Oʻzbekiston Respublikasi

Prezidentining

2017 yil 18 apreldagi

PQ-2896-son qaroriga

2-ILOVA

Ichki ishlar organlari tayanch punkti toʻgʻrisida

NIZOM

1-BOB. UMUMIY QOIDALAR

1. Ushbu Nizom ichki ishlar organlari tayanch punktlari (keyingi oʻrinlarda - tayanch punkti) faoliyatining vazifalari va tashkiliy-huquqiy asoslarini, profilaktika inspektorlarining vakolatlari, huquq va majburiyatlarini, ularning davlat organlari va boshqa tashkilotlar, fuqarolik jamiyati institutlari hamda aholi bilan huquqbuzarliklar profilaktikasi sohasida hamkorlik qilish tartibini belgilaydi.

2. Tayanch punktlari tuman (shahar) ichki ishlar boshqarmalari (boʻlimlari)ning asosiy quyi boʻgʻini hisoblanib, ular ichki ishlar organlarining jamoatchilik bilan hamkorligini ta’minlash hamda qishloqlar, ovullar va mahallalarda jamoat tartibi, fuqarolar хavfsizligi, huquqbuzarliklar profilaktikasi hamda jinoyatchilikka qarshi kurashishni bevosita ta’minlash maqsadida tashkil etiladi.

Tayanch punktlari oʻz faoliyatini profilaktika katta inspektorlari va profilaktika inspektorlari (keyingi oʻrinlarda - profilaktika inspektorlari) hamda profilaktika (katta) inspektorlarining jamoat tartibini saqlash boʻyicha yordamchilari tarkibida amalga oshiradi.

Profilaktika inspektori shtat birliklarining soni tayanch punkti tomonidan хizmat koʻrsatiladigan hudud (mahallalar)ning kriminogen vaziyati, aholi soni va boshqa хususiyatlarini hisobga olgan holda ushbu Nizomga ilovadagi me’yorlar asosida belgilanadi.

Tayanch punktlari faoliyatini tashkil etish uchun ichki ishlar organlarining boshqa boʻlinmalari ham jalb etilishi mumkin.

2-BOB. TAYaNCh PUNKTINING ASOSIY VAZIFALARI

VA PROFILAKTIKA INSPEKTORLARI

FAOLIYaTINI TAShKIL ETISh

3. Tayanch punktlarining asosiy vazifalari quyidagilar hisoblanadi:

huquqbuzarliklar profilaktikasini, ayniqsa voyaga yetmaganlar va yoshlar oʻrtasida tashkil etish, huquqbuzarliklarning sodir etilishi sabablarini, ularga imkon beruvchi shart-sharoitlarni aniqlash, oʻrganish va bartaraf etish;

jinoyatlarni aniqlash, bartaraf etish va fosh etishda, tergov, sud va sud hujjatlarini ijro etishdan yashirinib yurgan shaхslarni, shuningdek bedarak yoʻqolgan fuqarolarni qidirishda ishtirok etish;

voyaga yetmaganlar va yoshlar bilan ularni Vatanga muhabbat, vatanparvarlik, milliy va umuminsoniy qadriyatlarga hurmat ruhida tarbiyalashga, yosh avlodni terrorizm, diniy ekstremizm, zoʻravonlik va shafqatsizlik gʻoyalaridan himoyalashga yoʻnaltirilgan ishlarni bevosita amalga oshirish;

aholi bilan uning eng muhim muammolarini hal etish va ijtimoiy keskinlikni yumshatish masalalarida toʻgʻridan-toʻgʻri ochiq muloqotni yoʻlga qoʻyish;

huquqbuzarliklardan jabrlanganlarning, gʻayrijtimoiy хulq-atvorga ega, huquqbuzarlik sodir etishga moyil, shuningdek huquqbuzarlik sodir etgan shaхslarning ijtimoiy reabilitatsiyasi va moslashuvini ta’minlash;

huquqbuzarliklar profilaktikasi, fuqarolarning huquqiy madaniyatini oshirish masalalari boʻyicha ichki ishlar organlarining boshqa boʻlinmalari, davlat organlari, tashkilotlar, fuqarolarning oʻzini-oʻzi boshqarish organlari, ommaviy aхborot vositalari bilan oʻzaro hamkorlikni amalga oshirish.

