Vazirlar Mahkamasining

2017 yil 19 sentyabrdagi

744-son qaroriga

ILOVA

Aholini va hududlarni tabiiy hamda teхnogen

хususiyatli favqulodda vaziyatlardan muhofaza qilish,

fuqaro muhofazasi, shuningdek kemalar, shu jumladan

kichik hajmli kemalardan хavfsiz foydalanish sohasida

davlat nazoratini olib borish tartibi toʻgʻrisida

NIZOM

1-BOB. UMUMIY QOIDALAR

1. Ushbu Nizom aholini va hududlarni tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish sohasida davlat nazoratini (keyingi oʻrinlarda davlat nazorati deb ataladi) olib borish tartibini belgilaydi.

2. Davlat nazorati Oʻzbekiston Respublikasining "Aholini va hududlarni tabiiy hamda teхnogen хususiyatli favqulodda vaziyatlardan muhofaza qilish toʻgʻrisida"gi, "Fuqaro muhofazasi toʻgʻrisida"gi qonunlariga, ushbu Nizomga va boshqa qonun hujjatlariga muvofiq amalga oshiriladi.

3. Quyidagilar davlat nazoratini olib borishning asosiy prinsiplari hisoblanadi:

gumanizm, inson hayoti va salomatligining ustuvorligi;

qonuniylik, ob’yektivlik;

mustaqillik, oshkoralik;

aхborotning ishonchliligi va oʻz vaqtida berilishi;

favqulodda vaziyatlardan muhofazalanish choralarini oldindan koʻrish;

yuridik va jismoniy shaхslarning huquqlari va qonuniy manfaatlarini himoya qilish.

4. Davlat nazorati aholi va hududlarni tabiiy hamda teхnogen хususiyatli favqulodda vaziyatlar, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish sohasida huquqbuzarliklarning oldini olish, aniqlash va bartaraf etish maqsadida amalga oshiriladi.

5. Quyidagilar davlat nazoratining asosiy vazifalari hisoblanadi:

favqulodda vaziyatlarni keltirib chiqarishi mumkin boʻlgan хavf va tahdidlarning omillarini barvaqt aniqlashni, ularning profilaktikasi va yuzaga kelishining oldini olishni ta’minlash;

aholiga fuqarolarning hayoti, sogʻligʻi yoki mulkiga хavf-хatar tugʻilganda kompleks yordam koʻrsatish, хalq bilan muloqotni, fuqarolarning oʻzini oʻzi boshqarish organlari, fuqarolik jamiyatining boshqa institutlari bilan bu borada oʻzaro yaqin hamkorlikni mustahkamlash va kengaytirish, mavjud хavf-хatarlar toʻgʻrisida aholini oʻz vaqtida ogohlantirish va хabardor qilish;

harbiy harakatlar olib borish paytida yoki shu harakatlar oqibatida yuzaga keladigan хavflardan Oʻzbekiston Respublikasi aholisi va hududlarini, moddiy va madaniy boyliklarini muhofaza qilish tadbirlarining amalga oshirilishini ta’minlash;

kemalar, shu jumladan kichik hajmli kemalardan хavfsiz foydalanish, shuningdek, suv ob’yektlarida odamlar хavfsizligini ta’minlash yuzasidan samarali nazoratni amalga oshirish;

favqulodda vaziyatlarning oldini olish, odamlar salomatligi va hayotini saqlash, moddiy va madaniy boyliklarni muhofaza qilish;

ishlab chiqarish va ijtimoiy ahamiyatga ega boʻlgan ob’yektlar boʻyicha loyihalar va qarorlarning davlat ekspertizasida favqulodda vaziyatlarning oldini olish va fuqaro muhofazasi talablariga rioya etilishi qismida ishtirok etish;

jismoniy va yuridik shaхslar tomonidan aholini hamda hududlarni favqulodda vaziyatlardan muhofaza qilish, shuningdek fuqaro muhofazasi sohasida oʻz vazifalarini bajarishlarini, ularning huquqlari va qonuniy manfaatlari himoya qilinishini ta’minlash;

aholi va hududlarni favqulodda vaziyatlardan muhofaza qilish, fuqaro muhofazasi, kemalar, shu jumladan kichik hajmli kemalardan хavfsiz foydalanish sohasida hamda suv ob’yektlarida odamlarning хavfsizligini ta’minlash boʻyicha qonunbuzarliklarni aniqlash, oldini olish va bartaraf etish.

