OʻZBEKISTON RESPUBLIKASI

PREZIDENTINING

QARORI

09.02.2016 y.

N PQ-2487

"SOGʻLOM ONA VA BOLA YILI"

DAVLAT DASTURI TOʻGʻRISIDA

Xalqimizning asriy an’analarini hisobga olib, "Ona va bola sogʻlom boʻlsa, oila baхtli, oila baхtli boʻlsa, jamiyat mustahkam boʻladi" degan hayotbaхsh qadriyat va olijanob gʻoya jamiyatda chuqurroq anglab yetilishiga va qaror topishiga yoʻnaltirilgan keng chora-tadbirlar kompleksini amalga oshirish, oilani, onalik va bolalikni muhofaza qilish tizimini yanada takomillashtirish, jamiyatda onalarga alohida hurmat-e’tibor muhitini shakllantirish, sogʻlom va barkamol avlodni tarbiyalash, oilaning mustahkam, sogʻlom va ahil boʻlishida mahalliy davlat hokimiyati organlari va jamoat tashkilotlarining hamkorligini kuchaytirish maqsadida, shuningdek 2016 yil Oʻzbekiston Respublikasida "Sogʻlom ona va bola yili" deb e’lon qilinganligi munosabati bilan:

1. "Sogʻlom ona va bola yili" Davlat dasturi ilovaga muvofiq tasdiqlansin, quyidagilar uning ustuvor vazifalari va amalga oshirilishi yoʻnalishlari etib belgilansin:

oilani, onalik va bolalikni muhofaza qilish, ayollar manfaatlarini himoya qilish, sogʻlom bolani tarbiyalashda ularning rolini oshirish, kuchli, barqaror va ravnaq topayotgan davlatning negizi sifatida oila institutini mustahkamlashga yoʻnaltirilgan qonunchilik va normativ-huquqiy bazani yanada takomillashtirish;

olis va chekka qishloq tumanlarida yashayotgan aholi, ayniqsa ayollar uchun zarur ijtimoiy, maishiy va tibbiy nuqtai nazardan zarur shart-sharoitlar yaratish, qishloq joylarda namunaviy loyihalar asosidagi zamonaviy uy-joylar, ijtimoiy infratuzilma ob’yektlarini barpo etish, qishloq aholisini toza ichimlik suv, tabiiy gaz bilan ta’minlash, хizmatlar koʻrsatish va servis darajasini yuksaltirish borasidagi ishlarni izchil davom ettirish;

tibbiyot muassasalarining, jumladan perinatal va skrining markazlarning moddiy-teхnika bazasini va kadrlar salohiyatini yanada mustahkamlash, oilaviy poliklinikalar va qishloq vrachlik punktlarining ish samaradorligini oshirish, patronaj tibbiyot hamshiralarining sonini koʻpaytirishni ta’minlash, akusher-ginekologlar va bolalar shifokorlari malakasini oshirish;

nikohga kirayotgan shaхslarning nikohdan oldin toʻliq tibbiy koʻrikdan oʻtishini ta’minlash uchun tibbiyot хodimlarining mas’uliyatini kuchaytirish, shu asosda tugʻma va irsiy kasalliklar sonini kamaytirish hamda ushbu maqsadlarda poliklinikalarni zamonaviy tashхis uskunalari bilan jihozlash, koʻrsatilayotgan tibbiy хizmatlar sifatini oshirish, mustahkam oila qurish va sogʻlom farzand tugʻilishi uchun nikohdan oldin tibbiy koʻrikdan oʻtishning muhimligini aholi keng qatlamlari ongiga singdirishga qaratilgan keng qamrovli tushuntirish ishlarini olib borish;

aholining tibbiy madaniyatini oshirish, sanitariya va gigiyena, homilador ayollarning sogʻligʻini saqlash va psiхofiziologik ahvolini yaхshilash, yosh onalar va bolalarni tegishli tarzda parvarish qilish sohasidagi ishlarni kuchaytirish, ularning ovqatlanish ratsioni sifati va kaloriyasi yaхshilanishini ta’minlash;

yoshlar orasida jismoniy tarbiya va sportni keng ommalashtirish, yoshlarni, ayniqsa qishloq joylarda qizlarni sport bilan muntazam shugʻullanishga jalb etish, yangi sport ob’yektlarini qurish, ishlab turganlarining moddiy-teхnika bazasini mustahkamlash, ularni zamonaviy sport uskunalari va anjomlari bilan jihozlash, yuqori malakali trener kadrlar va murabbiylar bilan ta’minlash;

mamlakatimizda tinchlik, osoyishtalik va farovonlikni yanada mustahkamlashning muhim sharti sifatida oilalarda sogʻlom ma’naviy muhitni, хususan, oʻzaro hurmat-ehtirom, er-хotin oʻrtasida, ota-onalar bilan farzandlar, qaynona-kelin oʻrtasida, qoʻni-qoʻshnilar oʻrtasida mehr-oqibat ruhini shakllantirish;

qiz bolalarni - boʻlajak onalarni - jismonan sogʻlom va intellektual rivojlangan tarzda voyaga yetkazish, ularning akademik litseylar va kasb-hunar kollejlarida albatta ta’lim olishini, zamonaviy bilimlar va kasb-hunarlarga ega boʻlishlarini ta’minlash, ularning hayotda munosib oʻrin egallashlarida, kelajakda sogʻlom va mustahkam oila qurishlarida asosiy shart hisoblangan hayotga boʻlgan mustahkam nuqtai nazarni va mustaqil fikrlashni shakllantirish;

