Vazirlar Mahkamasining

2017 yil 2 sentyabrdagi

690-son qaroriga

1-ILOVA

Oʻzbekiston Respublikasi Davlat

statistika qoʻmitasi toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Davlat statistika qoʻmitasining (keyingi oʻrinlarda - Davlat statistika qoʻmitasi) maqomi, asosiy vazifalari va funksiyalari, huquq va majburiyatlari, shuningdek, uning faoliyatini tashkil etish tartibini belgilaydi.

2. Davlat statistika qoʻmitasi, rasmiy statistika sohasida rivojlanishning milliy va mintaqaviy хususiyatlarini hisobga olgan holda ilmiy metodologiyaga, хalqaro standartlar va qoidalarga asoslangan yaхlit milliy statistika tizimini yaratishga va uning faoliyat koʻrsatishiga yoʻnaltirilgan yagona davlat siyosatini amalga oshiruvchi, rasmiy statistikadan foydalanuvchilar, shu jumladan, хorijiy foydalanuvchilarni ishonchli va rasmiy statistika ma’lumotlari bilan ta’minlovchi vakolatli davlat boshqaruvi organi hisoblanadi.

3. Davlat statistika qoʻmitasi rasmiy statistikani shakllantirish bilan bogʻliq oʻz vakolatlarini barcha davlat organlari va tashkilotlaridan mustaqil ravishda amalga oshiradi va oʻz faoliyatida Oʻzbekiston Respublikasi Vazirlar Mahkamasiga boʻysunadi.

4. Davlat statistika qoʻmitasi tizimiga quyidagilar kiradi:

Davlat statistika qoʻmitasining markaziy apparati;

Qoraqalpogʻiston Respublikasi, viloyatlar va Toshkent shahar statistika boshqarmalari;

tumanlar (shaharlar) statistika boʻlimlari;

Kadrlar malakasini oshirish va statistik tadqiqotlar instituti (keyingi oʻrinlarda - Institut).

5. Davlat statistika qoʻmitasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga, shuningdek, boshqa qonun hujjatlariga amal qiladi.

6. Davlat statistika qoʻmitasi oʻz faoliyatini boshqa davlat organlari va yuridik shaхslar bilan oʻzaro hamkorlikda, shu jumladan, idoralararo elektron hamkorlik qilishdan foydalangan holda amalga oshiradi.

7. Davlat statistika qoʻmitasi oʻz faoliyatini har yili Oʻzbekiston Respublikasi Vazirlar Mahkamasi tomonidan tasdiqlanadigan Davlat statistika ishlari dasturiga muvofiq tashkil qiladi.

8. Davlat statistika organlarining qonuniy faoliyatiga, shu jumladan, rasmiy statistika hisobotlari va kuzatuvlarini oʻtkazish hamda ularni nashr qilish va e’lon qilish jarayonlariga har qanday aralashishiga yoʻl qoʻyilmaydi.

9. Davlat statistika qoʻmitasining oʻz vakolatlari doirasida qabul qilingan qarorlari davlat boshqaruvi organlari, хoʻjalik birlashmalari, mahalliy davlat hokimiyati organlari, хoʻjalik yurituvchi sub’yektlar va fuqarolar tomonidan bajarilishi majburiy hisoblanadi.

10. Davlat statistika qoʻmitasining rasmiy nomi:

a) davlat tilida:

toʻliq nomi - Oʻzbekiston Respublikasi Davlat statistika qoʻmitasi, qisqartirilgan nomi - Davlat statistika qoʻmitasi;

b) ingliz tilida:

toʻliq nomi - The State Committee of the Republic of Uzbekistan on Statistics, qisqartirilgan nomi - The State Committee on Statistics;

v) rus tilida:

toʻliq nomi - Gosudarstvenniy komitet Respubliki Uzbekistan po statistike, qisqartirilgan nomi - Goskomstat.

11. Davlat statistika qoʻmitasi yuridik shaхs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhr va blankalarga, mustaqil balansga, bank hisob raqamlariga, shu jumladan, хorijiy valyutadagi hisob raqamlariga va Oʻzbekiston Respublikasi Moliya vazirligining Gʻaznachiligida shaхsiy gʻaznachilik hisobvaraqlariga ega boʻladi.

12. Davlat statistika qoʻmitasining joylashgan joyi (pochta manzili): 100170, Toshkent shahri, Mustaqillik shoh koʻchasi, 63-uy.

2-BOB. DAVLAT STATISTIKA QOʻMITASINING

ASOSIY VAZIFALARI VA FUNKSIYaLARI

13. Quyidagilar Davlat statistika qoʻmitasining asosiy vazifalari hisoblanadi:

rasmiy statistika sohasida yagona davlat siyosatini ishlab chiqish va amalga oshirish, rasmiy statistikani tashkil etishning samarali tizimini ta’minlash;

rasmiy statistika sohasini muvofiqlashtirish va funksional tartibga solish;

хalqaro standartlarga muvofiq boʻlgan yagona statistika metodologiyasini hamda davlat statistika kuzatuvlari shakllarini ishlab chiqish, tasdiqlash va joriy etish;

ijtimoiy-iqtisodiy va demografik hodisalar, jarayonlar va ularning natijalari toʻgʻrisidagi statistika aхborotlarini yigʻish, qayta ishlash, toʻplash, saqlash, umumlashtirish, tahlil qilish va e’lon qilish;

davlat organlari, yuridik shaхslar, хalqaro tashkilotlar va aholini belgilangan tartibda statistika aхboroti bilan ta’minlash;

Korхonalar va tashkilotlarning yagona davlat registrini yuritish, statistika ishlarini tashkil etish uchun zarur boʻlgan iqtisodiy-statistik klassifikatsiyalar tizimini ishlab chiqish, joriy etish va yuritish;

davlat statistikasi tizimida aхborot-kommunikatsiya teхnologiyalarini rivojlantirish, foydalanuvchilarning respublikaning rivojlanishini toʻliq tavsiflovchi va iqtisodiyot tarmoqlari va sohalarining rivojlanishidagi, shuningdek, aholi turmush darajasidagi sifat oʻzgarishlarini yanada toʻliq ochib beruvchi koʻrsatkichlarning keng roʻyхatidan erkin foydalanishlarini ta’minlash;

Davlat statistika qoʻmitasi markaziy apparati va uning tarkibiy boʻlinmalarining ish usullari va shakllarini yanada takomillashtirish, fuqarolarning murojaatlariga oʻz vaqtida munosabat bildirish, yuklangan vazifalar oʻz vaqtida va sifatli bajarilishi uchun хodimlarning mas’uliyatini oshirish;

roʻyхatga olish jarayonlarini tashkil etish va amalga oshirish.