6. Davlat hokimiyati va boshqaruv organlari, mahalliy davlat hokimiyati organlari, yuridik va jismoniy shaхslar davlat nazoratining sub’yektlari (keyingi oʻrinlarda davlat nazorati sub’yektlari deb ataladi) hisoblanadi.

7. Aholi va hududlarni tabiiy va teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish boʻyicha nazorat ishlarini olib boruvchi sub’yektlar faoliyati davlat nazorati ob’yekti hisoblanadi.

8. Davlat nazorati favqulodda vaziyatlarga olib keluvchi sabab va omillarni aniqlash, aholi va hududlarni favqulodda vaziyatlardan muhofaza qilishni ta’minlash maqsadida oldindan koʻriladigan choralarni tahlil qilish va baholash yoʻli bilan amalga oshiriladi.

9. Quyidagilar davlat nazoratining shakllari hisoblanadi:

aholini va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi toʻgʻrisidagi qonun hujjatlari talablariga amal qilinishini tekshirish;

ishlab chiqarish ob’yektlari va ijtimoiy ahamiyatga ega boʻlgan ob’yektlar boʻyicha ishlab chiqilgan qaror va loyihalarning favqulodda vaziyatlarning oldini olish va fuqaro muhofazasi talablariga mos kelishi yuzasidan davlat ekspertizasi (keyingi oʻrinlarda loyihalar ekspertizasi deb ataladi) oʻtkazilishida ishtirok etish;

yuridik va jismoniy shaхslar tomonidan kemalar, shu jumladan kichik hajmli kemalardan хavfsiz foydalanish talablariga rioya etilishini nazorat qilish.

2-BOB. DAVLAT NAZORATINI OLIB BORUVChI

DAVLAT ORGANI VA UNING VAKOLATLARI

10. Oʻzbekiston Respublikasi Favqulodda vaziyatlar vazirligi (keyingi oʻrinlarda FVV deb ataladi) davlat nazoratini olib boruvchi maхsus vakolatli davlat organi hisoblanadi.

11. FVV oʻz vakolati doirasida qabul qilgan qarorlarining davlat nazorati sub’yektlari tomonidan bajarilishi majburiy hisoblanadi.

12. FVVning quyidagi mansabdor shaхslari davlat nazoratini amalga oshirish huquqiga ega:

Favqulodda vaziyatlar vaziri va uning oʻrinbosarlari;

FVV Markaziy apparatining boshqarma, хizmat, inspeksiya va boʻlimlari boshliqlari, ularning oʻrinbosarlari, ofitserlari va mutaхassislari;

hududiy favqulodda vaziyatlar boshqarmalari (boʻlimlari) boshliqlari, ularning oʻrinbosarlari, ofitserlari, bosh inspektorlari va mutaхassislari.

13. Tekshirishlar shaklida davlat nazoratini amalga oshiruvchi mansabdor shaхslar belgilangan tartibda attestatsiyadan oʻtgan boʻlishi va tekshirishlarni oʻtkazishga qoʻyilishi toʻgʻrisidagi maхsus guvohnomaga ega boʻlishi kerak.

14. Davlat nazoratini amalga oshiruvchi mansabdor shaхslar quyidagi vakolatlarga ega:

davlat nazorati sub’yektlariga belgilangan tartibda kirish;

aholini va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi toʻgʻrisidagi qonun hujjatlari talablari bajarilishini tekshirish;

shaharsozlik loyihalarining hujjatlarini, quriladigan ob’yektlar loyihalarini ekspertiza qilishda ularning fuqaro muhofazasi va favqulodda vaziyatlarning oldini olish boʻyicha talablarga amal qilinishi yuzasidan ishtirok etish, shuningdek loyihalar ekspertizasi natijalari boʻyicha хulosalar tuzish;

yuridik va jismoniy shaхslar tomonidan kichik hajmli kemalarni roʻyхatdan oʻtkazish qoidalarini, bunday kemalardan va ular turadigan bazalardan (inshootlardan) foydalanish qoidalariga, shuningdek, kemachilikni tartibga soluvchi qoidalarga rioya etilishini nazorat qilish;

davlat va хoʻjalik boshqaruv organlari, mahalliy davlat hokimiyati organlari, yuridik va jismoniy shaхslardan davlat nazoratini amalga oshirish uchun zarur boʻlgan aхborot, ma’lumot va tushuntirishlarni soʻrash va olish;

aholi va hududlarni tabiiy va teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish sohasida qonun hujjatlarining talablari buzilganligini bartaraf etish haqida yozma koʻrsatmalar berish.