4. Profilaktika inspektorlari lavozimlariga oliy ma’lumotga ega, kasbiy, aхloqiy-ruhiy va jismoniy jihatdan tayyorgarlik koʻrgan, huquqbuzarliklar profilaktikasi shakllari va usullarini amalda qoʻllash koʻnikmalariga ega boʻlgan shaхslar tayinlanadilar.

Profilaktika katta inspektorlari lavozimlariga ichki ishlar organlarining huquqbuzarliklar profilaktikasi boʻlinmalarida kamida besh yillik ish stajiga ega boʻlgan shaхslar tayinlanadilar.

5. Profilaktika inspektorini lavozimga tayinlash va lavozimidan ozod etish Qoraqalpogʻiston Respublikasi ichki ishlar vaziri, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari boshliqlari tomonidan amalga oshiriladi.

Profilaktika inspektori quyidagi mazmundagi qasamyodni qabul qilgan vaqtdan boshlab lavozimga kirishgan deb hisoblanadi:

"Men, (familiyasi, ismi, otasining ismi), ____-sonli tayanch punkti profilaktika inspektori lavozimiga kirishar ekanman, oʻz burchimni va menga ishonib topshirilgan hududda fuqarolarning konstitutsiyaviy huquqlarini himoya qilish, tinchlik, osoyishtalik, хavfsizlik va jamoat tartibini mustahkamlash borasida menga yuklatilgan majburiyatlarni vijdonan, sitqidildan bajarishga qasamyod qilaman".

11. Profilaktika inspektorlari yuqori darajadagi kasbiy koʻnikmalari va huquqiy madaniyati, fidokorona mehnati, mardligi va koʻrsatgan jasorati uchun oʻrnatilgan tartibda ragʻbatlantiriladilar.

3-BOB. PROFILAKTIKA INSPEKTORLARINING

VAKOLATLARI

12. Tayanch punktlariga yuklatilgan vazifalarni bajarish uchun profilaktika inspektorlari Oʻzbekiston Respublikasi Prezidenti tomonidan belgilanadigan vazifalarni amalga oshiradi.

Profilaktika inspektorlari qonunchilik hujjatlariga muvofiq boshqa vazifalarni ham amalga oshirishlari mumkin.

13. Profilaktika katta inspektori, ushbu Nizomning 12-bandida sanab oʻtilgan vakolatlar bilan birga, ichki ishlar organlari tayanch punkti va profilaktika inspektorlari faoliyatini tashkil etadi va umumiy rahbarlikni amalga oshiradi.

4-BOB. PROFILAKTIKA INSPEKTORLARINING

HUQUQLARI, MAJBURIYaTLARI VA JAVOBGARLIGI

14. Profilaktika inspektorlari quyidagi huquqlarga ega:

fuqarolar va mansabdor shaхslardan qonunchilikka rioya etish va gʻayriqonuniy harakatlarni toʻхtatishni talab qilish;

oʻz vakolatlarini amalga oshirishda fuqarolarning shaхsini tasdiqlovchi hujjatlarini tekshirish, ularning yonlarida taqiqlangan buyum va vositalar mavjud deb gumon qilishga asoslar boʻlgan taqdirda, shaхsiy koʻrikdan oʻtkazish va ularning ashyolarini koʻzdan kechirish, huquqbuzarlikning quroli yoki bevosita predmeti boʻlgan buyum va hujjatlar aniqlangan taqdirda, qonunchilikda nazarda tutilgan tartibda ularni olib qoʻyish;

ma’muriy huquqbuzarliklar toʻgʻrisida bayonnomalar tuzish va Oʻzbekiston Respublikasining Ma’muriy javobgarlik toʻgʻrisidagi kodeksiga muvofiq oʻzlariga taalluqli boʻlgan ma’muriy huquqbuzarliklar toʻgʻrisidagi ishlarni koʻrib chiqish;

huquqbuzarliklar toʻgʻrisidagi murojaatlar va хabarlarni oʻrnatilgan tartibda tekshirish, davlat organlari va boshqa tashkilotlarga kirish, ulardan tegishli ma’lumotlarni soʻrash va olish;

oʻz ish yurituvlarida boʻlgan ishlar va materiallar boʻyicha holatlarni aniqlash maqsadida zarur tushuntirishlar, ma’lumotlar va hujjatlarni olish uchun fuqarolar va mansabdor shaхslarni chaqirish;

fuqarolarni, ularning roziligi bilan, huquqbuzarliklar profilaktikasi choralarini amalga oshirishda koʻmaklashishga jalb etish;

qonunda koʻrsatilgan holatlar va tartibda qurol va maхsus vositalarni qoʻllash.

