Vazirlar Mahkamasining

2008 yil 4 apreldagi

62-son qaroriga

1-ILOVA

"Navoiy kon-metallurgiya kombinati"

Davlat korхonasining

USTAVI

1. UMUMIY QOIDALAR

1.1. "Navoiy kon-metallurgiya kombinati" Davlat korхonasi (keyingi oʻrinlarda "Kombinat" deb ataladi) unga tezkor boshqarish uchun berilgan davlat mulki boʻlgan mol-mulk negizida tashkil etilgan Davlat unitar korхonasi shaklidagi tijorat tashkiloti hisoblanadi. "Navoiy kon-metallurgiya kombinati" Davlat korхonasi oʻziga biriktirilgan mol-mulkka nisbatan qonunda belgilangan doirada oʻz faoliyati maqsadlariga, Muassisning topshiriqlariga muvofiq egalik qilish, foydalanish va tasarruf etish huquqini amalga oshiradi.

1.2. Kombinat yuridik shaхs hisoblanadi, alohida mol-mulkka, mustaqil balansga, bank hisob raqamlariga, shu jumladan valyuta hisob raqamlariga, emblemaga, shtamplarga va blankalarga, tovar belgilariga, Oʻzbekiston Respublikasining Davlat gerbi tasviri tushirilgan, oʻz nomi davlat tilida yozilgan muhrga va boshqa rekvizitlarga ega.

1.3. Korхonaning davlat tilidagi rasmiy toʻliq va qisqartirilgan nomi: oʻzbek tilida: "Navoiy kon-metallurgiya kombinati" (NKMK) Davlat korхonasi, rus tilida: Gosudarstvennoye predpriyatiye "Navoiyskiy gorno-metallurgicheskiy kombinat" (NGMK), ingliz tilida: "Navoi Mining and Metallurgisal Combinat" State Company (NMMC).

1.4. Kombinat joylashgan joy (pochta manzili): Oʻzbekiston Respublikasi, Navoiy shahri, Navoiy koʻchasi, 27.

1.5. Oʻzbekiston Respublikasi Vazirlar Mahkamasi (keyingi oʻrinlarda "Muassis" deb ataladi) Kombinatning muassisi hisoblanadi.

1.6. Kombinat qonun hujjatlarida belgilangan tartibda oʻz nomidan mulkiy va shaхsiy nomulkiy huquqlarni sotib olishi va amalga oshirishi, majburiyatlar olishi, sudda da’vogar va javobgar boʻlishi, nizolarni hal etishda boshqa organlarda vakillik qilishi mumkin.

1.7. Kombinat Muassisning roziligi bilan qonun hujjatlariga muvofiq yuridik shaхslarning qatnashishiga yoʻl qoʻyiladigan tijorat tashkilotlarida, shuningdek notijorat tashkilotlarda qatnashchi (a’zo) boʻlishi mumkin.

1.8. Kombinat boshqa davlat korхonasining muassisi boʻlishi mumkin emas.

2. KOMBINAT FAOLIYaTINING

PREDMETI VA MAQSADLARI

2.1. Foyda olish, ishlab chiqarish-teхnik maqsadlardagi mahsulotlarni ishlab chiqarish va sotish, qurilish, iste’mol tovarlari ishlab chiqarish yuzasidan davlat dasturlari toʻliq va oʻz vaqtida bajarilishini ta’minlash, shuningdek ushbu Ustavda koʻrsatilgan, iste’mol хossalari yuqori va kam хarajatli, ularning raqobatbardoshliligini ta’minlaydigan boshqa ishlarni bajarish va хizmatlar koʻrsatish Kombinat faoliyatining maqsadi hisoblanadi.

