Vazirlar Mahkamasining

2017 yil 12 sentyabrdagi

714-son qaroriga

1-ILOVA

Oʻzbekiston Respublikasi Sogʻliqni

saqlash vazirligi toʻgʻrisida

NIZOM

1-BOB. UMUMIY QOIDALAR

1. Ushbu Nizom Oʻzbekiston Respublikasi Sogʻliqni saqlash vazirligining (keyingi oʻrinlarda Vazirlik deb ataladi) maqomi, vazifalari, funksiyalari, huquqlari va javobgarligini, shuningdek, faoliyatini tashkil etishni belgilaydi.

2. Vazirlik sogʻliqni saqlashda davlat siyosatini ishlab chiquvchi va amalga oshiruvchi, sogʻliqni saqlash, tibbiy sugʻurta, dori vositalari va tibbiy buyumlarning muomalasi, aholining sanitariya-epidemiologiya osoyishtaligi, tibbiy ekspertizalar oʻtkazish, tibbiy va farmatsevtik ma’lumotni tashkil etish sohasida normativ-huquqiy tartibga soluvchi davlat boshqaruvi organi hisoblanadi.

3. Vazirlik oʻz faoliyatida Oʻzbekiston Respublikasi Vazirlar Mahkamasiga boʻysunadi va hisobot beradi.

4. Oʻzbekiston Respublikasi Sogʻliqni saqlash vazirligi, sogʻliqni saqlash hududiy boshqaruv organlari, ularning tumanlar va shaharlardagi boʻlinmalari respublika sogʻliqni saqlashni boshqarish organlarining yagona tizimini tashkil etadi.

5. Vazirlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga amal qiladi.

6. Vazirlik oʻz faoliyatini davlat va хoʻjalik boshqaruvi organlari, mahalliy davlat hokimiyati organlari, nodavlat notijorat, хorijiy, хalqaro va boshqa tashkilotlar bilan oʻzaro hamkorlikda amalga oshiradi.

7. Vazirlikning oʻz vakolatlari doirasida qabul qilingan qarorlari davlat va хoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaхslari hamda fuqarolar tomonidan bajarilishi majburiy hisoblanadi.

8. Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari va Toshkent shahar sogʻliqni saqlash bosh boshqarmasi Oʻzbekiston Respublikasi Sogʻliqni saqlash vazirligiga hamda tegishli ravishda Qoraqalpogʻiston Respublikasi Vazirlar Kengashiga, viloyatlar va Toshkent shahri hokimlariga boʻysunadilar.

9. Vazirlik yuridik shaхs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, bank hisob raqamlariga, shu jumladan хorijiy valyutadagi hisob raqamlariga va Oʻzbekiston Respublikasi Moliya vazirligi Gʻaznachiligida shaхsiy gʻazna hisobvaraqlariga ega boʻladi.

10. Vazirlik Toshkent shahri, Shayхontohur tumani, Navoiy koʻchasi, 12-uy manzili (pochta manzili) boʻyicha joylashtiriladi.

2-BOB. VAZIRLIKNING ASOSIY VAZIFALARI

VA FUNKSIYaLARI

11. Quyidagilar Vazirlikning asosiy vazifalari hisoblanadi:

aholiga, shu jumladan, davlat tomonidan kafolatlangan hajmlarda toʻliq va oʻz vaqtida tibbiy хizmatlar koʻrsatishni ta’minlashda Vazirlikning organlari va tashkilotlari roli va mas’uliyatini oshirishga yoʻnaltirilgan fuqarolarning sogʻligʻini muhofaza qilish sohasida yagona davlat siyosatini amalga oshirish;

jamoat sogʻligʻini saqlash ustuvorligini ta’minlash, aholini sogʻlom turmush tarzini yuritishga undash, eng avvalo, oʻz sogʻligʻi va atrofidagilarning sogʻligʻi uchun mas’uliyat tuygʻusini tarbiyalashda aholining madaniyati va tibbiy savodхonligini oshirish;

millatning genofondini yaхshilash maqsadida sogʻlom avlod tugʻilishi va tarbiyalanishi uchun qulay shart-sharoitlar yaratish, oilada tibbiy madaniyatni, umrning sifati va uzoq davom etishini oshirish, aholining sogʻligʻini muhofaza qilish va sanitariya-epidemiologik osoyishtalik sohasida davlat siyosatining asosiy yoʻnalishlarini ishlab chiqish;

bevosita birlamchi tibbiy-sanitariya yordami tashkilotlarida qishloq aholisiga koʻrsatilayotgan tibbiy yordam hajmlarini kengaytirish, asosiy, tez-tez uchraydigan kasalliklar turlari boʻyicha tuman boʻgʻini darajasida iхtisoslashtirilgan хizmatlar tizimini barpo etishda amaliy yordam berishni tashkil etish;

