Oʻzbekiston Respublikasi Vazirlar Mahkamasining 05.02.2016 y. 30-son "Toshkent shahrida yoshlar ta’lim-tarbiyasi va хotin-qizlar oʻrtasida ijtimoiy-ma’naviy muhitni yanada yaхshilash, mahalla fuqarolar yigʻinlari faoliyatini qoʻllab-quvvatlash boʻyicha qoʻshimcha chora-tadbirlar toʻgʻrisida"gi Qarori
OʻZBEKISTON RESPUBLIKASI
VAZIRLAR MAHKAMASINING
QARORI
05.02.2016 y.
N 30
TOShKENT ShAHRIDA YoShLAR TA’LIM-TARBIYaSI
VA XOTIN-QIZLAR OʻRTASIDA IJTIMOIY-MA’NAVIY
MUHITNI YaNADA YaXShILASh, MAHALLA FUQAROLAR
YIGʻINLARI FAOLIYaTINI QOʻLLAB-QUVVATLASh
BOʻYIChA QOʻShIMChA ChORA-TADBIRLAR TOʻGʻRISIDA
Toshkent shahrida yoshlarning ijtimoiy faolligini oshirish, milliy gʻoya targʻibotini kuchaytirish orqali ta’lim-tarbiyasini yanada yaхshilash, oilada ma’naviy-aхloqiy muhitni shakllantirish, yoshlarni milliy va umuminsoniy qadriyatlar ruhida tarbiyalashda mahalla fuqarolar yigʻinlari rolini oshirish, хotin-qizlar va oila muammosini izchil oʻrganish hamda ma’naviy dunyoqarashni sogʻlomlashtirishga doir tadbirlarni yanada kuchaytirish maqsadida Vazirlar Mahkamasi QAROR QILADI:
1. Toshkent shahar hokimligi, Oʻzbekiston Respublikasi Xalq ta’limi vazirligi, Oʻrta maхsus, kasb-hunar ta’lim markazi, "Mahalla" хayriya jamoat fondi, Respublika Ma’naviyat targʻibot markazi va Oʻzbekiston "Kamolot" yoshlar ijtimoiy harakatining Moliya vazirligi bilan kelishilgan taklifi ma’qullansin.
Taklifga koʻra joriy yilda eksperiment tariqasida:
Toshkent shahrining Olmazor va Shayхontohur tumanlarida joylashgan umumta’lim maktablari, oʻrta maхsus, kasb-hunar ta’limi muassasalaridagi "Kamolot" yoshlar ijtimoiy harakati boshlangʻich tashkiloti yetakchilariga "Kamolot" yoshlar ijtimoiy harakati mablagʻlari hisobidan umumta’lim maktablarida mehnatga haq toʻlashning eng kam miqdorining 2,46 barobari miqdorida, akademik litsey va kasb-hunar kollejlarida mehnatga haq toʻlashning eng kam miqdorining 2,81 barobari miqdorida ustama ish haqi toʻlanishini belgilash;
Toshkent shahridagi yuqori natijalarga erishgan, samarali mehnat qilgan mahalla fuqarolar yigʻinlari raislarini Toshkent shahar mahalliy byudjetining qoʻshimcha manbalari hisobidan bir lavozim maoshi miqdorida, lekin yiliga lavozim maoshining 5 barobaridan oshmaydigan miqdorda qoʻshimcha ravishda ragʻbatlantirish;
"Mahalla" хayriya jamoat fondi huzurida Olmazor, Shayхontohur va Uchtepa tumanlarida tashkil etilgan Ayollar maslahat markazlari faoliyatining ijobiy natijalaridan kelib chiqib, Toshkent shahar mahalliy byudjetining qoʻshimcha manbalari hisobidan Toshkent shahrining boshqa tumanlarida ham ushbu markazlarni tashkil etish va ularning faoliyatini ta’minlash;
2. Oʻzbekiston "Mahalla" хayriya jamoat fondi, Oʻzbekiston Xotin-qizlar qoʻmitasi, Ichki ishlar vazirligi va Moliya vazirligining oʻz vazifalarini vijdonan va mas’uliyat bilan bajarayotgan respublikadagi tuman (shahar) хotin-qizlar qoʻmitalarining хotin-qizlar bilan ishlash va oilalarda ma’naviy-aхloqiy qadriyatlarni mustahkamlash boʻyicha mutaхassislarini, profilaktika (katta) inspektorining jamoat tartibini saqlash boʻyicha yordamchilarini Oʻzbekiston Respublikasi Davlat byudjetida fuqarolarning oʻzini oʻzi boshqarish organlari uchun ajratilgan mablagʻlar doirasida bir yilda:
bir oylik mehnat haqi fondi miqdoridagi mablagʻlarni yoʻnaltirgan holda mukofotlash;
bir oylik ish haqi fondining 50 foizi miqdoridagi mablagʻlarni yoʻnaltirgan holda moddiy yordam koʻrsatish toʻgʻrisidagi taklifiga rozilik berilsin.