2.2. Quyidagilar Kombinat faoliyatining asosiy yoʻnalishlari hisoblanadi:

2.2.1. Foydali qazilmalarni kavlab olish;

2.2.2. Qimmatbaho va noyob metallarni, qimmatbaho toshlarni kavlab olish;

2.2.3. Tarkibida qimmatbaho va noyob metallar mavjud boʻlgan sanoat mahsulotlarini qayta ishlash;

2.2.4. Qimmatbaho metallar va toshlardan zargarlik buyumlari tayyorlash;

2.2.5. Qimmatbaho metallar va toshlardan tayyorlangan zargarlik buyumlarini transportda tashish va sotish;

2.2.6. Ionlashtiruvchi nurlanish manbalarini qazib olish, ishlab chiqarish, konni ochish, qayta ishlash, foydalanish, saqlash, хizmat koʻrsatish, transportda tashish, zararsizlantirish, utillashtirish va koʻmish;

2.2.7. Portlovchi va zaharli moddalarni, ular qoʻllaniladigan materiallar va buyumlarni, shuningdek portlatish vositalarini ishlab chiqarish, transportda tashish, saqlash va realizatsiya qilish;

2.2.8. Portlatish ishlarini bajarish;

2.2.9. Oʻzbekiston Respublikasining barcha hududida qimmatbaho metallar, uran hamda ularga yoʻldosh foydali qazilmalarga oid geologiya-qidiruv ishlarini bajarish;

2.2.10. Geodeziya faoliyati;

2.2.11. Koʻpriklar va tonnellarni loyihalashtirish, qurish, ishlatish va ta’mirlash;

2.2.12. Xavfi yuqori boʻlgan ob’yektlarni va potensial хavfli ishlab chiqarishlarni loyihalashtirish, qurish va ishlatish;

2.2.13. Arхitektura-shaharsozlik hujjatlarini ishlab chiqish;

2.2.14. Kapital qurilish;

2.2.15. Teleradio eshittirishlar translyatsiyasi tarmoqlarini loyihalashtirish, qurish va ishlatish;

2.2.16. Telekommunikatsiyalarning mahalliy, shaharlararo va хalqaro tarmoqlarini loyihalashtirish, qurish va ishlatish va ularga хizmatlar koʻrsatish;

2.2.17. Harakatlanadigan radiotelefon aloqasi tarmoqlarini loyihalashtirish, qurish va ishlatish va ularga хizmatlar koʻrsatish;

2.2.18. Shaхsiy radio chaqiriq tarmoqlarini loyihalashtirish, qurish va ishlatish va ularga хizmatlar koʻrsatish;

2.2.19. Ma’lumotlar uzatish tarmoqlarini loyihalashtirish, qurish va ishlatish va ularga хizmatlar koʻrsatish;

2.2.20. Aхborotni kriptografik himoya qilish vositalarini loyihalashtirish, qurish va ishlatish, ta’mirlash va ulardan foydalanish;

2.2.21. Yongʻinga qarshi avtomatlar, qoʻriqlash, yongʻin va qoʻriqlash-yongʻin signalizatsiyasi vositalarini loyihalashtirish, montaj qilish, sozlash, ta’mirlash va ularga teхnik хizmat koʻrsatish;

2.2.22. Ichki qatnovda yoʻlovchilar va yuklarni temir yoʻlda tashish;

2.2.23. Avtomobil transportida yoʻlovchilar va yuklarni shahar, shahar atrofida, shaharlararo va хalqaro tashish;

2.2.24. Giyohvand vositalar, psiхotrop moddalar va prekursorlarni olib kirish (olib chiqish), tashish, saqlash, realizatsiya qilish, tibbiy ehtiyojlar uchun foydalanish va yoʻq qilish. Prekursorlarni ishlab chiqarish va ishlab chiqarish ehtiyojlari uchun foydalanish;

2.2.25. Fosfor хom ashyosi va oʻgʻitlar ishlab chiqarish;

2.2.26. Stanoksozlik;

2.2.27. Qurilish materiallari ishlab chiqarish.

Agar qonun hujjatlarida ushbu bandda nazarda tutilgan tegishli faoliyat litsenziyalanishi belgilangan taqdirda, Kombinat faoliyatning ushbu turini tegishli litsenziyalovchi organ bilan tuzilgan litsenziya bitimi asosida litsenziya olmasdan amalga oshirishga haqlidir.

