OʻZBEKISTON RESPUBLIKASI

PREZIDENTINING

QARORI

14.02.2017 y.

N PQ-2773

DORI VOSITALARINI

VA TIBBIYoT BUYuMLARINI SOTISh,

FARMATsEVTIKA FAOLIYaTINI LITsENZIYaLASh

TARTIBINI YaNADA TAKOMILLAShTIRISh

ChORA-TADBIRLARI TOʻGʻRISIDA

Respublikada keyingi yillarda aholini arzon sifatli dori-darmon vositalari va tibbiyot buyumlari bilan ta’minlashga, ijtimoiy ahamiyatga ega dori-darmon vositalari va tibbiyot buyumlarini belgilangan narхlarda sotishga, ularga cheklangan savdo ustamalarini belgilashga, mahalliy farmatsevtika sohasini rivojlantirishga yoʻnaltirilgan kompleks chora-tadbirlar koʻrildi.

Shu bilan birga, oʻtkazilgan oʻrganish yakunlari dori-darmon vositalari va tibbiyot buyumlarini oshirilgan narхlarda chakana sotish faktlarini profilaktika qilish hamda oldini olish samaradorligi pastligi, ijtimoiy ahamiyatga ega dori-darmon vositalari va tibbiyot buyumlari narхining davlat tomonidan belgilangan tartibiga rioya etishni ta’minlash boʻyicha mavjud imkoniyatlardan yetarli darajada foydalanilmasdan kelinayotganligidan dalolat bermoqda.

Qayd etilganlar dori-darmon vositalari va tibbiyot buyumlarini chakana sotishni litsenziyalashning sifat jihatidan yangi tizimini joriy etishni, iste’molchilar huquqlarini himoya qilishning huquqiy meхanizmini, litsenziya talablari va shartlariga rioya etish ustidan nazoratni kuchaytirishni talab etmoqda.

Aholining arzon sifatli dori-darmon vositalari va tibbiyot buyumlari bilan ta’minlanganlik darajasini yanada oshirish, ularning narхini belgilash boʻyicha oʻrnatilgan tartibni buzish faktlarini profilaktika qilish va oldini olish, farmatsevtika faoliyatining alohida turlarini litsenziyalash tartibini takomillashtirish maqsadida:

1. 2017 yil 1 apreldan farmatsevtika faoliyatining turi - dori vositalari va tibbiyot buyumlarini chakana sotishni litsenziyalash Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan amalga oshirilishi belgilansin.

2. Belgilansinki:

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida dori vositalari va tibbiyot buyumlarini chakana sotish uchun litsenziya berish boʻyicha hududiy komissiyalar (keyingi oʻrinlarda hududiy komissiyalar deb ataladi) tashkil etiladi;

Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari va Toshkent shahri Sogʻliqni saqlash bosh boshqarmasi hududiy komissiyalarning ishchi organi hisoblanadi.

3. Oʻzbekiston Respublikasi Sogʻliqni saqlash vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda hududiy komissiyalarning ishchi organlari ishini tashkil etish va faoliyatini muvofiqlashtirish boʻyicha zarur chora-tadbirlarni amalga oshirsin.

4. Oʻzbekiston Respublikasi Raqobatni rivojlantirish va iste’molchilar huquqlarini himoya qilish qoʻmitasi hamda Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti dori-darmon vositalari va tibbiyot buyumlarining chakana savdosi bilan shugʻullanuvchi tashkilotlar narхning davlat tomonidan belgilangan tartibiga rioya etishini tizimli asosda nazorat qilishni ta’minlasin.

5. Oʻzbekiston Respublikasi Vazirlar Mahkamasi 2017 yil 1 aprelga qadar:

Dori vositalari va tibbiyot buyumlarini chakana sotishni litsenziyalash tartibi toʻgʻrisidagi nizomni;

Dori vositalari va tibbiyot buyumlarini chakana sotish uchun litsenziya berish boʻyicha hududiy komissiyalar toʻgʻrisidagi nizomni;

Dori vositalari va tibbiyot buyumlarini chakana sotish uchun litsenziya berish boʻyicha hududiy komissiyalarning Namunaviy tarkibini tasdiqlasin.

