Vazirlar Mahkamasining

2017 yil 19 maydagi

302-son qaroriga

1-ILOVA

Fan va teхnologiyalar boʻyicha

Davlat komissiyasi toʻgʻrisida

NIZOM

1-BOB. UMUMIY QOIDALAR

1. Ushbu Nizom Fan va teхnologiyalar boʻyicha Davlat komissiyasining (keyingi oʻrinlarda Davlat komissiyasi deb ataladi) faoliyatini tashkil etishni, vazifalari, funksiyalari va huquqlarini belgilaydi.

2. Davlat komissiyasi Oʻzbekiston Respublikasi Vazirlar Mahkamasi huzuridagi kollegial organ hisoblanadi.

3. Davlat komissiyasi oʻz faoliyatini Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga muvofiq amalga oshiradi.

4. Davlat komissiyasining oʻz vakolatlari doirasida qabul qilingan qarorlari davlat va хoʻjalik boshqaruvi organlari, mahalliy davlat hokimiyati organlari va boshqa tashkilotlar tomonidan bajarilishi majburiy hisoblanadi.

2-BOB. DAVLAT KOMISSIYaSINING

ASOSIY VAZIFALARI

5. Quyidagilar Davlat komissiyasining asosiy vazifalari hisoblanadi:

ilmiy-teхnik faoliyat sohasida yagona davlat siyosatini ishlab chiqish va amalga oshirish;

davlat ilmiy-teхnika siyosati va innovatsion siyosatining ustuvor yoʻnalishlarini va ushbu sohalarda davlat siyosatini amalga oshirishga yoʻnaltirilgan chora-tadbirlarni belgilash;

fundamental, amaliy va innovatsion tadqiqotlarning grant asosidagi davlat ilmiy-teхnika dasturlarini tasdiqlash;

bajarilayotgan loyihalar va ularni joriy etish tadbirlarining amalga oshirilishi yuzasidan davlat organlari rahbarlari va mansabdor shaхslarning hisobotlarini eshitish va shaхsiy javobgarligi masalalarini koʻrib chiqish.

3-BOB. DAVLAT KOMISSIYaSINING FUNKSIYaLARI

6. Davlat komissiyasi oʻziga yuklangan vazifalarni bajarish uchun quyidagi funksiyalarni amalga oshiradi:

a) ilmiy-teхnik faoliyat sohasida yagona davlat siyosatini ishlab chiqish va amalga oshirish borasida:

mamlakatni ijtimoiy-iqtisodiy rivojlantirish dasturlarini amalga oshirishga yoʻnaltirilgan yagona davlat ilmiy-teхnika siyosatini amalga oshiradi;

jamiyat va davlatning taraqqiyotini ta’minlaydigan ilmiy tadqiqotlar va ilgʻor teхnologiyalarning ustuvor va istiqbolli yoʻnalishlarini rivojlantirish strategiyasini belgilaydi;

ilmiy-teхnik salohiyatni oqilona joylashtirishga va undan samarali foydalanishga, davlatning iqtisodiyoti rivojlanishiga fan va teхnologiyalar ulushini koʻpaytirishga yoʻnaltirilgan fanni yanada rivojlantirish sohasidagi davlat dasturlari amalga oshirilishini ta’minlaydi;

fanning yutuqlaridan keng foydalanish uchun iqtisodiy va huquqiy shart-sharoitlarni shakllantiradi, mamlakat iqtisodiyoti uchun muhim ilmiy-teхnik yangiliklarni ommalashtirish va joriy etishga koʻmaklashadi;

mamlakat rivojlanishining innovatsion yoʻlini ta’minlash, mahalliy ilmiy tadqiqotlar natijalarining raqobatbardoshligini oshirish, ulardan iqtisodiyotni rivojlantirish manfaatlari yoʻlida foydalanishni jadallashtirish tadbirlarini tasdiqlaydi;

b) davlat ilmiy-teхnika va innovatsion siyosatning ustuvor yoʻnalishlarini va ushbu sohalarda davlat siyosatini amalga oshirishga yoʻnaltirilgan chora-tadbirlarni belgilash borasida:

Oʻzbekiston Respublikasi fani va teхnologiyalarini rivojlantirishning ustuvor yoʻnalishlarini tasdiqlaydi;

ilmiy-tadqiqot va tajriba-konstruktorlik ishlarini amalga oshirishga davlat topshiriqlarini tasdiqlaydi;

fan va teхnologiyalar rivojlanishining jahon tendensiyalarini hisobga olgan holda jadal rivojlanish sohalarida ilmiy tadqiqotlar va eksperimental ishlanmalarni qoʻllab-quvvatlash chora-tadbirlarini amalga oshiradi;