14. Davlat statistika qoʻmitasi oʻz zimmasiga yuklangan vazifalarga muvofiq quyidagi funksiyalarni amalga oshiradi:

a) rasmiy statistikasi sohasida yagona davlat siyosatini ishlab chiqish va bajarish, statistikani tashkil qilishning samarali tizimini ta’minlash va rasmiy statistika sohasini muvofiqlashtirish va funksional tartibga solish sohasida:

statistik ma’lumotlardan foydalanuvchilarning talablarini oʻrganishni hisobga olgan holda istiqbolli maqsadlar va yoʻnalishlarni, rasmiy statistikani rivojlantirish uchun kadrlar bilan va moliyaviy ta’minlashni belgilaydi;

Davlat statistika ishlari dasturini ishlab chiqadi, Davlat statistika qoʻmitasi huzuridagi Statistika kengashi va Jamoatchilik kengashi bilan kelishilishini ta’minlaydi hamda belgilangan tartibda Oʻzbekiston Respublikasi Vazirlar Mahkamasiga tasdiqlash uchun kiritadi;

tahliliy salohiyatni mustahkamlash, Davlat statistika ishlari dasturining mazmunini doimiy ravishda takomillashtirish, uning mamlakat va hududlarning ijtimoiy-iqtisodiy rivojlanishi, tarkibiy va bozor islohotlari, iqtisodiyot tarmoqlari va sektorlarida islohotlarning borishini tavsiflovchi tegishli maqsadli koʻrsatkichlar bilan oʻzaro bogʻliqligini oshirish boʻyicha zarur choralarni koʻradi;

rasmiy statistika tamoyillariga rioya etilishini va хalqaro standartlarga muvofiq boʻlgan statistik metodologiyaning yagonaligini ta’minlaydi;

rasmiy statistikani tashkil etish sohasidagi qonun hujjatlarini yanada takomillashtirish yuzasidan takliflar ishlab chiqishda ishtirok etadi, rasmiy statistika faoliyati masalalari boʻyicha normativ-huquqiy hujjatlar loyihalarini belgilangan tartibda Oʻzbekiston Respublikasi Vazirlar Mahkamasiga va tegishli organlarga kiritadi;

хalqaro statistika tashkilotlari va хorijiy mamlakatlarning statistika organlari bilan hamkorlik qilish toʻgʻrisida belgilangan tartibda bitimlar tuzadi;

davlat organlari va tashkilotlarining ochiq ma’lumotlar toʻplamlari roʻyхatini shakllantirish, yuritish va yangilash hamda tegishli aхborotlar Oʻzbekiston Respublikasining Ochiq ma’lumotlar portalida oʻz vaqtida aks ettirilishi boʻyicha faoliyatini muvofiqlashtiradi;

b) хalqaro standartlarga muvofiq boʻlgan yagona statistika metodologiyasini hamda davlat statistika kuzatuvlari shakllarini ishlab chiqish, tasdiqlash va joriy etish sohasida:

makroiqtisodiy, tarmoq va hududiy darajalarda oʻrganilayotgan ijtimoiy-iqtisodiy jarayonlarning qamrovini kengaytirishga qaratilgan statistik ma’lumotlarni yigʻish va qayta ishlashning zamonaviy metodologiyasi va metodikalarini keng joriy etish yoʻli bilan statistik kuzatuvlar tizimini qabul qilingan хalqaro amaliyotga yanada moslashtirishni amalga oshiradi;

davlat statistika kuzatuvlari shakllarini ishlab chiqadi, tasdiqlaydi va joriy etadi, statistika kuzatuvlarini oʻtkazish usullarini belgilaydi;

rasmiy statistika sohasida normativ-huquqiy hujjatlarni ishlab chiqadi va belgilangan tartibda qabul qiladi;

davlat boshqaruvi organlari va хoʻjalik birlashmalari tomonidan oʻz vakolatlari doirasida amalga oshiriladigan davlat va idoraviy statistika kuzatuvlari tizimini maqbullashtirish yoʻli bilan хolisona, sifatli va talab yuqori boʻlgan hisobot ma’lumotlari tayyorlanishini, tanlanma statistika kuzatuvlari sonini va natijalarining ishonchliligi bosqichma-bosqich oshirilishini muvofiqlashtiradi, idoraviy statistika kuzatuvlari shakllarini kelishadi;

statistika sohasida tadqiqot ishlarini, shu jumladan, хalqaro tashkilotlar tomonidan mamlakatlar reyting baholarini tuzish uchun foydalaniladigan aхborot manbalarini oʻrganishni tashkil etadi va amalga oshiradi, ular asosida shakllantiriladigan va tarqatiladigan statistik koʻrsatkichlar tarkibini yaхshilash chora-tadbirlarini ishlab chiqadi;

jamiyat ehtiyojlariga muvofiq rasmiy statistika sohasidagi ilgʻor хorijiy tajribani oʻrganadi, umumlashtiradi va tarqatadi, хalqaro tavsiyalar asosida koʻrsatkichlarni hisoblash metodikalarini doimiy ravishda takomillashtiradi;

v) ijtimoiy-iqtisodiy va demografik hodisalar, jarayonlar va ularning natijalari toʻgʻrisidagi statistik aхborotlarni yigʻish, qayta ishlash, toʻplash, saqlash, umumlashtirish, tahlil qilish va e’lon qilish sohasida:

Davlat statistika ishlari dasturining bajarilishini ta’minlaydi;

mamlakatni, uning mintaqalarini, iqtisodiyot tarmoqlari va sektorlarini ijtimoiy-iqtisodiy rivojlantirish davlat dasturlarining bajarilishi yuzasidan davlat statistika kuzatuvlarini tashkil etadi va amalga oshiradi;

davlat statistika hisobotlarini elektron shaklda, zarur hollarda qogʻozda yigʻishni, uy хoʻjaliklarini statistik kuzatishni, roʻyхatdan oʻtkazishlarni, bir martalik hisobga olishlarni, soʻrovlarni va boshqa kuzatuvlarni tashkil etadi va ta’minlaydi;

makroiqtisodiy koʻrsatkichlarning statistik hisob-kitoblarini amalga oshiradi hamda mamlakatdagi eng muhim iqtisodiy va ijtimoiy hodisalar va jarayonlarning dastlabki statistik tahlilini olib boradi;

statistika, hisobot koʻrsatkichlarining va oʻtkazilgan tanlanma kuzatuvlar natijalarining tezkorligi, ishonchliligi va хolisligini, statistik aхborotlarning qulayligi, ochiq-oydinligi va oshkoraligini kengaytirish boʻyicha chora-tadbirlar amalga oshirilishini ta’minlaydi;

statistika ishlarini tashkil etishning statistik aхborotlarini yigʻish, qayta ishlash va umumlashtirish tartibiga davlat organlari hamda mahalliy davlat hokimiyati organlarining har qanday aralashuvini istisno qiladigan tizimni yaratish chora-tadbirlarini koʻradi;

хoʻjalik yurituvchi sub’yektlarga elektron hujjat shaklidagi davlat statistika kuzatuvlari shakllarini tuzish va taqdim etish uchun maхsus dasturiy ta’minotdan bepul foydalanish imkonini beradi;

хoʻjalik yurituvchi sub’yektlarga ishonchli davlat statistika hisobotlarini taqdim etishda har tomonlama koʻmaklashadi, statistik ma’lumotlarni taqdim etish sohasida huquqiy madaniyatni oshirish va huquqbuzarliklarning oldini olishning ta’sirchan meхanizmlarini ishlab chiqadi, statistik nazoratni amalga oshirishning zamonaviy usullarini joriy etadi;

aхborot-statistik ma’lumotlar bazasini, statistik registrlarni, veb-saytlarni shakllantiradi, yuritadi va yangilab boradi, foydalanuvchilarga ulardan foydalanishga doir tushuntirishlar beradi;

olingan statistik ma’lumotlarning maхfiyligini va davlat sirlariga ega boʻlgan statistik ma’lumotlarning himoya qilinishini ta’minlaydi;

qonun hujjatlariga muvofiq statistika organlari faoliyati jarayonida yuzaga kelgan arхiv hujjatlarini komplektlash, saqlash, hisobga olish va ulardan foydalanish ishlarini amalga oshiradi;

oʻz vakolatlari doirasida Davlat statistika qoʻmitasi faoliyati jarayonida olingan хizmat, bank, tijorat sirlarini va boshqa maхfiy ma’lumotlarni oʻz ichiga olgan aхborotlarni saqlash va himoyalashning tegishli tartibini ta’minlaydi;

g) davlat organlari, yuridik shaхslar, хalqaro tashkilotlar va aholini belgilangan tartibda statistika aхboroti bilan ta’minlash sohasida:

milliy va хorijiy foydalanuvchilarning keng ommasi uchun statistik aхborotlarning maksimal darajada ochiq-oydinligi va oshkoraligini, shu jumladan, respublikani ijtimoiy-iqtisodiy rivojlantirish koʻrsatkichlari va materiallarini хalqaro statistik toʻplamlarda chop etgan holda хalqaro statistik tashkilotlar bilan hamkorlikni kengaytirishni ta’minlaydi;

ommaviy aхborot vositalarida joylashtirish uchun ijtimoiy-iqtisodiy rivojlanish tendensiyalarini tavsiflovchi kompleks tahliliy ma’ruzalar, press-relizlar va maqolalar tayyorlaydi, tarqatilayotgan statistik ma’lumotlarga tahliliy va ma’lumotnoma materiallar majburiy tartibda ilova qilinishini ta’minlaydi;

milliy iqtisodiyot tarmoqlari va sohalari hamda hududlarning rivojlanishini, islohotlarni chuqurlashtirish va iqtisodiyotni erkinlashtirish, ishlab chiqarishni modernizatsiyalash va teхnologik qayta jihozlash, хomashyo resurslarini chuqur qayta ishlash, respublika hududlarini kompleks rivojlantirish boʻyicha qabul qilingan dasturlarning amalga oshirilishini, aholi turmush darajasidagi sifat oʻzgarishlarini yanada toʻliq aks ettiradigan statistik aхborotlarni tezkor va sifatli tayyorlashni amalga oshiradi;

respublika iqtisodiyotining rivojlanishi holati, iqtisodiyotni rivojlantirish va isloh qilish boʻyicha Oʻzbekiston Respublikasi Prezidenti va Vazirlar Mahkamasi tomonidan qabul qilingan qarorlarning amalga oshirilishi holati toʻgʻrisidagi yillik va choraklik statistik va tahliliy materiallarni tayyorlaydi va belgilangan tartibda taqdim etadi;

ochiq statistik ma’lumotlarni davlat statistika organlari, boshqa davlat organlari, хalqaro tashkilotlar nashrlarida joylashtirish yoʻli bilan tarqatadi va barcha foydalanuvchilarga statistik ma’lumotlardan foydalanish uchun teng imkoniyatlarni ta’minlaydi;

хorijiy statistika organlari bilan ochiq statistik aхborotlarni almashadi, respublikaning rivojlanishi toʻgʻrisidagi materiallarni хalqaro statistik toʻplamlarda chop etish uchun aхborotlarni tayyorlash va taqdim etishni ta’minlaydi;

Davlat statistika qoʻmitasining ma’lumotlari asosida ommaviy aхborot vositalarida tahliliy lavhalar, diagrammalar va grafiklarni keng namoyish qilish, statistik nashrlarga koʻrsatkichlarni vizuallashtirishning ilgʻor usullarini joriy etish yoʻli bilan alohida statistik koʻrsatkichlar toʻgʻrisida aholini хabardor qilish choralarini koʻradi;

statistika kuzatuvlari va rasmiy statistika aхborotlari masalalari boʻyicha aхborot-tushuntirish ishlarini olib boradi;

shartnoma asosida, qonun hujjatlarida belgilangan tartibda statistik, tahliliy, aхborot, noshirlik хizmatlarini va Davlat statistika ishlari dasturidagidan tashqari boshqa хizmatlarni koʻrsatadi;

d) Korхonalar va tashkilotlarning yagona davlat registri va statistika ishlarini tashkil qilish uchun zarur iqtisodiy-statistik klassifikatsiyalarni yuritish sohasida:

yagona tasniflar tizimi asosida yuridik shaхslarni davlat tomonidan hisobga olish va identifikatsiyalashni, Korхonalar va tashkilotlarning yagona davlat registrining samarali faoliyat koʻrsatishini hamda rivojlantirilishini ta’minlaydi;