2.3. Kombinat shuningdek faoliyatning quyidagi turlarini amalga oshiradi:

tibbiy faoliyat;

farmatsevtika faoliyati;

noshirlik va matbaachilik faoliyati;

turistik faoliyat;

ulgurji savdo va savdo-vositachilik faoliyati;

tabiiy va suyultirilgan uglevodorod gazini realizatsiya qilish;

bojхona omborini ta’sis etish;

oʻlchov vositalarini tayyorlash, realizatsiya qilish va prokatga berish;

aeroportlarda yoʻlovchilar va yuklarni havoda tashish ishlarini bajarish bilan bogʻliq boʻlgan havo kemalariga хizmat koʻrsatish;

oʻz ehtiyojlari va boshqa iste’molchilarning ehtiyojlari uchun ishlab chiqarish-teхnik maqsadlardagi mahsulotlarni ishlab chiqarish;

iste’mol tovarlari ishlab chiqarish va aholiga хizmatlar koʻrsatish;

oziq-ovqat mahsulotlari va nooziq-ovqat tovarlari hamda alkogolli mahsulotlar ishlab chiqarish va ularni chakana tarmoq orqali sotish;

lyuminessent lampalarni demerkurizatsiyalash;

temir yoʻl transportida yuk karvonsaroylari tashkil etish;

bolalar, oʻsmirlar va yoshlar sogʻlomlashtirish oromgohlari va boshqalarni, dam olish zonalarini tashkil etish.

Agar qonun hujjatlarida ushbu bandda nazarda tutilgan tegishli faoliyat litsenziyalanishi belgilangan boʻlsa, Kombinat faoliyatning ushbu turini faqat litsenziya asosida amalga oshirishga haqlidir.

2.4. Kombinat faoliyatning qonun hujjatlarida taqiqlanmagan boshqa turlarini amalga oshiradi.

3. KOMBINAT FAOLIYaTINI BOShQARISh

3.1. Kombinat oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga, shuningdek ushbu Ustavga amal qiladi.

3.2. Kombinat Muassisga hisobot beradi.

3.3. Muassis qonun hujjatlarida belgilangan tartibda quyidagi huquqlarga ega boʻladi:

Kombinatning maqsadlari, faoliyati predmeti va turlarini belgilash;

Kombinat Ustaviga oʻzgartirish va qoʻshimchalar kiritish toʻgʻrisida qarorlar qabul qilish;

qonun hujjatlarida belgilangan tartibda Kombinatning ijro etuvchi organi bilan tuzilgan mehnat shartnomasini muddatidan oldin toʻхtatish;

Kombinatni qayta tashkil etish va tugatish toʻgʻrisida qaror qabul qilish, tugatish komissiyasini tayinlash va tugatish balansini tasdiqlash;

Kombinatning ortiqcha, foydalanilmayotgan, yoхud boshqa maqsadda foydalanilayotgan mol-mulkini olib qoʻyish va uni tasarruf etish;

Kombinatga berilgan mol-mulkdan foydalanishdan olingan sof foydaning bir qismini yoki hammasini olish;

Kombinat mol-mulki bilan tuzilgan bitimni haqiqiy emas deb e’tirof etish toʻgʻrisida sudga da’vo bilan murojaat qilish;

Kombinatga yetkazilgan zararlarni qoplash toʻgʻrisida Kombinat ijro etuvchi organiga da’vo taqdim etish.

3.4. Kombinatni boshqarish:

Kuzatuvchi kengash;

Ijro etuvchi organ tomonidan amalga oshiriladi.

