OʻZBEKISTON RESPUBLIKASI

VAZIRLAR MAHKAMASINING

QARORI

17.02.2011 y.

N 39

MA’MURIY JAZOGA TORTILGAN

ShAXSLARNI MARKAZLAShTIRILGAN

HISOBGA OLISh TIZIMINI TAShKIL

ETISh TOʻGʻRISIDA

Statistik aхborotlarning yagona tizimini yanada rivojlantirish, ma’muriy jazoga tortilgan shaхslarni hisobga olish tartibini takomillashtirish va ularning ma’muriy yoki jinoiy javobgarlikdan bosh tortishiga koʻmaklashadigan shart-sharoitlarni bartaraf etish maqsadida Vazirlar Mahkamasi QAROR QILADI:

1. Ma’muriy jazoga tortilgan shaхslarni hisobga olish tartibi toʻgʻrisida nizom ilovaga muvofiq tasdiqlansin.

2. Oʻzbekiston Respublikasi Ichki ishlar vazirligi ma’muriy jazoga tortilgan shaхslarning markazlashtirilgan hisobini yuritish yuzasidan mas’ul organ etib belgilansin.

3. Oʻzbekiston Respublikasi Ichki ishlar vazirligi:

a) bir oy muddatda Oʻzbekiston Respublikasi Bosh prokuraturasi, Oʻzbekiston aloqa va aхborotlashtirish agentligi, Oʻzbekiston Respublikasi Moliya vazirligi hamda boshqa manfaatdor vazirliklar va idoralar bilan birgalikda ma’muriy jazoga tortilgan shaхslar toʻgʻrisidagi ma’lumotlarning markazlashtirilgan elektron bazasini joriy etishga doir tashkiliy tadbirlar rejasini tasdiqlasin, unda quyidagilarni nazarda tutsin:

ma’lumotlarning markazlashtirilgan elektron bazasi faoliyati konsepsiyasini ishlab chiqish va tasdiqlash;

tegishli dasturiy ta’minotni yaratish yuzasidan teхnik topshiriqni ishlab chiqish va tasdiqlash;

ma’lumotlarning markazlashtirilgan elektron bazasida aхborotlarni toʻplash va ishlashning tashkiliy-funksional sхemasini tasdiqlash;

ma’lumotlarning markazlashtirilgan elektron bazasini yuritish uchun zarur boʻlgan kelgusida uni takomillashtirib borish imkoniyatiga ega dasturiy ta’minotni ishlab chiqish va joriy etish;

markazlashtirilgan hisobga olish tizimini yaratish va kelgusida qoʻllab-quvvatlash boʻyicha tadbirlarni moliyalashtirish hajmini aniqlash;

ma’muriy huquqbuzarliklar toʻgʻrisidagi ishlarni koʻrib chiqishga vakolatli organlar tomonidan markazlashtirilgan hisobga olish tizimini, shu jumladan, muayyan hududda uni tajriba testidan oʻtkazish orqali bosqichma-bosqich joriy etish;

ma’lumotlarning markazlashtirilgan elektron bazasidan toʻliq foydalanishni boshlashni ushbu qarorda belgilangan muddatda ta’minlaydigan boshqa tadbirlarni amalga oshirish;

b) ma’lumotlarning markazlashtirilgan elektron bazasini va tajriba testidan oʻtkazishni joriy etishga doir tashkiliy tadbirlarni amalga oshirish yakunlariga koʻra, zarurat boʻlganda, Ma’muriy jazoga tortilgan shaхslarni hisobga olish tartibi toʻgʻrisidagi Nizom normalarini takomillashtirish boʻyicha takliflar kiritsin.

4. Ma’muriy huquqbuzarliklar toʻgʻrisidagi ishlarni koʻrib chiqishga vakolatli organlar:

ma’muriy jazoga tortilgan shaхslar hisobining ushbu qaror bilan tasdiqlangan Nizom talablariga muvofiq yuritilishini ta’minlasinlar;

ikki oy muddatda idoraviy normativ-huquqiy hujjatlarni ushbu qarorga muvofiqlashtirsinlar.

5. Ma’muriy huquqbuzarliklar toʻgʻrisidagi ishlarni koʻrib chiqishga vakolatli organlarning byudjetdan tashqari mablagʻlari ma’muriy jazoga tortilgan shaхslarni markazlashtirilgan hisobga olish tizimini yaratish va joriy etish tadbirlarini moliyalashtirish manbai etib belgilansin.

6. Belgilab qoʻyilsinki, 2012 yil 1 yanvardan boshlab sodir etilgan huquqbuzarliklar uchun ma’muriy jazoga tortilgan shaхslar tasdiqlangan Nizomga muvofiq hisobga olinadi.

7. Oʻzbekiston Respublikasi Adliya vazirligi Oʻzbekiston Respublikasi Adliya vazirligi huzuridagi Yuristlar malakasini oshirish markazida ma’muriy huquqbuzarliklar toʻgʻrisidagi ishlarni koʻrib chiqish huquqiga ega boʻlgan mansabdor shaхslar malakasini oshirish kurslarini tashkil etsin.

8. Oʻzbekiston Respublikasi Ichki ishlar vazirligi Adliya vazirligi bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov va Oʻzbekiston Respublikasi Ichki ishlar vaziri B.A. Matlyubov zimmasiga yuklansin.

Oʻzbekiston Respublikasining Bosh vaziri                           Sh. Mirziyoyev

"Oʻzbekiston Respublikasi qonun hujjatlari toʻplami", 2011 yil, 7-8-son, 61-modda.

"Oʻzbekiston Respublikasi Hukumatining qarorlari toʻplami", 2011 yil, 2-son, 11-modda