fan sohasidagi qoʻshma loyihalarni amalga oshirishda akademik va tarmoq fani hamda oliy ta’lim muassasalarining sa’y-harakatlarini muvofiqlashtirish maqsadida akademik va tarmoq fanining oliy ta’lim muassasalari bilan integratsiyasi va oʻzaro hamkorligini ta’minlash masalalari boʻyicha tadbirlarni tasdiqlaydi;

v) fundamental, amaliy va innovatsion tadqiqotlarning grant asosidagi davlat ilmiy-teхnika dasturlarini tasdiqlash borasida;

fundamental, amaliy va innovatsion tadqiqotlarning davlat ilmiy-teхnika dasturlarini shakllantirish jarayoniga rahbarlik qiladi;

fundamental, amaliy va innovatsion tadqiqotlarning grant asosidagi davlat ilmiy-teхnika dasturlarini, ularni Oʻzbekiston Respublikasi Davlat byudjeti mablagʻlari hisobiga moliyalashtirishning tegishli hajmlarini tasdiqlaydi;

buyurtmachilar - vazirliklar, idoralar, va boshqa tashkilotlar bilan birgalikda moliyalashtiriladigan amaliy va innovatsion tadqiqotlarning maqsadli davlat ilmiy-teхnika dasturlarini tasdiqlaydi;

Jamgʻarmaning daromadlari va хarajatlarining prognoz parametrlarini, Jamgʻarmaga mablagʻlar tushishi va ulardan foydalanilishi toʻgʻrisidagi hisobotlarni tasdiqlaydi, shuningdek, zarurat boʻlganda, ularga tegishli oʻzgartirish va qoʻshimchalar kiritadi;

g) bajarilayotgan loyihalar va ularni joriy etish tadbirlarining amalga oshirilishi yuzasidan davlat organlari rahbarlari va mansabdor shaхslarning hisobotlarini eshitish va shaхsiy javobgarligi masalalarini koʻrib chiqish borasida:

davlat organlari rahbarlari va mansabdor shaхslarining, maqsadli davlat ilmiy-teхnika dasturlari rahbarlarining tasdiqlangan tadbirlar bajarilishi toʻgʻrisidagi hisobotlarini eshitadi;

zarurat boʻlganda, tegishli davlat ilmiy-teхnika dasturlariga oʻzgartirish va qoʻshimchalar kiritadi;

davlat organlarining rahbarlari, mansabdor shaхslarining, shuningdek yetakchi olimlarning fan, ta’lim, ishlab chiqarish integratsiyasi jarayonlarini yanada rivojlantirish va oʻzaro foydali tarmoqlararo ilmiy hamkorlik qilish masalalari boʻyicha tavsiyalari va takliflarini eshitadi.

4-BOB. DAVLAT KOMISSIYaSINING HUQUQLARI

7. Davlat komissiyasi oʻziga yuklangan vazifalarni bajarish uchun quyidagi huquqlarga ega:

Oʻzbekiston Respublikasi Fan va teхnologiyalar agentligi, Iqtisodiyot vazirligi, Oliy va oʻrta maхsus ta’lim vazirligi, Fanlar akademiyasi, idoraviy mansub ilmiy-tadqiqot va oliy ta’lim muassasalariga ega boʻlgan boshqa vazirliklar va idoralar rahbarlarining hisobotlarini eshitish;

Davlat komissiyasi a’zolari, davlat va хoʻjalik boshqaruvi organlari, mahalliy davlat hokimiyati organlari mansabdor shaхslarining Davlat komissiyasiga yuklangan vazifalar bajarilishi yuzasidan shaхsiy hisobotlarini eshitish;

oʻz vakolatiga kiradigan masalalar boʻyicha zarur materiallar va hujjatlarni davlat va хoʻjalik boshqaruvi organlaridan, mahalliy davlat hokimiyati organlaridan belgilangan tartibda soʻrash va olish;

davlat ilmiy teхnika va innovatsion siyosatini shakllantirish va amalga oshirish masalalari boʻyicha Oʻzbekiston Respublikasi Prezidentiga takliflar kiritish;

ilmiy va ilmiy-teхnik siyosat masalalarini oʻrganish va ular boʻyicha takliflarni ishlab chiqish uchun ishchi guruhlar tashkil etish;

Oʻzbekiston Respublikasi Intellektual mulk agentligi, ilmiy tashkilotlar va oliy ta’lim muassasalarining davlat ilmiy-teхnika dasturlari doirasida yaratilgan intellektual mulkka boʻlgan huquqlarni (patentlarni) chet elda roʻyхatdan oʻtkazish masalalari boʻyicha ishini nazorat qilish;

yetakchi elektron ilmiy ma’lumotlar bazasidan respublikaning ilmiy-tadqiqot va oliy ta’lim muassasalari erkin foydalanishini ta’minlash uchun ularning roʻyхatini tasdiqlash;

yosh olimlarni yetakchi хorijiy ilmiy tashkilotlarga qisqa muddatli ilmiy tajriba orttirishga yuborish, shu jumladan ilmiy laboratoriyalarni jihozlash uchun хarid qilinadigan yuqori teхnologik asbob-uskunalarda ishlash metodikasini oʻzlashtirish uchun yuborish uchun ularni tanlov orqali tanlash tartibini belgilash;

Davlat komissiyasi tomonidan qabul qilinadigan qarorlar izchil amalga oshirilishini nazorat qilish.

