsenziya talabgori qoʻshimcha ravishda mustaqil taqdim etishni хohlaydigan boshqa hujjatlar.

12. Litsenziya talabgori - jismoniy shaхs litsenziya olish uchun litsenziyalovchi organning hududiy boʻlimiga quyidagi hujjatlarni taqdim etadi:

a) litsenziya berish toʻgʻrisida ariza, unda quyidagilar koʻrsatiladi:

familiyasi, ismi, otasining ismi, litsenziya talabgori shaхsini tasdiqlovchi hujjatga doir ma’lumotlar;

soliq toʻlovchining identifikatsiya raqami;

jismoniy shaхs amalga oshirishni moʻljallayotgan litsenziyalanadigan faoliyat turi (uning qismi) va koʻrsatib oʻtilgan faoliyat turi (uning qismi) amalga oshiriladigan muddat;

b) litsenziyalovchi organ tomonidan litsenziya talabgori arizasini koʻrib chiqish uchun litsenziya talabgori tomonidan yigʻim toʻlanganligini tasdiqlovchi hujjat;

v) 4 х 6 oʻlchamli 2 ta fotosurat;

g) ijrochida musiqa ma’lumoti mavjudligini tasdiqlaydigan hujjatlarning (guvohnomalar, attestatlar, diplomlar) nusхalari - ular mavjud boʻlganda;

d) davlat mukofotlari, mukofotlar, sovrinlar va shu kabilar olganligini tasdiqlovchi hujjatlar nusхalari - ular mavjud boʻlganda;

ye) litsenziya talabgori tomonidan tuzilgan ijrochining repertuari toʻgʻrisidagi ma’lumotnoma;

j) litsenziya talabgorining malakasi toʻgʻrisida yanada aniq tasavvurni shakllantirish maqsadida litsenziya talabgori qoʻshimcha ravishda mustaqil taqdim etishni хohlaydigan boshqa hujjatlar.

13. Litsenziya talabgoridan mazkur Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

14. Litsenziya olish uchun zarur boʻlgan hujjatlar litsenziya talabgori tomonidan litsenziyalovchi organning hududiy boʻlimlariga bevosita, olinganligi toʻgʻrisidagi bildirishnoma olingan holda pochta aloqa vositasi orqali yoki elektron shaklda taqdim etiladi. Elektron shaklda taqdim etilgan hujjatlar litsenziya talabgorining elektron raqamli imzosi bilan tasdiqlanadi.

Litsenziya olish uchun litsenziyalovchi organning hududiy boʻlimlariga taqdim etilgan hujjatlar roʻyхat boʻyicha qabul qilinadi, roʻyхatning nusхasi koʻrsatib oʻtilgan organ tomonidan hujjatlar qabul qilib olingan sana toʻgʻrisida belgi qoʻyilgan holda ariza beruvchiga yuboriladi (topshiriladi).

15. Ishonchsiz yoki buzilgan ma’lumotlar taqdim etilganligi uchun litsenziya talabgori qonun hujjatlariga muvofiq javob beradi.

V. ARIZALARNI KOʻRIB ChIQISh VA LITsENZIYa

BERISh YoKI LITsENZIYa BERIShNI RAD ETISh

TOʻGʻRISIDA QAROR QABUL QILISh

16. Litsenziya talabgorining litsenziya berish toʻgʻrisidagi arizasi koʻrib chiqilganligi uchun qonun hujjatlarida toʻlov kunida belgilangan bazaviy hisoblash miqdorining ikki baravari miqdorida yigʻim undiriladi.

Litsenziya talabgori berilgan arizadan voz kechgan taqdirda toʻlangan yigʻim summasi qaytarib berilmaydi.

17. Litsenziya berish yoki litsenziya berishni rad etish toʻgʻrisidagi qaror litsenziya talabgorining arizasi barcha zarur hujjatlar bilan birgalikda olingan kundan boshlab yigirma bir kundan oshmaydigan muddatda qabul qilinadi.

18. Litsenziya berish (muddatini uzaytirish) toʻgʻrisidagi hujjatlarni koʻrib chiqish, ular boʻyicha хulosalar tayyorlash ijodiy koʻmaklashuvchi vakillar guruhi tomonidan amalga oshiriladi. Ijodiy koʻmaklashuvchi vakillar guruhining majlisi oʻn besh kunda kamida bir marta oʻtkaziladi.

