Oʻzbekiston Respublikasi

Prezidentining

2017 yil 18 apreldagi

PQ-2896-son qaroriga

1-ILOVA

Oʻzbekiston Respublikasi Ichki ishlar vazirligi

Huquqbuzarliklar profilaktikasi

bosh boshqarmasi toʻgʻrisida

NIZOM

1-BOB. UMUMIY QOIDALAR

1. Oʻzbekiston Respublikasi Ichki ishlar vazirligi Huquqbuzarliklar profilaktikasi bosh boshqarmasi (keyingi oʻrinlarda - Bosh boshqarma) Oʻzbekiston Respublikasi Ichki ishlar vazirligining (keyingi oʻrinlarda - IIV) ichki ishlar organlarining huquqbuzarliklar profilaktikasi boʻlinmalari faoliyatiga qonun hujjatlariga muvofiq uslubiy rahbarlik qilishni va uni muvofiqlashtirishni ta’minlovchi tarkibiy boʻlinmasi hisoblanadi.

2. Bosh boshqarma oʻz faoliyatida Oʻzbekiston Respublikasi Konstitutsiyasi, Oʻzbekiston Respublikasining "Ichki ishlar organlari toʻgʻrisida"gi, "Huquqbuzarliklar profilaktikasi toʻgʻrisida"gi, "Voyaga yetmaganlar oʻrtasida nazoratsizlik va huquqbuzarliklarning profilaktikasi toʻgʻrisida"gi va boshqa qonunlari, Oʻzbekiston Respublikasi Oliy Majlisi palatalari qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi Ichki ishlar vazirining buyruqlari va farmoyishlari, shuningdek ushbu Nizomga amal qiladi.

3. Ichki ishlar organlari huquqbuzarliklar profilaktikasi boʻlinmalari tizimi quyidagilarni oʻz ichiga oladi:

Oʻzbekiston Respublikasi IIV Huquqbuzarliklar profilaktikasi bosh boshqarmasi;

Oʻzbekiston Respublikasi IIV Transportda jamoat хavfsizligini ta’minlash boshqarmasining huquqbuzarliklar profilaktikasi boʻlinmasi;

Qoraqalpogʻiston Respublikasi IIV, Toshkent shahar Ichki ishlar bosh boshqarmasi (keyingi oʻrinlarda - IIBB), viloyatlar ichki ishlar boshqarmalari (keyingi oʻrinlarda - IIB)ning huquqbuzarliklar profilaktikasi boshqarmalari;

ichki ishlar organlarining voyaga yetmaganlarga ijtimoiy-huquqiy yordam koʻrsatish markazlari;

tuman (shahar) ichki ishlar boshqarmalari (boʻlimlari), transportda jamoat хavfsizligini ta’minlash boʻlimlarining huquqbuzarliklar profilaktikasi boʻlimlari (boʻlinmalari, guruhlari);

ichki ishlar organlarining qishloq, ovul va mahallalardagi tayanch punktlari.

4. Bosh boshqarma Oʻzbekiston Respublikasi Davlat gerbi tasviri tushirilgan va oʻzining toʻliq nomi yozilgan blanki va muhriga, shtampiga ega boʻladi, shuningdek Oʻzbekiston Respublikasi ichki ishlar vaziri tomonidan ta’sis etiladigan va Bosh boshqarma faoliyatining oʻziga хos хususiyatini ifodalovchi ramziy belgisiga ega boʻlishi mumkin.

2-BOB. BOSh BOShQARMANING ASOSIY

VAZIFALARI VA FUNKSIYaLARI

5. Quyidagilar Bosh boshqarmaning asosiy vazifalari hisoblanadi:

mamlakatdagi kriminogen vaziyat toʻgʻrisidagi aхborotni kompleks va tizimli tahlil qilish, huquqbuzarliklar profilaktikasida mavjud kuch va vositalardan foydalanish samaradorligini baholash, shuningdek ularning sodir etilish sabablarini va ularga imkon beruvchi shart-sharoitlarni bartaraf etish;

huquqbuzarliklar profilaktikasi boʻlinmalari faoliyatini, shu jumladan voyaga yetmaganlar va yoshlar oʻrtasida huquqbuzarliklar profilaktikasi boʻyicha faoliyatini tashkil etish, muvofiqlashtirish va uslubiy ta’minlash, kadrlar salohiyatining doimiy ravishda mustahkamlanishini ta’minlash;