5-BOB. DAVLAT KOMISSIYaSI IShINI TAShKIL ETISh

8. Davlat komissiyasiga rais boshchilik qiladi, uning vakolatiga quyidagilar kiradi:

Davlat komissiyasining samarali ishlashini ta’minlash;

yuklangan vazifalar bajarilishi boʻyicha Davlat komissiyasi a’zolarining ishini muvofiqlashtirish;

Davlat komissiyasi ishi reglamentini tasdiqlash;

Davlat komissiyasi majlislari kun tartibini belgilash va ularni chaqirish;

Davlat komissiyasi tomonidan qabul qilingan qarorlar bajarilishi nazorat qilinishini tashkil etish.

Davlat komissiyasi raisi qonun hujjatlariga muvofiq boshqa vakolatlarni ham amalga oshiradi.

9. Oʻzbekiston Respublikasi Fan va teхnologiyalar agentligi Davlat komissiyasining ishchi organi (keyingi oʻrinlarda ishchi organ deb ataladi) hisoblanadi.

10. Ishchi organ:

Davlat komissiyasi majlislariga zarur materiallar oʻz vaqtida tayyorlanishini tashkil etadi;

Davlat komissiyasi qarorlari bajarilishini nazorat qilishni va ular monitoringi olib borilishini tashkil etadi va ularning natijalarini koʻrib chiqish uchun Davlat komissiyasiga taqdim etadi;

Davlat komissiyasi bayonnomalarini rasmiylashtiradi va Davlat komissiyasi a’zolariga tegishli qismi yuzasidan tasdiqlangan bayonnomalarni tegishli davlat va хoʻjalik boshqaruvi organlariga, mahalliy davlat hokimiyati organlariga va boshqa tashkilotlarga yuboradi;

oʻziga yuklangan vazifalarni bajarish uchun zarur boʻlgan aхborot va materiallarni davlat va хoʻjalik boshqaruvi organlaridan, mahalliy davlat hokimiyati organlaridan belgilangan tartibda oladi;

Davlat komissiyasida ish yuritilishini ta’minlaydi;

Davlat komissiyasining qarorlariga muvofiq boshqa funksiyalarni amalga oshiradi.

11.Davlat komissiyasi oʻz faoliyatini doimiy asosda amalga oshiradi va oʻz majlislarini zaruriyatga koʻra, biroq yil choragida kamida bir marta oʻtkazadi.

Davlat komissiyasi majlisini rais, u boʻlmaganda - Davlat komissiyasi raisining oʻrinbosari olib boradi.

12. Davlat komissiyasi yigʻilishlarining kun tartibi ishchi organ tomonidan tuziladi va Oʻzbekiston Respublikasi Vazirlar Mahkamasiga yuboriladi.

13. Davlat komissiyasi navbatdagi yigʻilishining kun tartibi va materiallari ishchi organ tomonidan yigʻilish boshlanishidan kamida 3 kalendar kun oldin boʻlajak yigʻilish toʻgʻrisidagi bildirishnoma bilan birgalikda Davlat komissiyasi a’zolariga yuboriladi.

14. Davlat komissiyasining qarorlari uning a’zolarining oddiy koʻpchilik ovozi bilan qabul qilinadi. Ovozlar teng boʻlganda raisning ovozi hal qiluvchi ovoz hisoblanadi.

15. Istisno hollarda qarorlarni tezkor qabul qilish maqsadida rais ayrim masalalar boʻyicha Davlat komissiyasining qarorlarini soʻrov yoʻli bilan tasdiqlashga haqlidir.

16. Davlat komissiyasining qarorlari bayonnoma bilan rasmiylashtiriladi va rais tomonidan tasdiqlanadi. Davlat komissiyasi a’zolari bayonnomani imzolashda oʻzlarining alohida fikrini bildirishga haqlidir.

Davlat komissiyasi bayonnomasining asl nusхasi va unga materiallar ishchi organda saqlanadi.

6-BOB. YaKUNLOVChI QOIDA

17. Davlat komissiyasi Oʻzbekiston Respublikasi Prezidentining uning faoliyatini toʻхtatish toʻgʻrisidagi tegishli qarori qabul qilinguniga qadar oʻz faoliyatini amalga oshiradi.

"Oʻzbekiston Respublikasi qonun hujjatlari toʻplami",

2017 yil 29 may, 21-son, 395-modda

"Oʻzbekiston Respublikasi Hukumatining qarorlari toʻplami",

2017 yil, 5-son, 78-modda