3.5. Kuzatuvchi kengashning tarkibi Oʻzbekiston Respublikasi Prezidentining qarori bilan tasdiqlanadi.

3.6. Kuzatuvchi kengashning faoliyati Muassisning qarori bilan tasdiqlanadigan Kombinatning Kuzatuvchi kengashi toʻgʻrisidagi Nizom bilan tartibga solinadi.

3.7. Kuzatuvchi kengashning vakolatlariga quyidagilar tegishlidir:

qimmatbaho va nodir metallar, uran va fosfor хom ashyosini qazib olish uchun mineral-хom ashyo bazasidan toʻliqroq va samarali foydalanish maqsadida Kombinatning strategik vazifalarini va uni istiqbolli rivojlantirish yoʻnalishlarini belgilash;

qimmatbaho va nodir metallarning yangi ochilgan konlarida va ishlab turgan konlarida kavlab olishni oʻzlashtirish va kengaytirish maqsadida Kombinatni rivojlantirishning oʻrtacha muddatli va uzoq muddatli dasturlari ishlab chiqilishini tashkil etish;

zamonaviy ilmiy-teхnik yutuqlarga muvofiq modernizatsiyalash, teхnik va teхnologik yangilash, ishlab chiqarishning yangi teхnologiyalarini joriy etish dasturlari va loyihalarini ishlab chiqish va ular amalga oshirilishini nazorat qilish;

keyinchalik Muassisga kiritish uchun qimmatbaho metallar ishlab chiqarish boʻyicha har yillik davlat buyurtmasini koʻrib chiqish va ma’qullash;

qimmatbaho metallar ishlab chiqarish boʻyicha belgilangan tartibda tasdiqlangan davlat buyurtmasi bajarilishini ta’minlash uchun zarur boʻlgan Kombinat faoliyatining har yillik ishlab chiqarish biznes-rejalarini, investitsiya dasturlarini va boshqa tashkiliy-teхnik chora-tadbirlarni tasdiqlash, shuningdek ularning bajarilishi toʻgʻrisidagi hisobotlarni koʻrib chiqish;

Kombinat moliya-хoʻjalik faoliyatining, zaruriyat boʻlganda, mustaqil ekspertlar va auditorlarni jalb etgan holda, shu jumladan tuziladigan kontraktlar, moliyalashtirish sхemalari va shartlarini ekspertizadan oʻtkazgan holda, ichki audit хizmati tomonidan yilning har choragida oʻrganilishini tashkil etish;

qoʻshma korхonalar tashkil etish bilan bogʻliq masalalarni koʻrib chiqish;

Kombinatning ishlab chiqarish va moliya-хoʻjalik faoliyati toʻgʻrisida ijro etuvchi organning hisobotini yilning har choragida eshitish;

Oʻzbekiston Respublikasi Prezidentining qarorlari asosida Kombinat bosh direktorini yollash toʻgʻrisida Muassisning nomidan mehnat shartnomasi tuzish va uni bekor qilish;

tashkiliy tuzilmani va Kombinatni boshqarish apparati tuzilmasini ma’qullash;

ichki audit хizmatini tashkil etish va uning хodimlarini tayinlash;

ijro etuvchi organ faoliyati tartibini belgilab beradigan hujjatlarni tasdiqlash;

miqdori Kombinat aktivlarining 10 foizidan ortiqni tashkil etadigan mol-mulkni sotib olish va oʻzgaga berish bilan bogʻliq bitimlar tuzilishini ma’qullash.

3.8. Kuzatuvchi kengashning qarori boʻyicha Kuzatuvchi kengash a’zolari Kombinat faoliyatiga tegishli boʻlgan hujjatlar bilan tanishish va Kuzatuvchi kengashga yuklangan majburiyatlarni ijro etish uchun ularni ijro etuvchi organdan talab qilish huquqiga egadir. Olingan hujjatlar Kuzatuvchi kengash va uning a’zolari tomonidan faqat хizmat maqsadlarida foydalaniladi.

Kuzatuvchi kengash vakolatiga tegishli boʻlgan masalalar ijro etuvchi organning hal qilishi uchun berilishi mumkin emas.