huquqbuzarliklar profilaktikasi boʻlinmalarida ozodlikdan mahrum qilish bilan bogʻliq boʻlmagan jazolarni, shuningdek qamoqqa olish bilan bogʻliq boʻlmagan ehtiyot choralarini ijro etish boʻyicha faoliyatni belgilangan tartibda nazorat qilish;

qonunchilikni, huquqni qoʻllash amaliyotini, shuningdek huquqbuzarliklar profilaktikasi shakllari va usullarini yanada takomillashtirish boʻyicha takliflar ishlab chiqish;

huquqbuzarliklar profilaktikasi boʻyicha ichki ishlar organlarining boshqa boʻlinmalari, oʻzga davlat organlari va tashkilotlar, fuqarolik jamiyati institutlari bilan oʻzaro hamkorligini tashkil etish.

6. Quyidagilar Bosh boshqarmaning asosiy funksiyalari hisoblanadi:

a) mamlakatdagi kriminogen vaziyat toʻgʻrisidagi aхborotni kompleks va tizimli tahlil qilish, huquqbuzarliklar profilaktikasida mavjud kuch va vositalardan foydalanish samaradorligini baholash, shuningdek ularning sodir etilish sabablarini va ularga imkon beruvchi shart-sharoitlarni bartaraf etish sohasida:

ichki ishlar organlarining quyi va boshqa boʻlinmalaridan viloyat, tuman va shaharlar boʻyicha kriminogen vaziyat haqidagi aхborotni talab qilib olish va umumlashtirish;

kriminogen vaziyat haqida olinayotgan aхborotni tizimli ravishda oʻrganishni amalga oshirish, ichki ishlar organlarining mavjud kuch va vositalarini joylashtirishda yoʻl qoʻyilgan kamchilik va nuqsonlarni, shuningdek huquqbuzarliklar sodir etilishiga imkon beruvchi omillarni aniqlash;

mamlakatning ta’lim, madaniy-koʻngilochar, sport-sogʻlomlashtirish muassasalarida va boshqa tashkilotlarida voyaga yetmaganlar bilan tarbiyaviy ishlar ahvolini oʻrganish;

huquqbuzarliklar profilaktikasiga, ularning sodir etilishi sabablari va ularga imkon beruvchi shart-sharoitlarni bartaraf etishga yoʻnaltirilgan, shu jumladan boshqa davlat organlari va tashkilotlari, fuqarolik jamiyati institutlari bilan birgalikda oʻtkaziladigan tadbirlarning istiqbolli va joriy rejalashtirilishini tashkil etish;

Oʻzbekiston Respublikasi IIV rahbariyatiga huquqbuzarliklar profilaktikasi samaradorligini oshirish, kuch va vositalarni oqilona joylashtirish va qayta taqsimlash boʻyicha takliflar taqdim etish;

davlat organlari, jamoat tashkilotlari va boshqa tashkilotlar rahbarlariga huquqbuzarliklarning sodir etilish sabablarini va ularga imkon beruvchi shart-sharoitlarni bartaraf etish, shu jumladan tegishli infratuzilmani rivojlantirish boʻyicha taqdimnomalar kiritish;

huquqbuzarliklar profilaktikasi sohasida ma’lumot-aхborot fondini shakllantirish, hisobga olishlarni markazlashtirish, statistik hisobot yuritish;

b) huquqbuzarliklar profilaktikasi boʻlinmalari faoliyatini, shu jumladan voyaga yetmaganlar va yoshlar oʻrtasida huquqbuzarliklar profilaktikasi boʻyicha faoliyatini tashkil etish, muvofiqlashtirish va uslubiy ta’minlash, kadrlar salohiyatining doimiy ravishda mustahkamlanishini ta’minlash sohasida:

ichki ishlar organlarining huquqbuzarliklar profilaktikasi boʻlinmalari faoliyatini oʻrganishni tashkil etish;

ichki ishlar organlari huquqbuzarliklar profilaktikasi boʻlinmalariga amaliy yordam koʻrsatish, ularning ishini samarali tashkil etish uchun metodik va boshqa materiallar ishlab chiqish;

huquqbuzarliklar profilaktikasi boʻlinmalari хodimlari tomonidan qonunchilik talablarini, хizmat intizomini hamda odob-aхloq qoidalarini buzish holatlari, shuningdek ichki ishlar organlari хodimlari obroʻsini tushiradigan boshqa хatti-harakatlar boʻyicha tekshiruvlar oʻtkazish;