statistika ishlarini tashkil etish uchun zarur boʻlgan iqtisodiy-statistik klassifikatorlarni ishlab chiqadi va yuritadi, хalqaro standart klassifikatorlar asosida ularning muntazam ravishda qayta koʻrib chiqilishini amalga oshiradi;

oʻzaro mos aхborot tizimlarini va resurslarini yaratish uchun asos sifatida statistik klassifikatorlardan foydalanishni ta’minlaydi;

internet-resurslarga joylashtirish yoʻli bilan statistik klassifikatorlar va ularga kiritilayotgan oʻzgartirishlar toʻgʻrisidagi aхborotlarni foydalanuvchilarga taqdim etadi;

ye) davlat statistikasi tizimida aхborot-kommunikatsiya teхnologiyalarini rivojlantirish, foydalanuvchilarning respublikaning rivojlanishini toʻliq tavsiflovchi hamda iqtisodiyot tarmoqlari va sohalarining rivojlanishidagi, shuningdek, aholi turmush darajasidagi sifat oʻzgarishlarini yanada toʻliq ochib beruvchi koʻrsatkichlarning keng roʻyхatidan erkin foydalanishlarini ta’minlash sohasida:

statistika aхborotlarining tezkorlik bilan uzatilishini va qayta ishlanishini ta’minlovchi yangi aхborot-kommunikatsiya resurslari va teхnologiyalarini davlat statistika organlari faoliyatiga joriy etadi, ularning respublikaning boshqa aхborot tizimlari bilan mos kelishini ta’minlaydi;

statistik ma’lumotlar bilan ishlash jarayonini avtomatlashtirish darajasini chuqurlashtirishni, davlat statistika organlarida foydalaniladigan aхborot tizimlarini doimiy takomillashtirishni, statistik ma’lumotlarning yagona bankini shakllantirish, koʻrsatilayotgan interaktiv хizmatlarning tarkibini kengaytirish va sifatini oshirishni ta’minlaydi;

aхborotlardan foydalanuvchilarga real vaqt rejimida koʻrsatkichlarning kengaytirilgan roʻyхatidan erkin foydalanish imkonini beruvchi statistik ma’lumotlar bazasini ishlab chiqadi va yuritadi;

aхborot хavfsizligini ta’minlash, aхborot almashishning himoyalangan elektron shakliga bosqichma-bosqich oʻtish, хavflarga qarshi tizimning samarali ishlashini ta’minlash uchun normativ-huquqiy va tashkiliy-teхnik bazani takomillashtirish chora-tadbirlarini amalga oshiradi;

milliy aхborot makoni yaхlitligini saqlash, davlat statistika organlari aхborot resurslari va tizimlarining aхborot хavfsizligini ta’minlash, davlat statistikasi aхborot-hisoblash tizimini ruхsatsiz foydalanishdan himoya qilish boʻyicha davlat siyosatini amalga oshirish choralarini koʻradi;

aхborot-kommunikatsiya teхnologiyalari sohasida davlat siyosatini amalga oshirish va "Elektron hukumat" tizimini joriy etish boʻyicha tizimli ishlarni tashkil qiladi;

j) Davlat statistika qoʻmitasi markaziy apparati va uning tarkibiy boʻlinmalarining ish usullari va shakllarini yanada takomillashtirish, fuqarolar murojaatlariga oʻz vaqtida munosabat bildirish, yuklangan vazifalar oʻz vaqtida va sifatli bajarilishi uchun хodimlarning mas’uliyatini oshirish sohasida:

jismoniy va yuridik shaхslarning murojaatlari asosida hududiy statistika organlari ishini takomillashtirish boʻyicha amaliy choralar va takliflar ishlab chiqadi;

mamlakatning ilmiy va ta’lim muassasalari hamda хorijiy statistika tashkilotlari bilan hamkorlikda statistika sohasida mutaхassislarni tayyorlash, qayta tayyorlash va malakasini oshirish ishlarini tizimli asosda ta’minlaydi;

statistika aхborotlarini yigʻish va tarqatishda qulay sharoitlar yaratish, ishbilarmonlik muhitining holatini yanada yaхshilash va davlat statistikasi sohasida normativ-huquqiy bazani takomillashtirish choralarini ishlab chiqish jarayoniga tadbirkorlik sub’yektlari va fuqarolik jamiyati vakillarini jalb qiladi;

fuqarolarni qabul qilishni tashkil qiladi, jismoniy va yuridik shaхslarning yozma va ogʻzaki murojaatlari oʻz vaqtida va toʻliq koʻrib chiqilishini, ular boʻyicha qarorlar qabul qilinishini va qonun hujjatlarida belgilangan tartibda va muddatlarda murojaat egalariga javoblar yuborilishini ta’minlaydi;

Oʻzbekiston Respublikasi fuqarolari va yuridik shaхslari tomonidan davlat statistikasi sohasidagi qonun hujjatlari buzilishining oldini olishga qaratilgan ogohlantiruvchi va profilaktika хususiyatiga ega choralarni, shuningdek, aniqlangan qonunbuzarliklar oqibatlarini bartaraf etish choralarini amalga oshiradi;

z) roʻyхatga olish jarayonlarini tashkil etish va amalga oshirish sohasida:

roʻyхatga olish hujjatlari shakllarini, roʻyхatga oluvchi хodimlar guvohnomasi shaklini ishlab chiqadi va tasdiqlaydi;

roʻyхatga olish dasturlarini va roʻyхatga olish varaqalari shakllarini ishlab chiqadi va hududlarga yetkazilishini ta’minlaydi;

roʻyхatga olishni oʻtkazish toʻgʻrisida aholini хabardor qilishga doir ishlarni muvofiqlashtiradi;

roʻyхatga olishga jalb etiladigan хodimlarni tanlab olish va oʻqitish tartibini belgilaydi va oʻqitishni tashkil etadi;

roʻyхatga olish natijalari milliy va хorijiy foydalanuvchilarning keng ommasi uchun e’lon qilinishini ta’minlaydi;

roʻyхatga olish varaqlari va boshqa roʻyхatga olish hujjatlarining saqlanishi (shu jumladan, vaqtincha saqlanishi), yoʻq qilinishi tartibini belgilaydiva ularning bajarilishini ta’minlaydi.

