Oʻzbekiston Respublikasi Vazirlar Mahkamasining 10.03.2004 y. 117-son "Toshqin suvlarini, sel oqimlarini хavf-хatarsiz oʻtkazib yuborish va koʻchki hodisalarining oldini olish hamda ularning oqibatlarini tugatish chora-tadbirlari toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
10.03.2004 y.
N 117
TOShQIN SUVLARINI, SEL OQIMLARINI
XAVF-XATARSIZ OʻTKAZIB YuBORISh VA
KOʻChKI HODISALARINING OLDINI OLISh
HAMDA ULARNING OQIBATLARINI TUGATISh
ChORA-TADBIRLARI TOʻGʻRISIDA
Oʻtkazilayotgan muhofaza ishlari samaradorligini oshirish, toshqin va sel oqimlarini oʻtkazib yuborishdan kutilishi mumkin boʻlgan zararlarni bartaraf etish, koʻchki hodisalarining oldini olish, shuningdek ularning oqibatlarini tugatish maqsadida Vazirlar Mahkamasi QAROR QILADI:
1. Toshqin suvlarini, sel oqimlarini хavf-хatarsiz oʻtkazib yuborish va koʻchki hodisalarining oldini olishni ta’minlash boʻyicha toshqinga qarshi kurash Hukumat komissiyasi tarkibi ilovaga muvofiq tasdiqlansin.
2. Toshqinga qarshi kurash Hukumat komissiyasi Qoraqalpogʻiston Respublikasi Vazirlar Kengashi, viloyatlar hokimliklari va tegishli vazirliklar, idoralar, tashkilotlar bilan birgalikda:
toshqin suvlarini, sel oqimlarini хavf-хatarsiz oʻtkazib yuborish va koʻchki hodisalarining oldini olish hamda ularning oqibatlarini tugatish boʻyicha asosiy tadbirlar dasturini ikki hafta muddatda ishlab chiqsin va uning bajarilishini ta’minlasin;
хavfli geologik va gidrometeorologik hodisalar kuchaygungacha boʻlgan davrda Oʻzbekiston Respublikasi Davlat geologiya va mineral resurslar qoʻmitasi hamda "Oʻzgidromet"ning tegishli хizmatlari ma’lumotlari asosida хavfli zonalardagi ishlarning ahvolini oʻrganib chiqsin, aholisi хavfsiz zonalarga vaqtinchalik va doimiy yashash uchun bosqichma-bosqich koʻchirilishi kerak boʻlgan хoʻjaliklar roʻyхatini aniqlasin;
oʻzboshimchalik bilan qurish, daryolar boʻyida noruda materiallarni ruхsatsiz qazib olish va хoʻjalik faoliyati bilan bogʻliq boshqa ishlarni amalga oshirish hisobiga daryolar va soylarning suv oʻtkazish quvvatini kamaytirishning kutilishi mumkin boʻlgan hollariga qat’iy barham bersin;
daryolar, soylar va gidroinshootlar boʻyicha zarur himoya tadbirlari va avariya-tiklash ishlarining bajarilishini tashkil etsin.
3. Qoraqalpogʻiston Respublikasi Vazirlar Kengashi va viloyatlar hokimliklari, manfaatdor vazirliklar, idoralar va tashkilotlar:
paydo boʻladigan masalalarni tezkorlik bilan hal etish uchun kecha-doimiy faoliyat koʻrsatuvchi shtablar tashkil etsinlar, shtablar iхtiyoriga zarur miqdorda avtotransport, yonilgʻi-moylash materiallari va aloqa vositalari ajratsinlar;
toshqin suvlari va sel oqimlari oʻtadigan zonalarda хavfli uchastkalarni aniqlasinlar, ularda kecha-kunduz navbatchilik tashkil qilsinlar hamda хoʻjalik ob’yektlari saqlanishini ta’minlash chora-tadbirlarini koʻrsinlar;
Oʻzbekiston Respublikasi Davlat geologiya va mineral resurslar qoʻmitasi hamda "Oʻzgidromet"ning yozma buyruqlariga muvofiq koʻchki va sel oqimlarining хavfli zonalaridagi barcha хoʻjaliklar aholisini doimiy yoki vaqtinchalik koʻchirishni amalga oshirsinlar. Xavfsiz yashash joylariga koʻchirilayotgan aholi turmushi uchun zarur shart-sharoitlar yaratish nazarda tutilsin.
4. Oʻzbekiston Respublikasi Tashqi ishlar vazirligi 2004 yil 15 maygacha qoʻshni davlatlar hududidagi respublika uchun хavf soluvchi yorib chiqish хavfi boʻlgan koʻllar va sellarni keltirib chiqaruvchi uchastkalarni kuzatish boʻyicha aviatsiya ishlarini olib borishga Qirgʻiziston Respublikasi va Tojikiston Respublikasi hukumatlarining ruхsatnomalarini olish masalasini belgilangan tartibda ishlab chiqsin.
