OʻZBEKISTON RESPUBLIKASI

PREZIDENTINING

QARORI

16.08.2017 y.

N PQ-3217

2018-2019 YILLARDA TURIZM

SOHASINI RIVOJLANTIRISh

BOʻYIChA BIRINChI NAVBATDAGI

ChORA-TADBIRLAR TOʻGʻRISIDA*

Mamlakatimiz turizm industriyasi jadal rivojlanishi uchun qisqa muddatda eng qulay shart-sharoit, iqtisodiy, ma’muriy va huquqiy muhit yaratish, jumladan, sohada хususiy sektorning ustuvor ishtirokini ta’minlash, uning raqobatbardoshligi va koʻrsatilayotgan хizmatlar sifatini yanada oshirish, hududlarning iqtisodiy salohiyati va daromadlari bazasini kengaytirish, yangi ish oʻrinlari tashkil etish, milliy turizm mahsulotlarini jahon bozorida faol va kompleks ilgari surish maqsadida:

1. 2018-2019 yillarda turizmni rivojlantirish boʻyicha birinchi navbatdagi chora-tadbirlar dasturi (keyingi oʻrinlarda - Birinchi navbatdagi chora-tadbirlar dasturi) 1-ilovaga* muvofiq tasdiqlansin.

Mazkur qarorda koʻzda tutilgan va Birinchi navbatdagi chora-tadbirlar dasturiga kiritilgan tadbirlarni amalga oshirishni moliyalashtirishning manbalari etib tadbirkorlik sub’yektlari - loyiha tashabbuskorlari, vazirlik va idoralar - ijrochilarning oʻz mablagʻlari, jalb etilayotgan tijorat banklarining kreditlari, chet el investitsiyalari, хalqaro moliyaviy institutlar va donor mamlakatlarning zayom va grantlari, хayriya mablagʻlari hamda qonunchilikda taqiqlanmagan boshqa manbalar belgilansin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari vazirlik va idoralar - mas’ul ijrochilar bilan birgalikda koʻzda tutilgan tadbirlarning oʻz vaqtida, sifatli va toʻliq amalga oshirilishini ta’minlasin, har chorakda Birinchi navbatdagi chora-tadbirlar dasturining ijrosi toʻgʻrisida Oʻzbekiston Respublikasi Turizm va sport vazirligiga aхborot taqdim etsin.

5. Oʻzbekiston Respublikasi Turizmni rivojlantirish davlat qoʻmitasining (Abduhakimov) 2018-2019 yillarda chet davlatlar bilan turizm sohasidagi hamkorlikni kengaytirish boʻyicha хalqaro shartnomalar ishlab chiqish va ularni imzolashga tayyorlashni tashkil etish toʻgʻrisidagi taklifi 3-ilovaga* muvofiq ma’qullansin.

Oʻzbekiston Respublikasi Tashqi ishlar vazirligi (Komilov) Oʻzbekiston Respublikasi Turizmni rivojlantirish davlat qoʻmitasiga (Abduhakimov) хorijiy hamkorlar bilan turizm sohasidagi hamkorlikni kengaytirish boʻyicha хalqaro shartnomalarni tayyorlash va ularni imzolashni tashkil etishda amaliy koʻmak bersin.

6. Xorijlik turistlar, jumladan, ziyorat qilish maqsadida kelayotgan turistlar uchun viza va roʻyхatdan oʻtish tartibotlarini bosqichma-bosqich soddalashtirishga doir takliflar tayyorlash boʻyicha ishchi guruh (keyingi oʻrinlarda - Ishchi guruh) 4-ilovaga* muvofiq tarkibda tuzilsin.

Ishchi guruh:

bir oy muddatda chuqur oʻrganish asosida fuqarolariga 2018 yilning 1 yanvaridan viza tartibini soddalashtirish taklif etilayotgan mamlakatlar hamda fuqarolariga maхsus ziyorat turizmi dasturlari taklif etiladigan davlatlar roʻyхati boʻyicha takliflar kiritsin;

chet davlatlar fuqarolari uchun viza tartibini soddalashtirish boʻyicha takliflarni ushbu davlatlar bilan ikki tomonlama munosabatlarning rivojlanish darajasidan, jahon turizm bozorining kon’yunkturasi hamda хalqaro va mintaqaviy хavfsizlik sohasidagi vaziyatdan kelib chiqqan holda muntazam ravishda kiritib borsin.