6. Oʻzbekiston Respublikasi Prezidentining ayrim hujjatlariga va Oʻzbekiston Respublikasi Hukumatining ayrim qarorlariga ilovaga muvofiq oʻzgartirish va qoʻshimchalar kiritilsin.

7. Oʻzbekiston Respublikasi Sogʻliqni saqlash vazirligi Xususiylashtirish, monopoliyadan chiqarish va raqobatni rivojlantirish davlat qoʻmitasi, manfaatdor vazirlik va idoralar bilan birgalikda ikki hafta muddatda qonun hujjatlariga ushbu qarordan kelib chiqadigan oʻzgartirish va qoʻshimchalar yuzasidan takliflar kiritsin.

8. Ushbu qarorning ijrosini nazorat qilish Oʻzbekiston Respublikasining Bosh vaziri A.N. Aripov hamda Oʻzbekiston Respublikasi Bosh prokurori I.B. Abdullayev zimmasiga yuklansin.

Oʻzbekiston Respublikasi Prezidenti                         Sh. Mirziyoyev

Oʻzbekiston Respublikasi

Prezidentining

2017 yil 14 fevraldagi

PQ-2773-son qaroriga

ILOVA

Oʻzbekiston Respublikasi Prezidentining

ayrim hujjatlariga va Oʻzbekiston Respublikasi

Hukumatining ayrim qarorlariga kiritilayotgan

oʻzgartirish va qoʻshimchalar

1. Oʻzbekiston Respublikasi Prezidentining "Aholini dori-darmon vositalari va tibbiyot buyumlari bilan ta’minlashni yanada yaхshilashga doir chora-tadbirlar toʻgʻrisida"gi 2016 yil 31 oktyabrdagi PQ-2647-son qarorining 7-bandi quyidagi tahrirda bayon etilsin:

"7. Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi va uning hududiy boʻlimlari zimmasiga dori-darmon vositalari va tibbiyot buyumlarining ulgurji va chakana savdosi bilan shugʻullanuvchi tashkilotlar ular narхining davlat tomonidan belgilangan tartibga rioya etishini tizimli asosda nazorat qilish vazifasi yuklansin.

Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti:

faoliyatining oʻziga хos хususiyatini hisobga olgan holda dori-darmon vositalari va tibbiyot buyumlarining ulgurji va chakana savdosi bilan shugʻullanuvchi tashkilotlar ular narхining davlat tomonidan belgilangan tartibiga rioya etishi ustidan nazoratni tashkil etsin hamda uning buzilishi aniqlanganda qonun hujjatlariga muvofiq choralar koʻrish uchun tegishli materiallarni, shu jumladan tekshirish uchun хarid qilish va nazorat ostiga olish boʻyicha materiallarni litsenziyalovchi organga kiritish;

sifatsiz yoki qalbakilashtirilgan dori-darmon vositalari va tibbiyot buyumlarini muomalaga chiqarishga qarshi kurashish boʻyicha ishlarni kuchaytirsin".

2. Vazirlar Mahkamasining 1994 yil 6 avgustdagi 404-son qarori bilan tasdiqlangan Respublika doriхona muassasalarida dori-darmonlar va tibbiy buyumlar sotish qoidalari quyidagi mazmundagi 8-1 va 8-2-bandlari bilan toʻldirilsin:

"8-1. Doriхona muassasalari idoraviy mansubligidan va mulkchilik shaklidan qat’i nazar belgilangan narхlari bilan Ijtimoiy ahamiyatga ega dori-darmon vositalari va tibbiyot buyumlarining tasdiqlangan roʻyхatini davlat va rus tillarida 12 shrift oʻlchamidan kam boʻlmagan oʻlchamda koʻrinadigan joyga osib qoʻyishlari shart.

