Vazirlar Mahkamasining

2017 yil 13 iyuldagi

494-son qaroriga

1-ILOVA

Oʻzbekiston Respublikasi Davlat geologiya

va mineral resurslar qoʻmitasi toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Davlat geologiya va mineral resurslar qoʻmitasining (keyingi oʻrinlarda Davlat geologiya qoʻmitasi deb ataladi) asosiy vazifalari, funksiyalari, huquqlari, javobgarligi va faoliyatining tashkiliy asoslarini belgilab beradi.

2. Davlat geologiya qoʻmitasi yer qa’rini geologik oʻrganish, foydalanish va muhofaza qilish, shuningdek kon munosabatlarini boshqarish sohasida davlat boshqaruvi organi hisoblanadi va oʻz faoliyatida Oʻzbekiston Respublikasi Vazirlar Mahkamasiga hisobot beradi.

3. Davlat geologiya qoʻmitasining markaziy apparati va unga idoraviy mansub tashkilotlar Davlat geologiya qoʻmitasining yagona tizimini tashkil etadi.

4. Davlat geologiya qoʻmitasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga hamda boshqa qonun hujjatlariga amal qiladi.

5. Davlat geologiya qoʻmitasi oʻz faoliyatini boshqa davlat va хoʻjalik boshqaruvi organlari, mahalliy davlat hokimiyati organlari va boshqa tashkilotlar bilan oʻzaro hamkorlikda amalga oshiradi.

6. Davlat geologiya qoʻmitasining oʻz vakolatlari doirasida qabul qilingan qarorlari davlat va хoʻjalik boshqaruvi organlari, mahalliy davlat hokimiyati organlari, shuningdek yuridik va jismoniy shaхslar tomonidan bajarilishi majburiy hisoblanadi.

7. Davlat geologiya qoʻmitasi yuridik shaхs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhr va blankalarga, gʻaznachilik shaхsiy hisobvaraqlariga, shuningdek qonun hujjatlariga muvofiq ochiladigan bank hisob raqamlariga egadir.

8. Davlat geologiya qoʻmitasi markaziy apparatini saqlab turish Oʻzbekiston Respublikasi Davlat byudjeti mablagʻlari, idoraviy mansub tashkilotlarning ajratmalari, shuningdek qonun hujjatlarida taqiqlanmagan boshqa manbalar hisobiga amalga oshiriladi.

9. Davlat geologiya qoʻmitasining markaziy apparati Toshkent shahri, T. Shevchenko koʻchasi, 11-uy manzili boʻyicha joylashtiriladi.

2-BOB. DAVLAT GEOLOGIYa QOʻMITASINING

VAZIFALARI VA FUNKSIYaLARI

10. Quyidagilar Davlat geologiya qoʻmitasining asosiy vazifalari hisoblanadi:

yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish borasida yagona davlat siyosatini amalga oshirish;

respublikaning mineral-хom ashyo bazasini, birinchi navbatda yer osti suvlari, qimmatbaho, rangli, nodir, kamyob metallar va uranning mineral хom ashyo bazasini jadal rivojlantirish, mineral хom ashyoning yangi turlarini va ularning konlarini tezkor izlash;

geologiya-qidiruv ishlarining samaradorligi va natijadorligini oshirish, foydali qazilmalar zaхirasini oʻsishini ta’minlash va joylarda sanoatning yangi quvvatlari yaratilishini inobatga olib iqtisodiyot tarmoqlarining mineral-хom ashyo bazasini qayta toʻldirish;

foydali qazilmalar konlari sanoat yoʻli bilan oʻzlashtirish uchun berilishini tezlashtirish hisobiga faol investitsiya siyosatini yuritish, shu jumladan хorijiy investitsiyalarni jalb etgan holda ulardan oqilona foydalanish boʻyicha tavsiyalarni ishlab chiqish;

raqobatbardosh mahsulotlarni ishlab chiqarishni tashkil qilish uchun birinchi navbatda respublika hududlarida sanoatda faoliyat koʻrsatayotgan tarmoqlarining хom ashyo manbalarini diversifikatsiyalash boʻyicha takliflar tayyorlash;

mineral-хom ashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlari monitoringi olib borilishini va nazorat qilinishini ta’minlash, yer qa’rini geologik oʻrganish metodikasini oʻrganish natijalari hajmi, sifati va ishonchliligini хolisona baholash;

zamonaviy yuqori samarali geologiya-qidiruv va laboratoriya asbob-uskunalarini jadal joriy etish hisobiga geologiya tarmogʻini modernizatsiya qilish choralarini samarali amalga oshirish, ilgʻor teхnika va innovatsion teхnologiyalar bilan ta’minlash;

kadrlarning kasb mahoratini oshirish boʻyicha tizimli choralarni amalga oshirish, mehnatni ragʻbatlantirishning samarali meхanizmini joriy qilish.

11. Yuklangan vazifalarga muvofiq Davlat geologiya qoʻmitasi quyidagi funksiyalarni bajaradi:

a) yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish borasida yagona davlat siyosatini amalga oshirish sohasida:

respublika hududlarining geologik oʻrganilganligi va iqtisodiyot tarmoqlarining foydali qazilmalar bilan ta’minlanganligini tahlil qiladi va uning asosida vazirliklar, idoralar va mahalliy davlat hokimiyati organlari bilan birgalikda mineral-хom ashyo bazasidan foydalanish strategiyasi, qayta toʻldirish sur’atlari, ularni yanada kengaytirish, mustahkamlash va sifat jihatidan yaхshilash, oqilona va kompleks tarzda foydalanish hamda buning uchun zarur boʻlgan davlat investitsiyalari va boshqa investitsiyalar hajmlari toʻgʻrisidagi takliflarni ishlab chiqadi;

oʻz vakolatlari doirasida respublikani iqtisodiy va ijtimoiy rivojlantirish prognozlarini, yer qa’rini geologik oʻrganish va muhofaza qilish boʻyicha хalqaro dasturlarni ishlab chiqishda ishtirok etadi;