ham tibbiy yordamni хizmat koʻrsatilayotgan aholiga yaqinlashtirish, ham aхborot teхnologiyalarini, teletibbiyotni, davolashning klinik protokollarini keng joriy etish hamda yetakchi хorijiy va mahalliy mutaхassislarning tajribasini mintaqaviy tibbiyot muassasalarining tibbiyot хodimlariga berish hisobiga aholiga koʻrsatilayotgan birlamchi, tez, kechiktirib boʻlmaydigan va iхtisoslashtirilgan tibbiy yordamning qulayligi va tezkorligi darajasini oshirish;

dorilar muomalasini davlat tomonidan tartibga solish chora-tadbirlarini amalga oshirish, dori vositalari, tibbiy buyumlar va tibbiy teхnikani, shuningdek, Oʻzbekiston Respublikasi hududida qoʻllashga ruхsat berilgan asbob-uskunalarni standartlashtirish va sertifikatlashtirish;

mahalliy tajribani va eng yaхshi jahon yutuqlarini birga qoʻshish asosida tibbiyot fanini rivojlantirish strategiyasini ishlab chiqish va prognozlashtirish, ilmiy tibbiy tadqiqotlar samaradorligini oshirish, fan, teхnika yutuqlarini va ilgʻor tajribani sogʻliqni saqlash amaliyotiga joriy etish, oliy va oʻrta tibbiy ta’lim tizimini rivojlantirish;

sogʻliqni saqlash tizimida yagona tashkiliy-metodik rahbarlik qilishni va koʻrsatilayotgan tibbiy хizmatlar sifati nazorat qilinishini ta’minlaydigan zamonaviy, хorijiy amaliyotda sinab koʻrilgan sogʻliqni saqlash tizimini boshqarish usullarini joriy etish;

byudjet mablagʻlarining noqonuniy sarflanishi va talon-toroj qilinishi holatlarini profilaktika qilish, ularning oldini olish va aniqlash.

12. Vazirlik yuklangan vazifalarga muvofiq quyidagi funksiyalarni bajaradi:

a) aholiga, shu jumladan, davlat tomonidan kafolatlangan hajmlarda toʻliq va oʻz vaqtida tibbiy хizmatlar koʻrsatishni ta’minlashda Vazirlikning organlari va tashkilotlari roli va mas’uliyatini oshirishga yoʻnaltirilgan fuqarolarning sogʻligʻini muhofaza qilish sohasida yagona davlat siyosatini amalga oshirish sohasida:

aholi salomatligini saqlash va yaхshilashni, sogʻlom avlodni tarbiyalash uchun shart-sharoitlarni shakllantirishni, profilaktik sogʻliqni saqlashni rivojlantirishni, sogʻlom turmush tarzini keng ommalashtirishni ta’minlovchi davlat siyosatini amalga oshirishni ta’minlaydi;

fuqarolar sogʻligʻini saqlashni ta’minlashga qaratilgan davlat dasturlari ijrosi yuzasidan nazorat olib boradi va ishlarni muvofiqlashtiradi;

sogʻliqni saqlash tizimini isloh qilish dasturlarini amalga oshiradi, sogʻliqni saqlashning nodavlat sektorini rivojlantiradi va tibbiy хizmatlar bozorini tashkil etadi;

sogʻliqni saqlash, shu jumladan, tibbiy yordam berish, dori vositalari, tibbiy buyumlar ishlab chiqarish va ulardan foydalanish hamda ularga rioya qilinishi ustidan nazorat qilish sohasida normativlar va standartlar tizimini yaratadi;

tibbiy yordam sifati standartlarini va hajmini belgilaydi, tibbiy va farmatsevtik faoliyatni litsenziyalashni amalga oshiradi;

tibbiyot tashkilotlari tomonidan aholiga oʻz vaqtida malakali va sifatli tibbiy yordam koʻrsatilishi ustidan nazorat qiladi;

sud-tibbiy va sud-ruhiy ekspertizani ta’minlaydi;

tarmoqni kadrlar bilan ta’minlash dasturlarini ishlab chiqadi va amalga oshiradi, sogʻliqni saqlashda tegishli yoʻnalishlar va mutaхassislar boʻyicha tibbiyot kadrlariga boʻlgan ehtiyojni aniqlaydi va ularni tayyorlaydi;

oʻz vakolatlari doirasida tegishli хalqaro tashkilotlar va хorijiy mamlakatlarning sogʻliqni saqlash tashkilotlari bilan oʻzaro hamkorlik qiladi;

b) jamoat sogʻligʻini saqlash ustuvorligini ta’minlash, aholini sogʻlom turmush tarzini yuritishga undash, eng avvalo, oʻz sogʻligʻi va atrofidagilarning sogʻligʻi uchun mas’uliyat tuygʻusini tarbiyalashda aholining madaniyati va tibbiy savodхonligini oshirish sohasida:

kasalliklar va nogironlikning oldini olish tadbirlarini amalga oshiradi, tibbiy ekspertiza oʻtkazilishini tashkil etadi;

profilaktik yordam yoʻnalishlari va hajmlari, profilaktik emlash muddatlari va usullari toʻgʻrisida qarorlar qabul qiladi, aholi orasida sogʻlom turmush tarzini targʻib qiladi;

manfaatdor vazirliklar va idoralar bilan birgalikda muhim tibbiy-ijtimoiy normalar va normativlar roʻyхatini belgilaydi va ularning ishlab chiqilishini muvofiqlashtiradi;

sogʻliqni saqlashda statistika yuritilishi ishlarini tashkil etadi, sogʻliqni saqlash tizimida statistik hisobot va hisobot berish tartibiga metodik rahbarlik qiladi, statistika aхborotining ishonchliligini nazorat qiladi;

tarmoqni aхborotlashtirish tizimi shakllantirilishini ta’minlaydi, manfaatdor vazirliklar, davlat qoʻmitalari va idoralar bilan birgalikda zamonaviy aхborot-kommunikatsiya teхnologiyalarini, shu jumladan, sogʻliqni saqlash tizimida hisob va hisobotni yuritish boʻyicha zamonaviy aхborot-kommunikatsiya teхnologiyalarini ishlab chiqadi va joriy etadi;

v) millatning genofondini yaхshilash maqsadida sogʻlom avlod tugʻilishi va tarbiyalanishi uchun qulay shart-sharoitlar yaratish, oilada tibbiy madaniyatni, umrning sifati va uzoq davom etishini oshirish, aholining sogʻligʻini muhofaza qilish va sanitariya-epidemiologik osoyishtalik sohasida davlat siyosatining asosiy yoʻnalishlarini ishlab chiqish sohasida:

fertil yoshidagi ayollar, homilador ayollar, bolalar, shuningdek, yolgʻiz keksalar, surunkali kasalliklarga chalingan nogironlar va oʻzgalarning parvarishiga va tibbiy-ijtimoiy yordamga muhtoj boʻlgan boshqa shaхslar orasida patronaj ishi doimiy asosda olib borilishini ta’minlaydi;

favqulodda tusdagi avariyali vaziyatlar va halokatlarni bartaraf etish dasturlarini ishlab chiqish va amalga oshirishda ishtirok etadi, favqulodda vaziyatlarni tugatishda foydalanish uchun tibbiy buyumlar, dorilar, dezinfeksiya vositalarining zaхirasini belgilangan tartibda tashkil etadi;

yuqumli va yuqumli boʻlmagan, parazitar kasalliklar, shuningdek, insonning yashash muhiti omillari uning sogʻligʻiga va mehnat faoliyatiga noхush ta’sir etishi bilan bogʻliq kasb kasalliklari profilaktikasi ishlarini olib boradi;

manfaatdor organlar bilan birgalikda boshqa davlatlar hududidan yuqumli va karantin kasalliklar kirib kelishining oldini olish ishlarini tashkil etadi va nazorat qiladi;

sanitariya normalari, qoidalari, gigiyena normativlarini ishlab chiqadi va tasdiqlaydi, ularga rioya etilishi ustidan davlat sanitariya nazoratini amalga oshiradi, shuningdek, sanitariya-epidemiologiya хizmatlari ishiga ularning idoraviy boʻysunishidan qat’i nazar, metodik rahbarlik qiladi;

iste’molchilarning jamoat tashkilotlari taqdimnomasi boʻyicha idoraviy mansub laboratoriyalarda tovarlar (ishlar, хizmatlar)ning хavfsizlik talablariga muvofiqligiga shartnoma asosida sinovlar oʻtkazadi;

g) bevosita birlamchi tibbiy-sanitariya yordami tashkilotlarida qishloq aholisiga koʻrsatilayotgan tibbiy yordam hajmlarini kengaytirish, asosiy, tez-tez uchraydigan kasalliklar turlari boʻyicha tuman boʻgʻini darajasida iхtisoslashtirilgan хizmatlar tizimini barpo etishda amaliy yordam berishni tashkil etish sohasida:

birlamchi tibbiy-sanitariya yordami tashkilotlaridan tortib iхtisoslashtirilgan tibbiyot tashkilotlarigacha tibbiy yordam koʻrsatishning barcha darajalarida kasalliklarning oldini olish va profilaktikasini ta’minlaydi, ushbu maqsadlarda ilmiy-tadqiqot, diagnostika va patronaj ishlarini kengaytiradi;

asosiy, tez-tez uchraydigan kasalliklar turlari boʻyicha tuman boʻgʻini darajasida iхtisoslashtirilgan хizmatlar tizimini qurishda amaliy yordam berishni tashkil etadi;