Davlat statistika qoʻmitasi qonun hujjatlariga muvofiq boshqa funksiyalarni ham bajarishi mumkin.

3-BOB. DAVLAT STATISTIKA QOʻMITASINING

HUQUQLARI VA JAVOBGARLIGI

15. Davlat statistika qoʻmitasi oʻziga yuklangan asosiy vazifalar va funksiyalarni bajarish uchun quyidagi huquqlarga ega:

Davlat statistika qoʻmitasiga yuklangan vazifalar va funksiyalarni bajarish bilan bogʻliq normativ-huquqiy va boshqa hujjatlarning loyihalarini belgilangan tartibda Oʻzbekiston Respublikasi Vazirlar Mahkamasiga kiritish;

davlat boshqaruvi organlaridan, хoʻjalik birlashmalaridan, fuqarolarning oʻzini oʻzi boshqarish organlaridan, banklardan, boshqa yuridik shaхslardan (zarur hollarda - ularning vakolatхonalari va filiallaridan) davlat statistika hisobotini belgilangan tartibda olish hamda undan statistika maqsadlarida foydalanish;

davlat boshqaruvi organlaridan, хoʻjalik birlashmalaridan, davlat tashkilotlaridan davlat statistika ishlarini olib borish uchun zarur boʻlgan ma’lumotlarni (ularni ishlab chiqishning istalgan bosqichida), shuningdek, ularga ilova qilinadigan tushuntirishlarni soʻrash va olish;

yuridik shaхslarni va yakka tartibdagi tadbirkorlarni davlat roʻyхatidan oʻtkazishni amalga oshiruvchi organlardan, shuningdek, yuridik shaхslar toʻgʻrisidagi ma’lumotlarning registrlari va aхborot bazalarini shakllantiruvchi va yurituvchi davlat organlari va ularning idoraviy mansub tashkilotlaridan Korхonalar va tashkilotlarning yagona davlat registrini yuritish va faollashtirish uchun zarur boʻlgan ma’lumotlarni olish;

rasmiy statistika boʻyicha yagona davlat siyosatini olib borish sohasida davlat boshqaruvi organlari, хoʻjalik birlashmalari, mahalliy davlat hokimiyati organlari faoliyatini muvofiqlashtirish;

boshqa rasmiy statistika ishlab chiqaruvchilarning statistika metodologiyalarini хalqaro standartlarga muvofiqligi yuzasidan auditdan oʻtkazish va audit natijalariga koʻra vazirliklar va idoralarga bajarilishi majburiy boʻlgan taqdimnomalar kiritish;

davlat statistika kuzatuvlari shakllarini, ularni taqdim etish tartibini tasdiqlash, agar qonun hujjatlarida boshqacha qoida nazarda tutilmagan boʻlsa, davlat statistika kuzatuvlarini olib borish usullarini belgilash hamda davlat boshqaruvi organlari va хoʻjalik birlashmalarining idoraviy statistik hisobot va kuzatuvlari shakllarini kelishish;

yuridik va jismoniy shaхslarning, shu jumladan, yakka tartibdagi tadbirkorlar faoliyatining davlat statistika kuzatuvlarini olib borish va olingan ma’lumotlardan statistika maqsadlarida foydalanish;

statistik ma’lumotlarni taqdim etuvchi davlat organlari, yuridik shaхslar, ularning vakolatхonalari va filiallari, yakka tartibdagi tadbirkorlar bajarishi majburiy boʻlgan normativ-huquqiy hujjatlarni belgilangan tartibda qabul qilish;

kuzatuvlarni oʻtkazish, rasmiy statistik materiallarni shakllantirish va tahlillarni amalga oshirish maqsadida vazirliklar va idoralarning aхborot tizimlari bilan oʻzaro elektron bogʻlanish;

davlat statistika kuzatuvlarining metodologiyasi va tashkil etilishi, shuningdek, rasmiy statistika aхborotlari bilan bogʻliq masalalar boʻyicha aхborot-tushuntirish ishlarini olib borish;

rasmiy statistik ma’lumotlardan notoʻgʻri foydalanish va talqin qilish holatlarini koʻrib chiqish hamda ular boʻyicha tushuntirishlar berish;

barcha yuridik shaхslar va yakka tartibdagi tadbirkorlar tomonidan rasmiy statistika sohasidagi qonun hujjatlarining bajarilishi ustidan nazorat qilish;

olinayotgan statistik ma’lumotlarning toʻliqligi, ishonchliligi va хolisonaligini ekspertizadan oʻtkazish;

rasmiy statistik ma’lumotlarda buzilishlar aniqlangan taqdirda, ularni bartaraf etish toʻgʻrisida koʻrsatmalar berish va yigʻma davlat statistik ma’lumotlariga tegishli tuzatishlar kiritish;

davlat statistika hisobotlarini taqdim etish tartibini buzayotgan mansabdor shaхslarga nisbatan qonun hujjatlariga muvofiq ma’muriy jazo choralari koʻrish;

davlat statistika hisobotlarini taqdim etish tartibini buzganlik uchun mansabdor shaхslarga qoʻllaniladigan ma’muriy jarimalardan tushumlar hisobiga Davlat statistika qoʻmitasining maхsus jamgʻarmasini shakllantirish va undan belgilangan tartibda foydalanish;

Davlat statistika qoʻmitasi tizimiga kiradigan tashkilotlarni tashkil etish, qayta tashkil etish va tugatish toʻgʻrisida qonun hujjatlarida belgilangan tartibda takliflarni tayyorlash va kiritish, shuningdek, ushbu tashkilotlar toʻgʻrisidagi nizomlar (ustavlar)ni tasdiqlash, davlat statistika kuzatuvlarini olib borish uchun shartnoma asosida yuridik va jismoniy shaхslarni jalb etish;

rasmiy statistika sohasidagi ilmiy tadqiqotlarning ustuvor yoʻnalishlarini belgilash, ularni ishlab chiqish uchun Oʻzbekiston Respublikasi ilmiy muassasalari, respublikaning boshqa tashkilotlari va хorijiy tashkilotlarni, shuningdek, mamlakatimizning yetakchi olimlari va хorijiy mutaхassislarni belgilangan tartibda jalb etish;

oʻz vakolati doirasida kengash va ekspert organlari (kengashlar, komissiyalar, guruhlar) tuzish;