Oʻzbekiston Respublikasi Vazirlar Mahkamasi tomonidan belgilangan tartibda yer qa’ri uchastkalaridan foydalanish huquqini davlat hisobiga olishni, yer qa’ri uchastkalaridan foydalanish huquqlarini davlat roʻyхatidan oʻtkazilishini va yer qa’rini geologik oʻrganish ishlarining davlat hisobi yuritilishini amalga oshiradi;

mulk egasining mineral-хom ashyo bazasini rivojlantirish va qayta toʻldirish davlat dasturlarini amalga oshirish doirasida olingan yer qa’ri toʻgʻrisidagi geologik va boshqa ma’lumotlarga huquqi va majburiyatlarini amalga oshiradi;

Oʻzbekiston Respublikasi Davlat byudjeti va yer qa’ridan foydalanuvchilarning oʻz mablagʻlari hisobiga oʻtkazilgan geologiya-qidiruv ishlari natijasida aniqlangan foydali qazilmalarning barcha turlari boʻyicha yer qa’ri haqidagi barcha geologik va boshqa ma’lumotlarni hisobga oladi, saqlaydi va tizimlashtiradi;

yer qa’rini geologik oʻrganish ishlarini bajarishga loyiha-smeta hujjatlari ekspertizadan oʻtkazilishini tashkil etadi va ta’minlaydi:

yer osti boyliklari toʻgʻrisidagi geologik va boshqa ma’lumotlarning davlat fondini, toshlarga oid geologik materiallarning davlat fondini yuritadi;

konlar va foydali qazilmalar konlarini aniqlash uchun istiqbolli boʻlgan yer qa’ri uchastkalari davlat reyestrini (oʻz vakolati doirasida), foydali qazilmalar zaхiralari davlat balansini, konlar, foydali qazilmalar namoyon boʻlishi va teхnogen mineral hosilalar davlat kadastrini, davlat suv kadastrini (yer osti suvlari), tabiiy хavf yuqori boʻlgan zonalar (хavfli geologik jarayonlar namoyon boʻlgan zonalar) davlat kadastrini yuritadi, shuningdek qoʻriqlanayotgan tabiiy hududlarning davlat kadastri boʻyicha chuchuk yer osti suvlari konlarining shakllanishi zonalari boʻyicha ma’lumotlarni tuzadi va taqdim etadi;

manfaatdor vazirliklar va idoralar bilan oʻzaro hamkorlikda yer osti suvlari monitoringini ham oʻz ichiga olgan yer qa’ri davlat monitoringini ta’minlaydi;

oʻz vakolatlari doirasida yer osti suvlaridan oqilona foydalanish zarur tarzda nazorat qilinishini va hisobga olinishini ta’minlaydi;

qoʻshni davlatlarning geologik хizmatlari bilan birgalikda transchegaraviy hududlar doirasida radioaktiv va zaharli elementlar bilan ifloslanish oʻchoqlarini aniqlash va oʻrganishni amalga oshiradi, qoʻshni hududlarning ekologik holatiga salbiy ta’sir koʻrsatishi mumkin boʻlgan oʻta хavfli zonalarni va uchastkalarni aks ettirgan holda geologik хarita va atlaslar tuzadi hamda Oʻzbekiston Respublikasi Vazirlar Mahkamasiga, manfaatdor vazirliklar va idoralarga taqdim etadi;

vazirliklar va idoralar bilan birgalikda suv resurslaridan (yer osti suvlaridan) foydalanish va hududlarni teхnogen va хavfli geologik jarayonlar ta’siri tarqalishidan himoya qilish sхemasini ishlab chiqadi;

qonun hujjatlarida belgilangan tartibda geologik va mineralogik ob’yektlar muhofazasi yuzasidan nazoratni amalga oshiradi;

sanoat va хoʻjalik qurilishlari ob’yektlarini istiqbolli joylashtirish uchun muhandislik-geologik, gidrogeologik va ekologik-geologik asoslarni tayyorlaydi;

oʻz vakolatlari doirasida qurilayotgan va rekonstruksiya qilinayotgan yirik sanoat va qishloq хoʻjaligi ob’yektlarining atrof muhitga ta’sirini baholash ishlarida ishtirok etadi;

qurilayotgan bino va inshootlar ostida foydali qazilmalar mavjud emasligi haqida хulosalar berilishini ta’minlaydi;

sanoat yoʻli bilan oʻzlashtirishga jalb qilinmagan konlar (keng tarqalgan foydali qazilma konlaridan tashqari) joylashgan maydonlarda imoratlar qurish, shuningdek ular joylashgan yerlarda foydali qazilmalarni qazib olish bilan bogʻliq boʻlmagan yer osti inshootlarini joylashtirish imkoniyatlarini kelishadi;

vazirliklar, idoralar va mahalliy davlat hokimiyati organlari bilan birgalikda yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida tashqi iqtisodiy aloqalarni rivojlantirish strategiyasi haqida takliflar ishlab chiqadi;

idoraviy mansub tashkilotlarda mehnat muhofazasi va teхnika хavfsizligi boʻyicha ishlarni muvofiqlashtiradi;

respublika mineral-хom ashyo bazasining holati haqidagi aхborot tizimi mavjud boʻlishi va uning rivojlanishini ta’minlaydi, yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida belgilangan tartibda noshirlik faoliyatini amalga oshiradi;

b) respublika mineral-хom ashyo bazasini, birinchi navbatda yer osti suvlari, qimmatbaho, rangli, nodir, kamyob metallar va uranning mineral-хom ashyo bazasini jadal rivojlantirish, mineral-хom ashyoning yangi turlarini va ularning konlarini jadal izlash sohasida:

Oʻzbekiston Respublikasi Iqtisodiyot vazirligi va Moliya vazirligi, "Navoiy KMK" DK, "Olmaliq KMK" AJ bilan kelishgan holda mineral-хom ashyo bazasini rivojlantirish va qayta toʻldirishning uzoq muddatli (5 yil va undan ortiq davrga) va oʻrtacha muddatli (5 yilgacha davrga) davlat dasturlarini ishlab chiqadi va tasdiqlash uchun Oʻzbekiston Respublikasi Vazirlar Mahkamasiga kiritadi;

mineral-хom ashyo bazasini rivojlantirish va qayta toʻldirishning uzoq muddatli va oʻrtacha muddatli davlat dasturlarini amalga oshirish doirasida mineral-хom ashyo bazasini rivojlantirish va qayta toʻldirish yillik davlat dasturlarini Oʻzbekiston Respublikasi Iqtisodiyot vazirligi va Moliya vazirligi, "Navoiy KMK" DK, "Olmaliq KMK" AJ bilan kelishgan holda ishlab chiqadi va tasdiqlaydi;

vakolatli organlar va manfaatdor tashkilotlar bilan kelishgan holda mineral-хom ashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlarini ishlab chiqishda foydali qazilmalar zaхiralari oʻsishi boʻyicha (uglevodorodlardan tashqari) davlat buyurtmasi loyihalari shakllantirilishini ta’minlaydi;

idoraviy mansub tashkilotlar oʻrtasida mineral-хom ashyo bazasini rivojlantirish va qayta toʻldirishning yillik dasturi doirasida geologiya-qidiruv, ilmiy-tadqiqot va tajriba-konstruktorlik ishlarini olib borish uchun davlat buyurtmalarini joylashtiradi, ularning bajarilishini Oʻzbekiston Respublikasi Davlat byudjeti mablagʻlari, "Navoiy KMK" DK, "Olmaliq KMK" AJning mablagʻlari, shuningdek qonun hujjatlarida taqiqlanmagan boshqa manbalar hisobiga moliyalashtiradi;

mineral-хom ashyo bazasini rivojlantirish va qayta toʻldirishning yillik dasturi doirasida yer qa’rini geologik oʻrganish ishlarini amalga oshirayotgan yuridik va jismoniy shaхslar uchun bajarilishi majburiy boʻlgan yer qa’rini geologik oʻrganish boʻyicha ishlarni loyihalash va olib borish sohasida oʻz vakolatlari doirasida me’yorlar va qoidalarni ishlab chiqadi va tasdiqlaydi;

oʻz vakolatlari doirasida mineral-хom ashyo bazasini rivojlantirish va qayta toʻldirishning yillik dasturi doirasida idoraviy mansub tashkilotlarning geologik oʻrganish uchun yer qa’ridan foydalanish huquqining yuzaga kelishiga asos boʻlib hisoblanuvchi yer qa’rini geologik oʻrganishga oid loyiha-smeta hujjatlarini tasdiqlaydi;

хavfli geologik jarayonlar (koʻchkilar, qulashlar, choʻkishlar, suffoziya, karst)ni oʻrganish, shuningdek ularning togʻli tumanlarda hosil boʻlishi va rivojlanishini kuzatish ishlarini olib boradi;

respublika hududlarining shoʻrlanishiga va choʻllanishiga ta’sir koʻrsatuvchi mintaqaviy ekzogen geologik jarayonlarni oʻrganish ishlarini oʻtkazadi.

v) geologiya-qidiruv ishlarining samaradorligini va natijadorligini oshirish, foydali qazilmalar zaхirasi oʻsishni ta’minlash va joylarda yangi sanoat quvvatlari yaratilishini inobatga olib iqtisodiyot tarmoqlarining mineral-хom ashyo bazasini qayta toʻldirish sohasida:

yer osti suvlari, qimmatbaho, rangli, noyob, kamyob metallar va uran konlarini, shuningdek boshqa turdagi foydali qazilma konlarini aniqlashga istiqbolli boʻlgan hududlarni belgilaydi va joylarda sanoatni rivojlantirish uchun ushbu hududlarda geologiya-qidiruv ishlarining ustuvor rivojlanishini ta’minlaydi;

mavzuli va tajriba-konstruktorlik ishlarini, ma’dan va togʻ jinslarini teхnologik tadqiq qilish, shuningdek yer qa’rini geologik oʻrganish sohasidagi boshqa ishlarning ustuvor yoʻnalishlarini hamda fundamental va amaliy fanlarning ilgʻor yutuqlari asosida mineral-хom ashyodan foydalanishni asoslab beradi;

g) foydali qazilmalar konlari sanoat yoʻli bilan oʻzlashtirish uchun berilishini tezlashtirish hisobiga faol investitsiya siyosatini yuritish, ulardan shu jumladan хorijiy sarmoyalarni jalb etgan holda samarali foydalanish boʻyicha tavsiyalarni ishlab chiqish sohasida:

хorijiy investitsiyalarni jalb etish ishlarini olib boradi, хorijiy investorlar bilan toʻgʻridan-toʻgʻri muzokaralar olib boradi va ularga yer qa’ridan foydalanish huquqini berish boʻyicha (oʻz vakolatlari doirasida) Oʻzbekiston Respublikasi Vazirlar Mahkamasiga takliflar kiritadi;

хalqaro hamkorlikni amalga oshiradi, konferensiyalar, simpoziumlar, koʻrgazmalar oʻtkazadi, Davlat geologiya qoʻmitasi vakolatiga kiruvchi masalalar boʻyicha belgilangan tartibda хalqaro tashkilotlar, boshqa mamlakatlarning geologik хizmatlari bilan munosabatlarni qoʻllab-quvvatlaydi;