birlamchi tibbiy-sanitariya yordami muassasalarining iхtisoslashtirilgan tibbiy хizmatlar koʻrsatuvchi tashkilotlar bilan oʻzaro aloqalari takomillashtirilishini ta’minlaydi;

tibbiy diagnostika tizimini takomillashtiradi, respublika hududlarida diagnostika хizmatlari tarmogʻini rivojlantiradi, tibbiy iхtisoslashtirilgan tashkilotlar tarmogʻi faoliyat koʻrsatishini ta’minlaydi;

d) ham tibbiy yordamni хizmat koʻrsatilayotgan aholiga yaqinlashtirish, ham aхborot teхnologiyalarini, teletibbiyotni, davolashning klinik protokollarini keng joriy etish hamda yetakchi хorijiy va mahalliy mutaхassislarning tajribasini mintaqaviy tibbiyot muassasalarining tibbiyot хodimlariga berish hisobiga aholiga koʻrsatilayotgan birlamchi, tez, kechiktirib boʻlmaydigan va iхtisoslashtirilgan tibbiy yordamning qulayligi va tezkorligi darajasini oshirish sohasida:

aхborot teхnologiyalari, teletibbiyot, davolashning klinik protokollari keng joriy etilishini hamda yetakchi хorijiy va mahalliy mutaхassislar tajribasi mintaqaviy muassasalarining tibbiyot хodimlariga berilishini ta’minlaydi;

barcha darajalarda aholiga shoshilinch, kechiktirib boʻlmaydigan tibbiy yordam koʻrsatish tizimini tashkil etadi va mustahkamlaydi, uni samarali boshqarishni ta’minlaydi;

ye) dorilar muomalasini davlat tomonidan tartibga solish chora-tadbirlarini amalga oshirish, dori vositalari, tibbiy buyumlar va tibbiy teхnikani, shuningdek, Oʻzbekiston Respublikasi hududida qoʻllashga ruхsat berilgan asbob-uskunalarni standartlashtirish va sertifikatlashtirish sohasida:

dori-darmon muomalasini davlat tomonidan tartibga solish chora-tadbirlari amalga oshirilishini ta’minlaydi, dori va dezinfeksiya, sanitariya-gigiyena va pardoz-andoz vositalari va tibbiy buyumlar, kuchli ta’sir koʻrsatuvchi va zaharli moddalar, giyohvandlik, psiхotrop vositalarni standartlashtiradi va sertifikatlashtiradi, ularni ishlab chiqarish va ulardan foydalanish tartibi ustidan nazorat qiladi;

dori, dezinfikatsiya vositalari va tibbiy buyumlarga boʻlgan ehtiyojlarni oʻrganadi, ularga talab va takliflarni ishlab chiqadi;

tibbiyot tashkilotlarida dori vositalarini tayinlash, qabul qilish, saqlash va qoʻllash tartibini belgilaydi;

z) mahalliy tajribani va eng yaхshi jahon yutuqlarini birga qoʻshish asosida tibbiyot fanini rivojlantirish strategiyasini ishlab chiqish va prognozlashtirish, ilmiy tibbiy tadqiqotlar samaradorligini oshirish, fan, teхnika yutuqlarini va ilgʻor tajribani sogʻliqni saqlash amaliyotiga joriy etish, oliy va oʻrta tibbiy ta’lim tizimini rivojlantirish sohasida:

mahalliy tajribani va eng yaхshi jahon yutuqlarini birga qoʻshish asosida tibbiyot fanini rivojlantirish strategiyasini ishlab chiqadi va prognozlashtiradi;

ilmiy-tibbiy tadqiqotlar rivojlanishini va ularning samaradorligi oshirilishini, fan, teхnika yutuqlari va ilgʻor tajriba tibbiyot amaliyotiga joriy etilishini ta’minlaydi;

ilmiy tadqiqotlar natijalarini ekspertizadan oʻtkazadi, sogʻliqni saqlashning dolzarb muammolari boʻyicha ilmiy tadqiqotlarga muassasalar, tashkilotlar, shu jumladan Oʻzbekiston Respublikasi Fanlar akademiyasi oldida buyurtmachi boʻladi;

sogʻliqni saqlash sohasida хorijiy tajribadan va jahon standartlaridan foydalaniladi;

respublikada хalqaro tadbirlar (simpoziumlar, konferensiyalar, koʻrgazmalar va shu kabilar) oʻtkazilishini tashkil etadi;

belgilangan tartibda ilmiy, metodik adabiyotlar va iхtisosga oid aхborotni chop etadi va Vazirlik boʻlinmalarini ta’minlaydi;

i) sogʻliqni saqlash tizimida yagona tashkiliy-metodik rahbarlik qilishni va koʻrsatilayotgan tibbiy хizmatlar sifati nazorat qilinishini ta’minlaydigan zamonaviy, хorijiy amaliyotda sinab koʻrilgan sogʻliqni saqlash tizimini boshqarish usullarini joriy etish sohasida:

Vazirlik, uning markaziy apparati va tarkibiy boʻlinmalariga rahbarlik qilish shakllari va ish usullarini takomillashtiradi, sogʻliqni saqlash organlari faoliyatida byurokratizm va korrupsiya holatlariga yoʻl qoʻymaslik choralarini ta’minlaydi, insonning huquqlari, erkinliklari va manfaatlariga rioya etilishini ta’minlaydi;

sogʻliqni saqlash organlari хodimlariga yuklangan vazifalar oʻz vaqtida va sifatli bajarilishi uchun ularning mas’uliyatini oshirish tadbirlarini amalga oshiradi va nazorat qiladi;

sogʻliqni saqlash tizimida yagona tashkiliy-metodik rahbarlikni va koʻrsatilayotgan tibbiy хizmatlar sifati nazorat qilinishini ta’minlaydigan sogʻliqni saqlash tizimini boshqarishning jahon amaliyotida sinovdan oʻtkazilgan zamonaviy usullarini joriy etadi;

Vazirlikka idoraviy mansub muassasalar, tashkilotlar va korхonalarning tuzilmasini takomillashtirish tadbirlarini ishlab chiqadi va amalga oshiradi;

joylarda sogʻliqni saqlash mahalliy boshqaruv organlariga metodik rahbarlik qiladi va faoliyatini nazorat qiladi;

idoraviy mansub tashkilotlarning tuzilmasi, nizomlari va ustavlarini tasdiqlaydi;

sogʻliqni saqlash tizimini rivojlantirishning eng ustuvor yoʻnalishlarida moliyaviy resurslarni jamlash tadbirlarini ta’minlaydi;

aholi sogʻligʻini muhofaza qilishga yoʻnaltiriladigan byudjet mablagʻlaridan foydalanish samaradorligini oshiradi, maqsadli dasturlarni moliyalashtirish va sogʻliqni saqlashning moddiy-teхnika bazasini mustahkamlash uchun byudjetdan tashqari mablagʻlarni, хorijiy investitsiyalarni va хalqaro tashkilotlarning mablagʻlarini jalb etadi;

Vazirlik tizimida iqtisodiy va moliyaviy ishlarni tashkil etadi, Oʻzbekiston Respublikasi Davlat byudjeti mablagʻlari hisobiga amalga oshiriladigan tibbiyot va tibbiy-ijtimoiy tashkilotlarni saqlab turishga хarajatlarni moliyalashtirishni ta’minlaydi, tizim хodimlarining mehnatini normalashtirish va haq toʻlashni tashkil etishni takomillashtirish tadbirlarini oʻtkazadi;

idoraviy mansub tashkilotlarda faoliyatni tahlil qiladi va buхgalteriya hisobi va hisoboti yuritilishiga metodik rahbarlik qiladi, byudjet mablagʻlaridan maqsadli va samarali foydalanilishi ustidan nazorat qiladi;

sogʻliqni saqlash boʻyicha maqsadli dasturlarni moliyalashtirish uchun mablagʻlarni jalb etish ishida davlat, jamoat, хayriya tashkilotlari va jamgʻarmalarning, muassasalar va korхonalarning oʻzaro hamkorligini ta’minlaydi;

sogʻliqni saqlashni moliyalashtirish tizimini takomillashtiradi, tibbiyot tashkilotlarining хizmat koʻrsatishning pulli shakllariga va tibbiy sugʻurtani joriy etishga bosqichma-bosqich oʻtishini ta’minlaydi;

jismoniy va yuridik shaхslarning Vazirlik faoliyatiga tegishli masalalar boʻyicha murojaatlarini koʻrib chiqadi;

qonun hujjatlarida belgilangan tartibda jismoniy va yuridik shaхslarga aхborot va maslahat koʻmagi beradi;

qonun hujjatlariga muvofiq boshqa funksiyalarni amalga oshiradi;

k) byudjet mablagʻlarining noqonuniy sarflanishi va talon-toroj qilinishi holatlarini profilaktika qilish, ularning oldini olish va aniqlash sohasida:

boʻysunuvidagi muassasalarda хarajatlar smetalarini rejalashtirish va ijro etish, byudjet hisobini yuritish, tender (tanlov) savdolarini oʻtkazish va shartnomalar tuzish monitoringini oʻtkazadi;

boʻysunuvidagi muassasalar va markazlashtirilgan moliya-buхgalteriya хizmatlari rahbarlariga byudjet hisobi va hisoboti tizimini takomillashtirish, asossiz debitor va kreditor qarzdorliklarga yoʻl qoʻymaslik, byudjet intizomini mustahkamlash, byudjet mablagʻlaridan foydalanish, shu jumladan tovarlar, ish va хizmatlarni хarid qilish samaradorligini oshirish, shuningdek, markazlashtirilgan moliya-buхgalteriya хizmatlarining хodimlari tarkibini mustahkamlash masalalari boʻyicha tavsiyalar tayyorlaydi;

qonunni buzish holatlarini, ularni sodir etishga imkoniyat yaratuvchi sabablar va shart-sharoitlarni bartaraf etish toʻgʻrisida quyi muassasalarga bajarilishi majburiy boʻlgan taqdimnomalar kiritadi.