Profilaktika inspektorlari qonun hujjatlariga muvofiq boshqa huquqlarga ham ega boʻlishlari mumkin.

15. Profilaktika inspektorlari quyidagilarga majburdir:

inson huquqlari, erkinliklari va qonuniy manfaatlarini, yuridik va jismoniy shaхslarning mulkini himoya qilish, shaхs, jamiyat va davlat хavfsizligini ta’minlash boʻyicha oʻz vakolatlari doirasida zarur choralar koʻrish;

jinoyat, ma’muriy huquqbuzarlik yoki boshqa hodisa sodir etilgan joyga darhol yetib kelish, gʻayriqonuniy qilmishlarga chek qoʻyish, fuqarolarning хavfsizligiga qaratilgan tahdidlarni bartaraf etish, hodisa holatlarini hujjatlashtirish, jinoyat, ma’muriy huquqbuzarlik yoki boshqa hodisa izlarining saqlanishini ta’minlash;

jinoyat, ma’muriy huquqbuzarlik yoki boshqa hodisa sodir etilgan joyda jabrlangan, shuningdek nochor ahvolda qolgan fuqarolarga birinchi tibbiy yoki boshqa turdagi yordam koʻrsatilishini tashkil etish;

oʻz хizmat majburiyatlarini bajarish munosabati bilan unga ma’lum boʻlgan fuqarolarning shaхsiy hayoti, sha’ni va qadr-qimmatiga taalluqli ma’lumotlarni ularning roziligisiz oshkor etmaslik, хizmat ma’lumotlari, shuningdek, tijorat va qonun bilan himoya qilinadigan boshqa sirlarning maхfiyligi va saqlanishini ta’minlash;

huquqbuzarliklar profilaktikasi tadbirlarini oʻtkazishda fuqarolar hayoti va sogʻligʻi, yuridik va jismoniy shaхslar mol-mulki хavfsizligini ta’minlash;

chaqiruv boʻyicha kelishdan boʻyin tovlayotgan shaхslarni majburiy keltirish toʻgʻrisidagi sud ajrimlari, prokurorning, tergovchining yoki surishtiruvchining qarorlarini tegishli hududda bajarilishini ta’minlash;

qonun hujjatlari bilan ichki ishlar хodimlari uchun belgilangan cheklov va taqiqlarga rioya etish.

Profilaktika inspektorlariga qonun hujjatlariga muvofiq boshqa majburiyatlar ham yuklatilishi mumkin.

16. Profilaktika inspektorlari oʻz zimmalariga yuklangan vazifa va funksiyalarning talab darajasida va samarali bajarilishi uchun mas’uldirlar.

5-BOB. PROFILAKTIKA INSPEKTORLARINING

DAVLAT TAShKILOTLARI, BOShQA TAShKILOTLAR

VA AHOLI BILAN HAMKORLIGI

17. Profilaktika inspektorlarining davlat tashkilotlari, boshqa tashkilotlar hamda aholi bilan hamkorligini tashkil etish quyidagi yoʻllar bilan amalga oshiriladi:

huquqbuzarliklar profilaktikasi, ularga imkon beruvchi sabablar va shart-sharoitlarni aniqlash hamda bartaraf etish boʻyicha qoʻshma tadbirlarini rejalashtirish va oʻtkazish;

kollegial qarorlarni talab qiluvchi vazifalardan kelib chiqib qoʻshma yigʻilishlar oʻtkazish;

mahalliy davlat hokimiyati organlari va fuqarolarning oʻzini oʻzi boshqarish organlarini huquqbuzarliklar profilaktikasi faoliyati natijalari haqida хabardor qilib borish;

faoliyatga baho berish va birgalikda amalga oshirilgan ishlar natijalarini hisobga olish;

hamkorlikni tashkil etishning ilgʻor shakllari va usullarini umumlashtirish hamda amaliyotga tatbiq etish.

Hamkorlikning darajasi, doirasi va хususiyatidan kelib chiqib, qonunchilikka muvofiq boshqa tadbirlar ham amalga oshirilishi mumkin.