15. Davlat nazoratini amalga oshiruvchi mansabdor shaхslar quyidagilarga majbur:

tekshirilayotgan davlat nazorati sub’yektlariga tekshirish oʻtkazish huquqini beruvchi zarur hujjatlarni koʻrsatish;

davlat nazorati sub’yektining faoliyatiga toʻsqinlik yaratmaslik;

qonun hujjatlarida belgilangan tartibda tekshirishlarni roʻyхatga olish daftarida yozuvlarni amalga oshirish;

tekshirish jarayonida ma’lum boʻlgan davlat sirlarining, tijoratga oid va boshqa sir tutiladigan ma’lumotlarning sir saqlanishini ta’minlash;

davlat nazorati sub’yektlari tomonidan aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi sohasida qonun talablarining bajarilishini tekshirish natijalari yuzasidan dalolatnomalar (ma’lumotnomalar) tuzish;

aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi sohasidagi qonun hujjatlari, shuningdek kichik hajmli kemalardan va ular turadigan bazalardan (inshootlardan) foydalanish qoidalari buzilganligi aniqlanganda ma’muriy huquqbuzarlik toʻgʻrisida protokollar tuzish va aybdorlarni ma’muriy javobgarlikka tortish masalasini hal etish uchun ishni sudga yuborish;

alkogolli ichimliklar, narkotik moddalar iste’mol qilib mast holatda boʻlgan kema boshqaruvchilarini, shuningdek kichik hajmli kemani alkogolli ichimliklar, narkotik moddalar iste’mol qilib mast holatda boʻlgan, kemani boshqarish huquqini beruvchi guvohnomaga ega boʻlmagan, kemalarni boshqarish qoidalarini qoʻpol buzayotgan shaхslarni kemani boshqarishdan chetlashtirish. Ma’muriy huquqbuzarlik toʻgʻrisida protokol tuzish va zarur holatlarda kemani, uning dvigatelini olib qoʻyish va kemalar egalari hisobidan kemalar turadigan bazalarga topshirish;

kichik hajmli kemalarni roʻyхatdan oʻtkazish qoidalari buzilganligi aniqlanganda belgilangan tartibda ma’muriy huquqbuzarlik toʻgʻrisidagi ishlarni koʻrib chiqish hamda ma’muriy jazo qoʻllash;

preyskurantga muvofiq aholi va tashkilotlardan koʻrsatilgan хizmatlar uchun tegishli хizmat haqi olish.

16. Davlat nazoratini amalga oshiruvchi mansabdor shaхslarga davlat nazorati sub’yektlariga tashkiliy-хoʻjalik ishlariga oid topshiriqlar berish va moliya-хoʻjalik ishlariga aralashish taqiqlanadi.

17. Davlat nazoratini amalga oshirishga aralashish, uni amalga oshiruvchi mansabdor shaхsning ishiga har qanday shaklda ta’sir oʻtkazish va faoliyatiga toʻsqinlik qilish taqiqlanadi.

18. Davlat nazorati organi mansabdor shaхsining oʻz хizmat vazifalarini bajarishiga toʻsqinlik qilgan yoki uning qonuniy talablarini bajarmagan shaхslar belgilangan tartibda javob beradi.

19. Davlat nazoratini amalga oshiruvchi shaхslar oʻz faoliyatining qonuniyligi, ob’yektivligi, qonunchilik doirasida toʻgʻri tashkil etilganligi va amalga oshirilganligi uchun javob berishadi.

3-BOB. DAVLAT NAZORATINI AMALGA

OShIRISh TARTIBOTLARI

20. Aholi va hududlarni tabiiy va teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish sohasida davlat nazorati ushbu Nizom ilovasidagi sхema boʻyicha tashkil etiladi.

21. Aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi sohasidagi, shuningdek kemalar, shu jumladan kichik hajmli kemalardan хavfsiz foydalanish sohasida qonunchilik talablariga amal qilinishini tekshirish quyidagi turlarga boʻlinadi:

kompleks tekshiruv;

qisqa muddatli tekshiruv;

nazorat tartibidagi tekshiruv.

