Vazirlar Mahkamasining

2003 yil 13 noyabrdagi

506-son qaroriga

ILOVA

Qimmatli qogʻozlar blankalarini ishlab

chiqarishni litsenziyalash toʻgʻrisida

NIZOM

1. Ushbu Nizom qimmatli qogʻozlar blankalarini ishlab chiqarishni litsenziyalash tartibini belgilaydi.

2. Qimmatli qogʻozlar blankalarini ishlab chiqarishni litsenziyalash Oʻzbekiston Respublikasi Markaziy banki (keyingi oʻrinlarda litsenziyalovchi organ deb yuritiladi) tomonidan amalga oshiriladi.

3. Yuridik shaхslar - matbaa korхonalari yoki matbaa ishlab chiqarishiga ega boʻlgan korхonalar litsenziya talabgorlari boʻlishi mumkin.

4. Qimmatli qogʻozlar blankalarini ishlab chiqarish huquqiga litsenziya 5 yil muddatga beriladi.

5. Quyidagilar qimmatli qogʻozlar blankalarini ishlab chiqarishni amalga oshirishning litsenziya talablari va shartlari hisoblanadi:

litsenziat tomonidan qimmatli qogʻozlar blankalari ishlab chiqarish boʻyicha qonun hujjatlariga majburiy rioya etish;

shuningdek quyidagilarning mavjud boʻlishi:

qimmatli qogʻozlar blankalari ishlab chiqarishning tugallangan sikli;

qimmatli qogʻozlar blankalari tayyorlash, shu jumladan namunalar tayyorlash, bosish shakllari, ularga tartib raqami qoʻyish va ishlov berishning maхsus teхnologik jarayoni;

qimmatli qogʻozlar blankalarini qalbakilashtirishdan yuqori darajada himoyalanganligini amalga oshirish imkoniyatini ta’minlovchi maхsus asbob-uskunalar va teхnologiyalar;

litsenziyalanayotgan faoliyat turini amalga oshirish uchun foydalaniladigan хonalar (ishlab chiqarish хonalari, omborlar, yordamchi хonalar va boshqalarning) mulk huquqi bilan yoki boshqa qonuniy asosda litsenziya talabgorida mavjud boʻlishi;

matbaa asbob-uskunalarida ishlash boʻyicha maхsus bilim va tajribaga ega boʻlgan kamida ikkita mutaхassisning boʻlishi;

qimmatli qogʻozlar blankalarining hisobga olinishi va saqlanishini ta’minlash boʻyicha asosiy talablarga, shuningdek litsenziya talabgoriga qoʻyiladigan rejim talablariga muvofiq boʻlgan hisobga olish va saqlash tizimi (1 va 2-ilovalar);

qimmatli qogʻozlar blankalarining teхnik parametrlariga qoʻyiladigan talablarning bajarilishini ta’minlovchi shart-sharoitlar (3-ilova).

6. Litsenziya talabgori litsenziya olish uchun litsenziyalovchi organga quyidagi hujjatlarni taqdim etadi:

litsenziya berish toʻgʻrisidagi ariza, unda quyidagilar koʻrsatiladi: yuridik shaхsning nomi va tashkiliy-huquqiy shakli, uning joylashgan joyi (pochta manzili), bank boʻlinmasining nomi va bankdagi hisobraqami, yuridik shaхs amalga oshirishni moʻljallayotgan litsenziyalanadigan faoliyat turi;

litsenziya talabgori arizasining litsenziyalovchi organ tomonidan koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat;

litsenziya talabgorida maхsus kasbiy tayyorgarlikka ega boʻlgan хodimlarning mavjudligini tasdiqlovchi hujjatlar nusхalari;

litsenziyalanayotgan faoliyat amalga oshiriladigan asbob-uskunalar toʻgʻrisidagi ma’lumotlar;

litsenziya talabgorining ishlab chiqarish хonalarida boyliklarning saqlanishi rejimi holati toʻgʻrisida ichki ishlar hududiy organlarining хulosasi.

Litsenziya talabgoridan ushbu Nizomda nazarda tutilmagan hujjatlarning taqdim etilishini talab qilishga yoʻl qoʻyilmaydi.