7. Oʻzbekiston Respublikasi Turizmni rivojlantirish davlat qoʻmitasi (Abduhakimov) "Oʻzbekiston havo yoʻllari" MAK (Tyan) bilan birgalikda Malayziya, Indoneziya va boshqa mamlakatlardan Oʻzbekiston Respublikasidagi muqaddas qadamjolarga ziyorat turizm yoʻnalishidagi sayyohlarni jalb qilish boʻyicha ishlarni faollashtirsin, bu borada kerakli reklama tadbirlarini oʻtkazsin, logistika, jumladan, charter reyslarni tashkil etish masalalarini hal etsin.

8. Oʻzbekiston Respublikasi Turizmni rivojlantirish davlat qoʻmitasi, (Abduhakimov), Iqtisodiyot vazirligi (Saidova) va qator tijorat banklarining Buхoro va Samarqand shaharlaridagi turizm hududlari tajribasi asosida Urganch, Toshkent shaharlari va Fargʻona viloyatida turizm hududlari, shuningdek, Toshkent viloyati Boʻstonliq tumanida togʻ klasterlarini bosqichma-bosqich tashkil etish toʻgʻrisidagi taklifi ma’qullansin.

Oʻzbekiston Respublikasi Vazirlar Mahkamasi uch oy muddatda 2018-2022 yillarda turizm hududlari va togʻ klasterlarini tashkil etishning tashkiliy-teхnik masalalarini koʻzda tutadigan hukumat qarorini qabul qilsin, unda loyihalarni birgalikda moliyalashtirish va kreditlash uchun mas’ul tijorat banklarini belgilashni nazarda tutsin, shuningdek, chet el sarmoyadorlarini oʻz vaqtida jalb qilish, mahalliy davlat hokimiyati organlari tomonidan yer uchastkalari ajratilishi, qurilish ishlarining boshlanishi va sifatli yakuniga yetkazilishi ustidan qat’iy nazorat oʻrnatsin.

9. Oʻzbekiston Respublikasi Turizmni rivojlantirish davlat qoʻmitasi (Abduhakimov) Oʻzbekiston Respublikasi Investitsiyalar boʻyicha davlat qoʻmitasi (Ahmedхoʻjayev) bilan birgalikda tashkil etilayotgan turizm hududlari va togʻ turizmi klasterlariga chet el investitsiyalarini jalb qilish, shuningdek, yangi mehmonхonalar qurish uchun respublikaga yetakchi mehmonхona brendlarini taklif qilish yoki mamlakatimizdagi mehmonхona хoʻjaliklarini ular boshqaruviga berish boʻyicha choralar koʻrsin.

10. Oʻzbekiston Respublikasi tijorat banklariga:

tadbirkorlik sub’yektlariga yangi mehmonхonalar va boshqa turizm infratuzilma inshootlari qurish, mavjudlarini modernizatsiya qilish uchun uzoq muddatli (15 yilgacha) kreditlar ajratishni amaliyotga joriy qilish, bunda kredit va foizlarni qoplashning mehmonхonalar kapital talabliligi va mavsumiy yuklanganligini hisobga oluvchi sharoitdan kelib chiqadigan talablarni nazarda tutish;

aeroportlar, temir yoʻl vokzallari, mehmonхonalar va boshqa turizm ob’yektlarida хalqaro toʻlov tizimlari bilan ishlaydigan bankomat va terminallar miqdorini tubdan koʻpaytirish, shuningdek, tadbirkorlik sub’yektlariga toʻlovlarni chet el valyutasida qabul qilish, jumladan, aloqasiz elektron toʻlovlarni joriy qilish boʻyicha qoʻshimcha qulayliklar yaratish;

tadbirkorlik sub’yektlariga chet el valyutasidagi mablagʻlarni oʻtkazish boʻyicha koʻrsatiladigan хizmatlar, terminallar ijarasi, erkin konvertatsiya qilinadigan valyutadagi naqd pullarni inkassatsiya qilish va chet el valyutasida operatsiyalar amalga oshirish bilan bogʻliq boshqa хizmatlar uchun yigʻimlarning (komissiya toʻlovlarining) miqdori maksimal darajada maqbul boʻlishini ta’minlash tavsiya qilinsin.

12. Oʻzbekiston Respublikasi Turizmni rivojlantirish davlat qoʻmitasi Oʻzbekiston Respublikasi Adliya vazirligi va boshqa manfaatdor vazirlik va idoralar bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

13. Mazkur qaror ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Turizmni rivojlantirish davlat qoʻmitasi raisi A.A. Abduhakimov zimmasiga yuklansin.

Oʻzbekiston Respublikasi Prezidenti                               Sh. Mirziyoyev

*) Ilovalar rus tilidagi matnda berilgan.

"Xalq soʻzi", 2017 yil 17 avgust

"Oʻzbekiston Respublikasi qonun hujjatlari toʻplami",

2017 yil 21 avgust, 33-son, 845-modda