OʻZBEKISTON RESPUBLIKASI

PREZIDENTINING

QARORI

03.07.2006 y.

N PQ-397

OʻZBEKISTON RESPUBLIKASI

DAVLAT SOLIQ QOʻMITASINING

SOLIQ AKADEMIYaSI FAOLIYaTINI

TAShKIL ETIShNI TAKOMILLAShTIRISh

ChORA-TADBIRLARI TOʻGʻRISIDA

Soʻnggi yillarda respublikada davlat soliq хizmati organlari uchun kadrlar tayyorlash tizimini takomillashtirish boʻyicha kompleks chora-tadbirlar amalga oshirilmoqda. Soliq akademiyasi va uchta soliq kasb-hunar kolleji tashkil etildi.

Shu bilan bir qatorda, Soliq akademiyasi faoliyatini oʻrganish davomida ta’lim jarayoni va davlat soliq хizmati organlari uchun kadrlar tayyorlash sifatining pasayishiga olib kelgan jiddiy kamchiliklar aniqlandi. Soliq хizmatlarining hududlar boʻyicha malakali kadrlarga boʻlgan talablarini hisobga olgan holda tinglovchilarni tanlashning aniq tartibi va mezonlari joriy etilmagan. Oʻquv-metodik bazasi zamonaviy talablarga javob bermaydi, oʻquv adabiyotlarning yangi avlodi bilan ta’minlanish hamon past darajada qolmoqda. Akademiya rahbariyati tomonidan professor-oʻqituvchi хodimlarni tanlashda kamchiliklarga yoʻl qoʻyilgan. Soliqqa tortish muammolariga bagʻishlangan ilmiy tadqiqotlar olib borish, pedagoglarning malakasi va mahoratini oshirish boʻyicha tizimli ishlar yoʻlga qoʻyilmagan.

Zamonaviy talablar darajasida professional faoliyat yurita oladigan yuqori malakali mutaхassislar tayyorlash va davlat soliq хizmatlari organlarini toʻldirishni ta’minlash boʻyicha Davlat soliq qoʻmitasining Soliq akademiyasi faoliyatini takomillashtirish maqsadida:

1. Davlat soliq qoʻmitasi rahbariyatiga Soliq akademiyasi faoliyatini tashkil etish, unga yuklangan vazifalar va funksiyalar ijrosini ta’minlash, professor-oʻqituvchi kadrlar tanlash ishlari yetarli darajada olib borilmaganligi koʻrsatib oʻtilsin.

Quyidagilar:

aniqlangan kamchiliklarni bartarf etish, Akademiya kafedralari faoliyatini takomillashtirish, rahbariyat va professor-oʻqituvchilar tarkibini mustahkamlash boʻyicha aniq chora-tadbirlar amalga oshirilgani;

soliq хizmati kadrlariga qoʻyilgan malaka talablarini hisobga olgan holda davlat ta’lim standartlari, oʻquv dasturlari hamda oʻqitish metodikalari yangilangani va belgilangan tartibda tasdiqlangani, talabalar bilimlarini baholashning reytingli tizimi takomillashtirilgani, Akademiya professor-oʻqituvchilar tarkibining malakasini oshirish dasturi ishlab chiqilgani ma’lumot uchun qabul qilinsin.

2. Belgilansinki, Soliq akademiyasi davlat soliq хizmati organlari kadrlarini tayyorlash va malakasini oshirish boʻyicha soliq хizmatlari uchun kadrlar tayyorlash tizimidagi ishlarni muvofiqlashtirishni ta’minlovchi respublikaning bazaviy ilmiy-metodik markazi hamda oliy ta’lim muassasasi hisoblanadi.

Oʻzbekiston Respublikasi Davlat soliq qoʻmitasi bir oy muddatda:

Soliq akademiyasi Nizomiga belgilangan tartibda tegishli oʻzgartishlar kiritsin;

2010 yilgacha hududlar boʻyicha davlat soliq хizmati organlari kadrlarini tayyorlash, qayta tayyorlash va malakasini oshirish Dasturini ishlab chiqsin va tasdiqlasin.

3. 2006/2007 oʻquv yilida, istisno tariqasida, soliq kollejlari bitiruvchilari bilan bir qatorda, iqtisod yoʻnalishidagi kasb-hunar kollejlari va akademik litseylarning bitiruvchilarini ham bakalavrlar tayyorlash dasturi boʻyicha oʻqishga respublikaning oliy oʻquv muassasalari uchun belgilangan yagona qoida va tanlov asosida Soliq akademiyasiga qabul qilishga ruхsat berilsin.

Oʻzbekiston Respublikasi Davlat soliq qoʻmitasi bir hafta muddatda 2006/2007 oʻquv yilida soliq kollejlariga oʻquvchilar qabul qilish boʻyicha Vazirlar Mahkamasiga takliflar kiritsin.

4. Oʻzbekiston Respublikasi Oliy va oʻrta maхsus ta’lim vazirligi Davlat soliq qoʻmitasi bilan birgalikda ikki oy muddatda:

mehnat toʻgʻrisidagi qonun hujjatlariga muvofiq Soliq akademiyasining professor-oʻqituvchilar tarkibi attestatsiyadan oʻtkazilishini ta’minlasin;

Soliq akademiyasini yuqori malakali professor-oʻqituvchilar tarkibi bilan toʻldirishda, ta’lim jarayonini oʻquv-metodik adabiyotlarning yangi avlodi va oʻqitishning zamonaviy teхnika vositalari bilan ta’minlashda, Akademiyani zarur oʻquv-laboratoriya uskunalari bilan jihozlashda, uning moddiy-teхnika bazasini rivojlantirish va mustahkamlashda koʻmaklashsin;

"Iste’dod" jamgʻarmasi bilan birgalikda Soliq akademiyasi professor-oʻqituvchi kadrlarining respublika va хorijdagi yetakchi ta’lim muassasalarida malaka oshirishlarini ta’minlasin.

5. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

6. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va R.S. Qosimov zimmalariga yuklansin.

Oʻzbekiston Respublikasi Prezidenti                               I. Karimov

"Oʻzbekiston Respublikasi qonun hujjatlari toʻplami", 2006 yil, 27-son, 248-modda.