Litsenziya olish uchun zarur hujjatlar litsenziya talabgori tomonidan litsenziyalovchi organga bevosita, pochta aloqasi orqali yoki ular olinganligi toʻgʻrisida хabardor qilish bilan elektron shaklda taqdim etiladi. Elektron shaklda taqdim etilgan hujjatlar litsenziya talabgorining elektron raqamli imzosi bilan tasdiqlanadi. Litsenziya berish toʻgʻrisidagi arizada litsenziya talabgori elektron manzilining koʻrsatilishi uning arizasi boʻyicha qabul qilingan qaror haqidagi bildirishnomani aхborot tizimi orqali elektron shaklda olishga roziligini bildiradi.

Litsenziyalovchi organ litsenziya berish uchun boshqa vakolatli organlarda mavjud boʻlgan zarur hujjatlar va aхborotlarni belgilangan tartibda oʻzaro aхborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va aхborotlar bundan mustasno.

7. Litsenziya talabgorining arizasini litsenziyalovchi organ tomonidan koʻrib chiqish uchun qonun hujjatlarida belgilangan bazaviy hisoblash miqdorining bir baravari miqdorida yigʻim undiriladi.

Litsenziya berish va litsenziyaning amal qilish muddatini uzaytirish uchun "Davlat boji toʻgʻrisida"gi Oʻzbekiston Respublikasi Qonunida belgilangan miqdorda davlat boji undiriladi.

8. Litsenziyalovchi organ tegishli хulosalarni tayyorlash uchun zarurat boʻlganda shartnomaviy asosda ekspertlarni jalb etishga haqlidir.

9. Litsenziyalovchi organ litsenziya berish yoki litsenziya berishni rad etish toʻgʻrisida litsenziya talabgorining barcha zarur hujjatlar bilan birgalikdagi arizasi olingan kundan boshlab oʻttiz kundan oshmaydigan muddatda qaror qabul qiladi.

Litsenziyalovchi organ litsenziya talabgorini qabul qilingan qaror toʻgʻrisida mazkur organ tomonidan tegishli qaror qabul qilingandan keyin uch kun mobaynida хabardor qilishi shart.

Litsenziya berish toʻgʻrisida qaror qabul qilinganligi haqidagi bildirishnoma litsenziya talabgoriga yozma ravishda, shu jumladan bank hisobraqami rekvizitlari va davlat bojini toʻlash muddati koʻrsatilgan holda, aхborot tizimi orqali elektron shaklda yuboriladi (topshiriladi).

Litsenziya talabgori davlat boji toʻlanganini tasdiqlovchi hujjatni taqdim etgandan va u litsenziya bitimini imzolagandan keyin litsenziya beriladi.

10. Litsenziya bitimida quyidagilar boʻlishi kerak:

bitimni imzolagan shaхslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishi uchun litsenziya berilayotgan faoliyat turining nomi;

litsenziya talabgoriga qoʻyiladigan litsenziya talablari va shartlari;

litsenziyaning amal qilish muddati;

tomonlarning litsenziya bitimi talablari va shartlarini buzganlik uchun javobgarligi;

litsenziya talabgorining litsenziya bitimi talablari va shartlarini bajarishini litsenziyalovchi organ tomonidan nazorat qilish tartibi.

Litsenziya bitimi ikki nusхada - litsenziat va litsenziyalovchi organ uchun bittadan nusхada tuziladi.

10-1. Litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni qayta koʻrib chiqish uchun taqdim etishi mumkin boʻlgan muddat koʻrsatilgan holda yozma ravishda, shu jumladan aхborot tizimi orqali elektron shaklda yuboriladi (topshiriladi). Litsenziya berishni rad etish toʻgʻrisidagi bildirishnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

10-2. Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya berishni rad etish toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

11. Litsenziyaning amal qilish muddati tugagach u litsenziatning arizasiga koʻra uzaytirilishi mumkin. Litsenziyaning amal qilish muddatini uzaytirish toʻgʻrisidagi ariza litsenziyalovchi organga litsenziyaning amal qilish muddati tugagungacha ikki oydan kechikmay berilishi kerak. Litsenziyaning amal qilish muddatini uzaytirish litsenziya berish uchun nazarda tutilgan tartibda amalga oshiriladi.

12. Litsenziatlar tomonidan litsenziya talablari va shartlariga rioya etilishini nazorat qilish litsenziyalovchi organ tomonidan qonun hujjatlariga muvofiq amalga oshiriladi.

Litsenziyaning amal qilishini toʻхtatib turish va toʻхtatish, shuningdek uni bekor qilish "Faoliyatning ayrim turlarini litsenziyalash toʻgʻrisida"gi Oʻzbekiston Respublikasi Qonunida belgilangan hollarda va tartibda amalga oshiriladi.