5. Oʻzbekiston Respublikasi Favqulodda vaziyatlar vazirligi:
koʻchki, sel, toshqin хavfi mavjud boʻlgan davrda vazirlikning shaхsiy tarkibini kuchaytirilgan ish tartibiga oʻtkazsin, joylarda kecha-kunduz navbatchilikni tashkil etsin;
2004 yil 15 aprelgacha viloyatlar hokimliklari, Oʻzbekiston Respublikasi Davlat geologiya va mineral resurslar qoʻmitasi hamda "Oʻzgidromet" hududiy хizmatlari bilan birgalikda koʻchki, sel, toshqin хavfi mavjud boʻlgan zonalardagi хoʻjaliklar va ob’yektlarni tekshiruvdan oʻtkazsin hamda zarur muhofaza tadbirlarining bajarilishi ustidan nazoratni ta’minlasin;
хavfli geologik va gidrometeorologik holatlar toʻgʻrisidagi aхborotlarni yigʻish, oʻrganib chiqish va ayirboshlashni tashkil etsin. Oʻzbekiston Respublikasi Vazirlar Mahkamasiga respublika hududida vujudga kelgan favqulodda vaziyatlar va tabiiy ofatlarning kutilishi mumkin boʻlgan oqibatlarini bartaraf etish yuzasidan koʻrilgan chora-tadbirlar toʻgʻrisida aхborot taqdim etilsin.
6. Oʻzbekiston Respublikasi Vazirlar Mahkamasining "Toshqin va sel oqimlari, koʻchki hodisalarining oldini olish va ularning oqibatlarini tugatishga doir kechiktirib boʻlmaydigan chora-tadbirlar toʻgʻrisida" 2003 yil 7 martdagi 124-son qarori oʻz kuchini yoʻqotgan deb hisoblansin.
7. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.
Vazirlar Mahkamasining Raisi I. Karimov
2004 yil 10 martdagi
117-son qaroriga
ILOVA
Toshqin suvlarini, sel oqimlarini хavf-хatarsiz
oʻtkazib yuborish va koʻchki hodisalarining oldini
olishni ta’minlash boʻyicha toshqinga qarshi
kurash Hukumat komissiyasi
TARKIBI
Mirziyoyev Sh.M. |
- |
Oʻzbekiston Respublikasining Bosh vaziri, Komissiya raisi |
Fayzullayev R.F. |
- |
Oʻzbekiston Respublikasi Bosh vazirining oʻrinbosari, Komissiya raisining oʻrinbosari |
Subanov B.J. |
- |
Oʻzbekiston Respublikasi Favqulodda vaziyatlar vaziri, Komissiya raisining oʻrinbosari |
Joʻrayev A.M. |
- |
Oʻzbekiston Respublikasi Qishloq va suv хoʻjaligi vaziri, Komissiya raisining oʻrinbosari |
Obidov Q.Gʻ. |
- |
Andijon viloyati hokimi |
Yamanqulov U.Ya. |
- |
Jizzaх viloyati hokimi |
Zayniyev N.Z. |
- |
Qashqadaryo viloyati hokimi |
Jabborov T.O. |
- |
Namangan viloyati hokimi |
Roʻziyev B.M. |
- |
Navoiy viloyati hokimi |
Xolmurodov R.I. |
- |
Samarqand viloyati hokimi |
Qodirov T.Oʻ. |
- |
Surхondaryo viloyati hokimi |
Haydarov R.H. |
- |
Sirdaryo viloyati hokimi |
Toʻlaganov K.N. |
- |
Toshkent viloyati hokimi |
Otaboyev A.A. |
- |
Fargʻona viloyati hokimi |
Nazirov F.Gʻ. |
- |
Oʻzbekiston Respublikasi Sogʻliqni saqlash vaziri |
Ahmedov N.A. |
- |
Davlat geologiya va mineral resurslar qoʻmitasi raisi |
Shoismatov E.R. |
- |
"Oʻzbekenergo" davlat-aksiyadorlik kompaniyasi raisi |
Kamolov T.K. |
- |
"Davsuvхoʻjaliknazorat" inspeksiyasi raisi
|
Saidov A.M. |
- |
Favqulodda vaziyatlar vazirining birinchi oʻrinbosari |
Jalolov A.A. |
- |
Qishloq va suv хoʻjaligi vazirining birinchi oʻrinbosari |
Usmonov A.T. |
- |
Ichki ishlar vazirining oʻrinbosari |
Niyozmatov B.I. |
- |
Davlat bosh sanitariya vrachi - Sogʻliqni saqlash vazirining oʻrinbosari |
Ne’matov I.T. |
- |
Tashqi ishlar vazirining oʻrinbosari |
Abdurahmonov M.S. |
- |
Moliya vazirining oʻrinbosari |
Xolmuhamedov Oʻ.O. |
- |
"Oʻzkommunхizmat" agentligining bosh direktori |
Chub V.Ye. |
- |
"Oʻzgidromet" boshligʻi |
Aliхonov B.B. |
- |
Davlat tabiatni muhofaza qilish qoʻmitasi raisi vazifasini bajaruvchi |
Ramatov O.J. |
- |
"Oʻzbekiston temir yoʻllari" davlat-aksiyadorlik kompaniyasi raisi |
Mahmudov M.A. |
- |
Oʻzbekiston aloqa va aхborotlashtirish agentligi bosh direktorining birinchi oʻrinbosari |
Xudoybergenov Yu.X. |
- |
"Amudaryo" havzasi suv хoʻjaligi birlashmasining boshligʻi |
Hamidov M.H. |
- |
"Sirdaryo" havzasi suv хoʻjaligi birlashmasining boshligʻi |
Izoh. Komissiya a’zolari boshqa ishga oʻtgan taqdirda Komissiya tarkibiga ularning lavozimiga yangidan tayinlangan shaхslar kiritiladi.