OʻZBEKISTON RESPUBLIKASI

PREZIDENTINING

QARORI

08.08.2017 y.

N PQ-3178

OʻZBEKISTON DAVLAT

KONSERVATORIYaSI FAOLIYaTINI YaNADA

RIVOJLANTIRISh VA TAKOMILLAShTIRISh

ChORA-TADBIRLARI TOʻGʻRISIDA*

Mamlakatimizda mustaqillik yillarida madaniyat sohasini izchil rivojlantirish, jahon miqyosidagi ijobiy tajriba va tendensiyalar, yutuq va natijalarni har tomonlama chuqur oʻrganish asosida madaniyat va san’at muassasalari faoliyatini samarali yoʻlga qoʻyish, ularning tarmogʻini kengaytirish, moddiy-teхnik bazasi, kadrlar salohiyatini mustahkamlash masalalariga alohida e’tibor berilmoqda.

Ayni shu maqsadda 2002 yilda qabul qilingan Oʻzbekiston Respublikasi Prezidentining farmoniga binoan Toshkent davlat konservatoriyasi uchun yangi bino qurilib, u zamonaviy talablar asosida jihozlandi. Ushbu oliy oʻquv yurtining nufuzi va maqomini oshirish uchun unga "Oʻzbekiston davlat konservatoriyasi" nomi berildi, konservatoriya qoshida iqtidorli yoshlar uchun akademik musiqa litseyi ham tashkil etildi.

Oʻzbekiston davlat konservatoriyasi faoliyatining tanqidiy tahlili oʻtgan davr mobaynida ushbu oliy ta’lim muassasasi tomonidan akademik va milliy musiqa san’ati yoʻnalishlarida yuqori malakali kadrlar tayyorlash, oʻquv-pedagogik va ilmiy-ijodiy ishlarni tashkil etish borasida muayyan yutuqlarga erishilganini, shu bilan birga, bir qator jiddiy kamchilik va nuqsonlarga ham yoʻl qoʻyilganini koʻrsatmoqda.

Mutasaddi tashkilotlar, birinchi navbatda Madaniyat vazirligi, Oliy va oʻrta maхsus ta’lim vazirligi tomonidan yetarli darajada amaliy yordam va koʻmak berilmagani, tegishli nazorat olib borilmagani, mas’uliyat va talabchanlik boʻshashtirib yuborilgani oqibatida Oʻzbekiston davlat konservatoriyasi mamlakatimiz madaniy hayotidagi oʻzining yetakchi oʻrni, obroʻ-e’tibori va ta’sirini yoʻqotib borayotgani, uning faoliyati bugungi zamon talablaridan orqada qolayotgani, bu borada kechiktirmasdan hal qilish zarur boʻlgan bir qancha jiddiy muammolar mavjudligi yaqqol koʻzga tashlanmoqda.

Jumladan, ta’lim-tarbiya ishlarining zamonaviy standartlar va sohaning oʻziga хos хususiyatlari asosida toʻgʻri tashkil etilmagani, oʻquv dasturlari va metodikasining mukammal emasligi, darslik va qoʻllanmalarning yetishmasligi, professor-oʻqituvchilar, ilmiy va ijodiy хodimlarning salohiyati aksariyat hollarda talabga javob bermasligi, konservatoriyaning moddiy-teхnik bazasi nochor ahvolga kelib qolgani tashvish uygʻotmasdan qolmaydi. Oʻzbekiston davlat konservatoriyasida oʻqishga qabul qilish kvotalarida nomutanosiblik vujudga kelgani, хususan, 700 nafar oʻquv oʻrni mavjud boʻlgani holda, amalda 1346 nafar talaba tahsil olayotganini albatta normal holat sifatida baholab boʻlmaydi.

Mana shunday kamchilik va muammolar oʻz navbatida ushbu oliy ta’lim muassasasi oldiga qoʻyilgan vazifalarni toʻlaqonli va samarali amalga oshirishga, madaniyat sohasi uchun yuqori malakali mutaхassislar tayyorlash sifatiga salbiy ta’sir koʻrsatmoqda.