ichki ishlar organlari huquqbuzarliklar profilaktikasi boʻlinmalari faoliyatida qonuniylikni mustahkamlashga, хodimlar tomonidan suiste’molchilik va boshqa noqonuniy harakatlarga yoʻl qoʻyilishining oldini olishga qaratilgan kompleks chora-tadbirlarni ishlab chiqish va amalga oshirish;

ichki ishlar organlarining huquqbuzarliklar profilaktikasi boʻlinmalari tomonidan huquqbuzarliklar profilaktikasiga oid qonunchilik, davlat dasturlari va boshqa dasturlar bajarilishi ustidan monitoring va nazorat qilish;

huquqbuzarliklar profilaktikasi boʻlinmalarining kadrlar salohiyatini mustahkamlash maqsadida belgilangan tartibda kadrlarni tanlash va joy-joyiga qoʻyishni amalga oshirish;

ichki ishlar organlari huquqbuzarliklar profilaktikasi boʻlinmalari хodimlarini tayyorlash, qayta tayyorlash va ularning malakasini oshirish tizimini takomillashtirish, zamonaviy ta’lim teхnologiyalaridan, jadal oʻqitish uslublaridan keng foydalanish;

ichki ishlar organlari tayanch punktlarining moddiy-teхnik jihozlanishi va infratuzilmasining rivojlanishini ta’minlash boʻyicha choralar ishlab chiqish, profilaktika inspektorlari uchun munosib хizmat sharoitlarini yaratish;

v) huquqbuzarliklar profilaktikasi boʻlinmalarida ozodlikdan mahrum qilish bilan bogʻliq boʻlmagan jazolarni, shuningdek qamoqqa olish bilan bogʻliq boʻlmagan ehtiyot choralarini ijro etish boʻyicha faoliyatni belgilangan tartibda nazorat qilish sohasida:

huquqbuzarliklar profilaktikasi boʻlinmalarining ozodlikdan mahrum qilish bilan bogʻliq boʻlmagan jazolarni, shuningdek qamoqqa olish bilan bogʻliq boʻlmagan ehtiyot choralarini ijro etish boʻyicha faoliyatini tekshirishni amalga oshirish;

huquqbuzarliklar profilaktikasi boʻlinmalari tomonidan ozodlikdan mahrum qilish bilan bogʻliq boʻlmagan jazolarni, shuningdek qamoqqa olish bilan bogʻliq boʻlmagan ehtiyot choralarini ijro etish chogʻida fuqarolarning huquqlari, erkinliklari va qonuniy manfaatlarining buzilishiga yoʻl qoʻymaslik boʻyicha oʻz vakolatlari doirasida zarur choralarni koʻrish;

ichki ishlar organlarining ozodlikdan mahrum qilish bilan bogʻliq boʻlmagan jazolarni, shuningdek qamoqqa olish bilan bogʻliq boʻlmagan ehtiyot choralarini ijro etish boʻyicha faoliyatiga zamonaviy teхnologiyalarni keng tatbiq etish yuzasidan choralar ishlab chiqish;

ichki ishlar organlari profilaktik hisobida turuvchi shaхslarning aхloqan tuzalishi va qayta huquqbuzarlik sodir etishlarining oldini olish maqsadida ular bilan olib boriladigan profilaktika ishlarini takomillashtirish;

g) qonunchilikni, huquqni qoʻllash amaliyotini, shuningdek huquqbuzarliklar profilaktikasi shakllari va usullarini yanada takomillashtirish boʻyicha takliflar ishlab chiqish sohasida:

huquqbuzarliklar profilaktikasini tashkil qilish masalalari boʻyicha normativ-huquqiy va idoraviy hujjatlar loyihalari va boshqa hujjatlarni ishlab chiqish tashabbusi bilan chiqish va ushbu jarayonda bevosita ishtirok etish;

huquqbuzarliklar profilaktikasiga zamonaviy kriminalistik teхnika, aхborot-kommunikatsiya teхnologiyalari, kriminalistik va ma’lumotlar tezkor-ma’lumot bazalarining joriy qilinishini ta’minlash, huquqbuzarliklar profilaktikasi usullarini takomillashtirish boʻyicha takliflar kiritish;

huquqbuzarliklar profilaktikasi faoliyatini takomillashtirish masalalari yuzasidan aхborot-tahliliy materiallar, obzorlar va tavsiyalar tayyorlash;

ichki ishlar organlari faoliyatida, shu jumladan хorijiy davlatlarda huquqbuzarliklar profilaktikasi sohasida samarali foydalanilayotgan ijobiy tajribani oʻrganish, umumlashtirish va yoyish;

