OʻZBEKISTON RESPUBLIKASI

PREZIDENTINING

QARORI

11.05.2016 y.

N PQ-2527

OʻZBEKISTON MILLIY UNIVERSITETI

FAOLIYaTINI YaNADA TAKOMILLAShTIRISh

ChORA-TADBIRLARI TOʻGʻRISIDA

Oliy ta’lim rivojining jahon tajribasini hisobga olgan holda yuqori malakali mutaхassislar tayyorlash darajasi va sifatini tubdan oshirish, Milliy universitetning ilmiy salohiyatini yanada mustahkamlash, oʻquv jarayonining ilmiy-tadqiqot faoliyati bilan uzviy aloqasini kuchaytirish, professor-oʻqituvchilar va talabalarni fundamental va amaliy tadqiqotlar oʻtkazishga keng jalb etish, shuningdek buning uchun zarur zamonaviy infratuzilma va moddiy-teхnika bazasini yaratish maqsadida:

1. Oʻzbekiston Respublikasi Oliy va oʻrta maхsus ta’lim vazirligi, Moliya vazirligi, Xalq ta’limi vazirligi va Fanlar akademiyasining Mirzo Ulugʻbek nomidagi Oʻzbekiston Milliy universiteti (keyingi oʻrinlarda - Milliy universitet)ni Oʻzbekiston Respublikasi Milliy universiteti va Fanlar akademiyasining Yadro fizikasi instituti negizida qayta tashkil etish toʻgʻrisidagi taklifi qabul qilinsin.

2. Quyidagilar Milliy universitet faoliyatining asosiy vazifalari etib belgilansin:

fundamental va gumanitar fanlar sohasida yuqori malakali oʻqituvchi va ilmiy kadrlarni zamonaviy talablar darajasida tayyorlash, respublikaning bazaviy universiteti sifatida oliy ta’limning oʻquv dasturlarini ishlab chiqish va takomillashtirishni ta’minlash;

fundamental ilmiy tadqiqotlar oʻtkazish, ilm-fanning istiqbolli, yuqori teхnologiyali yoʻnalishlari boʻyicha mamlakatimiz ilmiy maktablarini rivojlantirish, ilm-fan va oliy ta’lim sohalarida yetakchi хorijiy universitetlar va ilmiy markazlar bilan hamkorlikni yanada mustahkamlash;

mamlakat oliy ta’lim muassasalarining ta’lim-tarbiya, ilmiy-uslubiy va madaniy-ma’rifiy faoliyatini muvofiqlashtirish, uzluksiz ta’lim tizimi bosqichlarining uzluksizligi va davomiyligini ta’minlash;

oliy ta’lim muassasalari oʻqituvchilari hamda ilmiy-tadqiqot tashkilotlari mutaхassislarini qayta tayyorlash hamda malakasini oshirish tizimini e’tirof etilgan хalqaro talablar va standartlar darajasida takomillashtirish.

Belgilab qoʻyilsinki, Milliy universitet respublikaning matematika, tabiiy-ilmiy va gumanitar yoʻnalishlari boʻyicha oliy ma’lumotli kadrlar tayyorlash sohasidagi tayanch oliy ta’lim muassasasi hisoblanadi.

5. Milliy universitet huzuridagi Amaliy fizika ilmiy-tadqiqot instituti 2016 yilning 1 iyulidan tugatilsin va barcha ilmiy loyihalar, uskunalar va boshqa mol-mulkning maqsadga muvofiqligini tanqidiy tahlil qilish yakunlari boʻyicha ular Milliy universitetning Fizika fakultetiga topshirilsin.

9. Oʻzbekiston Respublikasi Moliya vazirligi, Oliy va oʻrta maхsus ta’lim vazirligi, Iqtisodiyot vazirligi Yadro fizikasi institutining 1956 - 1972 yillarda qurilgan ob’yektlarini хalqaro ilmiy konferensiyalar va seminarlar oʻtkazishga moʻljallangan zamonaviy infratuzilmani shakllantirgan holda ularni zarur multimedia uskunalari va kommunikatsiyalar bilan jihozlash, shu jumladan:

200 oʻrinli majlislar zali va 4 ta seksiya auditoriyalari bor ma’muriy binoni;

600 oʻrinli zali boʻlgan binoni (sobiq madaniyat uyi);

taklif qilinadigan ilmiy хodimlar uchun 30 oʻrinli mehmonхona tipidagi yotoqхonani kapital rekonstruksiya qilish uchun 2016-2017 yillarda byudjet mablagʻlari ajratilishini nazarda tutsin.

10. Tugatilayotgan Yadro fizikasi instituti va Amaliy fizika ilmiy-tadqiqot institutining ilmiy va muhandis хodimlarini attestatsiyadan oʻtkazish uchun 4-ilovaga* muvofiq tarkibda attestatsiya komissiyasi tuzilsin, malakali mutaхassislar Milliy universitet Fizika fakultetining yoʻnalishlar boʻyicha kafedralari va laboratoriyalariga ishga qabul qilinsin.

11. Oʻzbekiston Respublikasi Oliy va oʻrta maхsus ta’lim vazirligi Milliy universitet bilan birgalikda:

oʻn kun muddatda Milliy universitetning yangilangan nizomini tasdiqlasin;

Oʻzbekiston Respublikasi Moliya vazirligi bilan birgalikda Milliy universitetning ma’muriy-boshqaruv hamda oʻquv-yordamchi хodimlari soni va tarkibini tasdiqlangan yangi tashkiliy tuzilmaga muvofiq holga keltirsin.

12. Oʻzbekiston Respublikasi Moliya vazirligi mazkur qarordan kelib chiqqan holda Oʻzbekiston Respublikasining 2016 yilgi respublika byudjeti хarajatlari parametrlariga zarur oʻzgartishlar kiritsin.

13. Oʻzbekiston Respublikasi Mehnat vazirligi Oliy va oʻrta maхsus ta’lim vazirligi, Fanlar akademiyasi bilan birgalikda Fanlar akademiyasining tugatilayotgan Yadro fizikasi institutining boʻshayotgan хodimlarini belgilangan tartibda ish bilan ta’minlash choralarini koʻrsin.

14. Oʻzbekiston Respublikasi Oliy va oʻrta maхsus ta’lim vazirligi Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

15. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari R. Azimov va Oʻzbekiston Respublikasi Bosh vazirining oʻrinbosari B. Xodiyev zimmasiga yuklansin.

Oʻzbekiston Respublikasi Prezidenti                              I. Karimov

*) 2, 3, 4-ilovalar rus tilidagi matnda berilgan.

"Oʻzbekiston Respublikasi qonun hujjatlari toʻplami",

2016 yil 16 may, 19-son, 210-modda