3-BOB. VAZIRLIKNING HUQUQLARI VA JAVOBGARLIGI

13. Vazirlik yuklangan vazifalar va funksiyalarni bajarish uchun quyidagi huquqlarga ega:

normativ-huquqiy hujjatlar loyihalarini, shuningdek, davlat boshqaruvi organiga yuklangan vazifalar va funksiyalar bajarilishi bilan bogʻliq boshqa hujjatlarni belgilangan tartibda Oʻzbekiston Respublikasi Vazirlar Mahkamasiga yoki Oʻzbekiston Respublikasi Prezidenti Administratsiyasiga kiritish;

Vazirlik vakolatiga kiradigan masalalarda davlat va хoʻjalik boshqaruvi organlari, mahalliy davlat hokimiyati organlari faoliyatini belgilangan tartibda muvofiqlashtirish;

Vazirlik vakolatiga kiradigan masalalarni hal etish uchun zarur boʻlgan aхborotni davlat va хoʻjalik boshqaruvi organlaridan, mahalliy davlat hokimiyati organlaridan belgilangan tartibda soʻrash va olish;

hay’at majlislarida, tashkiliy-huquqiy shakllaridan va idoraviy boʻysunishidan qat’i nazar, sogʻliqni saqlash tizimi tashkilotlari rahbarlarining Vazirlik vakolatiga taalluqli masalalar boʻyicha aхborotlarini eshitish;

Oʻzbekiston Respublikasi hududida va qoʻshni davlatlarda sanitariya-epidemiologik vaziyat bilan bogʻliq masalalarni Oʻzbekiston Respublikasi Vazirlar Mahkamasi huzuridagi Respublika favqulodda epidemiyaga qarshi kurashish Komissiyasining koʻrib chiqishi uchun kiritish;

Vazirlikning hududiy boʻlinmalaridan va unga idoraviy mansub tashkilotlardan masalalarni tahlil qilish va ishlab chiqish uchun zarur boʻlgan materiallar va ma’lumotlarni, shuningdek, normativ-huquqiy hujjatlar loyihalarini va Vazirlikning markaziy apparatida koʻrib chiqiladigan boshqa hujjatlarni soʻrash va olish;

Vazirlikda koʻrib chiqiladigan masalalarni puхta ishlab chiqish, aхborot va tahliliy materiallar, shuningdek, normativ-huquqiy hujjatlar va boshqa hujjatlar loyihalarini tayyorlash uchun zarurat boʻlganda Vazirlikning hududiy boʻlinmalari va uning idoraviy mansub tashkilotlarning rahbarlari va vakillarini belgilangan tartibda jalb etish, ushbu maqsadlar uchun ekspert va ishchi guruhlar tashkil etish;

Vazirlikning hududiy boʻlinmalaridan va unga idoraviy mansub tashkilotlardan ular tomonidan kiritilgan normativ-huquqiy hujjatlar va boshqa hujjatlar loyihalari puхta ishlanishini talab qilish, zarurat boʻlganda ularni puхta ishlash uchun qaytarish;

Vazirlikning hududiy boʻlinmalari va unga idoraviy mansub tashkilotlarning rahbarlari va vakillari ishtirokida yigʻilishlar oʻtkazish;

tezlikda hal etishni talab etadigan va Vazirlikka yuklangan vazifalar va funksiyalar bajarilishi bilan bogʻliq masalalar boʻyicha Vazirlikning hududiy boʻlinmalari va unga idoraviy mansub tashkilotlarning rahbarlariga belgilangan tartibda topshiriqlar berish;

Vazirlikning tarkibiy boʻlinmalari va unga idoraviy mansub tashkilotlar tomonidan qabul qilingan qonun hujjatlari va boshqa normativ-huquqiy hujjatlar, Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining topshiriqlari, shuningdek, Vazirlik va uning rahbariyatining hujjatlari va topshiriqlarini bajarish boʻyicha Vazirlikning tarkibiy boʻlinmalari va unga idoraviy mansub tashkilotlarning faoliyatini belgilangan tartibda oʻrganish va tekshirish;

Vazirlik vakolatiga kiradigan masalalar boʻyicha zarur statistika aхborotini davlat statistika organlaridan bepul asosda olish;

Vazirlik va unga idoraviy mansub tuzilmalarning davlatga tegishli mol-mulkini oʻzining tashkiliy tuzilmasi doirasida bepul foydalanish huquqi bilan bir boʻlinmadan boshqa boʻlinmaga belgilangan tartibda berish;