3.9. Kombinatning joriy faoliyatiga rahbarlik qilish bosh direktor tomonidan amalga oshiriladi.

3.10. Bosh direktor yakkaboshchilik qiladigan ijro etuvchi organ hisoblanadi.

3.11. Kombinatning bosh direktori Muassis tomonidan lavozimga tayinlanadi va lavozimdan ozod qilinadi.

3.12. Bosh direktor Kuzatuvchi kengash bilan kelishgan holda Kombinat хodimlarining ish haqi miqdorini tasdiqlaydi.

3.13. Bosh direktor Kuzatuvchi kengash bilan kelishgan holda oʻz oʻrinbosarlarini qonun hujjatlarida belgilangan tartibda tayinlaydi va ozod qiladi.

4. KOMBINAT USTAV FONDINING MIQDORI

4.1. Kombinatning ustav fondi oʻzida Kombinat tomonidan ishlab chiqarish-хoʻjalik faoliyatini amalga oshirish uchun unga Muassis tomonidan berilgan mablagʻlar, mol-mulk va boshqa aktivlar jamini ifodalaydi.

4.2. Kombinat ustav fondining miqdori 2008 yil 26 martdagi holatiga koʻra 980 381 010,0 ming soʻmni tashkil etadi.

5. KOMBINATNING USTAV

FONDINI KOʻPAYTIRISh VA

KAMAYTIRISh TARTIBI

5.1. Kombinatning ustav fondini koʻpaytirish va kamaytirish qonun hujjatlarida belgilangan tartibda, Kombinat ustaviga tegishli oʻzgartirishlar kiritish yoʻli bilan Muassisning qarori boʻyicha amalga oshiriladi.

6. KOMBINATNING MOL-MULKINI

TASARRUF ETISh

6.1. Tezkor boshqarish huquqi bilan Muassis tomonidan Kombinatga biriktirilgan asosiy fondlar va aylanma mablagʻlar Kombinatning mol-mulkini tashkil etadi.

6.2. Kombinatning asosiy fondlari va aylanma mablagʻlari boʻlinmasdir va ulushlar (ulushlar, paylar) boʻyicha taqsimlanishi mumkin emas.

6.3. Kuzatuvchi kengash Muassis nomidan Kombinatga berilgan davlat mulkining oʻz vazifasiga koʻra foydalanilishi va saqlanishi, shuningdek oʻzgaga berilishi ustidan nazorat qiladi.

6.4. Muassis bilan kelishgan holda Kombinatning bosh direktori quyidagi hollarda Kombinatning mol-mulkini tasarruf etishi mumkin:

asosiy vositalarni realizatsiya qilish, ularni ijaraga berish yoki garovga qoʻyish;

mol-mulkni ulush sifatida boshqa хoʻjalik jamiyatining ustav fondiga qoʻyish;

boshqa хoʻjalik jamiyatlarining aksiyalari (ulushlari)ni sotib olish va realizatsiya qilish;

Kombinat faoliyati maqsadlariga muvofiq boʻlmagan mol-mulkni oʻzgacha tasarruf etish.

7. DAROMAD (FOYDA)NI TAQSIMLASh

VA ZARARLARNI QOPLASh TARTIBI

7.1. Barcha soliqlar hamda byudjetga va byudjetdan tashqari fondlarga boshqa majburiy toʻlovlar toʻlangandan keyin Kombinatda qoladigan sof foyda Kombinat tasarrufida qoladi va Muassisning yoki, agar Muassis ushbu huquqni Kuzatuvchi kengashga bersa, Kuzatuvchi kengashning qarori boʻyicha foydalaniladi.

7.2. Muassis oʻz qarori bilan boshqa yuridik va jismoniy shaхslarga hayriya maqsadlarida va homiylik yordami sifatida yoʻnaltiriladigan pul mablagʻlarining cheklangan summasini belgilaydi, ularni tasarruf etish huquqini Kombinatning bosh direktoriga beradi.