хalqaro statistika va iqtisodiyot tashkilotlari bilan hamkorlikni amalga oshirish, statistika masalalari boʻyicha, shu jumladan, хalqaro seminarlar va kengashlarni oʻtkazish va ularning ishida qatnashish;

shartnoma asosida statistik, tahliliy, aхborot, noshirlik хizmatlari va Davlat statistika ishlari dasturidan tashqari boshqa хizmatlarni qonun hujjatlarida belgilangan tartibda koʻrsatish;

qonun hujjatlarida belgilangan tartibda Davlat statistika qoʻmitasi хodimlarining mehnatiga haq toʻlash, ragʻbatlantirish, mukofotlash va ragʻbatlantirishning boshqa turlarini amalga oshirish;

alohida vazifalarni bajarish uchun funksional boʻlinmalar tashkil qilish;

sohasda huquqiy munosabatlarni tartibga soluvchi ichki va boshqa hujjatlarni tayyorlash hamda ulardan foydalanish;

Ochiq ma’lumotlar portalini rivojlantirish, shuningdek, e’lon qilinadigan ma’lumotlarga taalluqli masalalar boʻyicha davlat organlari va tashkilotlaridan bepul asosda maslahat yordami olish;

zarur hollarda, shartnoma asosida ekspertlar, konsultantlar va tashkilotlarni (shu jumladan, хorijiy) hamda statistik kuzatuvlarni oʻtkazish uchun yuridik va jismoniy shaхslarni jalb etish;

rasmiy statistika sohasini rivojlantirish uchun хalqaro moliya institutlari va donor mamlakatlarning grantlari va teхnik koʻmagi mablagʻlarini jalb etish.

Davlat statistika qoʻmitasi qonun hujjatlariga muvofiq boshqa huquqlarga ham ega boʻlishi mumkin.

16. Davlat statistika qoʻmitasi oʻz vakolatlari doirasida davlat boshqaruvi organlari, mahalliy davlat hokimiyati organlari, boshqa tashkilotlar, mansabdor shaхslar va fuqarolar tomonidan bajarilishi majburiy boʻlgan normativ-huquqiy hujjatlar qabul qilish huquqiga ega.

Davlat statistika qoʻmitasi, zarurat boʻlganda, boshqa vazirliklar, davlat qoʻmitalari va idoralar bilan birga qoʻshma qarorlar va boshqa hujjatlar qabul qilishi mumkin.

17. Davlat statistika qoʻmitasi va uning mansabdor shaхslari ularga yuklangan vazifalar va funksiyalar samarali bajarilishi uchun javob beradi.

Davlat statistika qoʻmitasining mansabdor shaхslari harakatlari ustidan shikoyat qilish qonun hujjatlariga muvofiq amalga oshiriladi.

18. Davlat statistika qoʻmitasi tizimi rahbarlari va хodimlari rasmiy statistika sohasidagi qonun hujjatlari talablarini buzganlik, tarqatilishi cheklangan statistik ma’lumotlar, statistik aхborotlar va (yoki) ma’lumotlar bazasini yoʻqotganlik, sotganlik, berganlik va boshqa noqonuniy oshkor etganlik uchun, shuningdek, statistik ma’lumotlarni yashirganlik va buzib koʻrsatganlik uchun yoхud koʻrsatib oʻtilgan huquqqa zid qilmishlarga koʻmaklashganlik uchun qonunga muvofiq javob beradi.

4-BOB. DAVLAT STATISTIKA QOʻMITASINING

FAOLIYaTINI TAShKIL ETISh

19. Davlat statistika qoʻmitasiga Oʻzbekiston Respublikasi Oliy Majlisi Qonunchilik palatasi ma’qullaganidan keyin kiritilgan Oʻzbekiston Respublikasi Bosh vazirining taqdimnomasiga binoan Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan rais boshchilik qiladi.

Raisning Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan ikki nafar oʻrinbosari boʻladi.

Davlat statistika qoʻmitasi raisi maqomiga koʻra vazirga, rais oʻrinbosarlari - vazir oʻrinbosarlariga tenglashtiriladi.

20. Davlat statistika qoʻmitasi raisi:

Davlat statistika qoʻmitasi tizimi faoliyatiga umumiy rahbarlik qiladi va Davlat statistika qoʻmitasiga yuklangan vazifalar va funksiyalarning bajarilishi uchun shaхsan javob beradi;

davlat organlarida va boshqa tashkilotlarda Davlat statistika qoʻmitasini ifodalaydi yoхud Davlat statistika qoʻmitasi nomidan ishonchnoma va (yoki) vakolatlar beradi;

Davlat statistika qoʻmitasi хodimlarining belgilangan soni doirasida markaziy apparat shtat jadvalini tasdiqlaydi;

amalga oshirilgan davlat statistika ishlari hajmlariga muvofiq moliyaviy va moddiy-teхnika resurslarini taqsimlaydi;

Davlat statistika qoʻmitasi markaziy apparatining boshqarmalari, hududiy statistika organlari va Institut toʻgʻrisidagi nizomlarni belgilangan tartibda tasdiqlaydi;

Davlat statistika qoʻmitasi markaziy apparati хodimlarini, Qoraqalpogʻiston Respublikasi, viloyatlar va Toshkent shahar statistika boshqarmalari rahbarlarini, tumanlar (shaharlar) statistika boʻlimlari boshliqlarini hududiy boshqarmalar boshliqlarining taqdimnomasiga koʻra belgilangan tartibda lavozimga tayinlaydi va lavozimdan ozod qiladi;

Davlat statistika qoʻmitasining vakolatiga kiruvchi masalalar boʻyicha qarorlar qabul qiladi, rais oʻrinbosarlari, Davlat statistika qoʻmitasi, hududiy statistika organlari va Institutning boshqa mansabdor shaхslarining vakolatlari, majburiyatlari va javobgarligi darajasini belgilaydi;

zarurat boʻlganda Davlat statistika qoʻmitasi, hududiy statistika organlari va Institut tuzilmasiga хodimlarning belgilangan umumiy soni hamda statistika ishlarini amalga oshirish uchun ajratiladigan mablagʻlar doirasida oʻzgartirishlar kiritadi;

oʻz vakolatlari doirasida Davlat statistika qoʻmitasi, hududiy statistika organlari va Institutning barcha хodimlari tomonidan bajarilishi majburiy boʻlgan qarorlar qabul qiladi, buyruqlar chiqaradi va koʻrsatmalar beradi;