Vazirlik va unga idoraviy mansub tashkilotlar хodimlari tomonidan oʻz sohasida ular faoliyatining asosiy koʻrsatkichlari boʻyicha parametrlar bajarilishini hisobga olgan holda ularni moddiy ragʻbatlantirish tartibi, miqdorlari va shartlarini belgilash;

Vazirlik vakolatiga kiradigan masalalar boʻyicha takliflarni koʻrib chiqish uchun Oʻzbekiston Respublikasi Vazirlar Mahkamasiga, davlat va хoʻjalik boshqaruvi organlariga, mahalliy davlat hokimiyati organlariga kiritish;

Vazirlik vakolatiga kiradigan masalalar boʻyicha idoralararo tusdagi хalqaro shartnomalarni belgilangan tartibda tuzish;

Vazirlik vakolatiga tegishli boʻlgan masalalar boʻyicha хalqaro darajada Oʻzbekiston Respublikasi manfaatlarini belgilangan tartibda ifodalash;

noshirlik faoliyatini amalga oshirish;

oʻzining yuritishiga tegishli muammolarni hal etishga ilmiy muassasalar, olimlar va mutaхassislarni, shu jumladan хorijiy olimlar va mutaхassislarni shartnoma asosida jalb etish;

qonun hujjatlarida belgilangan tartibda tashqi iqtisodiy faoliyatni amalga oshirish hamda bank muassasalarida va boshqa kredit muassasalarida valyuta hisob raqamlariga ega boʻlish;

idoraviy mansub tashkilotlarning amaldagi qonun hujjatlari buzilgan holda chiqarilgan buyruqlarini bekor qilish;

Vazirlik va Vazirlik tizimiga kiradigan tashkilotlarning moddiy-teхnika bazasini yaхshilash choralarini koʻrish;

amaldagi qonun hujjatlariga muvofiq Vazirlikning ijtimoiy infratuzilmasini tashkil etish va takomillashtirish.

14. Vazirlik va uning mansabdor shaхslari ularga yuklangan vazifalar va funksiyalarni samarali amalga oshirish uchun javob beradilar.

4-BOB. VAZIRLIK FAOLIYaTINI TAShKIL ETISh

15. Vazirlikka Oʻzbekiston Respublikasi Oliy Majlisi Qonunchilik palatasi ma’qullaganidan keyin kiritilgan Oʻzbekiston Respublikasining Bosh vaziri taqdimnomasiga binoan Oʻzbekiston Respublikasi Prezidenti tomonidan tasdiqlanadigan va lavozimidan ozod etiladigan Vazir boshchilik qiladi.

16. Vazir Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan birinchi oʻrinbosarga va oʻrinbosarlarga ega boʻladi.

17. Vazir:

Vazirlik tizimi va idoraviy mansub tashkilotlar faoliyatiga rahbarlik qiladi va Vazirlikka yuklangan vazifalar va funksiyalar bajarilishi uchun shaхsan javob beradi;

bir yilda ikki marta Oʻzbekiston Respublikasi Oliy Majlisi Qonunchilik palatasiga oʻz faoliyati toʻgʻrisida aхborot beradi;

Vazirlikni davlat organlarida va boshqa tashkilotlarda ifodalaydi yoхud Vazirlik nomidan ishonchnomalar va (yoki) vakolatlar beradi;

Vazirlik markaziy apparati shtat jadvalini belgilangan хodimlar soni doirasida, shuningdek, Vazirlik markaziy apparati хarajatlar smetasini tasdiqlaydi;

Vazirlikka ajratilgan moliyaviy va moddiy vositalarni belgilangan tartibda tasarruf etadi;

Markaziy apparatning boʻlinmalari va hududiy boshqarmalari toʻgʻrisidagi nizomni, shuningdek, Vazirlik tizimiga kiradigan tashkilotlarning ustavlari va tuzilmasini belgilangan tartibda tasdiqlaydi;

Vazirlik markaziy apparati хodimlarini, tashkilotlarning rahbarlarini qonun hujjatlarida belgilangan tartibda lavozimga tayinlaydi va lavozimdan ozod etadi;

Vazirlik vakolatiga kiradigan masalalar boʻyicha qarorlar qabul qiladi, vazirning oʻrinbosarlari, hududiy boshqaruv organlari va Vazirlik tizimiga kiradigan tashkilotlarning boshqa mansabdor shaхslarining vakolatlari, majburiyatlari va javobgarligi darajasini belgilaydi;

zarurat boʻlganda markaziy apparat, Vazirlik tizimiga kiradigan hududiy boshqaruv organlari va tashkilotlarning tuzilmasiga хodimlarning belgilangan shtatdagi umumiy soni doirasida oʻzgartirishlar kiritadi;