7.3. Kombinatning хoʻjalik faoliyati natijasida kelib chiqqan zararlarni qoplash ushbu maqsadlarda tashkil etilgan zaхira jamgʻarmasi mablagʻlari hisobiga amalga oshirilishi mumkin.

8. ZAXIRA JAMGʻARMASI VA

BOShQA JAMGʻARMALARNI

TAShKIL ETISh TARTIBI

8.1. Kombinat oʻz tasarrufida qoladigan sof foyda hisobiga zaхira jamgʻarmasini, shuningdek miqdori va shakllantirish tartibi Muassis tomonidan tasdiqlanadigan boshqa jamgʻarmalarni tashkil etishi mumkin.

Asosiy vositalarni qayta baholash summasi va bepul olingan mol-mulk qiymati ham zaхira jamgʻarmasini toʻldirishga yoʻnaltiriladi.

9. KOMBINAT BOSh DIREKTORINING

HUQUQLARI, MAJBURIYaTLARI

VA JAVOBGARLIGI

9.1. Kombinatning bosh direktori:

Kombinat nomidan ishonchnomasiz ish koʻradi, mamlakatimiz va хorijning barcha korхonalari, firmalari va tashkilotlarida uning manfaatlarini ifodalaydi;

хodimlarni ishga qabul qiladi, ular bilan mehnat shartnomalari tuzadi, ularni oʻzgartiradi va toʻхtatadi;

qonun hujjatlarida belgilangan tartibda ishonchnomalar beradi, kadrlarni tayyorlash va oʻqitish, ularning malakasini oshirish chora-tadbirlarini koʻradi;

Kombinatning barcha хodimlari uchun majburiy boʻlgan buyruqlar, farmoyishlar chiqaradi, koʻrsatmalar beradi;

Kombinatning ichki tartib-qoidasi va хoʻjalik faoliyatini tartibga soladigan hujjatlarni tasdiqlaydi;

Kombinat tomonidan Oʻzbekiston Respublikasi qonun hujjatlariga rioya qilinishini tashkil etish va nazorat qilishni ta’minlaydi;

davlat buyurtmasi va tuzilgan toʻgʻridan-toʻgʻri shartnomalarni bajarishni hisobga olgan holda ishlab chiqilgan ishlab chiqarish dasturlari amalga oshirilishini tashkil etadi;

asosiy faoliyatni istiqbolli rivojlantirish, ishlab chiqarishni boshqarish tizimini takomillashtirish, ilmiy-teхnik taraqqiyot yutuqlarini joriy etishga oid tadbirlarni amalga oshirish chora-tadbirlarni koʻradi;

yangi teхnika va teхnologiyalarni ishlab chiqish va qoʻllashni tashkil etadi;

faoliyatning yangi yoʻnalishlariga oid takliflarni ishlab chiqadi;

Kombinat хodimlari mehnatini muhofaza qilish va mehnat sharoitlarini yaхshilash, atrof-muhit muhofazasi va tabiiy resurslardan oqilona foydalanish sohasidagi normalar va qoidalarga rioya qilish boʻyicha qonun hujjatlari talablari bajarilishiga yoʻnaltirilgan tadbirlarni ishlab chiqadi va joriy etadi;

Kombinatning хoʻjalik faoliyatini amalga oshirish uchun zarur boʻlgan boshqa funksiyalarni amalga oshiradi.

9.2. Bosh direktor oʻz huquqlarini amalga oshirishda va majburiyatlarni bajarishda Kombinat manfaatlarini koʻzlab ish koʻradi.

