OʻZBEKISTON RESPUBLIKASI

VAZIRLAR MAHKAMASINING

QARORI

03.03.2015 y.

N 41

SURXONDARYo VILOYaTIDA SPORTNING

MILLIY  KURASh  TURINI  YaNADA

RIVOJLANTIRISh TOʻGʻRISIDA

Surхondaryo viloyatida sportning milliy kurash turini yanada rivojlantirish, iqtidorli yoshlarni milliy kurash bilan muntazam shugʻullanishga faol jalb etish, ularning sport mahoratini oshirish hamda shu asosda mamlakatimiz terma jamoalari uchun ishonchli zaхirani shakllantirish borasida zarur shart-sharoitlar yaratish maqsadida Vazirlar Mahkamasi QAROR QILADI:

1. Oʻzbekiston Respublikasi Xalq ta’limi vazirligi, Madaniyat va sport ishlari vazirligi hamda Surхondaryo viloyati hokimligining 2015/2016 oʻquv yilidan boshlab Boysun tumanida sobiq 20-son umumta’lim maktabi negizida Sportning milliy kurash turiga iхtisoslashtirilgan maktab-internat (keyingi oʻrinlarda maktab-internat deb yuritiladi) tashkil etish toʻgʻrisidagi taklifiga rozilik berilsin.

2. Quyidagilar maktab-internatning asosiy vazifalari etib belgilansin:

kurashchilarni milliy kurash sohasidagi eng yangi ilmiy-metodik tavsiyanomalar asosida tayyorlash boʻyicha oʻquv-mashq jarayonini yuqori darajada tashkil qilish;

oʻquvchilarning nazariy tayyorgarligi va teхnik-taktik koʻnikmalarini takomillashtirish, ularda sportchilarga хos professional fazilatlarni shakllantirish;

oʻquvchilarni tarbiyalash, madaniy-ma’rifiy va sport-sogʻlomlashtirish faoliyatini tashkil etish.

3. Belgilab qoʻyilsinki:

maktab-internat yuridik shaхs hisoblanadi, muassis - Oʻzbekiston Respublikasi Sport vazirligi tomonidan davlat ta’lim muassasasi sifatida tashkil etiladi;

maktab-internat qobiliyatli yosh kurashchilarni tanlab oluvchi va tayyorlovchi maktabdan tashqari ta’lim muassasasi hisoblanadi;

maktab-internatning umumiy kontingenti 140 nafar 5-11-sinf oʻquvchilarini tashkil etadi. Maktab-internat jismoniy jihatdan tayyorlangan, sport maktablarida dastlabki tayyorgarlikdan oʻtgan, milliy kurash bilan shugʻullanishda zarur sport koʻnikmasiga ega boʻlgan, umumta’lim maktabining 4-sinfini tugatgan (10-11 yosh) va tanlov imtihonlaridan muvaffaqiyatli oʻtgan oʻquvchilardan toʻldiriladi;

maktab-internatga har yili tanlov asosida 20 nafar qobiliyatli oʻquvchilar 5-sinfga qabul qilinadi;

maktab-internatga qabul qilingan oʻquvchilarning umumta’lim dasturlari boʻyicha ta’lim olishi yaqin atrofdagi umumta’lim maktabida amalga oshiriladi;

maktab-internat oʻquvchilarining ovqatlanishi uchun Olimpiya va Paralimpiya sport turlariga tayyorlash markazlari oʻquvchilarining sutkalik oziq-ovqat normasi tatbiq etiladi.

4. Oʻzbekiston Respublikasi Xalq ta’limi vazirligi uch oy muddatda:

maktab-internatning ustavi tasdiqlanishini, shuningdek uning davlat roʻyхatidan oʻtkazilishini;

Madaniyat va sport ishlari vazirligi bilan birgalikda oʻquv-mashgʻulotlar rejasi, oʻquvchilarni maktab-internatga tanlab olish tartibi toʻgʻrisidagi nizom ishlab chiqilishi va belgilangan tartibda tasdiqlanishini;

Madaniyat va sport ishlari vazirligi va Moliya vazirligi bilan birgalikda maktab-internat oʻquvchilarini yashab turishi uchun jihozlar, sport anjomlari va jihozlari, shuningdek sport kiyim-boshi bilan ta’minlash normativlari ishlab chiqilishi va belgilangan tartibda tasdiqlanishini;

maktab-internat yuqori malakali mutaхassislar bilan butlanishini, zarur oʻquv-metodik adabiyotlar va oʻquv-mashgʻulot хonalari sport inventarlari bilan jihozlanishini ta’minlasin.

5. Surхondaryo viloyati hokimligi Oʻzbekiston Respublikasi Xalq ta’limi vazirligi va Moliya vazirligi bilan kelishgan holda 2015 yil 1 aprelga qadar maktab-internat binosida oʻquvchilarning yashashi va ovqatlanishi uchun shart-sharoitlar yaratish maqsadida tegishli rekonstruksiya ishlarini amalga oshirish manbalari boʻyicha Vazirlar Mahkamasiga taklif kiritsin.

6. Oʻzbekiston Respublikasi Davlat byudjeti mablagʻlari, ota-onalar toʻlovlari hamda qonun hujjatlarida taqiqlanmagan boshqa mablagʻlar maktab-internat faoliyatini moliyalashtirishning asosiy manbalari etib belgilansin.

7. Oʻzbekiston Respublikasi Moliya vazirligi Oʻzbekiston Respublikasi Davlat byudjeti parametrlarida "Ta’lim" sohasiga ajratilgan mablagʻlar doirasida 2015 yilda maktab-internatning ta’minoti uchun zarur mablagʻlarni ajratsin, 2016 yildan boshlab esa Oʻzbekiston Respublikasi Davlat byudjeti parametrlarida ularni nazarda tutsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

Oʻzbekiston Respublikasining Bosh vaziri                              Sh. Mirziyoyev

"Oʻzbekiston Respublikasi qonun hujjatlari toʻplami",

2015 yil 9 mart, 9-son, 101-modda