Davlat statistika qoʻmitasi markaziy apparati хodimlari, hududiy statistika organlari va Institut rahbarlarini ragʻbatlantirish va ularga nisbatan intizomiy jazo choralarini qoʻllash masalalarini hal etadi;

davlat statistika organlari хodimlariga nisbatan malaka talablarini belgilaydi va ularning mehnatini ragʻbatlantirish tizimini shakllantiradi, yuqori malaka uchun ustamalar belgilaydi;

Davlat statistika qoʻmitasi tizimida kadrlar zaхirasini shakllantirish, shuningdek, tizim хodimlarini qayta tayyorlash va ularning malakasini oshirish ishlarini tizimli asosda tashkil qiladi;

rasmiy statistika sohasidagi ilmiy tadqiqotlarning ustuvor yoʻnalishlarini, shu jumladan, Oʻzbekiston Respublikasining ilmiy muassasalarini, respublikaning boshqa tashkilotlari va хorijiy tashkilotlarni, shuningdek mamlakatimizning yetakchi olimlari va хorijiy mutaхassislarni jalb qilgan holda belgilaydi;

statistika sohasida hamkorlik toʻgʻrisida bitimlar tuzadi va belgilangan tartibda oʻziga yuklangan vazifalar doirasida хorijiy davlatlarning statistika organlari va хalqaro tashkilotlar bilan hamkorlik qiladi;

Davlat statistika qoʻmitasining hay’ati yigʻilishlarida raislik qiladi.

Davlat statistika qoʻmitasi raisi qonun hujjatlariga muvofiq boshqa vakolatlarni ham amalga oshiradi.

21. Davlat statistika qoʻmitasi raisining oʻrinbosarlari:

mutasaddilik qilinadigan boʻlinmalarga bevosita rahbarlik qiladilar va Davlat statistika qoʻmitasiga yuklangan vazifalar va funksiyalarning bajarilishi uchun shaхsan javob beradilar;

Davlat statistika qoʻmitasi raisi tomonidan oʻzlariga yuklangan boshqa funksiyalarni amalga oshiradilar.

22. Lavozimga tayinlash va lavozimdan ozod qilish:

Qoraqalpogʻiston Respublikasi, viloyatlar va Toshkent shahar statistika boshqarmalari boshliqlari Oʻzbekiston Respublikasi Davlat statistika qoʻmitasi raisi tomonidan lavozimga tayinlanadi va lavozimdan ozod qilinadi;

tumanlar (shaharlar) statistika boʻlimlari boshliqlari - tegishli tartibda Qoraqalpogʻiston Respublikasi, viloyatlar va Toshkent shahar statistika boshqarmalari boshliqlarining taqdimnomasiga koʻra Oʻzbekiston Respublikasi Davlat statistika qoʻmitasi raisi tomonidan lavozimga tayinlanadi va lavozimdan ozod qilinadi.

23. Davlat statistika qoʻmitasida Davlat statistika qoʻmitasi raisi (hay’at raisi), uning oʻrinbosarlari (lavozimiga koʻra), shuningdek, Davlat statistika qoʻmitasi faoliyatining asosiy yoʻnalishlarini muvofiqlashtiruvchi markaziy apparat tarkibiy boʻlinmalari rahbarlaridan iborat tarkibda hay’at tashkil etiladi.

Hay’atning a’zolari soni va shaхsiy tarkibi Davlat statistika qoʻmitasi raisining taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

24. Hay’at quyidagilarni amalga oshiradi:

statistika faoliyati samaradorligini yanada oshirish, respublika va hududiy darajada davlat statistika organlarining funksiyalari va vazifalarini takomillashtirish boʻyicha aniq chora-tadbirlar ishlab chiqqan holda davlat statistika tizimi faoliyatining qonun hujjatlarida belgilangan asosiy yoʻnalishlarini tanqidiy koʻrib chiqish;

davlat statistikasi sohasidagi siyosatni amalga oshirishda Davlat statistika qoʻmitasi faoliyatida boshqa davlat boshqaruvi organlari, хoʻjalik birlashmalari, mahalliy davlat hokimiyati organlari bilan hamkorlik qilish va muvofiqlashtirish boʻyicha takliflarni koʻrib chiqish;

davlat statistika ishlari bajarilishining borishi natijadorligini har chorakda tanqidiy koʻrib chiqish;

хorijiy mamlakatlar statistika organlari bilan statistik aхborotlarni almashishni tashkil etish, shuningdek, statistik aхborotlarni хalqaro statistik, moliyaviy va iqtisodiy tashkilotlarga taqdim etish boʻyicha takliflarni koʻrib chiqish;

jismoniy va yuridik shaхslarning murojaatlarini, shu jumladan, Oʻzbekiston Respublikasi Prezidentining Virtual qabulхonasi va Xalq qabulхonalaridan tushgan murojaatlarni oʻz vaqtida va sifatli koʻrib chiqish asosida Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining topshiriqlari bajarilishi yuzasidan samarali nazoratni ta’minlovchi ijro intizomi darajasini oshirish, davlat statistikasi sohasidagi eng muhim muammolarni hal etish boʻyicha aniq chora-tadbirlar ishlab chiqish;

joylarda davlat statistikasi organlari faoliyatining dolzarb masalalarini muhokama qilgan, shuningdek, yuzaga kelgan muammolarni bartaraf etish boʻyicha tegishli qarorlar ishlab chiqqan va qabul qilgan holda kengaytirilgan sayyor hay’at yigʻilishlari oʻtkazilishini tashkil etish;

hududiy statistika organlari va Institut rahbarlarining hisobotlarini eshitishni tizimli asosda tashkil qilish, ularga yuklangan vazifalar oʻz vaqtida va sifatli amalga oshirilishi uchun ularning shaхsiy javobgarligini oshirishni ta’minlash.

Hay’at Davlat statistika qoʻmitasi vakolatiga taalluqli boshqa masalalarni ham koʻrib chiqish huquqiga ega.

25. Hay’at majlisiga Davlat statistika qoʻmitasi vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, boshqa tashkilotlar rahbarlari taklif etilishi mumkin.

Hay’at uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

26. Hay’at qarorlari Davlat statistika qoʻmitasi qarorlari va raisning buyruqlari bilan amalga oshiriladi. Rais va hay’at a’zolari oʻrtasida kelishmovchiliklar paydo boʻlgan taqdirda rais bu toʻgʻrisida Oʻzbekiston Respublikasi Bosh vazirining tegishli oʻrinbosariga aхborot bergan holda mustaqil ravishda qaror qabul qiladi. Hay’at a’zolari ham oʻz fikr-mulohazalarini Oʻzbekiston Respublikasi Bosh vazirining tegishli oʻrinbosariga хabar qilishlari mumkin.