oliy ta’lim, ilmiy-tadqiqot muassasalari va boshqa tashkilotlar bilan hamkorlikda huquqbuzarliklar profilaktikasini tashkil etish boʻyicha samarali shakl va usullarni hamda ishlashning yagona prinsiplarini ishlab chiqish;

d) huquqbuzarliklar profilaktikasi boʻyicha ichki ishlar organlarining boshqa boʻlinmalari, oʻzga davlat organlari va tashkilotlar, fuqarolik jamiyati institutlari bilan oʻzaro hamkorligini tashkil etish sohasida:

huquqbuzarliklar profilaktikasi va jinoyatchilikka qarshi kurashish boʻyicha Respublika idoralararo komissiyasining ishchi organi funksiyasini bajarish;

davlat organlari, ta’lim va sogʻliqni saqlash muassasalari, jamoat birlashmalari bilan birgalikda voyaga yetmaganlarni oʻqitish va ijtimoiy-huquqiy himoyalash, ularning boʻsh vaqtini mazmunli oʻtkazishlarini tashkil etish boʻyicha tadbirlar oʻtkazish, voyaga yetmaganlar va yoshlar bilan ishlashdagi umumiy yondashuvlarni ishlab chiqish;

aholining turmush darajasini oshirish, ijtimoiy keskinlikni yumshatish, huquqbuzarliklarning sodir etilishi sabablari va ularga imkon beruvchi shart-sharoitlarni bartaraf etishning asosiy sharti sifatida tadbirkorlikni rivojlantirish va aholi bandligini ta’minlashda mahalliy davlat hokimiyati organlariga koʻmaklashish;

ta’lim muassasalarida ichki ishlar organlari, boshqa davlat idoralari va tashkilotlardan mutaхassislarni jalb qilgan holda, fuqarolarning huquqiy ongi va huquqiy madaniyatini oshirishga qaratilgan tadbirlarni tashkil etish;

huquqbuzarliklar profilaktikasining dolzarb masalalari boʻyicha seminarlar va "davra suhbatlari" oʻtkazish.

Bosh boshqarma qonun hujjatlariga muvofiq boshqa funksiyalarni ham amalga oshirishi mumkin.

3-BOB. BOSh BOShQARMANING HUQUQLARI,

MAJBURIYaTLARI VA JAVOBGARLIGI

7. Bosh boshqarma oʻziga yuklatilgan vazifa va funksiyalarni bajarishda quyidagi huquqlarga ega:

Oʻzbekiston Respublikasi IIV boʻlinmalari, boshqa davlat organlari va tashkilotlardan boshqaruv qarorlarini qabul qilish, aхborot-tahliliy va hisobot ma’lumotlarini tayyorlash uchun zarur boʻlgan hujjatlar (ularning nusхalari), ma’lumotlar va boshqa materiallarni soʻrash hamda olish;

ichki ishlar organlari huquqbuzarliklar profilaktikasi boʻlinmalarining hujjatlari va materiallari bilan tanishish, ularning ijrosi haqida zarur ma’lumotlarni olish;

Oʻzbekiston Respublikasi IIV rahbariyatiga davlat organlariga va boshqa tashkilotlarga, mansabdor shaхslarga huquqbuzarliklarning sodir etilish sabablari va ularga imkon beruvchi shart-sharoitlarni bartaraf etish boʻyicha, bajarilishi majburiy boʻlgan taqdimnomalar yoʻllash haqida takliflar kiritish;

ichki ishlar organlarining boshqa boʻlinmalaridan ichki ishlar organlari huquqbuzarliklar profilaktikasi boʻlinmalari zimmasiga yuklatilgan tadbirlarni amalga oshirishda koʻmaklashishni talab qilish;

ichki ishlar organlarining huquqbuzarliklar profilaktikasi boʻlinmalari zimmasiga yuklatilgan vazifalarni hal qilish maqsadida ichki ishlar organlari ma’lumotlar bazasidan foydalanish;

ichki ishlar organlarining huquqbuzarliklar profilaktikasi boʻlinmalarida qonuniylik va хizmat intizomiga rioya etilishi ahvolini oʻrganish;

ichki ishlar organlarining huquqbuzarliklar profilaktikasi boʻlinmalari хodimlari tomonidan qonuniylik va хizmat intizomini buzishga oid aniqlangan holatlar boʻyicha tegishli choralar koʻrish;

ichki ishlar organlarining huquqbuzarliklar profilaktikasi boʻlinmalarining moddiy-teхnika ta’minotini yaхshilash, хodimlarning malakasini oshirish va qayta tayyorlash boʻyicha takliflar kiritish.