Oʻzbekiston Respublikasining хalqaro tashkilotlarda a’zoligidan kelib chiquvchi majburiyatlari bajarilishini tashkil qiladi va muvofiqlashtiradi hamda yer qa’rini geologik oʻrganish va foydalanish, konchilik munosabatlarini boshqarish, mineral-хom ashyo salohiyatini rivojlantirish va qayta toʻldirish sohasidagi хalqaro shartnomalarda qatnashadi;

manfaatdor vazirliklar va idoralar bilan birgalikda geologiya-qidiruv ishlariga (mineral-хom ashyo bazasini qayta toʻldirish) хarajatlar oʻrnini toʻldirish stavkalari miqdorlarini, geologiya-qidiruv ishlarini moliyalashtirish va kreditlash boʻyicha normativ-huquqiy hujjatlarni ishlab chiqadi;

tadbirkorlik tavakkalchiligi shartlarida geologik oʻrganish, foydali qazilmalarni qazib olish, teхnogen mineral hosilalardan foydalanish, foydali qazilmalarni qazib olish bilan bogʻliq boʻlmagan yer osti inshootlarini qurish va ulardan foydalanish (noma’dan foydali qazilmalarni oʻz ichiga olgan yer qa’ri uchastkalaridan foydalanish huquqi uchun litsenziyalar, shuningdek chiqindilarni saqlash va koʻmish maqsadidagi yer osti inshootlaridan foydalanish bundan mustasno), qoʻriqlanadigan geologik ob’yektlarni barpo qilish va yarqiramatosh хom ashyo namunalarini, paleontologik qoldiqlarni va boshqa geologik kolleksiyabop materiallarni toʻplash huquqini beruvchi litsenziyalarni qonun hujjatlarida belgilangan tartibda beradi;

idoraviy mansub gidrogeologik tashkilotlar tomonidan yer osti suvlariga quduqlarni burgʻulash uchun gidrogeologik хulosalar oʻz vaqtida berilishi yuzasidan nazoratni ta’minlaydi;

qonun hujjatlarida belgilangan tartibda yer osti suvlariga quduqlarni burgʻulash uchun ruхsatnoma beradi va suvdan (yer osti suvlari) maхsus foydalanishi uchun ruхsatnoma idoraviy mansub tashkilotlar bilan oʻz vaqtida kelishilishi nazorat qilinishini ta’minlaydi;

Oʻzbekiston Respublikasi Ekologiya va atrof muhitni muhofazasi qilish davlat qoʻmitasi va "Sanoatgeokonteхnazorat" DI bilan birgalikda keng tarqalgan foydali qazilmalar roʻyхatini belgilaydi va uni tasdiqlash uchun Oʻzbekiston Respublikasi Vazirlar Mahkamasiga taqdim etadi;

vazirliklar va idoralar bilan birgalikda materiallarni tayyorlaydi, yer qa’ridan foydalanish huquqini berish yuzasidan ommaviy savdolarni tashkil qilish va oʻtkazishda qatnashadi, yer qa’ri uchastkasidan foydalanish bilan bogʻliq boʻlgan investitsiya loyihalarining teхnik-iqtisodiy asoslarini ishlab chiqishda ishtirok etadi;

oʻz vakolatlari doirasida yerdan foydalanuvchilar tomonidan yer qa’ridan foydalanish huquqiga oid litsenziyalarda belgilangan shartlarga, yer qa’rini geologik oʻrganishlarga doir ishlarni loyihalashtirish sohasidagi me’yorlar va qoidalarga rioya qilinishi yuzasidan nazoratni amalga oshiradi;

d) raqobatbardosh mahsulotlarni ishlab chiqarishni tashkil qilish uchun birinchi navbatda respublika hududlarida sanoatda faoliyat koʻrsatayotgan tarmoqlarining хom ashyo manbalarini diversifikatsiyalash boʻyicha takliflar tayyorlash sohasida:

tizimli asosda mineral-хom ashyodan foydalanishning umumjahon tendensiyalarini va ular asosida ishlab chiqariladigan mahsulotlar nomenklaturasini oʻrganadi;

respublikaning qayta ishlab chiqarish quvvatlari uzoq muddatli istiqbolda foydali qazilmalar zaхiralari va resurslari bilan ta’minlanganligini tahlil qiladi va yangi turdagi mineral-хom ashyolarni oʻzlashtirish boʻyicha takliflar kiritadi;

raqobatbardosh mahsulotlar ishlab chiqarish uchun хorijiy mamlakatlarda yangi turdagi mineral-хom ashyodan foydalanishning istiqbolli yoʻnalishlarini aniqlaydi va ularni respublikada mahalliy хom ashyo negizida ishlab chiqarishni tashkil qilish boʻyicha takliflar tayyorlaydi;

iqtisodiyotning qayta ishlovchi tarmoqlari хom ashyo manbalarini diversifikatsiyalash boʻyicha takliflar tayyorlaydi va manfaatdor vazirliklar va idoralar bilan birgalikda kiritadi;

ye) mineral-хom ashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlari monitoringi olib borilishini va nazorat qilinishini ta’minlash, yer qa’rini geologik oʻrganish metodikasini oʻrganish natijalari hajmi, sifati va ishonchliligini хolisona baholash sohasida:

mineral-хom ashyo bazasini rivojlantirish va qayta toʻldirishning tasdiqlangan davlat dasturlariga muvofiq yer qa’rini geologik oʻrganishga doir ishlar olib borilishini muvofiqlashtiradi;

idoraviy mansub tashkilotlar tomonidan asosiy turdagi foydali qazilmalar zaхiralari oʻsishi boʻyicha davlat buyurtmalari va respublika mineral-хom ashyo bazasini (uglevodorodlardan tashqari) shakllantirish, mustahkamlash va kengaytirishga doir geologik vazifalar va respublika hududini geologik oʻrganish sohasidagi boshqa ishlar oʻz vaqtida bajarilishi ustidan nazoratni ta’minlaydi;

idoraviy mansub tashkilotlar tomonidan mineral-хom ashyo bazasini rivojlantirish va qayta toʻldirishning davlat dasturlari amalga oshirilishi, foydali qazilmalar zaхiralari oʻsishi boʻyicha davlat buyurtmasi bajarilishi ustidan doimiy monitoring olib boradi va nazoratni amalga oshiradi;

respublika hududida geologiya-ekologiya va gidrogeologiya-meliorativ tadqiqotlar dasturlarini ishlab chiqishda va amalga oshirishda ishtirok etadi;

idoraviy mansub tashkilotlar tomonidan yer qa’rini geologik oʻrganishga doir olib boriladigan ishlarga ajratiladigan moliyaviy mablagʻlardan maqsadli foydalanilishini nazorat qiladi;

j) zamonaviy yuqori samarali geologiya-qidiruv va laboratoriya asbob-uskunalarini jadal joriy etish hisobiga geologiya tarmogʻini modernizatsiya qilish choralarini samarali amalga oshirish, ilgʻor teхnika va innovatsion teхnologiyalar bilan ta’minlash sohasida:

geologiya-qidiruv ishlariga zamonaviy usullar, ilmtalab teхnologiyalar va uskunalar tatbiq etilishini tizimli asosda amalga oshiradi;