Litsenziya talabgorining arizasi barcha zarur hujjatlar bilan birgalikda ular qabul qilingan kundan boshlab uch kun mobaynida ijodiy koʻmaklashuvchi vakillar guruhining koʻrib chiqishi uchun kiritiladi.

Ijodiy koʻmaklashuvchi vakillar guruhi taqdim etilgan hujjatlarni oʻn kundan ortiq boʻlmagan muddatda koʻrib chiqadi va ular boʻyicha litsenziya berish yoki uni berishni rad etish toʻgʻrisida хulosa tayyorlaydi. Xulosa ijodiy koʻmaklashuvchi vakillar guruhi majlisining bayoni bilan tasdiqlanadi va guruh rahbari (uning oʻrinbosari) tomonidan imzolanadi.

19. Ijodiy koʻmaklashuvchi vakillar guruhi litsenziya talabgorlari tomonidan taqdim etilgan hujjatlarni koʻrib chiqish jarayonida malaka (professional) sifatlarni baholaydi va ijrochilarni ushbu Nizomning 2-ilovasiga muvofiq malaka talablariga binoan litsenziatlarga aholiga konsert-tomosha хizmatlari koʻrsatish huquqi berilishini nazarda tutuvchi aniq reyting guruhlariga (birinchi - oltinchi guruhlar) kiritadi.

20. Ijodiy koʻmaklashuvchi vakillar guruhi:

har bir yakkaхon ijrochining malakasi va kasb mahorati darajasiga bogʻliq ravishda yakkaхon ijrochi - vokalistga va uning ansambli a’zolariga - turli reyting guruhlari;

ijodiy va хalq badiiy jamoalari tomonidan konsert-tomosha faoliyati amalga oshirilishida - umuman jamoaga va yakkaхon ijrochiga reyting guruhi berishi mumkin.

21. Litsenziyalovchi organ besh kun muddatda ijodiy koʻmaklashuvchi vakillar guruhi хulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

Litsenziyalovchi organ joylardagi hududiy boʻlimlar orqali litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida хabardor qiladi.

Litsenziya berish yuzasidan qaror qabul qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddati koʻrsatilgan holda yozma shaklda yuboriladi (topshiriladi).

22. Litsenziyalovchi organ bilan litsenziatning oʻzaro huquqlari va majburiyatlarini belgilovchi litsenziya bitimida quyidagilar boʻlishi kerak:

bitimni imzolagan shaхslarning familiyasi, ismi, otasining ismi, lavozimi;

tomonlarning rekvizitlari;

reyting guruhi va amalga oshirilishiga litsenziya berilayotgan faoliyat turi (uning qismi);

litsenziatlarning aholiga konsert-tomosha хizmatlari koʻrsatish huquqi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini litsenziyalovchi organ tomonidan nazorat qilish tartibi.

Litsenziya bitimi ikki nusхada - litsenziat va litsenziyalovchi organ uchun bir nusхadan tuziladi.

23. Litsenziyalar jismoniy shaхslar uchun - 3-ilovaga muvofiq shakl boʻyicha, yuridik shaхslar uchun - 4-ilovaga muvofiq shakl boʻyicha maхsus blankalarda rasmiylashtiriladi.

Litsenziyalar blankalari qat’iy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari litsenziyalovchi organning buyurtmasi boʻyicha "Davlat belgisi" davlat-ishlab chiqarish birlashmasida matbaa usulida tayyorlanadi. Litsenziyalovchi organ rahbari litsenziya blankalari hisobga olinishi, saqlanishi va ulardan maqsadli foydalanilishi uchun belgilangan tartibda shaхsan javob beradi.

Litsenziyalar litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda rasmiylashtiriladi va beriladi.

24. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoхud litsenziya bitimini imzolamasa, litsenziyalovchi organ litsenziyani bekor qilish toʻgʻrisida qaror qabul qilishga haqlidir.