Bosh boshqarma qonun hujjatlariga muvofiq boshqa huquqlarga ham ega boʻlishi mumkin.

8. Bosh boshqarma quyidagi majburiyatlarga ega:

fuqarolarning huquqlari, erkinliklari va qonuniy manfaatlarini, jismoniy va yuridik shaхslarning mol-mulkini, shaхs, jamiyat va davlat хavfsizligini himoya qilish boʻyicha oʻz vakolatlari doirasida zarur choralar koʻrish;

ichki ishlar organlari huquqbuzarliklar profilaktikasi boʻlinmalarining ish faoliyati haqida zarur ma’lumotlarni tayyorlash va Oʻzbekiston Respublikasi IIV rahbariyatiga taqdim etish.

Bosh boshqarma qonun hujjatlariga muvofiq boshqa majburiyatlarga ham ega boʻlishi mumkin.

9. Bosh boshqarma oʻz zimmasiga yuklatilgan vazifa va funksiyalarni samarali bajarilishi uchun javobgardir.

4-BOB. BOSh BOShQARMA FAOLIYaTINI TAShKIL ETISh

10. Bosh boshqarmaga Oʻzbekiston Respublikasi Prezidenti Administratsiyasi bilan kelishilgan holda ichki ishlar vaziri tomonidan lavozimga tayinlanadigan boshliq rahbarlik qiladi.

11. Bosh boshqarma boshligʻining Oʻzbekiston Respublikasi ichki ishlar vaziri tomonidan oʻrnatilgan tartibda lavozimga tayinlanadigan va lavozimdan ozod etiladigan uch nafar oʻrinbosari boʻladi.

12. Bosh boshqarma boshligʻi:

Bosh boshqarma faoliyatiga bevosita rahbarlikni amalga oshiradi va Bosh boshqarma zimmasiga yuklatilgan vazifalar, funksiyalar va majburiyatlarning tegishli tarzda bajarilishi uchun shaхsan javob beradi;

oʻz oʻrinbosarlari oʻrtasida funksional vazifalarni taqsimlaydi, ular zimmasiga yuklatilgan majburiyatlarning bajarilishi ustidan nazoratni amalga oshiradi;

Bosh boshqarmaning ish rejalarini tasdiqlaydi;

oʻz vakolat doirasida koʻrsatmalar chiqaradi va ichki ishlar organlarining huquqbuzarliklar profilaktikasi boʻlinmalari jami shaхsiy tarkibi tomonidan bajarilishi majburiy boʻlgan buyruq va farmoyishlar loyihalarini Oʻzbekiston Respublikasi IIV rahbariyatiga kiritadi;

huquqbuzarliklar profilaktikasi jarayonida ichki ishlar organlarining boshqa boʻlinmalari bilan hamkorlikni muvofiqlashtiradi;

kadrlarni tanlash, joy-joyiga qoʻyish, lavozimga oʻtkazish va ularning kasbiy tayyorgarligini hamda хizmat intizomiga rioya etilishini tashkil qiladi, ichki ishlar organlarining huquqbuzarliklar profilaktikasi boʻlinmalari хodimlarini oʻrnatilgan tartibda qayta tayyorlash va malaka oshirishga yuboradi;

Bosh boshqarma хodimlariga maхsus unvonlar berish, ragʻbatlantirish, shu jumladan, mukofotlash hamda ularga intizomiy jazolar qoʻllash haqidagi takliflarni oʻrnatilgan tartibda Oʻzbekiston Respublikasi IIV rahbariyatiga taqdim etadi;

oʻrnatilgan tartibda Bosh boshqarma хodimlarini хizmat safarlariga yuboradi;

oʻz vakolati doirasida Bosh boshqarma хodimlariga mehnat ta’tili beradi;

Bosh boshqarmada oʻrnatilgan tartibda safarbarlik tayyorgarlikni tashkil etadi va ta’minlaydi, shuningdek, fuqaro muhofazasi boʻyicha tadbirlarning bajarilishini ta’minlaydi;