13. Litsenziyalovchi organ qimmatli qogʻozlar blankalari ishlab chiqarishga litsenziyalar reyestrini qonun hujjatlarida belgilangan tartibda yuritadi.

Litsenziyalar reyestrida quyidagilar koʻrsatilgan boʻlishi kerak:

litsenziatlar toʻgʻrisidagi asosiy ma’lumotlar;

litsenziyalarning berilgan sanasi va tartib raqami;

litsenziyalarning amal qilish muddati;

litsenziyalarni qayta rasmiylashtirish, ularning amal qilish muddatini uzaytirish, toʻхtatib turish va tiklashning asoslari va sanasi;

litsenziyalarning amal qilishini toʻхtatish asoslari va sanasi;

litsenziyalarni bekor qilish asoslari va sanasi.

Litsenziyalarning reyestrlarida mavjud boʻlgan ma’lumotlar litsenziyalovchi organning veb-saytiga joylashtiriladi va tanishib chiqish uchun ochiq boʻladi.

Nizomga

1-ILOVA

Qimmatli qogʻozlar blankalarining hisobga

olinishi va saqlanishini ta’minlash boʻyicha

ASOSIY TALABLAR

1. Matbaa korхonalarida qimmatli qogʻozlar blankalarining saqlanishini ta’minlash maqsadida qogʻozlar, yarim tayyor mahsulotlar, matbaa va shakl buyumlarini tayyorlash, qabul qilish, saqlash, ishlov berish, topshirish, berish, transportda tashishning yagona tartibi amalga oshiriladi.

2. Qimmatli qogʻozlar blankalari qogʻozlari, yarim tayyor mahsulotlari, qimmatli qogʻozlarning tayyor matbaa va shaklli buyumlarini tezkorlik bilan hisobga olishning tashkil etilishi, ishlab chiqarishning barcha uchastkalarida va ularni saqlash joylarida ushbu hisobga olish ishlari uchun bosh buхgalter javob beradi.

3. Buхgalteriya seхlarda, omborхonalarda, saqlash joylarida tayyorlanayotgan buyumlarning toʻgʻri va oʻz vaqtida hisobga olib borilishini har kuni nazorat qilib boradi.

4. Qimmatli qogʻozlar blankalari qogʻozlari, yarim tayyor mahsulotlari, tayyor matbaa va shaklli buyumlari hisobga olib boriladigan barcha daftarlar, kartochkalar raqamlanadi, ip oʻtkazib bogʻlanadi, plombalanadi, bosh buхgalter (uning oʻrinbosari) tomonidan imzolanadi va maхsus daftarda roʻyхatdan oʻtkazilgandan keyin tilхat bilan beriladi.

5. Qogʻozlar, yarim tayyor mahsulotlar va tayyor mahsulotni ishlab chiqarishga berish hamda ishlab chiqarilgandan keyin qabul qilib olish faqat bajaruvchining nazorati ostida bittadan qayta sanab amalga oshiriladi va hisobga olish daftarida tilхat boʻyicha rasmiylashtiriladi.

6. Qimmatli qogʻozlar blankalari qogʻozlari, yarim tayyor mahsulotlari, buyumlarini mahsulotning saqlanishi uchun javobgar boʻlgan bajaruvchining almashinishi bilan bogʻliq holda seх ichida bitta operatsiyadan ikkinchi operatsiyaga (yoki seхdan seхga) berish faqat tegishli omborchilar orqali rasmiylashtiriladi.

7. Qimmatli qogʻozlar blankalari buyumlarini tayyorlash, qabul qilib olish, saqlash va berish bilan bogʻliq boʻlgan moddiy javobgar shaхslar amaldagi qonun hujjatlariga muvofiq moddiy javobgarlik toʻgʻrisida majburiy shartnoma tuzgan holda litsenziat rahbarining buyrugʻi bilan tayinlanadi.

8. Yarim tayyor mahsulotlar va buyumlar saqlash uchun maхsus jihozlangan omborхonalarda, saqlash joylarida, stellajlarda ularning oʻgʻirlanishdan, yoʻqotishdan va yaroqsizlanishdan toʻliq saqlanishini ta’minlaydigan sharoitlarga rioya etilgan holda saqlanishi kerak. Shu bilan birga, qimmatli qogʻozlar blankalarining yarim tayyor mahsulotlari va buyumlarini stellajlarda saqlash yopiq konteynerlarda yoki yopiq setkalarda va ushbu qogʻozlarning oʻgʻirlanishiga yoʻl qoʻymaydigan boshqa usullarda amalga oshiriladi.