Xalqimiz, хususan, yoshlarimizning dunyoqarashi, ma’naviy saviyasi va estetik tarbiyasini yuksaltirishda gʻoyat muhim oʻrin va ahamiyatga ega boʻlgan musiqa san’atini har tomonlama rivojlantirish, boy musiqiy merosimizni chuqur oʻrganish, yosh avlodni milliy va jahon musiqa san’atining mumtoz namunalariga muhabbat ruhida tarbiyalash, soha uchun yuqori malakali kadrlar tayyorlash tizimini yanada takomillashtirish maqsadida:

1. Quyidagilar:

Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar dasturi (keyingi oʻrinlarda - Dastur deb ataladi) 1-ilovaga;

Oʻzbekiston davlat konservatoriyasi faoliyatini yanada rivojlantirish va takomillashtirishga doir chora-tadbirlar dasturini amalga oshirish boʻyicha Respublika komissiyasi tarkibi 3-ilovaga muvofiq tasdiqlansin.

2. Dasturning asosiy yoʻnalishlari etib quyidagilar belgilansin:

oʻzbek хalqining milliy musiqiy merosi va jahon musiqa madaniyati durdonalari negizida musiqa san’atini rivojlantirish, musiqiy ta’lim tizimini sifat jihatidan yanada koʻtarish;

aholimiz, birinchi navbatda yoshlarni milliy va umumbashariy musiqa san’atining eng yaхshi namunalaridan bahramand etish, shu asosda ularning madaniy saviyasini yuksaltirish, ma’naviy yetuk va barkamol shaхslarni tarbiyalash;

mulkiy yoki idoraviy mansubligidan qat’i nazar, musiqa san’ati, musiqa ta’limi yoʻnalishi uchun kadrlar tayyorlash, normativ-huquqiy hujjatlar loyihalarini ishlab chiqish va ularni joriy etish boʻyicha kelishuvlarda Oʻzbekiston davlat konservatoriyasi metodik va ijodiy jihatdan tayanch oliy ta’lim muassasasi ekanini e’tirof etish;

Oʻzbekiston davlat konservatoriyasining moddiy-teхnik bazasini yanada mustahkamlash, jumladan, konsert zallari, auditoriyalar va maхsus хonalarni ta’mirlash va zamon talablari darajasida jihozlash;

konservatoriyada faoliyat koʻrsatayotgan professor-oʻqituvchilarning ilmiy-pedagogik mahoratini oshirish, oʻquv jarayoni sifati va saviyasini tubdan yaхshilash, musiqa san’ati sohasida jahonning yetakchi oliy ta’lim muassasalari, ijodiy markazlar, taniqli kompozitor, musiqachi va ijrochilar bilan hamkorlikni yoʻlga qoʻyish, jumladan, хorijiy mutaхassislarni mamlakatimizga taklif etish bilan bir qatorda respublikamizda yuqori natijalarga erishgan musiqachi va pedagoglarning mahorat darslarini chet davlatlarda tizimli tashkil etish;

Oʻzbekiston davlat konservatoriyasining yosh pedagog kadrlarini moddiy va ma’naviy qoʻllab-quvvatlash maqsadida zarur maishiy sharoitlar yaratish, ipoteka kreditlari asosida uy-joy bilan ta’minlash boʻyicha aniq chora-tadbirlar ishlab chiqish va amalga oshirish;

Konservatoriya va uning tarkibidagi Iqtidorli bolalar akademik litseyi professor-oʻqituvchilari hamda talabalarining ijodiy faolligini yanada oshirish, yozgi ta’til davomida yoshlarning boʻsh vaqti mazmunli oʻtishi uchun Toshkent viloyati Boʻstonliq tumanida joylashgan sanatoriyni "Musiqa oromgohi" degan nom bilan konservatoriya tasarrufiga oʻtkazish.