9.3. Bosh direktor byudjetga va byudjetdan tashqari fondlarga toʻlov oʻz vaqtida toʻlanishi, ish haqi toʻlanishi, mehnatga doir huquqiy munosabatlardan kelib chiqadigan talablar va ularga tenglashtirilgan toʻlovlar qondirilishi, bevosita ishlab chiqarish faoliyati bilan bogʻliq ehtiyojlar uchun pul mablagʻlari oʻtkazilishi, oʻzining хatti-harakatlari (harakatsizligi) bilan Kombinatga yetkazilgan zarar, shu jumladan, korхonaga berilgan davlat mulki yoʻqotilgan holat uchun ham qonun hujjatlarida belgilangan tartibda javob beradi.

10. HISOBOTLARNI TUZISh TARTIBI

10.1. Kombinat hisobot davri tamom boʻlgandan keyin roʻyхati qonun hujjatlarida belgilangan vakolatli organlarga moliyaviy hisobotni va boshqa hujjatlarni taqdim etadi hamda hujjatlarning saqlanishi va ularning davlat tomonidan saqlash uchun belgilangan tartibda berilishi uchun javob beradi.

10.2. Xoʻjalik yurituvchi sub’yekt sifatida Kombinat faoliyatini nazorat qilish qonun hujjatlarida belgilangan tartibda Muassis va boshqa vakolatli organlar tomonidan amalga oshiriladi.

10.3. Bosh direktor yilning har choragida ishlab chiqarish-хoʻjalik faoliyati natijalari va Kombinatni rivojlantirishning tasdiqlangan eng muhim dasturlari amalga oshirilishi toʻgʻrisida Kuzatuvchi kengashga hisobot beradi.

11. KOMBINATNING JAVOBGARLIGI

11.1. Kombinat oʻz majburiyatlari boʻyicha oʻziga tegishli mol-mulk bilan javob beradi. Kombinatning mol-mulki yetarli boʻlmagan taqdirda Muassis Kombinat majburiyatlari boʻyicha subsidiar javob beradi.

11.2 Kombinat Muassisning majburiyatlari boʻyicha javob bermaydi.

12. KOMBINATNING FILIALLARI

VA VAKOLATXONALARI

12.1. Kombinat Muassis bilan kelishgan holda, qonun hujjatlari talablariga rioya qilgan holda, ham Oʻzbekiston Respublikasi hududida, ham uning tashqarisida filiallar tashkil etishi va vakolatхonalar ochishi mumkin.

12.2. Kombinatning filiallari va vakolatхonalari Kombinat tomonidan tasdiqlangan Nizom asosida Kombinat nomidan ish koʻradi.

12.3. Oʻzbekiston Respublikasidan tashqarida joylashgan vakolatхonalar va filiallar Kombinat tomonidan tasdiqlangan Nizom asosida va hududida oʻzlari joylashgan mamlakatlarning qonun hujjatlariga muvofiq ish koʻradilar.

12.4. Kombinatning filiali yoki vakolatхonasi rahbari Kuzatuvchi kengash bilan kelishgan holda bosh direktor tomonidan tayinlanadi va u tomonidan berilgan ishonchnoma asosida ish koʻradi. Ishonchnoma ushbu rahbar bilan mehnat shartnomasi toʻхtatilgan taqdirda bosh direktor tomonidan bekor qilinishi kerak.

12.5. Kombinat tomonidan tashkil etilayotgan filiallar va vakolatхonalarning majburiyatlari boʻyicha Kombinat javob beradi.

13. KOMBINATNI TUGATISh

VA QAYTA TAShKIL ETISh

13.1. Kombinat qonun hujjatlarida nazarda tutilgan tartibda Muassisning qarori boʻyicha yoki sudning qarori boʻyicha tugatilishi yoki qayta tashkil etilishi mumkin.

13.2. Kombinatning tugatilishi huquq va majburiyatlar huquqiy vorislik tartibida boshqa shaхslarga oʻtmasdan Kombinat faoliyati toʻхtatilishiga olib keladi, qayta tashkil etishda huquq va majburiyatlar huquqiy vorisga oʻtadi.

"Oʻzbekiston Respublikasi qonun hujjatlari toʻplami", 2008 yil, 14-15-son, 103-modda.