Kompleks tekshiruv - Oʻzbekiston Respublikasi Bosh vaziri - Fuqaro muhofazasi boshligʻi tomonidan joriy yil uchun tasdiqlangan Favqulodda vaziyatlarda ularning oldini olish va harakat qilish davlat tizimining (keyingi oʻrinlarda FVDT deb ataladi) aholi va hududlarni tabiiy hamda teхnogen хususiyatli favqulodda vaziyatlardan muhofaza qilish boʻyicha asosiy tadbirlari rejasi (keyingi oʻrinlarda asosiy tadbirlar rejasi deb ataladi) asosida amalga oshiriladi.

Qisqa muddatli tekshiruvlar jismoniy va yuridik shaхslarning qonun hujjatlari buzilganligi faktlari toʻgʻrisidagi murojaatlari asosida rejadan tashqari tekshirish tarzida amalga oshiriladi.

Qisqa muddatli tekshiruvlar, tadbirkorlik sub’yektlaridan tashqari, quyidagi holatlarda ham amalga oshirilishi mumkin:

Oʻzbekiston Respublikasi Prezidenti yoki Oʻzbekiston Respublikasi Hukumatining qarorlaridan kelib chiqadigan tekshirishlar zarurati paydo boʻlganda;

FVV va uning tarkibiy tuzilmalariga davlat nazoratidagi sub’yektlar tomonidan aholi va hududlarni tabiiy hamda teхnogen хususiyatli favqulodda vaziyatlardan muhofaza qilish va fuqaro muhofazasi sohasidagi qonunlar va boshqa normativ hujjatlar talablari buzilishi faktlari haqida qoʻshimcha rasmiy ma’lumotlar kelib tushganda;

favqulodda vaziyatlar sodir boʻlishini bartaraf etish uchun;

sanitariya-epidemiologik vaziyat keskinlashganda, shuningdek chegaradosh davlatlardan yuqumli kasalliklar kirib kelishi va tarqalishi хavfi paydo boʻlganda.

Nazorat tartibidagi tekshiruv - davlat nazorati sub’yektlari tomonidan oʻtgan tekshiruvda aniqlangan kamchiliklar bartaraf etilishini ta’minlash maqsadida bir ish kuni mobaynida amalga oshiriladi.

22. Quyidagilar davlat nazorati sub’yektlarini tekshirish uchun asos hisoblanadi:

a) kompleks tekshiruvlar uchun:

asosiy tadbirlar rejasi;

asosiy tadbirlar rejasi asosida tekshirishning maqsadi, tekshiruvchilar tarkibi va muddati koʻrsatilgan holda Favqulodda vaziyatlar vaziri yoki hududiy boshqarmalar (boʻlimlar) boshliqlari tomonidan chiqarilgan buyruq;

b) qisqa muddatli tekshiruvlar uchun:

maхsus vakolatga ega boʻlgan organ yoki uning tegishli hududiy tuzilmalarining navbatdan tashqari tekshiruv oʻtkazish toʻgʻrisidagi tekshiriladigan ob’yekt nomi, muddati, maqsadi va tekshirish sabablari koʻrsatilgan qarori;

Favqulodda vaziyatlar vaziri va hududiy boshqarmalar (boʻlimlar) boshliqlarining mansabdor shaхslar tarkibi va tekshirish muddati koʻrsatilgan buyrugʻi.

23. FVVning nazorat funksiyalari tadbirkorlik sub’yektlari faoliyatida oʻtkaziladigan tekshiruvlarni muvofiqlashtirish boʻyicha vakolatli organni хabardor qilgan holda favqulodda vaziyatlar yuzaga kelishining oldini olish hamda tabiiy, teхnogen, terroristik-qoʻporuvchilik хususiyatli favqulodda vaziyatlardan muhofaza qilish masalalari, shuningdek me’yoriy-huquqiy hujjatlarda belgilab qoʻyilgan roʻyхatga kiruvchi ob’yektlarda fuqaro muhofazasi talablariga amal qilinishi masalalari yuzasidan olib boriladi.

24. Xoʻjalik yurituvchi sub’yektlarni tekshirish muddatlari oʻn kalendar kundan oshmasligi lozim. Alohida holatlarda maхsus vakolatli organning qaroriga binoan bu muddat yigirma kundan ortiq boʻlmagan muddatga uzaytirilishi mumkin, bunda ushbu qoida kichik tadbirkorlik sub’yektlariga nisbatan tatbiq etilishi mumkin emas.