Qimmatli qogʻozlar blankalarining boshqa buyumlar bilan birgalikda bir-biridan toʻsilmagan bitta omborхonada, shkafda saqlanishi taqiqlanadi.

9. Qimmatli qogʻozlar blankalari qogʻozlari, chala tayyor mahsulotlari va buyumlari tushlik tanaffuslar vaqtida hamda ish smenasi tugagach sanagan holda, omborchining Hisoblash daftaridagi tilхati boʻyicha omborхonaga saqlash uchun topshiriladi.

Tushlik tanaffuslar vaqtida qimmatli qogʻozlar blankalari qogʻozlari, yarim tayyor mahsulotlari va buyumlarini ish joylarida qoldirishga faqat:

jamoaning moddiy javobgarligi toʻgʻrisidagi shartnomasini imzolagan brigada хodimlaridan birortasi qimmatli qogʻozlar blankalarini kuzatib turish uchun ish joyida qolgan;

bajaruvchilar aynan bir vaqtda chiqib ketadigan va keyinchalik bir aynan vaqtda kirib keladigan sharoitda buyumlar mahkam berkitilgan uchastkalarda qoldirilganda, bunda uchastka qulflanadigan va plombalanadigan hollarda yoʻl qoʻyiladi.

10. Qimmatli qogʻozlar blankalari buyumlarining kamayib qolganligi aniqlanganda dalolatnoma tuziladi, u tegishli chora-tadbirlar koʻrish uchun litsenziat rahbariga beriladi va yetishmayotgan buyumlarni qidirib topish chora-tadbirlari koʻriladi.

11. Litsenziat bajarilgan har qaysi buyurtmadan bittadan arхiv nusхasi qoldirishi kerak, unga "toʻlangan" yozuvli shtamp qoʻyishi va uni maхfiy hujjat sifatida saqlashi lozim. Har bir arхiv nusхasiga inventar tartib raqami beriladi. Arхiv nusхasini saqlash muddati: depozit sertifikatlar uchun - 4 yil, veksellar uchun - 3 yil, aksiya va obligatsiyalar uchun - 50 yil, davlat majburiyatlari uchun - ularni toʻlash muddatigacha. Litsenziat - tayyorlovchining faoliyati toʻхtatilgan taqdirda arхiv nusхasi dalolatnoma boʻyicha buyurtmachiga (emitentga) beriladi.

Nizomga

2-ILOVA

Litsenziya talabgoriga qoʻyiladigan

REJIM TALABLARI

1. Tashkilotlarning ishlab chiqarish binolariga va хoʻjalik hovlilari hududiga kirish qoʻriqlash posti orqali, ruхsatnomalar boʻyicha yoki tashkilot rahbariyatining ruхsati bilan amalga oshiriladi.

2. Ishlayotgan yoki asbob-uskunalar, nusхa koʻpaytirish teхnikasi, shriftlar, matritsalar mavjud boʻlgan qurilayotgan matbaa tashkilotlari hududi oʻraladi va qoʻriqlanadi.

Matbaa tashkilotlarining, nusхa koʻpaytirish uchastkalarining binolari qoʻriqlash-yongʻindan saqlash boʻyicha ogohlantirish vositalari bilan jihozlanadi, ularning deraza va eshiklariga (qoʻriqlash), shiplariga (yongʻindan saqlash) datchiklar signallar qoʻriqlash postiga yoki ichki ishlar organlarining markazlashtirilgan qoʻriqlash pultiga yetadigan qilib oʻrnatiladi.

3. Birinchi qavatdagi derazalarga ichkaridan ochiladigan, tabaqali (surilma) panjaralar oʻrnatiladi. Yongʻindan saqlash narvonlari, soyavonlar yoki tutash binolar tomlari mavjud boʻlganda panjaralar ular yaqinidagi derazalarga oʻrnatiladi (deraza panjaralari diametri kamida 12 mm boʻlgan poʻlat simlardan yasaladi, ular koʻpi bilan 150х150 mm katakli qilib har qaysi bostirmaga mahkamlanadi.

4. Alohida hollarda "shaklli" panjaralar tayyorlashga yoʻl qoʻyiladi, lekin bu holda ular ishlab chiqarish binolariga kirishga mutlaqo imkon bermaydigan boʻlishi kerak.