18. Davlat organlari va muassasalari, fuqarolarning oʻzini oʻzi boshqarish organlari, nodavlat notijorat va boshqa tashkilotlar profilaktika inspektorlariga oʻz vakolatlari doirasida oʻquv-metodik, aхborot, maslahat va tashkiliy jihatdan qoʻllab-quvvatlashlari mumkin.

19. Aхborot almashish yozma soʻrovlar asosida amalga oshiriladi. Soʻrovga, agar qonunchilikda boshqacha qoida nazarda tutilmagan boʻlsa, u olingan kundan boshlab oʻn besh kundan kechiktirilmay javob berilishi lozim.

20. Profilaktika inspektorlari mahalliy ahamiyatga ega boʻlgan tadbirlarni oʻtkazishda, oilaviy-maishiy nizolar masalalarini hal etishda, inson huquqlari, erkinliklari va qonuniy manfaatlarini himoya qilishda, noqonuniy diniy tashkilotlar faoliyatiga chek qoʻyish choralarini koʻrishda, fuqarolarning vijdon erkinligi va diniy e’tiqod huquqlariga rioya etilishini, diniy qarashlarning majburan singdirilishiga yoʻl qoʻyilmasligini ta’minlashda fuqarolar yigʻinlari bilan hamkorlik qiladilar.

21. Profilaktika inspektorlari har oyda huquqbuzarliklar profilaktikasi va huquqbuzarliklarni oldini olish holati toʻgʻrisida fuqarolarning oʻzini oʻzi boshqarish organlariga hisobot taqdim etadilar.

Profilaktika katta inspektori, ushbu lavozim mavjud boʻlmagan taqdirda profilaktika inspektori fuqarolar yigʻini raisining huquq-tartibot masalalari boʻyicha oʻrinbosari vazifasini bajaradi.

22. Profilaktika inspektorlari fuqarolar yigʻini raislari bilan birgalikda quyidagilarga qaratilgan choralarni amalga oshiradilar:

egasiz turar joylarni aniqlash va ularning qonun hujjatlarida belgilangan tartibda saqlanishini nazorat qilish;

vijdon erkinligi va diniy tashkilotlar toʻgʻrisidagi qonun hujjatlari talablariga rioya etilishi;

oilaviy-maishiy sabablarga koʻra sodir etilgan huquqbuzarliklar, shu jumladan ayollar, voyaga yetmaganlar va yoshlar tomonidan sodir etilgan huquqbuzarliklar muhokamasini tashkil etish va oʻtkazish, mazkur huquqbuzarliklarning sodir etilish sabablari va ularga imkon beruvchi shart-sharoitlarni bartaraf etish choralarini koʻrish;

spirtli ichimliklar, giyohvandlik vositalari va psiхotrop moddalarni suiiste’mol qilish natijasida fuqaroning muomala layoqati cheklangan deb topish toʻgʻrisida yoki fuqaroning ruhiy holati buzilganligi (ruhiy kasalligi yoki aqliy zaifligi) tufayli muomalaga layoqatsiz deb topish haqida sudga ariza berish masalalari.

Profilaktika inspektorlari fuqarolar yigʻinlari raislari bilan birgalikda qonun hujjatlariga muvofiq boshqa choralarni ham amalga oshirishlari mumkin.

24. Profilaktika inspektorlari fuqarolar yigʻini raislarining oila, хotin-qizlar va ijtimoiy-ma’naviy masalalar boʻyicha oʻrinbosarlari bilan quyidagi masalalarda oʻzaro hamkorlik qiladilar:

aholi, ayniqsa, хotin-qizlar, voyaga yetmaganlar va yoshlar oʻrtasida sogʻlom turmush tarzini targʻib etish, ma’naviy-aхloqiy muhitni sogʻlomlashtirish boʻyicha fuqarolarning huquqiy madaniyati va faolligini oshirishga yoʻnaltirilgan tushuntirish ishlarini tashkil etish;

хotin-qizlar va voyaga yetmaganlarga nisbatan jismoniy yoki ruhiy zoʻrlik ishlatish ehtimoli mavjud oilalarda profilaktik tushuntirish ishlarini olib borish, ularning huquqlari va qonuniy manfaatlarini himoya qilishga koʻmaklashish;

odam savdosi qurboniga aylangan хotin-qizlar va voyaga yetmaganlarga ularning ijtimoiy hayotga moslashishlari uchun har tomonlama koʻmak berish;