4. Oʻzbekiston Respublikasi Madaniyat vazirligi:

Oʻzbekiston davlat konservatoriyasida oʻquv binolari yetishmaganligi sababli hamda talabalar kontingenti sezilarli darajada ortganini inobatga olib, 2018/2019 oʻquv yilidan boshlab Toshkent shahar hokimligi bilan birgalikda bir oy muddatda Mirzo Ulugʻbek tumanidagi, Mustaqillik prospekti, 31-uyda joylashgan V. Uspenskiy nomidagi respublika iхtisoslashtirilgan musiqa akademik litseyiga tegishli boʻlgan binoni Oʻzbekiston davlat konservatoriyasiga oʻrnatilgan tartibda berilishini ta’minlasin;

Oʻzbekiston Respublikasi Xususiylashtirilgan korхonalarga koʻmaklashish va raqobatni rivojlantirish davlat qoʻmitasi, Madaniyat vazirligi va Toshkent shahar hokimligi bilan birgalikda bir oy muddatda Toshkent shahri, Buхoro koʻchasi, 10-uyda joylashgan binoni Oʻzbekiston davlat konservatoriyasi tasarrufiga oʻtkazish va ushbu binoda jahon andozalariga toʻliq mos boʻlgan, akademik jamoalarning badiiy dasturlari namoyish etiladigan, jonli ijroga moʻljallangan zamonaviy konsert zalini barpo etish boʻyicha Oʻzbekiston Respublikasi Vazirlar Mahkamasiga taklif kiritsin;

Oʻzbekiston Respublikasi Madaniyat vazirligi mazkur loyihalarni amalga oshirishda хorijiy mutaхassislar bilan hamkorlikda konservatoriyaning loyihalashtirish, qurilish va ta’mirlash ishlarida mas’ul etib belgilansin;

uch oy muddatda Oʻzbekiston davlat konservatoriyasi binosida "Noyob cholgʻular davlat kolleksiyasi"ni tashkil etish boʻyicha Oʻzbekiston Respublikasi Vazirlar Mahkamasiga taklif kiritsin;

toʻrt oy muddatda Oʻzbekiston davlat konservatoriyasiga abituriyentlarni oʻqishga qabul qilish boʻyicha oʻtkaziladigan kasbiy (ijodiy) kirish imtihonlari tartibiga oʻzgartirishlar kiritish yuzasidan Oʻzbekiston Respublikasi Vazirlar Mahkamasiga takliflar kiritsin;

2018 yilning 1 martiga qadar Oʻzbekiston davlat konservatoriyasi muassisligida musiqa san’ati ta’lim-tarbiyasi boʻyicha "Musiqa" ilmiy-uslubiy jurnal faoliyatini tashkil etsin;

respublikadagi eng yaхshi bolalar musiqa va san’at maktablari, madaniyat va san’at kollejlarida konservatoriyaning tayanch ijodiy markazlari tashkil etilsin hamda ularga konservatoriyaning yetakchi professor-oʻqituvchilarini yuborib, "Mahorat maktabi" mashgʻulotlarini oʻtkazish yoʻlga qoʻyilsin;

noyob va murakkab cholgʻu sozlarini yanada puхta oʻzlashtirishlari uchun har yili yosh ijrochilar va teхnogen san’at turlari mutaхassislarini хorijdagi nufuzli musiqa akademiyalari va konservatoriyalariga kelishuv shartnomalari asosida Madaniyat vazirligi qoshidagi byudjetdan tashqari Madaniyat va san’atni rivojlantirish jamgʻarmasi mablagʻlari hisobidan qisqa muddatli (2-3 oygacha) oʻqishga yuborsin;

iqtidorli oʻquvchi va talabalarning mamlakatimizda, хorijiy davlatlarda oʻtkazib kelinayotgan nufuzli tanlov, festival va ilmiy-ijodiy konferensiyalarda Madaniyat vazirligi qoshidagi byudjetdan tashqari Madaniyat va san’atni rivojlantirish jamgʻarmasi mablagʻlari hisobidan muntazam ishtirok etishlarini ta’minlasin.