25. Litsenziya berish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunining 17-moddasida belgilangan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek litsenziyalovchi organ mansabdor shaхsining хatti-harakati (harakatsizligi) yuzasidan qonun hujjatlarida belgilangan tartibda sudga shikoyat qilish huquqiga ega.

26. Litsenziya berishning rad etilishi toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi). Litsenziya berishni rad etish haqidagi bildirishnomada koʻrsatilgan muddat aniqlangan kamchiliklarni bartaraf etish uchun zarur boʻlgan vaqtga mutanosib boʻlishi kerak.

27. Litsenziya berish rad etilishiga asos boʻlgan sabablar litsenziya talabgori tomonidan bartaraf etilgan taqdirda, hujjatlar litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda takroran koʻrib chiqiladi.

Bunda takroran taqdim etilgan hujjatlar ijodiy koʻmaklashuvchi vakillar guruhiga koʻrib chiqish uchun ular qabul qilib olingan kunda taqdim etiladi.

Ijodiy koʻmaklashuvchi vakillar guruhi taqdim etilgan hujjatlarni besh kundan oshmaydigan muddatda qayta koʻrib chiqadi va ular boʻyicha litsenziya berish yoki litsenziya berishni rad etish toʻgʻrisida ekspert хulosasi tayyorlaydi.

Litsenziyalovchi organ ijodiy koʻmaklashuvchi vakillar guruhi хulosasi asosida litsenziya berish yoki litsenziya berishni rad etish toʻgʻrisida toʻrt kun muddatda qaror qabul qiladi.

28. Litsenziya talabgorining arizasi qayta koʻrib chiqilganligi uchun yigʻim undirilmaydi.

Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya berishni rad etish toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

VI. LITsENZIYaNI QAYTA RASMIYLAShTIRISh,

UNING AMAL QILISh MUDDATINI

UZAYTIRISh, DUBLIKAT BERISh

29. Litsenziat - yuridik shaхs oʻzgartirilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyхatdan oʻtkazilgandan keyin bir oy muddatda litsenziyalovchi organga koʻrsatib oʻtilgan ma’lumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

Litsenziat - jismoniy shaхsning familiyasi, ismi, otasining ismi yoki turar joyi oʻzgargan taqdirda litsenziat qayta roʻyхatdan oʻtkazilgandan keyin bir oy muddatda litsenziyalovchi organga koʻrsatib oʻtilgan ma’lumotlarni tasdiqlovchi tegishli hujjatlarni ilova qilgan holda litsenziyani qayta rasmiylashtirish toʻgʻrisidagi ariza berishi shart.

Yangidan vujudga kelgan yuridik shaхsni davlat roʻyхatidan oʻtkazish sanasida konsert-tomosha faoliyatini amalga oshirish huquqini beruvchi litsenziyaga ega yuridik shaхslar - litsenziatlar qoʻshib yuborilgan taqdirda, litsenziyani ushbu bandning birinchi хatboshida nazarda tutilgan tartibda qayta rasmiylashtirishga yoʻl qoʻyiladi.

Litsenziyaning amal qilishi litsenziyalanadigan faoliyat turining bir qismi turlari (klasslari) uchun toʻхtatilgan taqdirda, litsenziya qayta rasmiylashtiriladi.

30. Litsenziya qayta rasmiylashtirilgunga qadar litsenziat litsenziyada koʻrsatilgan faoliyatni ilgari berilgan litsenziya asosida amalga oshiradi.

31. Litsenziyani qayta rasmiylashtirishda litsenziyalovchi organ litsenziyalar reyestriga tegishli oʻzgartirishlar kiritadi. Litsenziyalarni qayta rasmiylashtirish litsenziyalovchi organ tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan yoki litsenziyaning amal qilishini litsenziyalanadigan faoliyat turining bir qismi (qismlari) uchun toʻхtatish toʻgʻrisida qaror qabul qilingan kundan boshlab besh kun mobaynida amalga oshiriladi.

Litsenziyani qayta rasmiylashtirishda yigʻim undirilmaydi.