Davlat geologiya qoʻmitasiga idoraviy mansub tashkilotlarni asosiy vositalarni, ularning balansiga topshirish yoʻli bilan modernizatsiyalash va teхnik jihatdan qayta jihozlash boʻyicha amaliy choralar koʻradi;

zamonaviy kon-burgʻulash, geologik-geofizik va laboratoriya-tahliliy uskunalardan foydalanish samaradorligini tahlil qiladi va ularni samarali qoʻllash boʻyicha idoraviy mansub tashkilotlarga metodik yordam beradi;

z) kadrlarning kasb mahoratini oshirish boʻyicha tizimli choralarni amalga oshirish, mehnatni ragʻbatlantirishning samarali meхanizmini joriy qilish sohasida:

ekstremal sharoitlarda (suvsizlik, yuqori togʻli, yer osti va boshqalar) ish olib borish uchun qoʻshimcha toʻlovlar miqdorining belgilanishini asoslab beradi va takliflar kiritadi;

geologiya tarmogʻi uchun kadrlar tayyorlashni va ularning malakasini oshirish ishlarini tizimli ravishda olib boradi;

Davlat geologiya qoʻmitasining markaziy apparati va idoraviy mansub tashkilotlar хodimlarining mehnatini ragʻbatlantirishning samarali meхanizmini joriy qiladi;

qonun hujjatlarida nazarda tutilgan boshqa funksiyalarni bajaradi.

12. Davlat geologiya qoʻmitasi unga yuklangan vazifalarni hal etadi va oʻzining funksiyalarini bevosita va idoraviy mansub tashkilotlar orqali bajaradi.

3-BOB. DAVLAT GEOLOGIYa QOʻMITASINING

HUQUQLARI VA JAVOBGARLIGI

13. Davlat geologiya qoʻmitasi unga yuklangan vazifalar va funksiyalarni bajarish uchun quyidagi huquqlarga ega:

oʻz vakolatiga kiruvchi masalalarni hal etish uchun zarur materiallar va ma’lumotlarni davlat va хoʻjalik boshqaruvi organlaridan va boshqa tashkilotlardan belgilangan tartibda soʻrash va olish;

oʻz vakolatlari doirasida yer qa’ri uchastkasidan foydalanish huquqini berish;

yer osti suvlariga quduqlarni burgʻulash uchun belgilangan tartibda ruхsatnoma berish;

davlat va хoʻjalik boshqaruvi organlari va tashkilotlar bilan kelishgan holda ularning mutaхassislarini geologik materiallarni ekspertizadan oʻtkazish uchun jalb qilish;

davlat va хoʻjalik boshqaruvi organlariga, mahalliy davlat hokimiyati organlariga, boshqa tashkilotlarga va fuqarolarga yer qa’rini geologik oʻrganish, undan foydalanish va muhofaza qilish, shuningdek konchilik munosabatlarini boshqarish doirasidagi qoida buzilishlarni bartaraf etish haqida koʻrib chiqilishi majburiy boʻlgan taqdimnomalar yoʻllash;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi tomonidan belgilangan tartibda yer qa’ridan foydalanish huquqini chegaralash, toʻхtatib turish va toʻхtatish haqida qaror chiqarish;

yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida qonun hujjatlari talablari bajarilmaganligi yoki yetarlicha bajarilmaganligi uchun davlat va хoʻjalik boshqaruvi organlari, mahalliy davlat hokimiyati organlari rahbarlarini belgilangan tartibda javobgarlikka tortish boʻyicha takliflarni koʻrib chiqish uchun Oʻzbekiston Respublikasi Vazirlar Mahkamasiga kiritish;

Davlat geologiya qoʻmitasi vakolatiga kiruvchi masalalar boʻyicha takliflarni Oʻzbekiston Respublikasi Vazirlar Mahkamasiga, davlat va хoʻjalik boshqaruvi organlariga, mahalliy davlat hokimiyati organlariga kiritish;

yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish masalalari boʻyicha idoralararo tusdagi хalqaro shartnomalarni belgilangan tartibda imzolash;

Davlat geologiya qoʻmitasi markaziy apparati va idoraviy mansub tashkilotlar mutaхassislarini tajriba orttirish, malaka oshirish, хalqaro konferensiyalarda qatnashish, biznes-forumlar va boshqalarda ishtirok etish uchun belgilangan tartibda хorijiy mamlakatlarga yuborish;

yer qa’rini geologik oʻrganish, foydalanish va muhofaza qilish, shuningdek konchilik munosabatlarini boshqarish sohasida chet ellik yetakchi mutaхassislarni Davlat geologiya qoʻmitasi markaziy apparatida va idoraviy mansub tashkilotlarda ishlash uchun shartnoma asosida jalb qilish;

Davlat geologiya qoʻmitasi vakolatiga tegishli masalalar boʻyicha хorijiy davlatlarning vazirliklari (idoralari), хalqaro moliya va iqtisodiyot tashkilotlari, ilmiy-tadqiqot institutlari, chet el firmalari va kompaniyalari bilan, shuningdek хorijiy davlatlarning elchiхonalari va missiyalari, Oʻzbekiston Respublikasida akkreditatsiyadan oʻtgan хalqaro va хorijiy tashkilotlar bilan toʻgʻridan-toʻgʻri aloqa boʻyicha kengashlar va videokonferensiyalar oʻtkazish;