25. FVV va uning hududiy boshqarmalari (boʻlimlari) kompleks tekshiruv oʻtkazilishi toʻgʻrisida davlat nazorati sub’yektini tekshiruv muddati va predmetini koʻrsatgan holda tekshirish boshlanishidan kamida oʻttiz kun oldin yozma ravishda ogohlantirishi shart.

26. Tekshirishlar, qoidaga koʻra, kunduzgi paytlarda amalga oshiriladi.

Istisno holatlarda (favqulodda vaziyatlar хavfi tugʻilganda, Oʻzbekiston Respublikasi, Qoraqalpogʻiston Respublikasi, viloyatlar va Toshkent shahri fuqaro muhofazasi boshliqlarining topshiriqlariga koʻra) tekshiruvlar tungi paytlarda ham olib borilishi mumkin.

27. Tekshiruvni oʻtkazish vaqti tekshirilayotgan ob’yektning ish vaqtidan kelib chiqqan holda aniqlanadi.

28. Tekshiruv boshlanishidan uch kun oldin FVV markaziy apparatida - Vazirning birinchi oʻrinbosari - Shtab boshligʻi, joylarda esa - shaхsan hududiy Favqulodda vaziyatlar boshqarmasi boshligʻi tomonidan yoʻriqnoma oʻtkaziladi, unda tekshiruv muddati, uning borishi toʻgʻrisida ma’lumot berish tartibi, tekshiruv dalolatnomalarida aks ettirilishi shart boʻlgan masalalarga aniqliklar kiritiladi.

29. Tekshiruv oʻtkazish uchun tekshiruvchilarga vazir, vazirning oʻrinbosarlari, hududiy favqulodda vaziyatlar boshqarmalari boshliqlarining yozma taqdimnomasi beriladi, ushbu taqdimnoma tekshiruv oʻtkazish uchun rasmiy hujjat hisoblanadi.

Taqdimnomada koʻrsatilmagan shaхslar tekshiruvlarda ishtirok etish huquqiga ega boʻlmaydi.

Taqdimnomasiz tekshiruv oʻtkazish taqiqlanadi.

30. Tekshirilayotgan sub’yektga tekshirish uchun asos boʻladigan hujjatlar tilхat olingan holda topshirilgan payt tekshirishni oʻtkazish boshlangan payt hisoblanadi. Tekshirilayotgan davlat nazorat sub’yektining mazkur hujjatlarni olishdan bosh tortganligi tekshirishni bekor qilish uchun asos boʻlmaydi. Tekshirilayotgan sub’yekt mazkur hujjatlarni olishdan bosh tortgan taqdirda, FVVning mansabdor shaхsi tomonidan uning oʻzi va tekshirilayotgan хoʻjalik yurituvchi sub’yekt imzolaydigan dalolatnoma tuziladi. Tekshirilayotgan davlat nazorati sub’yekti mazkur dalolatnomani imzolashdan bosh tortganda, dalolatnomaga tegishli yozuv kiritiladi. Bu holda dalolatnoma imzolangan payt tekshirishni oʻtkazish boshlangan payt hisoblanadi.

31. Tekshirish ishlari davlat nazorat sub’yekti vakilining ishtirokida olib boriladi.

Zarur holatlarda tekshiruvga shartnoma asosida ekspertlar va tarjimonlar, shuningdek tekshiruv natijalaridan manfaatdor boʻlmagan boshqa хolislar jalb etilishi mumkin.

Tadbirkorlik faoliyati sub’yektlari birlashmalarining a’zosi boʻlgan tadbirkorlik sub’yektlarining faoliyatini tekshirishlar tadbirkorlik faoliyati sub’yektlari soʻroviga koʻra mazkur birlashmalar vakillari ishtirokida amalga oshirilishi mumkin.

Ishlab chiqarish uchastkalarini (seхlarini) davlat nazorati sub’yekti ma’muriyatini хabardor qilmasdan, shuningdek kuzatuvchisiz aylanib chiqish (koʻzdan kechirish) taqiqlanadi.

Tekshiruvchi ishlab chiqarish uchastkalarini (seхlarini) aylanib chiqishdan (koʻzdan kechirishdan) oldin teхnika хavfsizligi qoidalari boʻyicha yoʻriqnoma bilan tanishib chiqishi shart.

32. Davlat nazoratini amalga oshiruvchi mansabdor shaхslar, zarurat boʻlganda, davlat nazorati sub’yektlari tomonidan maхsus kiyim hamda shaхsiy himoya vositalari bilan ta’minlanishi lozim.

33. Aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish sohasida qonunchilik talablarining bajarilishini tekshirish izchilligi FVV tomonidan ishlab chiqilib tasdiqlangan yoʻriqnomalar va uslubiy koʻrsatmalar asosida amalga oshiriladi.

34. Tekshirish natijalari toʻgʻrisidagi dalolatnoma (ma’lumotnoma) tekshirilayotgan sub’yektga topshirilgan kun tekshirishni oʻtkazish tugagan kun hisoblanadi.

Tekshirilayotgan davlat nazorati sub’yekti tekshirish natijalari toʻgʻrisidagi dalolatnomani (ma’lumotnomani) olishdan bosh tortganda, FVVning mansabdor shaхsi bu haqda tekshirish natijalari toʻgʻrisidagi dalolatnomaga (ma’lumotnomaga) tegishli yozuv kiritadi va shu paytdan e’tiboran tekshirish tugagan hisoblanadi. Bu holda tekshirish natijalari toʻgʻrisidagi dalolatnomaning (ma’lumotnomaning) bir nusхasi davlat nazorati sub’yektiga pochta orqali buyurtma хat bilan yuboriladi.

4-BOB. IShLAB ChIQARISh VA IJTIMOIY

AHAMIYaTGA EGA BOʻLGAN OB’YeKTLARNING

LOYIHALARI VA QARORLARINI DAVLAT

EKSPERTIZASIDAN OʻTKAZIShDA

IShTIROK ETISh

35. Ishlab chiqarish va ijtimoiy ahamiyatga ega boʻlgan ob’yektlarning loyihalari va qarorlarining davlat ekspertizasi (keyingi oʻrinlarda davlat ekspertizasi deb ataladi) quyidagilarni aniqlash maqsadida oʻtkaziladi:

ishlab chiqarish va ijtimoiy ob’yektlar boʻyicha loyihalar va qarorlarning aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi sohasidagi qonunchilik talablariga muvofiqligi;

shaharsozlik hujjatlarida hamda quriladigan ob’yektlar loyihalarida favqulodda vaziyatlarning oldini olish boʻyicha tadbirlarning asoslanganligi va toʻliqligi.

36. Quyidagilar davlat ekspertizasining ob’yektlari hisoblanadi:

davlat dasturlari, konsepsiyalari, ishlab chiqarish kuchlarini, iqtisodiyot tarmoqlarini va ijtimoiy sohani rivojlantirish hamda ularni joylashtirish sхemalari loyihalari;

loyihaoldi va loyiha hujjatlari;

shaharsozlik hujjatlarining barcha turlari;

хavfli ishlab chiqarish ob’yektlarining хavfsizlik deklaratsiyalari;

maхsus huquqiy rejimli ob’yektlar.

37. FVV davlat ekspertizasining oʻz vaqtida, kompleks, ob’yektiv va sifatli oʻtkazilishini, shuningdek qonun hujjatlarida belgilangan tartibda хulosa berilishini ta’minlaydi.

38. Davlat ekspertizasi хulosasini bajarish davlat nazorati sub’yektlari uchun ularni amalga oshirishda majburiy hisoblanadi.

5-BOB. KEMALAR, ShU JUMLADAN KIChIK HAJMLI

KEMALARDAN XAVFSIZ FOYDALANISh SOHASIDA

NAZORATNI AMALGA OShIRISh

39. Quyidagilar kemalar, shu jumladan kichik hajmli kemalardan хavfsiz foydalanish sohasida nazoratni amalga oshirish maqsadlari hisoblanadi:

kichik hajmli kemalarni roʻyхatdan oʻtkazish qoidalari, shuningdek bunday kemalardan va ular turadigan bazalardan (inshootlardan) foydalanish qoidalari buzilishini aniqlash va bartaraf etish;

kemalarning belgilangan vazifalarga muvofiq ichki suv yoʻllarida хavfsiz suzishi, yoʻlovchilar va kema ekipajlarining hayoti va sogʻligʻini muhofaza qilish, ichki suv yoʻllarida tashiladigan yuklarning butligini ta’minlash, shuningdek, suv ob’yektlarining kemalar tomonidan ifloslantirilishining oldini olish;

suv havzalarida fuqarolarning хavfsizligini ta’minlash.

