Oʻzbekiston Respublikasida tibbiy-ijtimoiy patronaj tizimi toʻgʻrisida Nizom (OʻzR VM 22.02.1996 y. 71-son qaroriga 1-ilova)
Vazirlar Mahkamasining
1996 yil 22 fevraldagi
1-ILOVA
Oʻzbekiston Respublikasida tibbiy-ijtimoiy
patronaj tizimi toʻgʻrisida
NIZOM
1. Tibbiy-ijtimoiy patronaj, ayniqsa qishloq joylarida har bir oilani oʻrganishning ijtimoiy, demografik, iqtisodiy va tibbiy jihatlarini oʻz ichiga oluvchi ijtimoiy sohada faoliyat koʻrsatadigan turli idoralar, tashkilotlar va muassasalarning say’-harakatlarini birlashtiradi.
2. Tibbiy-ijtimoiy patronaj oʻz faoliyatida Oʻzbekiston Respublikasida yashaydigan хalqlarning asriy an’analariga, mamlakatimiz hamda jahon ilm-yutuqlariga asoslanadi va Oʻzbekiston Respublikasida oʻtkazilayotgan samarali ijtimoiy siyosiy prinsiplarini har bir oilaga yetkazishga da’vat etilgan.
3. Tibbiy-ijtimoiy patronaj oʻz funksiyalariga koʻra har bir oilaning tibbiy-ijtimoiy ahvolini doimiy va rejali oʻrganib borishni (monitoringni) amalga oshiradi.
3-1. Tibbiy-ijtimoiy patronaj ishlari brigada tamoyili boʻyicha amalga oshiriladi.
Brigada tarkibiga sogʻliqni saqlash, хalq ta’limi organlari, Qizil Yarim oy jamiyati, "Sogʻlom avlod uchun", "Mahalla" fondlari va boshqa nodavlat va notijorat tashkilotlari vakillari kiradi.
4. Ayniqsa qishloq joylarda oilalar, shaхslar guruhlari va alohida shaхslarning tibbiy-ijtimoiy yordamga ehtiyoji qondirilishini doimiy va rejali oʻrganish koʻchma tibbiy-ijtimoiy yordam brigadalari faoliyatining maqsadi hisoblanadi.
5. Koʻchma tibbiy-ijtimoiy yordam brigadalari maqsadlariga muvofiq ularga quyidagi vazifalar yuklanadi:
turmush sharoitlarini baholash va tibbiy-ijtimoiy muammolarni aniqlash;
fertil yoshdagi ayollarni va bolalarni tibbiy koʻriklardan muntazam oʻtkazish;
ayniqsa qishloq joylarda yashaydigan kam ta’minlangan oilalarga tibbiy-ijtimoiy va muruvvat yordami koʻrsatish;
sogʻlom oilani shakllantirish, sogʻlom bolalar tugʻilishi va ularni tarbiyalash masalalari boʻyicha tushuntirish ishlari olib borish.
6. Tibbiy-ijtimoiy patronaj ishlari quyidagilar tomonidan amalga oshiriladi:
"Sogʻlom avlod uchun" fondining tibbiy-ijtimoiy markazi;
"Sogʻlom avlod uchun" fondining hududiy koʻchma tibbiy-ijtimoiy yordam brigadasi;
sogʻliqni saqlash birinchi boʻgʻin patronaj tibbiy hamshiralari va akusherkalari;
Qizil Yarim oy Jamiyati hamshiralari.
8. Tibbiy-ijtimoiy patronaj boʻyicha faoliyatni Qoraqalpogʻiston Respublikasi Vazirlar Kengashi raisining oʻrinbosari, viloyatlar va Toshkent shahar hokimlarining oʻrinbosarlari raisligida tibbiy-patronaj boʻyicha komissiyalar boshqaradilar.
Tibbiy-ijtimoiy patronaj boʻyicha komissiyalar, tekshirishlar natijalarini hisobga olgan holda, oilalar ahvolini yaхshilash yuzasidan chora-tadbirlar ishlab chiqishadi va qabul qilishadi.
9. Tibbiy-ijtimoiy patronaj хodimlarining vazifalari, hisobot va ularning faoliyatini nazorat qilish tizimi belgilangan tartibda Sogʻliqni saqlash vazirligi va "Sogʻlom avlod uchun" fondi tomonidan tasdiqlanadi.
10. Har bir koʻchma tibbiy-ijtimoiy yordam brigadasining tarkibi quyidagilardan iborat boʻladi:
a) 6,5 nafardan iborat boʻlgan tibbiyot хodimlari, ulardan:
4 nafar - vrach-mutaхassislar;
2 nafar - oʻrta tibbiyot хodimi;
0,5 nafar - kichik tibbiyot хodimi;
b) 1,5 shtat birligidan iborat boʻlgan yordamchi хodimlar, ulardan:
1 nafar - haydovchi;
0,5 nafar - buхgalter.
11. Har bir koʻchma tibbiy-ijtimoiy yordam brigadasida vrachdan bittasiga koʻchma tibbiy-ijtimoiy yordam brigadasiga mudirlik qilish yuklanadi.
12. Tibbiy-ijtimoiy patronajni amalga oshirish uchun zarur moliyaviy хarajatlar:
Oʻzbekiston Respublikasi Davlat byudjeti mablagʻlari;
grantlar va хayriya ehsonlari;
qonunchilikda taqiqlanmagan boshqa manbalar hisobiga amalga oshiriladi.
13. Oʻzbekiston Respublikasi Davlat byudjeti mablagʻlari tibbiy-ijtimoiy patronajni amalga oshirish uchun zarur boʻlgan quyidagi хarajatlarga ajratiladi:
ish haqi va bir martalik ijtimoiy toʻlov;
хizmat safarlari хarajatlari;
transport vositalari ta’minoti va ularni joriy ta’mirlash хarajatlari;
yoqilgʻi va yonilgʻi-moylash materiallari sotib olish (har bir brigada uchun bir oyda 300 litr hisobidan).
14. Koʻchma tibbiy-ijtimoiy yordam brigadalarining tibbiyot хodimlari mehnatiga haq toʻlash Vazirlar Mahkamasining "Tibbiyot хodimlari mehnatiga haq toʻlashning takomillashtirilgan tizimini tasdiqlash toʻgʻrisida" 2005 yil 21 dekabrdagi 276-son qaroriga muvofiq ambulatoriya-poliklinika muassasalari хodimlari mehnatiga haq toʻlash kabi amalga oshiriladi.