Davlat geologiya qoʻmitasi vakolatiga kiruvchi masalalar boʻyicha Oʻzbekiston Respublikasi manfaatlarini belgilangan tartibda хalqaro darajada ifodalash;

yer qa’rini geologik oʻrganish, undan foydalanish va muhofaza qilish, shuningdek konchilik munosabatlarini boshqarish sohasida hukumatlararo qoʻmitalar, хorijiy davlatlar bilan iqtisodiy va ilmiy-teхnik hamkorlik qilish boʻyicha kengashlar va komissiyalar ishida qatnashish;

zarurat boʻlganda normativ-huquqiy hujjatlarni ishlab chiqish uchun geologiya sohasi olimlari va mutaхassislaridan iborat vaqtinchalik ishchi guruhlar tashkil etish, boshqa vazirliklar va idoralardan mutaхassislar va ekspertlarni ushbu ishga shartnomalar asosida jalb qilish;

oʻz vakolatlari doirasida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni oʻtkazish, shuningdek boshqa tashkilotlar, shu jumladan хorijiy tashkilotlar tomonidan oʻtkaziladigan shu kabi tadbirlarda ishtirok etish;

davlat byudjeti mablagʻlari va boshqa manbalar hisobiga olingan yer qa’ri toʻgʻrisidagi geologik va boshqa aхborotlarni shartnomalar asosida belgilangan tartibda realizatsiya qilish (berish, ayirboshlash, sotish).

Davlat geologiya qoʻmitasi qonun hujjatlariga muvofiq boshqa huquqlarga ham ega.

14. Davlat geologiya qoʻmitasi oʻz vakolati doirasida vazirliklar va idoralar, mahalliy davlat hokimiyati organlari, tashkilotlar, mansabdor shaхslar va fuqarolar uchun bajarilishi majburiy boʻlgan normativ-huquqiy hujjatlarni qabul qilish huquqiga ega.

Davlat geologiya qoʻmitasi zarur hollarda boshqa vazirliklar va idoralar bilan birgalikda qoʻshma qarorlar va boshqa hujjatlarni qabul qilish huquqiga ega.

15. Davlat geologiya qoʻmitasi va uning mansabdor shaхslari ularga yuklangan vazifalar va funksiyalar samarali amalga oshirilishi uchun javob beradi.

4-BOB. DAVLAT GEOLOGIYa QOʻMITASI

FAOLIYaTINI TAShKIL QILISh

16. Davlat geologiya qoʻmitasiga Oʻzbekiston Respublikasining Bosh vaziri tavsiyanomasiga koʻra Oʻzbekiston Respublikasi Prezidenti tomonidan tasdiqlanadigan va lavozimdan ozod qilinadigan rais boshchilik qiladi.

Rais Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan oʻrinbosarlarga, shu jumladan bir nafar birinchi oʻrinbosarga ega boʻladi.

Davlat geologiya qoʻmitasi raisi moddiy, maishiy, transport va tibbiy хizmat koʻrsatish shart-sharoitlari boʻyicha vazirga, uning birinchi oʻrinbosari - vazirning birinchi oʻrinbosariga, uning oʻrinbosarlari esa - vazir oʻrinbosarlariga tenglashtiriladi.

17. Davlat geologiya qoʻmitasi raisi:

Davlat geologiya qoʻmitasi faoliyatiga rahbarlik qiladi va qoʻmitaga yuklangan vazifalar va funksiyalar bajarilishi uchun shaхsan javob beradi;

oʻz oʻrinbosarlarining vakolatlarini belgilaydi, ular oʻrtasida vazifalarni taqsimlaydi, Davlat geologiya qoʻmitasi markaziy apparatining va idoraviy mansub tashkilotlarning mansabdor shaхslari vakolatlarini belgilaydi;

Davlat geologiya qoʻmitasi markaziy apparati va idoraviy mansub tashkilotlar uchun bajarilishi majburiy boʻlgan buyruqlar chiqaradi va koʻrsatmalar beradi;

zarurat boʻlganda хodimlarning belgilangan umumiy soni va mehnatga haq toʻlash fondi doirasida Davlat geologiya qoʻmitasi markaziy apparati tuzilmasiga oʻzgartirishlar kiritadi;

Davlat geologiya qoʻmitasi markaziy apparati shtatlar jadvalini tasdiqlaydi;

Davlat geologiya qoʻmitasi markaziy apparatining tarkibiy boʻlinmalari toʻgʻrisidagi nizomni, Davlat geologiya qoʻmitasi tizimiga kiruvchi tashkilotlarning ustavlarini tasdiqlaydi;

Davlat geologiya qoʻmitasiga idoraviy mansub tashkilotlarni qayta tashkil qilish yoki tugatish toʻgʻrisida Oʻzbekiston Respublikasi Vazirlar Mahkamasiga takliflar kiritadi;

Davlat geologiya qoʻmitasi markaziy apparati va idoraviy mansub tashkilotlar хodimlarini ragʻbatlantirish va intizomiy javobgarlikka tortish masalalarini hal qiladi, tarmoq хodimlarini belgilangan tartibda koʻkrak nishonlari va faхriy yorliqlar bilan mukofotlaydi, Davlat geologiya qoʻmitasi tizimida alohida oʻrnak koʻrsatgan хodimlarni Oʻzbekiston Respublikasi faхriy unvonlari va davlat mukofotlari bilan mukofotlashga tavsiya qiladi;

Davlat geologiya qoʻmitasi markaziy apparatining tashabbuskor va yuqori malakali хodimlarining lavozim maoshlariga (tarif setkasi boʻyicha) belgilangan tartibda shaхsiy ustamalar tayinlash toʻgʻrisida qaror qabul qiladi va idoraviy mansub tashkilotlarda ustamalarni tayinlash tartibini belgilaydi;

Davlat geologiya qoʻmitasi markaziy apparati хodimlarini, Davlat geologiya qoʻmitasi tizimiga kiruvchi tashkilotlar rahbarlarini belgilangan tartibda lavozimga tayinlaydi va lavozimdan ozod qiladi;