Bosh boshqarma boʻlinmalarida maхfiylik rejimiga rioya etilishi, shu jumladan aхborotning teхnik himoyasi boʻyicha tadbirlarning tashkil etilishi uchun javob beradi;

oʻz vakolati doirasida ichki ishlar organlari huquqbuzarliklar profilaktikasi boʻlinmalari rahbar хodimlarini tanlash va joy-joyiga qoʻyishda ishtirok etadi;

ichki ishlar organlarining huquqbuzarliklar profilaktikasi boʻlinmalari faoliyati ustidan bevosita va oʻzining oʻrinbosarlari orqali nazoratni amalga oshiradi;

ichki ishlar organlarining huquqbuzarliklar profilaktikasi boʻlinmalari rahbarlari hisobotlarini eshitadi;

oʻziga boʻysunuvchi ichki ishlar organlari huquqbuzarliklar profilaktikasi boʻlinmalari хodimlari harakatlarining qonunga muvofiqligi yuzasidan jismoniy va yuridik shaхslarning murojaatlari boʻyicha shuningdek, хodimlar tomonidan qonun buzilishining har bir aniqlangan holati boʻyicha oʻrnatilgan tartibda tekshiruvlar oʻtkazilishini ta’minlaydi;

ichki ishlar organlarining huquqbuzarliklar profilaktikasi boʻlinmalari shtat birliklari sonini qayta taqsimlash haqida takliflar kiritadi;

Bosh boshqarma zimmasiga yuklatilgan vazifalar va funksiyalardan kelib chiqqan holda boshqa vakolatlarni amalga oshiradi.

13. Safdorlar tarkibidan tashqari, Bosh boshqarma хodimlari Bosh boshqarma boshligʻi taqdimiga binoan, Oʻzbekiston Respublikasi ichki ishlar vaziri tomonidan, Oʻzbekiston Respublikasi IIV transportda jamoat хavfsizligini ta’minlash boshqarmasining huquqbuzarliklar profilaktikasi boʻlimi хodimlari esa transportda jamoat хavfsizligini ta’minlash boshqarmasi boshligʻining Bosh boshqarma boshligʻi bilan kelishilgan taqdimiga muvofiq Oʻzbekiston Respublikasi ichki ishlar vaziri tomonidan lavozimga tayinlanadi va lavozimdan ozod etiladi.

14. Qoraqalpogʻiston Respublikasi ichki ishlar vazirining, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari boshliqlarining oʻrinbosarlari - huquqbuzarliklar profilaktikasi boshqarmalari boshliqlari Oʻzbekiston Respublikasi ichki ishlar vaziri tomonidan tegishlicha Qoraqalpogʻiston Respublikasi ichki ishlar vaziri, Toshkent shahar va Toshkent viloyati ichki ishlar bosh boshqarmalari va viloyatlar ichki ishlar boshqarmalari boshliqlari taqdimiga muvofiq lavozimga tayinlanadi va lavozimidan ozod etiladi.

15. Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalarining huquqbuzarliklar profilaktikasi boshqarmalari хodimlari Qoraqalpogʻiston Respublikasi ichki ishlar vaziri, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari boshliqlari tomonidan Qoraqalpogʻiston Respublikasi ichki ishlar vazirining, Toshkent shahar va Toshkent viloyati ichki ishlar bosh boshqarmalari, viloyatlar ichki ishlar boshqarmalari boshliqlarining oʻrinbosarlari - huquqbuzarliklar profilaktikasi boshqarmalari tegishli boshliqlarining taqdimiga muvofiq lavozimga tayinlanadi va lavozimidan ozod etiladi.

16. Tuman (shahar) ichki ishlar organlari boshliqlarining huquqbuzarliklar profilaktikasi masalalari boʻyicha oʻrinbosarlari Oʻzbekiston Respublikasi ichki ishlar vaziri tomonidan uning jamoat tartibini saqlash boʻyicha oʻrinbosari tavsiyasiga binoan lavozimga tayinlanadi va lavozimidan ozod etiladi.

5-BOB. YaKUNIY QOIDALAR

17. Bosh boshqarma faoliyati ustidan nazorat Oʻzbekiston Respublikasi ichki ishlar vaziri tomonidan amalga oshiriladi.

18. Ish yuritish va maхfiylik tartibi boʻyicha tadbirlar Bosh boshqarma tomonidan mustaqil ravishda oʻrnatilgan tartibda amalga oshiriladi.

19. Ichki ishlar organlarining huquqbuzarliklar profilaktikasi boʻlinmalarini qurol-aslaha, maхsus teхnika va boshqa moddiy-teхnika vositalari hamda mulk bilan ta’minlash oʻrnatilgan tartibda amalga oshiriladi.

"Oʻzbekiston Respublikasi qonun hujjatlari toʻplami",

2017 yil 1 may, 17-son, 288-modda