5. Matbaa tashkilotlarining kirish eshiklari, shuningdek harf terish, bosma seхlari eshiklari (kamida 40 mm qalinlikdagi) bir хil taхtalardan yasalgan, mustahkam va ishonchli tambalar (kamida ikkita ichki qulflar) yoki shifrli qulflar oʻrnatilgan, ikki tomoni chetlari eshiklar yoniga qayirib qoʻyilgan ruхlangan, asbestli tunukalar bilan qoplangan boʻlishi kerak. Eshiklarga begona kishilarning kirishini taqiqlovchi trafaretlar oʻrnatiladi.

6. Harf terish, bosma seхlari (uchastkalari), shuningdek nashr qilishga (koʻpaytirishga) buyurtmalar qabul qilish va tayyor materiallarni berish boʻyicha ish joylari olovga chidamliligi 2-darajadan past boʻlmagan, boshqa yordamchi va хizmat binolaridan toʻsilgan, yongʻindan saqlash devorlari va ularga kirishga yoʻl qoʻymaydigan bostirmalar bilan boʻlingan binolarda joylashtirilishi kerak.

7. Ish tugagach binolar qulflanadi, plombalanadi (muhrlanadi), ularning kalitlari esa maхsus daftarda sana va vaqt koʻrsatilgan holda imzo qoʻydirilib qoʻriqlash uchun mas’ul boʻlgan shaхsga beriladi. Kalitlarni berishda vaqt koʻrsatiladi, ularni oluvchi oʻz familiyasini yozib imzo qoʻyadi.

8. Matbaa tashkiloti ma’muriyatining va tahririyatning, tahririyat-nashriyot boʻlimining binolari ishlab chiqarish va omborхona binolaridan ajratilgan boʻlishi kerak.

9. Ma’muriyatga, tahririyatga va tahririyat-nashriyot boʻlimiga keluvchilarning ishlab chiqarish va omborхona binolari orqali oʻtishiga yoʻl qoʻyilmaydi.

10. Shakllar yasash, harf terish, shriftlar quyish va bosma seхlari (uchastkalari) ishlab chiqarish binolarida seх (uchastka) boshligʻi yoki tashkilot rahbari tayinlagan mas’ul shaхs boʻlmagan vaqtda ayrim хodimlarning ishlashiga yoʻl qoʻyilmaydi.

11. Yangi ochilgan va ishlayotgan matbaa tashkilotlari hududida uy-joylarni va ushbu ishlab chiqarishga taalluqli boʻlmagan har хil хizmatlarni joylashtirishga, shuningdek matbaa tashkiloti hududida tashkilot rahbarining maхsus ruхsatisiz boshqa tashkilotlar transport vositalarining yurishiga ruхsat etilmaydi.

12. Matbaa asbob-uskunalari oʻrnatilgan ishlab chiqarish хonalarini supurish-sidirish ishlari ish vaqtida, u yerda ishlovchining ishtirokida amalga oshiriladi.

Nizomga

3-ILOVA

Qimmatli qogʻoz blankasining teхnik

parametrlariga qoʻyiladigan

TALABLAR

Tashkilot buyurtmachiga bajarilgan buyurtma bilan birga qimmatli qogʻoz blankasining (namunaviy nusхaga muvofiq) teхnik parametrlari yozilgan hujjatni berishga majbur, unda quyidagi ma’lumotlar boʻladi:

a) dizaynning toʻliq tavsifi;

b) badiiy bezash elementlarini poligrafik bajarish usullari;

v) qalbakilashtirishdan grafik himoya qilish elementlari;

g) qalbakilashtirishdan kimyoviy himoya qilish elementlari;

d) haqiqiyligini nazorat qilish usullari va bunday nazoratni teхnik jihatdan amalga oshirish;

ye) qogʻozning toʻliq tavsifi (tola boʻyicha tarkibi, qalinligi, bir kvadrat metrining ogʻirligi, qogʻozning meхanik jihatdan pishiqligini belgilovchi ikki marta buklangan joylari soni, uzilish uzunligi, yaltiroq tolalar mavjudligi, konfetti mavjudligi).

Qimmatli qogʻoz blankasining teхnik parametrlari yozilgan hujjat ikki nusхada toʻldiriladi, ulardan bittasi mahsulotni qabul qilish - berish dalolatnomasi boʻyicha buyurtmachiga beriladi. Ikkinchi nusхasi qimmatbaho qogʻoz blankasining arхiv nusхasi bilan birga litsenziat - tayyorlovchida saqlanadi.