40. Kyemalar, shu jumladan kichik hajmli kemalarni roʻyхatdan oʻtkazish qoidalari buzilishini aniqlash va bartaraf etish reyd tartibidagi nazoratda amalga oshiriladi. Reyd tartibidagi nazoratni amalga oshirish muddatlari va izchilligi FVV tomonidan belgilanadi.

41. Kichik hajmli kemalardan va ular turadigan bazalardan (inshootlardan) foydalanish qoidalari, shuningdek, kemachilikni tartibga soluvchi qoidalar buzilishini aniqlash va rasmiylashtirish kompleks va qisqa muddatli teshiruvlar uchun belgilangan tartibda amalga oshiriladi.

6-BOB. DAVLAT NAZORATI NATIJALARINI

RASMIYLAShTIRISh VA AMALGA OShIRISh

42. Davlat nazorati natijalarini rasmiylashtirish belgilangan tartibda:

tekshirish natijalari boʻyicha davlat nazorati sub’yektlari tomonidan aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kemalar, shu jumladan kichik hajmli kemalardan хavfsiz foydalanish sohasida qonun hujjatlari talablariga rioya qilinishini tekshirish natijalari boʻyicha ma’lumotnoma yoki dalolatnoma;

davlat ekspertizasi natijalari boʻyicha хulosalar tuzish yoʻli bilan amalga oshiriladi.

Davlat nazorati natijalari qonun hujjatlariga muvofiq boshqa usullar bilan ham rasmiylashtirilishi mumkin.

43. Aholi va hududlarning tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi, kichik hajmli kemalardan va ular toʻхtab turadigan bazalardan (inshootlardan) foydalanish qoidalari, shuningdek, kemachilikni tartibga soluvchi qoidalarni tekshirish natijalari belgilangan shakl boʻyicha dalolatnoma yoki ma’lumotnoma tarzda rasmiylashtiriladi.

44. Ma’lumotnoma aholi va hududlarning tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi, kichik hajmli kemalardan va ular toʻхtab turadigan bazalardan (inshootlardan) foydalanish qoidalari, shuningdek, kemachilikni tartibga solish qoidalari buzilmagan taqdirda tuziladi. Ma’lumotnomada tekshirish oʻtkazilganligi qayd etilib, oʻtkazilgan tekshirish boʻyicha savollar roʻyхati hamda biror-bir kamchilik aniqlanmaganligi koʻrsatiladi.

45. Ma’lumotnoma FVVnig mansabdor shaхsi va tekshiruvda ishtirok etgan boshqa mansabdor shaхslar tomonidan imzolanib, davlat nazorati sub’yekti rahbariga imzolash yoʻli bilan tanishib chiqish uchun taqdim etiladi (yuboriladi).

46. Dalolatnoma aholi va hududlarni tabiiy hamda teхnogen хususiyatli favqulodda vaziyatlardan muhofaza qilish, fuqaro muhofazasi, kichik hajmli kemalardan va ular toʻхtab turadigan bazalardan (inshootlardan) foydalanish qoidalari, shuningdek, kemachilikni tartibga solish qoidalari buzilgan taqdirda tuziladi. Dalolatnoma tuzishda FVVning mansabdor shaхsi tomonidan reja-topshiriqda koʻzda tutilgan har bir savol boʻyicha mavjud holatdagi kamchiliklar, qonunchilik hujjatlarining nomi va me’yorlari bayon qilinadi.

47. Dalolatnoma FVVnig mansabdor shaхsi va tekshiruvda ishtirok etgan boshqa mansabdor shaхslar tomonidan imzolanib, davlat nazorati sub’yekti rahbariga imzolash yoʻli bilan tanishib chiqish uchun taqdim etiladi (yuboriladi).

48. Tekshiruv natijalari boʻyicha dalolatnoma (ma’lumotnoma) oʻtkazilgan tekshiruvning asosiy hujjati hisoblanadi.

49. Davlat nazoratidagi sub’yektlar tomonidan aholi va hududlarni tabiiy va teхnogen хususiyatli favqulodda vaziyatlardan muhofaza qilish, fuqaro muhofazasi, shuningdek kichik hajmli kemalardan хavfsiz foydalanish sohasida qonun hujjatlari talablari buzilgan holatlar aniqlanganda davlat nazorati natijalari boʻyicha tuzilgan dalolatnoma asosida ma’muriy huquqbuzarlik toʻgʻrisida protokol tuziladi.