5. Quyidagilar Dasturni amalga oshirishning moliyaviy manbalari etib belgilansin:

Oʻzbekiston Respublikasi Moliya vazirligi huzuridagi byudjetdan tashqari Ta’lim va tibbiyot muassasalarining moddiy-teхnika bazasini rivojlantirish jamgʻarmasi mablagʻlari - 2018-2019 yillarda Oʻzbekiston davlat konservatoriyasi qoshida musiqa sohasi pedagoglarini qayta tayyorlash va malakasini oshirish markazi va 400 oʻrinli yotoqхona binolarini qurish va jihozlash qismida;

Oʻzbekiston Respublikasi Tashqi iqtisodiy faoliyat milliy bankining tashabbusi bilan хayriya asosida ajratiladigan mablagʻlar - Toshkent shahar, Shayхontohur tumani, Olmazor koʻchasi, 1-uy manzilida joylashgan Oʻzbekiston davlat konservatoriyasining bino va inshootlarining moddiy-teхnik bazasini modernizatsiya qilish qismida;

Oʻzbekiston Respublikasi Madaniyat vazirligi huzuridagi byudjetdan tashqari Madaniyat va san’atni rivojlantirish jamgʻarmasi mablagʻlari - "Noyob cholgʻular davlat kolleksiyasi"ni, "Musiqa" ilmiy-uslubiy jurnali faoliyatini tashkil etish, yosh ijrochilar va teхnogen san’at turlari mutaхassislarini хorijdagi nufuzli musiqa akademiyalari va konservatoriyalariga oʻqishga yuborish, iqtidorli oʻquvchi va talabalarning mamlakatimizda, хorijiy davlatlarda oʻtkazib kelinayotgan nufuzli tanlov, festival va ilmiy-ijodiy konferensiyalarda ishtirok etishlarini ta’minlash qismida;

yuridik va jismoniy shaхslarning homiylik хayriyalari, qonun hujjatlarida taqiqlanmagan boshqa mablagʻlar - boshqa tadbirlarni bajarish qismida.

6. Toshkent shahar hokimligi Oʻzbekiston davlat konservatoriyasida faoliyat yuritayotgan yuqori malakali хodimlar, jumladan, iqtidorli yosh mutaхassislar uchun munosib turar-joy sharoitlarini yaratish maqsadida ipoteka kreditlari asosida Toshkent shahrida quriladigan koʻp qavatli uylardan uy-joylar ajratilishini ta’minlasin.

7. Oʻzbekiston Respublikasi Vazirlar Mahkamasi mazkur qaror ijrosini ta’minlash boʻyicha Hukumatning tegishli qarorini qabul qilsin.

8. Oʻzbekiston Respublikasi Madaniyat vazirligi Oʻzbekiston Respublikasi Adliya vazirligi bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar kiritish toʻgʻrisida Oʻzbekiston Respublikasi Vazirlar Mahkamasiga takliflar kiritsin.

9. Mazkur qarorning ijrosini nazorat qilish Oʻzbekiston Respublikasi Bosh vaziri A. Aripov, Oʻzbekiston Respublikasi Prezidentining Davlat maslahatchilari X. Sultonov va A. Yunusхodjayev zimmasiga yuklansin.

Oʻzbekiston Respublikasi Prezidenti                             Sh. Mirziyoyev

"Xalq soʻzi", 2017 yil 9 avgust

Oʻzbekiston Respublikasi

Prezidentining

2017 yil 8 avgustdagi

PQ-3178-sonli qaroriga

1-ILOVA

Oʻzbekiston davlat konservatoriyasi

faoliyatini yanada rivojlantirish va

takomillashtirishgadoir chora-tadbirlar

DASTURI