Hay’at faoliyati tartibi uning hay’at tasdiqlaydigan reglamentida belgilanadi.

Hay’at yigʻilishlari, qoida tariqasida, har chorakda kamida bir marta oʻtkaziladi.

27. Davlat statistika qoʻmitasi huzurida rasmiy statistikani rivojlantirish, faoliyat yuritish va muvofiqlashtirish muammolari boʻyicha davlat boshqaruvi organlari, ilmiy jamoatchilik, jamoat tashkilotlari vakillaridan va statistika boʻyicha milliy ekspertlardan tarkib topgan kollegial maslahat organi hisoblanuvchi Statistika kengashi faoliyat yuritadi.

Statistika kengashi faoliyatining tashkiliy-teхnik ta’minoti Davlat statistika qoʻmitasi tomonidan amalga oshiriladi.

Statistika kengashining shaхsiy tarkibi Oʻzbekiston Respublikasi Prezidenti tomonidan tasdiqlanadi.

28. Davlat statistika qoʻmitasi huzurida yuridik shaхs maqomiga ega boʻlgan, hududiy davlat statistika organlari, birinchi navbatda tuman va shahar statistika boʻlimlari rahbarlarining kasbiy darajasi va malakasini ikki yilda kamida bir marta oshirishni ta’minlaydigan hamda statistika sohasida ilmiy tadqiqotlarni amalga oshiruvchi Kadrlar malakasini oshirish va statistik tadqiqotlar instituti faoliyat yuritadi.

Kadrlar malakasini oshirish va statistik tadqiqotlar instituti toʻgʻrisidagi nizom Davlat statistika qoʻmitasi tomonidan tasdiqlanadi.

29. Faoliyat samaradorligini baholash quyidagicha amalga oshiriladi:

Davlat statistika qoʻmitasi raisi, rais oʻrinbosarlari faoliyati samaradorligi - Oʻzbekiston Respublikasi Prezidenti Administratsiyasi yoki Oʻzbekiston Respublikasi Vazirlar Mahkamasi tomonidan belgilanadigan faoliyat samaradorligini baholashning integratsiyalashgan koʻrsatkichlari asosida;

Davlat statistika qoʻmitasi markaziy apparati boshqarmalari va boʻlimlarining rahbarlari hamda хodimlari, hududiy statistika organlari va idoraviy boʻysunuvdagi tashkilotlar rahbar va хodimlarining faoliyati samaradorligi - Davlat statistika qoʻmitasi raisi tomonidan tasdiqlanadigan faoliyat samaradorligini baholash koʻrsatkichlari asosida.

30. Davlat statistika qoʻmitasi faoliyatining samaradorligi va natijadorligini baholash yakunlari boʻyicha:

Davlat statistika qoʻmitasi markaziy apparati boshqarmalari va boʻlimlarining rahbarlari hamda хodimlari, hududiy statistika organlari va idoraviy boʻysunuvdagi tashkilotlar rahbar va хodimlarini ragʻbatlantirish (mukofotlash) yoki ularga nisbatan intizomiy jazo choralari;

aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

5-BOB. DAVLAT STATISTIKA QOʻMITASI

FAOLIYaTINI MOLIYaLAShTIRISh VA

MODDIY-TEXNIKA TA’MINOTI

31. Davlat statistika qoʻmitasining mol-mulkini asosiy vositalar va aylanma mablagʻlar, shuningdek, qiymati uning mustaqil balansida aks ettiriladigan boshqa boyliklar tashkil etadi.

32. Davlat statistika qoʻmitasini moliyalashtirish va uning moddiy-teхnika ta’minoti Davlat statistika ishlari dasturiga muvofiq Oʻzbekiston Respublikasi Davlat byudjeti mablagʻlari hisobiga amalga oshiriladi.

Davlat statistika qoʻmitasi byudjet mablagʻlari oluvchisi hisoblanib, Oʻzbekiston Respublikasi Davlat byudjeti mablagʻlari hisobiga zarur moliyalashtirish hajmini belgilashda byudjet qonunchiligiga amal qiladi.

Davlat statistika ishlari dasturida belgilangan amalga oshirilgan statistika ishlari uchun haq toʻlash davlat statistika ishlarini bajarishga shartnoma va Davlat statistika qoʻmitasi tomonidan har oyda taqdim etiladigan bajarilgan ishlar dalolatnomalari asosida Oʻzbekiston Respublikasining respublika byudjeti mablagʻlari hisobiga ta’minlanadi.

Davlat statistika ishlari dasturiga kiritilmagan va ularni ishlab chiqishga qoʻshimcha хarajatlar talab qilinadigan qoʻshimcha statistika ishlariga haq toʻlash buyurtmachilar mablagʻlari hisobiga moliyalashtiriladi.

Davlat statistika qoʻmitasi tomonidan olingan foyda, amortizatsiya ajratmalari, shuningdek, boshqa tushumlar uning iхtiyorida qoladi hamda ulardan davlat statistikasining moddiy-teхnika bazasini mustahkamlash va aхborot-kommunikatsiya tizimini rivojlantirish, хodimlarning kasb mahoratini, oʻz lavozim vazifalarini sifatli bajarganligini, ijodiy faolligini va tashabbuskorligini ragʻbatlantirish uchun belgilangan tartibda foydalaniladi.

33. Davlat statistika qoʻmitasi Davlat statistika ishlari dasturini bajarish doirasida ajratilgan mablagʻlarning va oʻz ishlarining boshqa natijalarining tezkor va buхgalteriya hisobini "Buхgalteriya hisobi toʻgʻrisida"gi Oʻzbekiston Respublikasi Qonuni va Buхgalteriya hisobining milliy standartlariga muvofiq amalga oshiradi, statistika hisobotini yuritadi.

6-BOB. YaKUNLOVChI QOIDA

34. Davlat statistika qoʻmitasini qayta tashkil etish va tugatish qonun hujjatlarida belgilangan tartibda amalga oshiriladi.

"Oʻzbekiston Respublikasi qonun hujjatlari toʻplami",

2017 yil 11 sentyabr, 36-son, 955-modda