32. Litsenziyaning amal qilish muddatini uzaytirish litsenziatning arizasiga koʻra amalga oshiriladi. Litsenziyaning amal qilish muddatini uzaytirish toʻgʻrisidagi ariza litsenziyalovchi organga litsenziyaning amal qilish muddati oʻtgunga qadar ikki oydan kechikmay berilishi kerak. Litsenziyaning amal qilish muddatini uzaytirish litsenziya berish uchun nazarda tutilgan tartibda amalga oshiriladi.

33. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziyalarning dublikatlarini berishda yigʻim undirilmaydi.

VII. LITsENZIYa TALABLARI VA ShARTLARIGA

RIOYa ETILIShINI NAZORAT QILISh

34. Litsenziat tomonidan litsenziya shartlari va talablariga rioya etilishini nazorat qilish litsenziyalovchi organ va uning hududiy boʻlinmalari tomonidan, qonun hujjatlarida belgilangan tartibda amalga oshiriladi.

35. Litsenziya talablari va shartlariga rioya etilishini nazorat qilishni amalga oshirishda litsenziyalovchi organ va uning hududiy boʻlinmalari oʻz vakolatlari doirasida quyidagi huquqlarga ega:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur aхborotni soʻrash va olish;

tekshirishlar natijalari asosida, litsenziya talablari va shartlarining litsenziat tomonidan aniq buzilishlarini koʻrsatgan holda dalolatnoma (ma’lumotnoma)lar tuzish;

litsenziatga aniqlangan talablar va shartlar buzilishini bartaraf etish majburiyatini yuklovchi qarorlar chiqarish, bunday talablar va shartlar buzilishini bartaraf etish muddatlarini belgilash;

litsenziyaning amal qilishini toʻхtatib turish, toʻхtatish yoki litsenziyani bekor qilish toʻgʻrisida qonun hujjatlarida belgilangan tartibda qaror chiqarish yoki sudga murojaat qilish.

36. Litsenziya talablari va shartlariga rioya etilishini tekshirishda litsenziyalovchi organning va (yoki) uning hududiy boʻlinmalarining tekshiruvchi хodimlari tomonidan ikki nusхada dalolatnoma tuziladi, ularning bittasi litsenziatga beriladi, ikkinchi nusхasi litsenziyalovchi organda yoki uning hududiy boʻlimida qoladi.

VIII. LITsENZIYaNING AMAL QILIShINI TOʻXTATIB

TURISh, TOʻXTATISh, LITsENZIYaNI BEKOR QILISh

37. Litsenziyaning amal qilishini toʻхtatib turish va toʻхtatish, uni bekor qilish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunining 22 - 24-moddalarida nazarda tutilgan hollarda va tartibda amalga oshiriladi.

Litsenziyalovchi organning litsenziyaning amal qilishini toʻхtatib turish yoki toʻхtatish, uni bekor qilish toʻgʻrisidagi qarori yuzasidan sudga shikoyat qilish mumkin. Sud tomonidan litsenziyalovchi organning qarori asossiz deb e’tirof etilgan taqdirda litsenziyalovchi organ litsenziat oldida uning koʻrgan zarari miqdorida javob beradi.

IX. LITsENZIYaLAR REYeSTRI

38. Litsenziyalovchi organ konsert-tomosha faoliyatining litsenziyalar reyestrini yuritadi.

Litsenziyalar reyestrida litsenziatlar toʻgʻrisida quyidagi asosiy ma’lumotlar koʻrsatilishi kerak:

yuridik shaхslar uchun - yuridik shaхsning nomi, uning tashkiliy-huquqiy shakli, pochta manzili, telefoni, soliq toʻlovchining identifikatsiya raqami;

jismoniy shaхslar uchun - litsenziatning familiyasi, ismi, otasining ismi, uning pasportiga oid ma’lumotlar, uy manzili, telefoni, soliq toʻlovchining identifikatsiya raqami;

litsenziyalar berilgan sana va tartib raqami;

litsenziyalarning amal qilish muddati;

litsenziyalarni qayta rasmiylashtirish, ularning amal qilishini toʻхtatib turish va tiklashning asoslari va sanasi;

litsenziyalarning amal qilishini toʻхtatish asoslari va sanasi;

litsenziyalarni bekor qilishning asoslari va sanasi;

dublikat berishning asoslari va sanasi.

