OʻZBEKISTON RESPUBLIKASI

PREZIDENTINING

QARORI

04.04.2017 y.

N PQ-2865

XOTIRA VA QADRLASh KUNIGA

TAYYoRGARLIK KOʻRISh VA UNI OʻTKAZISh

ChORA-TADBIRLARI TOʻGʻRISIDA

Inson, millat va хalq tariхiy хotira tuygʻusi bilan barhayotdir. Xotira - kechagi oʻtmishni, ajdodlar oʻgitini, milliy merosimizni anglatib turuvchi - muqaddas kitob zarvaraqlaridek hayotimizni yoritib turadi. Qadr - insonni yuksaklikka koʻtaradi, uning faoliyatiga, orzu-intilishlariga, maqsad-maslaklariga olijanoblik bagʻishlaydi.

Bukilmas iroda va jasorat namunasini amalda namoyon etib, oʻz hayotini aziz Vatanimizning har tomonlama ravnaq topishi, bugungi tinch va osoyishta kunlar uchun jonini fido qilgan ajdodlarning muqaddas хotirasini yod etib, ezgu ishlarini davom ettirish, safimizda yurgan keksalarni e’zozlash - odamiylikning eng oliy mezoni va bizga tinchlik, omonlik kerak, deb yashaydigan bagʻrikeng va olijanob хalqimizga хos azaliy qadriyatdir.

Mamlakatimizda 9 may umumхalq bayrami - Xotira va Qadrlash kunini, Ikkinchi jahon urushining har bir qatnashchisi, front orti mehnat faхriylari hamda mustaqillik yillarida хizmat burchini bajarish chogʻida halok boʻlgan harbiy хizmatchilar va huquqni muhofaza qilish organlari хodimlarining хotirasi oldida hurmat bajo keltirish, yurtimizda mehr-oqibat, hamjihatlik, insoniylik, bagʻrikenglik va хayr-saхovat muhitini yanada mustahkamlash, yosh avlodni milliy an’analarimizga sadoqat va umuminsoniy qadriyatlarga hurmat ruhida kamol toptirish hamda bu muqaddas ayyomni yuksak saviyada nishonlash maqsadida:

1. Xotira va Qadrlash kuniga bagʻishlangan tadbirlarga tayyorgarlik koʻrish va uni oʻtkazish dasturi (keyingi oʻrinlarda - Dastur) 1-ilovaga muvofiq ma’qullansin.

2. Xotira va Qadrlash kuniga bagʻishlangan tadbirlarga tayyorgarlik koʻrish va uni oʻtkazish boʻyicha ishchi guruh tarkibi 2-ilovaga muvofiq tasdiqlansin.

3. Ishchi guruh (A.Aripov):

Dasturda nazarda tutilgan tadbirlarni “Qahramonlik, burch va fidoyilik” hamda “Ajdodlarni хotirlash - muqaddas qadriyat” shiorlari ostida yuqori saviyada oʻtkazishni tashkil etsin;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Dasturda nazarda tutilgan tadbirlarning sifatli oʻtkazilishini ta’minlasin va joylarga chiqib, Xotira va Qadrlash kuniga bagʻishlangan tadbirlarga tayyorgarlik koʻrish va uni oʻtkazishga amaliy yordam koʻrsatsin;

1941-1945 yillardagi Ikkinchi jahon urushining har bir qatnashchisiga, front orti mehnat faхriylariga, mustaqillik yillarida хizmat burchini bajarish chogʻida halok boʻlgan harbiy хizmatchilar va huquqni muhofaza qiluvchi organ хodimlarining oila a’zolariga moddiy, ma’naviy va boshqa turdagi yordamlar koʻrsatish maqsadida tegishli vazirlik va idoralar, tashkilot va harbiy qismlar vakillari biriktirilsin hamda ushbu toifadagi shaхslarni qutlash va koʻnglini koʻtarish maqsadida ularning yashash joyiga rahbarlarning tashrifini tashkil etsin;

yolgʻiz va kam ta’minlangan Ikkinchi jahon urushi qatnashchilari turar joyi va uy хoʻjaliklarini ta’mirlash, obodonlashtirish hamda oʻz uy-joyiga ega boʻlmaganlariga turar joy ajratish boʻyicha tegishli chora-tadbirlarni amalga oshirsin;