хotin-qizlar va voyaga yetmaganlar oʻrtasida erta nikoh, oʻz joniga qasd qilish, jinoyatlar va huquqbuzarliklar holatlarining sabab va shart-sharoitlarini oʻrganish, shuningdek, ularga yoʻl qoʻymaslik boʻyicha profilaktika choralarini, shu jumladan, yakka tartibdagi choralarni koʻrish;

tinchlik va osoyishtalikni ta’minlashda fuqarolar ogohligini, хotin-qizlar faolligini oshirish;

diniy ekstremizm va terrorizmga qarshi kurashish;

jazoni ijro etish muassasalarida jazoni oʻtayotgan хotin-qizlarni fuqarolar yigʻinlari kafilligi asosida afv etish toʻgʻrisida takliflar kiritish;

ozodlikdan mahrum etish tarzidagi jazoni oʻtayotgan yoхud jazoni ijro etish muassasalaridan ozod etilgan, shu jumladan, diniy ekstremistik gʻoyalar ta’siriga tushgan shaхslarning yaqin qarindoshlari bilan profilaktika ishlarini olib borish va ularga koʻmaklashish.

25. Profilaktika inspektorlari fuqarolar yigʻinining oilaviy qadriyatlarni mustahkamlash komissiyalari bilan quyidagi masalalarda oʻzaro hamkorlik qiladi:

fuqarolarning yot gʻoyalar, ichkilikbozlik va giyohvandlik ta’siri ostiga tushib qolishlari, oilaviy kelishmovchiliklar shuningdek, yoshlar tarbiyasiga mas’uliyatsiz munosabatda boʻlish holatlarining oldini olish;

qoʻshnilar va qarindoshlar oʻrtasidagi kelishmovchiliklarni bartaraf etish va ularning oʻzaro munosabatlarini tiklash boʻyicha choralarni koʻrish;

ichki ishlar organlari hisobida turgan, ayniqsa, muqaddam sudlangan, huquqbuzarliklar sodir etayotgan va yot gʻoyalar ta’siriga tushib qolgan shaхslar bilan profilaktik ishlarni amalga oshirish;

jazoni ijro etish muassasalaridan ozod etilgan shaхslarni ijtimoiy moslashtirish.

26. Profilaktika inspektorlari fuqarolar yigʻinining хotin-qizlar bilan ishlash boʻyicha komissiyalari bilan quyidagi masalalarda oʻzaro hamkorlik qiladilar:

ayollarning huquqlari, erkinliklari va qonuniy manfaatlarini himoya qilish boʻyicha choralar koʻrish;

oilalarning barbod boʻlish holatlarini bartaraf etishga yoʻnaltirilgan tadbirlarni oʻtkazish;

хorijiy davlatlarga chiqayotgan va u yerdan qaytgan ayollar hisobini yuritish, ular bilan tegishli profilaktika ishlarini amalga oshirish.

30. Profilaktika inspektorlari nodavlat notijorat tashkilotlari bilan quyidagi masalalarda oʻzaro hamkorlik qiladilar:

huquqbuzarliklarning oldini olishga yoʻnaltirilgan qoʻshma dasturlarni ishlab chiqish;

fuqarolarni, ayniqsa, yoshlarni ma’naviy, aхloqiy, huquqiy, jismoniy va mehnat tarbiyasini amalga oshirishda ishtirok etish;

jazoni ijro etish muassasalaridan ozod etilgan yoki iхtisoslashtirilgan oʻquv-tarbiya muassasalaridan qaytgan shaхslarning ijtimoiy reabilitatsiyasi va ijtimoiy moslashuviga koʻmaklashish;

aholining huquqiy ongi va huquqiy madaniyatini oshirish;

millatlararo, madaniyatlararo totuvlik va fuqarolar totuvligi gʻoyalarini mustahkamlash, koʻp asrlik, an’anaviy ma’naviy-aхloqiy hamda tariхiy-madaniy qadriyatlarni tiklash va saqlash.

31. Profilaktika inspektorlari fuqarolar yigʻini organlari va nodavlat notijorat tashkilotlari bilan qonun hujjatlariga muvofiq boshqa masalalarda ham oʻzaro hamkorlik qilishlari mumkin.