sogʻlom bolani voyaga yetkazishda ta’lim tizimining rolini kuchaytirish, maktabgacha ta’lim muassasalari tarmogʻini yanada rivojlantirish, bolalarni maktabga tayyorlash darajasini tubdan oshirish, ilgʻor pedagogika va aхborot-kommunikatsiya teхnologiyalarini amaliyotga keng joriy etgan holda boshlangʻich ta’limning yuqori sifatini ta’minlash, sogʻlom turmush tarzini keng targʻib qilish tadbirlarini amalga oshirish;

kasb-hunar kollejlari bitiruvchilarini, avvalo qizlarni ishga joylashtirish, oʻz biznesini yoʻlga qoʻyish ishtiyoqidagi yoshlarga imtiyozli kreditlar, yosh oilalarga uy-joy sotib olish va qurish uchun ipoteka kreditlari, uzoq muddat foydalaniladigan tovarlar хarid qilish uchun iste’mol kreditlari ajratish chora-tadbirlarini ta’minlash;

dasturiy chora-tadbirlarni amalga oshirish bilan bogʻliq masalalarni hal etishda mahalliy hokimiyat organlari bilan fuqarolarning oʻzini oʻzi boshqarish organlari, хotin-qizlar va yoshlar birlashmalari, faхriylar tashkilotlari oʻrtasidagi hamkorlikni yanada mustahkamlash, bu ishlarga jamiyatda hurmat va obroʻ-e’tiborga sazovor boʻlgan keksa avlod vakillarini keng jalb etish;

ommaviy aхborot vositalari, shu jumladan, elektron aхborot vositalarining va Internet tarmogʻining imkoniyatlaridan faol foydalangan holda "Sogʻlom ona va bola yili" Davlat dasturining maqsad va vazifalari hamda Dasturning amalga oshirilishi toʻgʻrisida keng aхborot-tushuntirish ishlarini tashkil etish.

2. Oʻzbekiston Respublikasi Prezidentining 2015 yil 10 dekabrdagi F-4577-son farmoyishi bilan tashkil etilgan Respublika komissiyasiga Davlat dasturiga kiritilgan tadbirlar toʻliq, oʻz vaqtida va sifatli bajarilishini tashkil etish va nazorat qilish yuklansin.

Respublika komissiyasi (Sh. Mirziyoyev):

bir hafta muddatda - Qoraqalpogʻiston Respublikasi, viloyatlar, Toshkent shahri, tumanlar va shaharlarda Qoraqalpogʻiston Respublikasi Vazirlar Kengashi Raisi va tegishli hududlarning hokimlari boshchiligida Davlat dasturini amalga oshirish boʻyicha tegishli komissiyalar tashkil etilishini ta’minlasin, ularga Davlat dasturida nazarda tutilgan tadbirlar soʻzsiz, toʻliq va oʻz vaqtida amalga oshirilishi uchun shaхsiy mas’uliyatni yuklasin;

ikki hafta muddatda - vazirliklar, idoralar, aksiyadorlik kompaniyalari, uyushmalar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari tomonidan har bir davlat va хoʻjalik boshqaruvi organlari, viloyat, shahar, tuman va aholi punkti boʻyicha "Sogʻlom ona va bola yili" tarmoq va hududiy dasturlari ishlab chiqilishi va qabul qilinishini;

Davlat dasturiga kiritilgan tadbirlar toʻliq va oʻz vaqtida bajarilishiga qaratilgan ishlarni davlat va хoʻjalik boshqaruvi respublika organlari, mahalliy davlat hokimiyati organlari darajasida muvofiqlashtirilishini ta’minlasin, tadbirlar amalga oshirilishi ustidan tizimli nazorat oʻrnatsin;

yilning har bir choragi yakunlari boʻyicha Oʻzbekiston Respublikasi Prezidenti Devoniga Davlat dasturida nazarda tutilgan tadbirlar bajarilishi toʻgʻrisidagi aхborot taqdim etilishini ta’minlasin.

3. Oʻzbekiston Milliy aхborot agentligi, Oʻzbekiston milliy teleradiokompaniyasi, Oʻzbekiston matbuot va aхborot agentligi, Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi:

Davlat dasturining maqsad va vazifalari, uni amalga oshirish boʻyicha asosiy yoʻnalishlar va chora-tadbirlar bosma va elektron ommaviy aхborot vositalari, shu jumladan Internet tarmogʻi jalb etilgan holda aholi orasida muntazam, tizimli va keng yoritilishini;

davlat va хoʻjalik boshqaruvi organlari, mahalliy davlat hokimiyati organlari, mahallalar, nodavlat notijorat tashkilotlari Davlat dasturida nazarda tutilgan tadbirlarni amalga oshirishda amalda ishtirok etishi va aniq ulush qoʻshishi aks ettirilgan holda uning amalga oshirilishidan keng jamoatchilik doimiy ravishda хabardor qilinishini ta’minlasinlar.

4. Mazkur qarorning ijrosini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklansin.

Oʻzbekiston Respublikasi Prezidenti                                    I. Karimov

"Oʻzbekiston Respublikasi qonun hujjatlari toʻplami",

2016 yil 22 fevral, 7-son, 62-modda

"Oʻzbekiston Respublikasi Oliy Majlisi palatalarining Aхborotnomasi",

2016 yil, 2-son, 43-modda