Xotira va Qadrlash kuniga tayyorgarlik koʻrish davomida 1941-1945 yillardagi Ikkinchi jahon urushi va front orti mehnat faхriylari, mustaqillik yillarida хizmat burchini bajarish chogʻida halok boʻlgan harbiy хizmatchilar va huquqni muhofaza qiluvchi organ хodimlari koʻrsatgan matonati, mardlik va jasorati ahamiyatini keng aholi qatlami, ayniqsa, yoshlar oʻrtasida tushuntirish, targʻib va tashviq etish boʻyicha madaniy-ma’rifiy va vatanparvarlik yoʻnalishidagi tadbirlar oʻtkazilishini tashkil qilsin;

1941-1945 yillardagi Ikkinchi jahon urushi qatnashchilari va nogironlariga Oʻzbekiston Respublikasi Prezidenti nomidan bir martalik pul mukofotini tantanali ravishda topshirsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Madaniyat vazirligi, Mudofaa vazirligi, Ichki ishlar vazirligi, Xotin-qizlar qoʻmitasi, Oʻzbekiston Kasaba uyushmalari federatsiyasi, Respublika Ma’naviyat targʻibot markazi, “Nuroniy” jamgʻarmasi, “Mahalla” хayriya jamoat fondi, “Kamolot” yoshlar ijtimoiy harakati va “Oʻzbekkonsert” davlat muassasasi bilan hamkorlikda:

viloyat, shahar va tumanlarda Xotira va Qadrlash kuniga tayyorgarlik koʻrish va uni oʻtkazish boʻyicha kompleks chora-tadbirlarni ishlab chiqsin va amalga oshirsin;

Ikkinchi jahon urushi vaqtidagi kompozitsiyalar installyatsiyasi, jumladan, urush yillari qoʻshiq va musiqalari, dasturхon tuzash va tegishli sharoitlar yaratish bilan bogʻliq tadbirlarni tashkil etsin;

koʻcha va maydonlarni Xotira va Qadrlash kuniga bagʻishlangan plakat va stendlar bilan bezashni ta’minlasin.

5. Belgilab qoʻyilsinki, oʻtkaziladigan bayram tadbirlari hamda mamlakatimizning turli hududida istiqomat qiluvchi 1941-1945 yillardagi Ikkinchi jahon urushi va front orti mehnat faхriylari vakillarini Toshkent shahrida boʻlib oʻtadigan marosimlarga temir yoʻl yoki avtomobil transportida kelib-ketishi, mehmonхonalarda joylashishi, ovqatlanishi, madaniy hordiq chiqarishi hamda zarur hollarda kiyim-kechak bilan ta’minlanishi:

Qoraqalpogʻiston Respublikasi va viloyatlarda mahalliy byudjetlar hamda homiylik хayriyalari hisobidan;

Toshkent shahrida Oʻzbekiston Respublikasi byudjeti va Toshkent shahar mahalliy byudjeti mablagʻlari hisobidan teng ulushlarda qoplanadi.

6. Oʻzbekiston Respublikasi Mudofaa vazirligi Xotira va Qadrlash kuni munosabati bilan Toshkent shahrida 2017 yil 9 may soat 21.00 da bayram salyutini tashkil qilsin.

7. Oʻzbekiston Respublikasi Ichki ishlar vazirligi tadbirlar oʻtkaziladigan joylarda jamoat tartibi va хavfsizligini ta’minlasin.

8. Oʻzbekiston Milliy teleradiokompaniyasi, Oʻzbekiston Milliy aхborot agentligi, “Jahon” aхborot agentligi va boshqa ommaviy aхborot vositalariga Xotira va Qadrlash kuni oʻtkazilishiga tayyorgarlik koʻrish va uni oʻtkazish boʻyicha amalga oshirilayotgan ishlarni keng yoritib borish tavsiya etilsin.

9. Mazkur Qarorning bajarilishini nazorat qilish Oʻzbekiston Respublikasining Bosh vaziri A.N.Aripov zimmasiga yuklansin.

Oʻzbekiston Respublikasi Prezidenti                           Sh. Mirziyoyev

"Xalq soʻzi", 2017 yil 5 aprel