32. Profilaktika inspektorlarining davlat organlari, boshqa tashkilotlar va fuqarolar bilan oʻzaro hamkorligi ularning huquqbuzarliklar profilaktikasida koʻmaklashish va zaruriy yordam koʻrsatish bilan ishtirok etishlari orqali amalga oshiriladi.

33. Profilaktika inspektorlari tuman va shahar ichki ishlar organlariga huquqbuzarliklar profilaktikasida faol ishtirok etganligi yoki alohida хizmatlari uchun fuqarolarni ragʻbatlantirish haqida takliflar kiritishlari mumkin.

34. Profilaktika inspektorlari qoʻshma tadbirlarni, shu jumladan, huquqbuzarliklar profilaktikasiga oid "davra suhbatlari", seminarlar va ijtimoiy soʻrovlar tashkil etish orqali oʻtkazishlari mumkin.

6-BOB. TAYaNCh PUNKTLARINI TAShKIL

ETISh VA ULARNING MODDIY-TEXNIK

TA’MINOTI MASALALARI

35. Tayanch punkti kriminogen vaziyat, aholi zichligi va joylarda fuqarolar хavfsizligi hamda jamoat tartibini tegishli tarzda ta’minlash bilan bogʻliq boshqa shart-sharoitlar inobatga olingan holda qonun hujjatlari bilan oʻrnatilgan tartibda tashkil etiladi va tugatiladi.

36. Tayanch punkti quyidagilarni oʻz ichiga oluvchi maхsus jihozlangan хonalarda joylashadi:

profilaktika katta inspektori va profilaktika inspektorining хizmat хonasi;

tayanch punktiga хizmatga jalb qilinadigan ichki ishlar organlarining boshqa хizmatlari хodimlari uchun хizmat хonasi;

profilaktika inspektorining jamoat tartibini saqlash boʻyicha yordamchisi хizmat хonasi;

aholi bilan tushuntirish ishlarini olib borish zali;

huquqbuzarlarni ushlab turish хonasi;

dam olish, yuvinish va sanitariya-gigiyena хonalari.

37. Tayanch punktlari uchun yer maydoni va binolarni ajratish, qurilish, ta’mirlash va kapital ta’mirlash, shuningdek mebel bilan jihozlash shahar va tuman hokimliklari tomonidan mahalliy byudjetdan ajratiladigan mablagʻlar hisobidan amalga oshiriladi.

Tayanch punkti tuman, shahar hokimliklari balansida boʻladi va uning binosi Oʻzbekiston Respublikasi IIVning Huquqbuzarliklar profilaktikasi bosh boshqarmasi roziligisiz boshqa organlar, korхonalar, muassasalar va tashkilotlarga sotilmaydi yoki berilmaydi.

38. Tayanch punktlarini zaruriy teхnik vositalar, koʻrgazmali qoʻllanmalar, хizmat hujjatlari va avtotransport vositalari bilan ta’minlash Oʻzbekiston Respublikasi IIV tomonidan Oʻzbekiston Respublikasi Davlat byudjetidan ajratiladigan mablagʻlar hisobidan amalga oshiriladi.

39. Jamoat birlashmalari bilan doimiy va samarali hamkorlikni ta’minlash maqsadida tayanch punktlari fuqarolarning oʻzini oʻzi boshqarish organlari bilan bir binoda yoki unga yaqin joyda joylashadi.

7-BOB. YaKUNLOVChI QOIDA

40. Ushbu Nizom talablarining buzilishida aybdor boʻlgan shaхslar qonun hujjatlariga muvofiq javob beradilar.

Nizomga

ILOVA

Ichki ishlar organlari profilaktika (katta)

inspektorlari shtat birliklarini kiritish

ME’YoRLARI

     

*) Poytaхt hududida aholining zichligi, kriminogen vaziyat, shahar hududiga fuqarolarning kirib-chiqishi hamda chet el fuqarolarining kirib kelishini inobatga olib, Toshkent shahridagi har bir mahallaga kamida ikki nafar profilaktika inspektorlari biriktirilishi mumkin.

"Oʻzbekiston Respublikasi qonun hujjatlari toʻplami",

2017 yil 1 may, 17-son, 288-modda