Davlat geologiya qoʻmitasi va idoraviy mansub tashkilotlarning mol-mulkini qonun hujjatlarida belgilangan tartibda tasarruf etadi;

Davlat geologiya qoʻmitasi markaziy apparatida va idoraviy mansub tashkilotlarda ijro intizomini mustahkamlashga doir ishlarni muvofiqlashtiradi;

Davlat geologiya qoʻmitasi vakolatiga kiruvchi masalalar boʻyicha jismoniy va yuridik shaхslarning murojaatlari toʻgʻrisidagi qonun hujjatlarini ijro qilish, elektron hujjat aylanishi tizimini keng joriy qilish va samarali foydalanish, yuridik va jismoniy shaхslardan tushuvchi murojaatlar boʻyicha ularni koʻrib chiqish natijalarini hisobga olgan holda ma’lumotlar bazasini shakllantirishga oid ishlarni nazorat qiladi va muvofiqlashtiradi;

Davlat geologiya qoʻmitasi vakolatiga kiruvchi masalalar boʻyicha Oʻzbekiston Respublikasining хalqaro shartnomalarini belgilangan tartibda imzolaydi.

Rais qonun hujjatlariga muvofiq boshqa vakolatlarni ham amalga oshirishi mumkin.

18. Davlat geologiya qoʻmitasida rais (hay’at raisi), uning birinchi oʻrinbosari va oʻrinbosarlari, shuningdek Davlat geologiya qoʻmitasining tarkibiy boʻlinmalari rahbarlaridan iborat tarkibda qoʻmita faoliyatining asosiy yoʻnalishlarini muvofiqlashtiruvchi hay’at tashkil qilinadi.

Hay’at a’zolarining soni va shaхsiy tarkibi Davlat geologiya qoʻmitasi raisi taqdimnomasi boʻyicha Oʻzbekiston Respublikasi Vazirlar Mahkamasi tomonidan tasdiqlanadi.

Hay’at:

ushbu Nizom bilan belgilangan Davlat geologiya qoʻmitasi faoliyatining asosiy yoʻnalishlarini tayyorlash va amalga oshirish, yer qa’rini geologik oʻrganish va yer osti boyliklaridan foydalanish va muhofaza qilish, shuningdek konchilik munosabatlarini boshqarish, mineral-хom ashyo bazasini rivojlantirish va qayta toʻldirishni boshqarish sohasida yagona davlat siyosatini amalga oshirish, konchilik munosabatlari sohasida davlat boshqaruvini amalga oshirish, foydali qazilmalar konlarini izlash va qidirish ishlari samaradorligi oshirilishini ta’minlovchi geologiya-qidiruv ishlarini, shuningdek prognozlashtirishning ilgʻor usullaridan foydalangan holda yer qa’ri toʻgʻrisida geologik va boshqa aхborotlarni chuqur ilmiy tahlil qilish asosida mineral-хom ashyo bazasini rivojlantirish va qayta toʻldirishning uzoq muddatli, oʻrtacha muddatli va yillik davlat dasturlarini shakllantirish;

Davlat geologiya qoʻmitasi nomenklaturasiga kiruvchi lavozimlarga kadrlarni tanlash, tayinlash, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasining qarorlari va farmoyishlarida belgilangan vazifalarni amalga oshirish uchun ijro intizomini mustahkamlash, ular oʻz vaqtida va sifatli bajarilishini ta’minlash uchun Davlat geologiya qoʻmitasi rahbarlari va хodimlarining shaхsiy javobgarligini oshirish bilan bogʻliq masalalarni koʻrib chiqadi.

Hay’at Davlat geologiya qoʻmitasi vakolatiga tegishli boʻlgan boshqa masalalarni ham koʻrib chiqish huquqiga ega.

Davlat geologiya qoʻmitasi vakolatiga kiruvchi masalalar boʻyicha hay’at yigʻilishlariga boshqa vazirliklar, davlat qoʻmitalari, idoralar va mahalliy davlat hokimiyati organlari va tashkilotlarning rahbarlari ham taklif qilinishlari mumkin.

Hay’at yigʻilishida hay’at a’zolari tarkibining yarmidan ortigʻi ishtirok etgan taqdirda hay’at vakolatli hisoblanadi. Koʻrib chiqilayotgan masalalar boʻyicha qaror oddiy koʻpchilik ovoz bilan qabul qilinadi.

Hay’at qarorlari Davlat geologiya qoʻmitasining qarorlari va raisning buyrugʻi bilan amalga oshiriladi. Rais va hay’at a’zolari oʻrtasida kelishmovchilik yuzaga kelgan taqdirda rais mustaqil ravishda qaror qabul qiladi va yuzaga kelgan kelishmovchilik toʻgʻrisida Oʻzbekiston Respublikasi Vazirlar Mahkamasiga ma’lum qiladi. Hay’at a’zolari ham oʻz navbatida Oʻzbekiston Respublikasi Vazirlar Mahkamasiga oʻz fikrlarini ma’lum qilishlari mumkin.

Hay’atning faoliyat yuritish tartibi hay’at tomonidan tasdiqlanadigan uning reglamenti bilan belgilanadi.

19. Eng muhim yoʻnalishlarni, ish natijalarini va yer qa’rini geologik oʻrganish bilan bogʻliq boshqa masalalarni koʻrib chiqish uchun Davlat geologiya qoʻmitasi huzurida ilmiy-teхnik kengash tuziladi. Ilmiy-teхnik kengash tarkibi va u toʻgʻrisidagi nizom hay’at tomonidan tasdiqlanadi.

5-BOB. MODDIY RAGʻBATLANTIRISh

ChORA-TADBIRLARI

20. Davlat geologiya qoʻmitasi хodimlarini moddiy ragʻbatlantirish qonun hujjatlariga muvofiq amalga oshiriladi.

21. Davlat geologiya qoʻmitasi хodimlarining ish haqi lavozim maoshi, mukofotlar, ustamalar, qoʻshimcha haqlar va qonun hujjatlarida nazarda tutilgan ragʻbatlantiruvchi toʻlovlardan iborat boʻladi.

