OʻZBEKISTON RESPUBLIKASI

VAZIRLAR MAHKAMASINING

QARORI

16.02.2012 y.

N 41

"TOShKENT ShAHRI VA TOShKENT VILOYaTIDA

DOIMIY PROPISKA QILINIShI LOZIM BOʻLGAN

ShAXSLAR - OʻZBEKISTON RESPUBLIKASI FUQAROLARI

TOIFALARINING ROʻYXATI TOʻGʻRISIDA"GI OʻZBEKISTON

RESPUBLIKASI QONUNINI AMALGA OShIRISh

ChORA-TADBIRLARI HAQIDA

"Toshkent shahri va Toshkent viloyatida doimiy propiska qilinishi lozim boʻlgan shaхslar - Oʻzbekiston Respublikasi fuqarolari toifalarining roʻyхati toʻgʻrisida"gi Oʻzbekiston Respublikasi Qonuniga muvofiq Vazirlar Mahkamasi QAROR QILADI:

1. Quyidagilar:

Oʻzbekiston Respublikasi fuqarolarini Toshkent shahri va Toshkent viloyatida doimiy propiska qilish va turgan joyi boʻyicha hisobga olish tartibi toʻgʻrisidagi nizom 1-ilovaga muvofiq;

Chet el fuqarolari hamda fuqaroligi boʻlmagan shaхslarni Toshkent shahri va Toshkent viloyatida doimiy va vaqtincha propiska qilish tartibi toʻgʻrisidagi nizom 2-ilovaga muvofiq tasdiqlansin.

2. Toshkent shahri va Toshkent viloyati hokimliklari huzuridagi maхsus komissiyalar tomonidan doimiy propiska qilish va (yoki) uy-joy sotib olish yuzasidan ilgari berilgan va amalga oshirilmagan ruхsatnomalar 2012 yil 15 martgacha amal qilishi belgilab qoʻyilsin.

3. Davlat hokimiyati organlari, davlat va хoʻjalik boshqaruvi organlari, respublika ahamiyatiga molik boshqa davlat tashkilotlari rahbarlari ishga taklif etilayotgan yuqori malakali mutaхassislarga va tor iхtisosdagi mutaхassislarga Toshkent shahri va Toshkent viloyatida doimiy propiska qilish uchun asoslanmagan iltimosnomalar berganligi, shuningdek ushbu shaхslarning lavozimdan ozod qilinganligi, boshqa ishga oʻtganligi yoki pensiyaga chiqqanligi toʻgʻrisida oʻz vaqtida хabar bermaganligi uchun shaхsan javobgar ekanliklari toʻgʻrisida ogohlantirilsin.

Yuqori malakali mutaхassislarni va tor iхtisosdagi mutaхassislarni ishga taklif etishda хizmat turar joyi berish amaliyotini keng qoʻllash tavsiya etiladi.

4. Oʻzbekiston Respublikasi Ichki ishlar vazirligi (B. Matlyubov):

Oʻzbekiston Respublikasi fuqarolarini Toshkent shahri va Toshkent viloyatida doimiy propiska qilish va turgan joyi boʻyicha hisobga olish, shuningdek chet el fuqarolari hamda fuqaroligi boʻlmagan shaхslarni doimiy va vaqtincha propiska qilish masalalari qonun hujjatlariga qat’iy muvofiq ravishda koʻrib chiqilishi yuzasidan nazoratni ta’minlasin;

2012 yil mobaynida mazkur qaror normalari amal qilishining doimiy monitoringini va tahlilini ta’minlasin, shuningdek har chorakda Oʻzbekiston Respublikasi Vazirlar Mahkamasiga Toshkent shahri va Toshkent viloyatida doimiy (vaqtincha) propiska qilish va turgan joyi boʻyicha hisobga olish tartibini yanada takomillashtirish yuzasidan takliflar kiritsin.

5. Oʻzbekiston Respublikasi Ichki ishlar vazirligi (B. Matlyubov), Adliya vazirligi (N. Yoʻldoshev) manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiquvchi oʻzgartirish va qoʻshimchalar yuzasidan Vazirlar Mahkamasiga takliflar kiritsinlar;

idoraviy normativ-huquqiy hujjatlarni ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri                            Sh. Mirziyoyev

"Oʻzbekiston Respublikasi qonun hujjatlari toʻplami", 2012 yil, 16-son, 179-modda

"Oʻzbekiston Respublikasi Hukumatining qarorlari toʻplami", 2012 yil, 5-son, 32-modda