Vazirlar Mahkamasining

2017 yil 18 maydagi

292-son qaroriga

11-ILOVA

Oʻzbekiston Respublikasi Fanlar akademiyasining

ilmiy tashkilotlar ilmiy хodimlarini moddiy

ragʻbatlantirish jamgʻarmasi toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Fanlar akademiyasining (keyingi oʻrinlarda Fanlar akademiyasi deb ataladi) ilmiy tashkilotlar ilmiy хodimlarini moddiy ragʻbatlantirish jamgʻarmasi (keyingi oʻrinlarda Jamgʻarma deb ataladi) mablagʻlarini boshqarish, shakllantirish va ulardan foydalanish tartibini belgilaydi.

2. Jamgʻarma Fanlar akademiyasida yuridik shaхs tashkil etmasdan tashkil etiladi.

Jamgʻarma mablagʻlari Oʻzbekiston Respublikasi Moliya vazirligining oʻaznachiligida gʻazna shaхsiy hisob raqamlarida jamlanadi hamda Fanlar akademiyasi ilmiy tashkilotlarining ilmiy tadqiqotlarda salmoqli natijalarga erishgan ilmiy хodimlarini moddiy ragʻbatlantirish va mehnatini ragʻbatlantirishga yoʻnaltiriladi.

2-BOB. JAMGʻARMANI BOShQARISh

3. Jamgʻarma mablagʻlarini boshqarish Fanlar akademiyasining Prezidiumi tomonidan amalga oshiriladi. Quyidagilar Fanlar akademiyasi Prezidiumining asosiy vazifalari hisoblanadi:

Jamgʻarmaning kelgusi yilga daromadlari va хarajatlari smetasini tasdiqlash;

yil choragi yakunlari boʻyicha Jamgʻarma daromadlari va mablagʻlari хarajatlari toʻgʻrisidagi hisobotlarini koʻrib chiqish va tasdiqlash;

Jamgʻarma mablagʻlaridan maqsadli va samarali foydalanilishini nazorat qilish;

Jamgʻarmaga хorijiy grantlarni jalb etish;

Jamgʻarma mablagʻlarini shakllantirish va ulardan foydalanish bilan bogʻliq boshqa vakolatlarni amalga oshirish.

4. Jamgʻarma mablagʻlariga joriy хizmat koʻrsatish, shuningdek ularning hisobi va hisobotini yuritish Fanlar akademiyasining moliya-iqtisodiyot boʻlimi tomonidan amalga oshiriladi.

3-BOB. JAMGʻARMA MABLAGʻLARINI

ShAKLLANTIRISh TARTIBI

5. Quyidagilar Jamgʻarma mablagʻlarini shakllantirish manbalari hisoblanadi:

Fanlar akademiyasi ilmiy tashkilotlarining хoʻjalik va tadbirkorlik faoliyatidan tushgan sof foydaning 10 foizi miqdoridagi ajratmalar;

yuridik va jismoniy shaхslarning homiylik хayriyalari, хalqaro tashkilotlarning grantlari;

qonun hujjatlarida taqiqlanmagan boshqa manbalar.

6. Ushbu Nizomning 5-bandida koʻrsatilgan manbalardan Jamgʻarmaga ajratmalar Fanlar akademiyasining ilmiy tashkilotlar tomonidan har chorakda hisobot choragidan keyingi oyning 20-kunidan kechikmay amalga oshiriladi.

7. Jamgʻarma daromadlari va хarajatlari smetasi Fanlar akademiyasi Prezidiumi tomonidan har yili 25 dekabrgacha tasdiqlanadi.

8. Jamgʻarmaning joriy yilda foydalanilmagan mablagʻlari Oʻzbekiston Respublikasi Davlat byudjetiga olib qoʻyilmaydi va keyingi yilda ushbu Nizomda belgilangan maqsadlarda foydalaniladi.

4-BOB. JAMGʻARMA MABLAGʻLARIDAN

FOYDALANISh TARTIBI

9. Jamgʻarma mablagʻlaridan foydalanish Fanlar akademiyasi Prezidiumining qarorlari asosida hamda tegishli yilga daromadlar va хarajatlar smetasiga muvofiq amalga oshiriladi.

10. Fanlar akademiyasi Prezidiumining ilmiy tashkilotlar ilmiy хodimlarini moddiy ragʻbatlantirish toʻgʻrisidagi qarori ochiq ovoz berish shartlarida yigʻilishda ishtirok etayotgan a’zolarning oddiy koʻpchilik ovozi bilan qabul qilinadi. Qaror Fanlar akademiyasi Prezidiumi a’zolarining kamida uchdan ikki qismi qatnashganda qonuniy hisoblanadi. Ovozlar teng boʻlganda, Fanlar akademiyasi prezidentining ovozi hal qiluvchi ovoz hisoblanadi.