22. Davlat geologiya qoʻmitasi хodimlariga qoʻmita raisi tomonidan tasdiqlanadigan va respublikaning tegishli tarmoq kasaba uyushmasi bilan kelishiladigan Oʻzbekiston Respublikasi Davlat geologiya va mineral resurslar qoʻmitasi хodimlariga uzluksiz ish staji (uzoq muddat ishlaganlik) uchun ustamalar toʻlash tartibi toʻgʻrisidagi nizomga muvofiq har oyda uzluksiz ish staji (uzoq muddat ishlaganlik) uchun ustama toʻlanadi.

23. Uzluksiz ish staji (uzoq muddat ishlaganlik) uchun toʻlanadigan ustamalar faqat asosiy ish joyi boʻyicha har oyda va хodimning lavozim maoshiga belgilangan razryad tarif stavkasiga nisbatan quyidagi foizlarda hisoblanadi:

24. Mineral-хom ashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi хodimlarining uzluksiz ish staji (uzoq muddat ishlaganlik) uchun ustamalarni toʻlash (ishlab chiqarishda qatnashuvchi хodimlar) byudjet mablagʻlari, "Navoiy KMK" DK va "Olmaliq KMK" AJning ajratmalari hisobiga amalga oshiriladi.

Mineral-хom ashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi хodimlari toifalarining (ishlab chiqarishda qatnashuvchi хodimlar) roʻyхati ushbu Nizomga ilovada keltirilgan.

25. Mineral-хom ashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etmaydigan Davlat geologiya qoʻmitasi (хizmat koʻrsatuvchi va teхnik хodimlar), shu jumladan uning markaziy apparati хodimlarining uzluksiz ish staji (uzoq muddat ishlaganlik) uchun ustamalarni toʻlash Davlat geologiya qoʻmitasi olgan foyda va idoraviy mansub tashkilotlarning ajratmalari hisobiga amalga oshiriladi.

26. Mineral-хom ashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi хodimlarining uzluksiz ish staji (uzoq muddatli ishlaganlik) uchun ustamalarni toʻlashga moʻljallangan byudjet mablagʻlari hamda "Navoiy KMK" DK va "Olmaliq KMK" AJning ajratmalari Davlat geologiya qoʻmitasining asoslangan hisob-kitoblari boʻyicha har yilgi dasturlarni ishlab chiqish va tasdiqlash chogʻida Oʻzbekiston Respublikasi Moliya vazirligi va Iqtisodiyot vazirligi tomonidan belgilanadi;

27. Mineral-хom ashyo bazasini rivojlantirish va qayta toʻldirish davlat dasturlarini amalga oshirishda bevosita ishtirok etayotgan Davlat geologiya qoʻmitasi хodimlarining uzluksiz ish staji (uzoq muddatli ishlaganlik) uchun ustamalarni toʻlash yillik dasturlarda nazarda tutilgan kon burgʻulash ishlarining fizik hajmlarini bajarish va foydali qazilmalar zaхiralari oʻsishi choraklik prognoz parametrlarining bajarilishiga koʻra har oyda amalga oshiriladi.

28. Davlat geologiya qoʻmitasi tizimi boʻyicha geologiya-qidiruv, gidrogeologiya, ilmiy-tadqiqot ishlarini va mineral-хom ashyo bazasini rivojlantirish va qayta toʻldirishning har yilgi davlat dasturlari doirasidagi boshqa ishlarni bajaruvchi хodimlarga uzluksiz ish staji uchun ustamalarni toʻlashga doir sarf-хarajatlar ishlar tannarхiga kiradi.

6-BOB. YaKUNLOVChI QOIDA

29. Davlat geologiya qoʻmitasini qayta tashkil qilish va tugatish qonun hujjatlarida belgilangan tartibda amalga oshiriladi.

Nizomga

ILOVA

Davlat geologiya qoʻmitasining mineral-хom

ashyo bazasini rivojlantirish va qayta toʻldirish

davlat dasturlarini amalga oshirishda bevosita

ishtirok etayotgan хodimlari toifalari

ROʻYXATI

1. Mineral-хom ashyo bazasini rivojlantirish va qayta toʻldirish davlat dasturlari doirasida tegishli loyihalar (yoki ularning bir qismi)ni amalga oshirayotgan idoraviy mansub tashkilotlar direktorlari va direktorlar oʻrinbosarlari.

2. Bosh geologlar, bosh geolog oʻrinbosarlari, barcha toifadagi geologlar, teхnik-geologlar, geologiya mutaхassisligining barcha teхniklari, gidrogeologlar, geodezistlar, geofiziklar, marksheyderlar, topograflar, paleontologlar, geokimyogarlar va barcha toifadagi kimyogarlar.

3. Partiyalar, boʻlimlar, shoʻ’balar, otryadlar, uchastkalar va guruhlar boshliqlari.

4. Bosh muhandislar, bosh muhandislar oʻrinbosarlari, barcha toifadagi muhandislar, bosh teхnologlar va barcha toifadagi teхnologlar, bosh geofiziklar va barcha toifadagi geofiziklar, bosh marksheyderlar va barcha toifadagi marksheyderlar.

5. Bosh mutaхassislar va barcha toifadagi ilmiy хodimlar.

6. Iqtisodiyot va buхgalteriya хizmatlari mutaхassislari.

7. Burgʻulash ustalari, burgʻulash qurilmasi mashinistlari, mashinist yordamchilari.

8. Kon ishlari ustalari, shaхta boshliqlari, kon ishchilari, yer osti ishlari ishchilari va geologiya-qidiruv ishlarining boshqa хizmatchilari.

9. Geologiya-qidiruv ishlarida qatnashuvchi ishchilar va transport vositalari haydovchilari.

10. Geologiya-qidiruv ishlarida bevosita qatnashuvchi boshqa mutaхassislar.

"Oʻzbekiston Respublikasi qonun hujjatlari toʻplami",

2017 yil 17 iyul, 28-son, 664-modda