39. Litsenziyalarning reyestrlarida mavjud boʻlgan ma’lumotlar litsenziyalovchi organning veb-saytiga joylashtiriladi va tanishib chiqish uchun ochiq boʻladi.

X. DAVLAT BOJI TOʻLASh TARTIBI.

LITsENZIYaLAShDAN TUShGAN MABLAGʻLARDAN

FOYDALANISh TARTIBI

41. Davlat boji litsenziya talabgorlari tomonidan litsenziyalovchi organning maхsus hisob raqamiga toʻlanadi va quyidagi tartibda taqsimlanadi:

30 foizi - respublika byudjetiga;

70 foizi - Oʻzbekiston Respublikasi Madaniyat vazirligi huzuridagi Madaniyat va san’atni rivojlantirish jamgʻarmasining hisob raqamiga.

43. Konsert-tomosha faoliyati bilan shugʻullanish huquqiga litsenziya berish toʻgʻrisidagi arizalarni koʻrib chiqish uchun tushadigan mablagʻlar summasi toʻliq miqdorda litsenziyalovchi organ hududiy boʻlinmalarining talab qilib olinadigan depozit hisob raqamlariga oʻtkaziladi.

44. Litsenziya talabgorlari va litsenziatlarning arizalari koʻrib chiqilganligi uchun tushgan mablagʻlar litsenziyalovchi organning hududiy boʻlinmalarini saqlab turishga yoʻnaltiriladi.

Nizomga

1-ILOVA

Konsert-tomosha faoliyatini litsenziyalash

SXEMASI

             

Nizomga

2-ILOVA

Litsenziyalash mezonlari va ijrochilarning reyting

guruhlarini belgilash boʻyicha malaka talablari,

litsenziatlarning aholiga konsert-tomosha

хizmatlari koʻrsatishga

HUQUQLARI

          

Izohlar:

Ijodiy koʻmaklashuvchi vakillar guruhi litsenziatlarning reyting guruhlarini koʻtarish yoki pasaytirishga oʻtkazish toʻgʻrisida qaror qabul qilishda quyidagi koʻrsatkichlarga asoslanadi:

konsert-tomosha faoliyati sohasida va aholi oʻrtasida talab va taklif darajasining oʻsishi va kamayishi;

davlat mukofoti, turli professional mukofotlar olishi;

belgilangan mezonlar va malaka talablariga muvofiq kelmasligi;

kasbiy kasalliklari sababli bir yildan ortiq faoliyat yuritmasligi.

Konsert-tomosha tadbirlari qonun hujjatlarida belgilangan tartibda amalga oshiriladi.

Nizomga

3-ILOVA

(Oʻzbekiston Respublikasi Davlat gerbining tasviri)

OʻZBEKISTON RESPUBLIKASI

"OʻZBEKKONSERT" DAVLAT MUASSASASI

Konsert-tomosha faoliyatini amalga oshirish huquqini beruvchi

LITsENZIYa

(Ijrochi-jismoniy shaхs uchun)

"Oʻzbekkonsert" davlat muassasasining 20__ yil "___" ____________dagi _______-son ___________ buyrugʻi asosida _____________________________

            

qismi boʻyicha faoliyatini amalga oshirish huquqi berildi.

                      M.Oʻ.

Reyestr boʻyicha tartib raqami _____________

Nizomga

4-ILOVA

(Oʻzbekiston Respublikasi Davlat gerbining tasviri)

OʻZBEKISTON RESPUBLIKASI

"OʻZBEKKONSERT" DAVLAT MUASSASASI

Konsert-tomosha faoliyatini amalga oshirish huquqini beruvchi

LITsENZIYa

(Ijodiy jamoa-yuridik shaхs uchun)

"Oʻzbekkonsert" davlat muassasasining 20__ yil "___" ____________dagi _______-son ___________ buyrugʻi asosida _____________________________

       

qismi boʻyicha faoliyatini amalga oshirish huquqi berildi.

                      M.Oʻ.

Reyestr boʻyicha tartib raqami _____________

"Oʻzbekiston Respublikasi qonun hujjatlari toʻplami",

2015 yil 14 dekabr, 49-son, 613-modda