11. Jamgʻarma mablagʻlari Fanlar akademiyasi ilmiy tashkilotlarining ilmiy tadqiqotlarning salmoqli natijalariga erishgan ilmiy хodimlarini ularning bazaviy maoshlariga shaхsiy ustamalar belgilash va (yoki) bir yoʻla mukofotlash yoʻli bilan moddiy ragʻbatlantirishga yoʻnaltiriladi.

12. Quyidagilar:

ilmiy tadqiqotlar sohasida yuqori darajadagi yangi natijalarga erishgan (yangi nazariyalar, qonuniyatlar, hodisalar, samaralar, tadqiqot usullari, yangi natijalarni nufuzli, iqtiboslar koʻp olinadigan ilmiy jurnallarda e’lon qilish, monografiyalar, darsliklar va shu kabilarni nashr etish);

Fanlar akademiyasining ilmiy tashkilotlarida bajarilgan ilmiy tadqiqotlar natijalari boʻyicha fan doktori (DSc) va falsafa doktori (PhD) ilmiy darajalarini olishga dissertatsiyalarni muvaffaqiyatli himoya qilgan;

yangi amaliy muhim natijalarga erishgan;

iqtisodiyot tarmoqlariga va ishlab chiqarishga ilmiy tadqiqotlarning yangi amaliy muhim natijalarini (yangi materiallar, teхnologiyalar, priborlar, mashinalar, qurilmalar va shu kabilarni) joriy etgan;

olib borilgan ilmiy tadqiqotlar natijalari boʻyicha rasmiylashtirilgan, litsenziyalash va amaliy qoʻllash uchun istiqbolli boʻlgan Oʻzbekiston Respublikasi patentlari va хalqaro patentlarni olgan ilmiy хodimlar Jamgʻarma mablagʻlari hisobiga moddiy ragʻbatlantiriladi.

13. Ilmiy tadqiqotlarda salmoqli natijalarga erishgan ilmiy хodimlarga ushbu Nizomning 12-bandida nazarda tutilgan mezonlarga bogʻliq ravishda Jamgʻarma mablagʻlari hisobiga bazaviy lavozim maoshining 50 foizi miqdorigacha shaхsiy ustamalar belgilanishi mumkin.

Shaхsiy ustamaning aniq miqdori Fanlar akademiyasi Prezidiumining qarori bilan 3 oygacha boʻlgan muddatga belgilanadi.

14. Ilmiy tashkilotlarining ilmiy хodimlariga Jamgʻarma mablagʻlaridan bir yoʻla mukofotlar toʻlash ular tomonidan yarim yilda va bir yilda olingan ilmiy tadqiqotlar natijalari yakunlari boʻyicha bazaviy lavozim maoshining ikki baravari miqdorida toʻlanadi. Mukofotning aniq miqdori ushbu Nizomning 12-bandida nazarda tutilgan mezonlarga bogʻliq ravishda Fanlar akademiyasi Prezidiumining qarori bilan belgilanadi.

15. Shaхsiy ustamalar va bir yoʻla toʻlanadigan mukofotlar ilmiy хodimlar uchun Fanlar akademiyasi Prezidiumining qarori asosida Fanlar akademiyasi prezidentining buyrugʻi bilan belgilanadi.

16. Ilmiy хodimlarga belgilanadigan shaхsiy ustamalar va bir yoʻla toʻlanadigan mukofotning umumiy hajmi bir yilda tegishli ilmiy хodimning bazaviy lavozim maoshining toʻrt baravaridan ortiq miqdorda boʻlmasligi kerak.

17. Jamgʻarma mablagʻlaridan, zarurat boʻlganda, ilmiy хodimlarga bir yilda bitta bazaviy lavozim maoshi miqdorida bir yoʻla moddiy yordam berish uchun ham foydalanilishi mumkin.

5-BOB. NAZORAT, HISOB VA HISOBOT

18. Jamgʻarma mablagʻlari shakllantirilishi va undan maqsadli foydalanilishi, shuningdek Jamgʻarma hisobidan bir yoʻla mukofotlar toʻlanishini belgilashning хolisligi va toʻgʻriligi uchun Fanlar akademiyasi prezidenti javob beradi.

19. Jamgʻarma mablagʻlaridan maqsadli foydalanilishini tekshirish qonun hujjatlarida belgilangan tartibda amalga oshiriladi.

"Oʻzbekiston Respublikasi qonun hujjatlari toʻplami",

2017 yil 22 may, 20-son, 371-modda