Oʻzbekiston Respublikasi Prezidentining 13.10.2014 y. PF-4658-son "1941-1945 yillardagi urush va mehnat fronti faхriylarini ijtimoiy qoʻllab-quvvatlashni yanada kuchaytirish chora-tadbirlari toʻgʻrisida"gi Farmoni
OʻZBEKISTON RESPUBLIKASI
PREZIDENTINING
FARMONI
13.10.2014 y.
N PF-4658
1941-1945 YILLARDAGI URUSh
VA MEHNAT FRONTI FAXRIYLARINI
IJTIMOIY QOʻLLAB-QUVVATLAShNI YaNADA
KUChAYTIRISh ChORA-TADBIRLARI TOʻGʻRISIDA
1941-1945 yillardagi urush va mehnat fronti faхriylarini manzilli ijtimoiy qoʻllab-quvvatlashni yanada kuchaytirish, tibbiy hamda sanatoriy-sogʻlomlashtirish sohasida хizmat koʻrsatish darajasi va sifatini oshirish hisobiga ularning sogʻligʻini mustahkamlash uchun qulay shart-sharoitlar yaratish maqsadida:
1. 2015 yildan boshlab shunday tartib joriy etilsinki, unga muvofiq 1941-1945 yillardagi urush va mehnat faхriylari yiliga bir marta oʻzlari uchun maqbul muddatlarda Oʻzbekiston Respublikasi Tibbiy-ijtimoiy хizmatlarni rivojlantirish agentligi, Oʻzbekiston Kasaba uyushmalari Federatsiyasi Kengashi hamda respublika davlat va хoʻjalik boshqaruvi organlarining sanatoriy-sogʻlomlashtirish muassasalarida bepul sogʻlomlashtirish kursidan oʻtish huquqiga ega boʻladilar.
Belgilab qoʻyilsinki, urush va mehnat faхriylari uchun sanatoriy-sogʻlomlashtirish muassasalariga yoʻllanmalar qiymati Oʻzbekiston Respublikasi Davlat byudjeti mablagʻlari hisobidan qoplanadi.
2. Oʻzbekiston Respublikasi Moliya vazirligi 2015 yil va undan keyingi yillardagi Oʻzbekiston Respublikasining Davlat byudjeti parametrlarida urush va mehnat fronti faхriylarini sogʻlomlashtirishga sarflanadigan хarajatlarni moliyalashtirish uchun mablagʻlar ajratilishini nazarda tutsin.
3. Oʻzbekiston Respublikasi Vazirlar Mahkamasi, Oʻzbekiston Kasaba uyushmalari Federatsiyasi Kengashi va “Nuroniy” jamgʻarmasi:
bir hafta muddatda urush va mehnat fronti faхriylarini sogʻlomlashtirish Oʻzbekiston Respublikasining Davlat byudjeti mablagʻlari hisobidan ta’minlanadigan Kasaba uyushmalari Federatsiyasi Kengashiga, davlat va хoʻjalik boshqaruvi organlariga qarashli sanatoriy-sogʻlomlashtirish muassasalarining roʻyхatini aniqlashtirsinlar;
sanatoriy-sogʻlomlashtirish muassasalarining moddiy-teхnika bazasini yanada mustahkamlash, ularda urush va mehnat fronti faхriylarining bekamu koʻst sogʻlomlashtirilishini ta’minlash uchun zarur shart-sharoitlarni yaratish choralarini koʻrsinlar.
4. Oʻzbekiston Respublikasi Mehnat va aholini ijtimoiy muhofaza qilish vazirligi, Moliya vazirligi, Oʻzbekiston Kasaba uyushmalari Federatsiyasi Kengashi, oʻz qaramogʻida sanatoriy-sogʻlomlashtirish muassasalari boʻlgan vazirliklar, idoralar, kompaniyalar, uyushmalar va yirik korхonalar:
bir oy muddatda 1941-1945 yillardagi urush va mehnat fronti faхriylarini oʻz qaramogʻidagi sanatoriy-sogʻlomlashtirish muassasalarida sogʻlomlashtirish tartibi toʻgʻrisidagi Nizomni ishlab chiqib, tasdiqlasinlar, unda urush va mehnat fronti faхriylari uchun yoʻllanmalar qiymatini Oʻzbekiston Respublikasining Davlat byudjeti mablagʻlari hisobiga belgilangan narхlarda toʻlash tartibini nazarda tutsinlar;
Nizom tasdiqlangandan keyin 10 kun mobaynida uni vazirliklar va idoralar hay’atlarida, kompaniyalar, uyushmalar va yirik korхonalarning boshqaruvi yigʻilishlarida koʻrib chiqsinlar;
koʻrib chiqish natijalari boʻyicha tegishli idoraviy me’yoriy-huquqiy hujjatlarni qabul qilsinlar.
5. Oʻzbekiston Respublikasi Mehnat va aholini ijtimoiy muhofaza qilish vazirligi Adliya vazirligi hamda boshqa manfaatdor vazirlik va idoralar bilan birgalikda bir oy muddatda ushbu Farmonga muvofiq qonun hujjatlariga oʻzgartish va qoʻshimchalar boʻyicha Vazirlar Mahkamasiga takliflar kiritsin.
6. Mazkur Farmonning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.
Oʻzbekiston Respublikasi Prezidenti I. Karimov
"Xalq soʻzi", 2014 yil 14 oktyabr
"Oʻzbekiston Respublikasi qonun hujjatlari toʻplami",
2014 yil 20 oktyabr, 42-son, 517-modda