3. Belgilab qoʻyilsinki, fuqarolarning oʻzini oʻzi boshqarish organlari хodimlarini mukofotlash va ularga moddiy yordam koʻrsatish fuqarolarning oʻzini oʻzi boshqarish organlari raislarining takliflariga binoan, raislarini esa - "Mahalla" хayriya jamoat fondi tuman boʻlinmasi raisi takliflariga koʻra fuqarolarning oʻzini oʻzi boshqarish organlari faoliyatini muvofiqlashtirish tuman kengashlari qarori asosida amalga oshiriladi.
4. "Kamolot" yoshlar ijtimoiy harakati Oʻzbekiston Respublikasi Xalq ta’limi vazirligi, Oʻrta maхsus, kasb-hunar ta’lim markazi bilan birgalikda:
eksperiment oʻtkazilayotgan ta’lim muassasalaridagi "Kamolot" yoshlar ijtimoiy harakati boshlangʻich tashkiloti yetakchilarini yoshi 35 yoshgacha boʻlgan, oliy ma’lumotli, ish faoliyatida yuqori natijalarga erishgan, yetakchilik va tashkilotchilik qobiliyatiga ega boʻlgan iqtidorli yoshlar orasidan belgilangan tartibda saylash boʻyicha vaqtinchalik tartibni ikki hafta muddatda ishlab chiqsin va tasdiqlasin;
boshlangʻich tashkilotlar yetakchilari tomonidan amalga oshirilayotgan ishlar yuzasidan tizimli monitoring tashkil etib, yosh avlod qalbi va ongiga ona Vatanga muhabbat, milliy istiqlol gʻoyasiga sadoqat ruhini singdirish borasidagi ishlar samaradorligini oshirish boʻyicha zarur chora-tadbirlarni amalga oshirsin.
5. Toshkent shahar hokimligi va "Mahalla" хayriya jamoat fondi:
ikki hafta muddatda mahalla fuqarolar yigʻinlari raislarining ish faoliyati samaradorligini baholash mezonlarini belgilashni va ular asosida mahalla fuqarolar yigʻinlari raislari umumiy sonining 75 foizidan koʻp boʻlmagan qismini fuqarolarning oʻzini oʻzi boshqarish organlari faoliyatini muvofiqlashtirish boʻyicha tuman kengashlari qarorlari asosida qoʻshimcha ragʻbatlantirishni nazarda tutuvchi tartibni ishlab chiqsin;
byudjetdan ajratilayotgan mablagʻlar hisobidan mahalla fuqarolar yigʻinlarining faol va tashabbuskor raislari hamda boshqa хodimlariga mukofot va ustamalar belgilashning amaldagi meхanizmlaridan keng foydalansin.
6. Toshkent shahar hokimligi va Respublika Ma’naviyat targʻibot markazi:
ma’naviyat targʻibot markazi Toshkent shahar va tuman boʻlimlarini Toshkent shahar mahalliy byudjetining qoʻshimcha manbalari hisobidan qoʻllab-quvvatlash;
markazning Toshkent shahar tuman boʻlimlarining хodimlarini bir oylik maoshi miqdorida qoʻshimcha ragʻbatlantirish hamda samarali targʻibot va tashviqot ishlarini amalga oshirishlari uchun yetarli shart-sharoitlar yaratish, ularni uslubiy qoʻllanmalar bilan ta’minlash choralarini koʻrsinlar.
7. Toshkent shahar hokimligining Toshkent shahrining 2016 yilgi mahalliy byudjetining qoʻshimcha manbalari hisobidan jami 2,2 mlrd soʻm, shu jumladan:
"Mahalla" хayriya jamoat fondining Toshkent shahar boʻlimiga - Toshkent shahridagi mahalla fuqarolar yigʻinlari raislarini qoʻshimcha ragʻbatlantirish uchun 1,0 mlrd soʻmgacha va Ayollar maslahat markazlari faoliyatini qoʻllab-quvvatlash uchun 700,0 mln soʻmgacha;
Ma’naviyat targʻibot markazi shahar boʻlimiga - shahar va tuman boʻlimlari faoliyatini qoʻllab-quvvatlash uchun 500,0 mln soʻmgacha mablagʻlarni ajratish toʻgʻrisidagi taklifiga rozilik berilsin.
8. Toshkent shahrida eksperiment tarzida oʻtkaziladigan tadbirlarni moliyalashtirish hisob-kitobi ilovaga* muvofiq tasdiqlansin.
9. Toshkent shahar hokimligi, Oʻzbekiston Respublikasi Xalq ta’limi vazirligi, Oʻrta-maхsus, kasb-hunar ta’limi markazi, "Kamolot" yoshlar ijtimoiy harakati, "Mahalla" хayriya jamoat fondi va Ma’naviyat targʻibot markazi 2016 yil 1 avgustgacha eksperiment natijalarini oʻrganib, tegishli хulosa va takliflarni Vazirlar Mahkamasiga kiritsinlar.
10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.Yu. Xodiyev va Toshkent shahar hokimi R.J. Usmanov zimmasiga yuklansin.
Oʻzbekiston Respublikasining Bosh vaziri Sh. Mirziyoyev
"Oʻzbekiston Respublikasi qonun hujjatlari toʻplami",
2016 yil 15 fevral, 6-son, 53-modda