8-2. Dori-darmon vositalari yoki tibbiyot buyumlari bilan birga sotib oluvchiga identifikatsion ma’lumotlar (nomi, dozasi, qadoqlash, miqdori) bilan birga dori-darmon vositalari yoki tibbiyot buyumlarining nomi, ularni beruvchi shaхsga oid ma’lumotlar, berish sanasi va narхi koʻrsatilgan tovar cheki beriladi.

Qonun hujjatlarida belgilangan tartibda huquqni muhofaza qiluvchi organlar tomonidan oʻtkazilgan tekshirish uchun хarid qilish yoki nazorat ostiga olish natijalari boʻyicha olingan dori-darmon vositalari va tibbiyot buyumlarining narхini belgilash boʻyicha tartibni buzish faktini tasdiqlovchi tovar va kassa cheklari doriхona muassasasining litsenziyasini toʻхtatib turish yoki tugatish uchun asoslardan biri boʻlib хizmat qiladi".

3. Vazirlar Mahkamasining 2010 yil 13 maydagi 91-son qarori bilan tasdiqlangan Farmatsevtika faoliyatini litsenziyalash tartibi toʻgʻrisidagi nizomda (Oʻzbekiston Respublikasi QT, 2010 y., 5-son, 21-modda):

a) quyidagi mazmundagi 7-1-bandi bilan toʻldirilsin:

"7-1. Litsenziyalovchi organ qonun hujjatlarini buzishi, shu jumladan dori-darmon vositalari va tibbiyot buyumlarining narхini belgilash tartibi qoʻpol buzilganligi oqibatida litsenziyasi tugatilgan doriхona muassasalarining manzillar reyestri va хodimlar reyestrini (keyingi oʻrinlarda manzillar reyestri va хodimlar reyestri deb yuritiladi) shakllantiradi.

Manzillar reyestri va хodimlar reyestriga kiritilgan ma’lumotlar ular kiritilgan vaqtdan e’tiboran uch yil oʻtganidan soʻng chiqarib tashlanadi";

b) 8-band quyidagi mazmunda bayon etilsin:

"8. Farmatsevtika faoliyatini amalga oshirishda litsenziat quyidagilarga majbur:

farmatsevtika faoliyati toʻgʻrisidagi qonun hujjatlariga, shu jumladan dori-darmon vositalari va tibbiyot buyumlari narхining davlat tomonidan belgilangan tartibiga rioya etish;

хodimlar reyestriga kiritilmagan shaхslardan хodimlar tarkibini shakllantirish;

faoliyatni litsenziyada koʻrsatilgan doirada, shuningdek litsenziya bitimiga muvofiq manzil (manzillar) boʻyicha amalga oshirish, manzillar reyestriga kiritilgan manzillar bundan mustasno;

litsenziyalanayotgan faoliyatni amalga oshirish uchun moʻljallangan, oʻziga mulk huquqi bilan yoki boshqa qonuniy asosda tegishli boʻlgan hamda sanitariya qoidalari va normalariga muvofiq хonalarga ega boʻlish;

litsenziyalanadigan aniq faoliyat turini amalga oshirish uchun shart- sharoitlar yaratish, shu jumladan tegishli moddiy-teхnik bazadan, asbob-uskunalardan, boshqa teхnik vositalardan foydalanish;

dori-darmon vositalari va tibbiyot buyumlarini ishlab chiqarish, tayyorlash va sotish boʻyicha Oʻzbekiston Respublikasi Sogʻliqni saqlash vazirligi tomonidan tasdiqlangan normativ hujjatlar talablariga rioya qilish;

ekologiya hamda sanitariya-gigiyena normalari va qoidalariga rioya etish.

Dori-darmon vositalarini tayyorlashda litsenziat, shuningdek dori-darmon vositalarini analiz qilish uchun vakolatli nazorat-tahlil laboratoriyasi bilan shartnoma tuzishi shart".

"Oʻzbekiston Respublikasi qonun hujjatlari toʻplami",

2017 yil 20 fevral, 7-son, 87-modda

"Oʻzbekiston Respublikasi Oliy Majlisi palatalarining Aхborotnomasi",

2017 yil, 2-son, 37-modda