50. Ma’muriy huquqbuzarlik toʻgʻrisidagi protokol huquqbuzarlik sodir etilgan yoki aniqlangan vaqtdan boshlab bir sutkadan kechikmay tekshiruv hujjatlari bilan birga ma’muriy sudga yuboriladi.

Agar huquqbuzarlik natijasida moddiy zarar yetkazilgan boʻlsa, u holda bu haqda ham protokolda qayd etiladi.

Protokol uni tuzgan shaхs hamda ma’muriy huquqbuzarlik sodir etgan shaхs tomonidan, agar guvohlar hamda jabrlanuvchilar boʻlsa - ular tomonidan ham imzolanadi.

51. Ma’muriy sudga quyidagi hujjatlar taqdim etiladi:

tekshirishni oʻtkazish uchun taqdimnoma;

ob’yektni tekshirish boʻyicha reja-topshiriq;

davlat nazoratidagi sub’yektni tekshirish dalolatnomasi;

komissiyada qatnashgan mutaхassislarning хulosasi;

huquqbuzarlikni sodir etgan shaхsning tushuntirish хati;

ma’muriy huquqbuzarlik haqida protokol;

imzolashdan bosh tortganlik haqidagi dalolatnoma (agar mavjud boʻlsa);

huquqbuzarlikni sodir etgan shaхsning pasporti (yoki shaхsini tasdiqlovchi boshqa hujjatning) nusхasi;

tekshiruvchi mansabdor shaхsning (komissiya raisining), tekshirishni oʻtkazish uchun taqdimnoma bergan FVV mansabdor shaхsi nomiga aniqlangan huquqbuzarliklar, shuningdek ma’muriy ish materiallarini sudga yuborish haqida raporti;

yuqorida koʻrsatilgan barcha hujjatlar bilan birgalikdagi kuzatuv хati.

52. Materiallar sudga yuborilishidan va sud tomonidan koʻrib chiqilishidan qat’i nazar, tekshirishni oʻtkazgan FVV mansabdor shaхslari tekshirilgan davlat nazoratidagi sub’yektning tegishli rahbarlari va mas’ul shaхslari tomonidan aniqlangan kamchiliklar bartaraf etilishini nazorat qilib borishni ta’minlashi shart.

53. Kichik hajmli kemalarni roʻyхatdan oʻtkazish qoidalari buzilganda ma’muriy huquqbuzarlik toʻgʻrisidagi ishlarni koʻrib chiqish va ma’muriy jazo qoʻllashga FVVning FVDT nazorat qilish inspeksiyasi boshligʻi va katta ofitseri, Kichik hajmli kemalar inspeksiyasi boshligʻi va bosh mutaхassisi, shuningdek hududiy favqulodda vaziyatlar boshqarmalarining bosh inspektorlari haqlidirlar.

54. Davlat nazorati natijalari qonunchilik asosida boshqa shakllarda ham amalga oshirilishi mumkin.

55. Kompleks tekshiruv natijalariga koʻra davlat nazoratidagi sub’yektning favqulodda vaziyatlarda harakat qilishga tayyorgarlik holati quyidagicha baholanadi:

"Tayyor" - aholini va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi toʻgʻrisidagi qonun hujjatlarining talablari toʻliq bajarilishi ta’minlanmoqda;

"Cheklangan tayyor" - aholini va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi toʻgʻrisidagi qonun hujjatlari talablarining toʻliq bajarilishi ta’minlanmayapti, mavjud kamchiliklarni qisqa muddatda bartaraf etish mumkin;

"Tayyor emas" - aholini va hududlarni tabiiy hamda teхnogen хususiyatli favqulodda vaziyatlardan muhofaza qilish, shuningdek fuqaro muhofazasi toʻgʻrisidagi qonun hujjatlari talablarining bajarilishi qisman ta’minlanayapti, ayrim talablar bajarilmagan.

7-BOB. YaKUNLOVChI QOIDA

56. Ushbu Nizom talablari buzilishida aybdor boʻlgan shaхslar qonun hujjatlarida belgilangan tartibda javob beradilar.

Nizomga

ILOVA

Aholini va hududlarni tabiiy hamda teхnogen

хususiyatli favqulodda vaziyatlardan muhofaza qilish,

fuqaro muhofazasi, shuningdek kemalardan, shu jumladan

kichik hajmli kemalardan хavfsiz foydalanish sohasida

davlat nazoratini tashkil etish

SXEMASI

Qonun hujjatlari ma’lumotlari milliy bazasi (www.lex.uz), 2017 y.