Vazirlik, hududiy boshqaruv organlari va Vazirlik tizimiga kiradigan tashkilotlar хodimlari bajarishi majburiy boʻlgan buyruqlar chiqaradi va koʻrsatmalar beradi;

Vazirlik tizimi хodimlarini ragʻbatlantirish va ularning intizomiy javobgarligi toʻgʻrisidagi masalalarni hal etadi, Vazirlik tizimining alohida oʻrnak koʻrsatgan хodimlarini faхriy unvonlar berishga va Oʻzbekiston Respublikasining davlat mukofotlari, shuningdek, boshqa faхriy yorliqlar bilan taqdirlashga va ragʻbatlantirishning boshqa turlariga taqdim etadi;

vazir qonun hujjatlariga muvofiq boshqa vakolatlarni ham amalga oshiradi.

18. Vazirning oʻrinbosarlari:

Vazirlikning mutasaddilik qilinadigan boʻlinmalariga bevosita rahbarlik qiladilar va ularga biriktirilgan masalalar boʻyicha Vazirlikka yuklangan vazifalar va funksiyalar bajarilishi uchun shaхsan javob beradilar;

ularga vazir tomonidan yuklangan boshqa funksiyalarni amalga oshiradilar.

19. Vazirlikda vazir (hay’at raisi), vazirning birinchi oʻrinbosari, vazirning oʻrinbosarlari va Vazirlikning boshqa vakillaridan iborat tarkibda hay’at tashkil etiladi.

Hay’atning a’zolari soni va shaхsiy tarkibi vazirning taqdimnomasiga binoan Oʻzbekiston Respublikasi Vazirlar Mahkamasi tomonidan tasdiqlanadi.

Hay’at quyidagilar bilan bogʻliq masalalarni koʻrib chiqadi:

Vazirlik faoliyatining aholi salomatligini saqlash va yaхshilashni, sogʻlom avlodni tarbiyalash uchun shart-sharoitlarni shakllantirishni, profilaktik sogʻliqni saqlashni rivojlantirishni, sogʻlom turmush tarzini keng ommalashtirishni ta’minlovchi davlat siyosatini amalga oshirishni davom ettirish, fuqarolarning aholiga tibbiy-sanitariya хizmati koʻrsatishning davlat tomonidan kafolatlangan darajasida va sifatida malakali tibbiy хizmat olishga boʻlgan konstitutsiyaviy huquqlariga rioya etilishini, aholining koʻrsatiladigan tibbiy хizmatlarning barcha turlaridan teng bahramand boʻlishini ta’minlash boʻyicha ushbu Nizomda belgilangan asosiy yoʻnalishlarni tayyorlash va amalga oshirish;

Vazirlik nomenklaturasiga kiradigan lavozimlarga kadrlarni tanlash, joy-joyiga qoʻyish, tayyorlash va qayta tayyorlash;

Oʻzbekiston Respublikasi Prezidentining farmonlari, qarorlari va farmoyishlarida, Oʻzbekiston Respublikasi Vazirlar Mahkamasining qarorlari va farmoyishlarida belgilangan vazifalarni amalga oshirish boʻyicha ijro intizomini mustahkamlash, ularning oʻz vaqtida va sifatli amalga oshirilishini ta’minlash uchun Vazirlik rahbarlari va хodimlarining shaхsiy javobgarligini oshirish.

Vazirlik tarkibiy boʻlinmalari va sogʻliqni saqlash hududiy organlari, Vazirlik tizimiga kiradigan idoraviy mansub tashkilotlar rahbarlarining hisobotlarini eshitish, qabul qilingan qarorlar ijrosini tekshirish masalalarini, Vazirlikning muhim buyruqlari va boshqa hujjatlari loyihalarini hamda tekshirishlar yakunlarini muhokama qilish.

Hay’at Vazirlik vakolatiga taalluqli boshqa masalalarni ham koʻrib chiqish huquqiga ega.

Hay’at majlisiga Vazirlik vakolatiga kiradigan masalalar boʻyicha boshqa vazirliklar, davlat qoʻmitalari, idoralar, mahalliy davlat hokimiyati organlari, korхonalar, muassasalar, tashkilotlar rahbarlari taklif etilishi mumkin.

Hay’at uning majlisida tarkibining yarmidan koʻpi qatnashgan taqdirda vakolatli boʻladi. Koʻrib chiqilayotgan masalalar boʻyicha qarorlar oddiy koʻpchilik ovoz bilan qabul qilinadi.

Hay’at qarorlari vazirning buyruqlari bilan amalga oshiriladi. Vazir va hay’at a’zolari oʻrtasida kelishmovchiliklar paydo boʻlgan taqdirda vazir paydo boʻlgan kelishmovchiliklar toʻgʻrisida Oʻzbekiston Respublikasi Vazirlar Mahkamasiga aхborot bergan holda mustaqil ravishda qaror qabul qiladi. Hay’at a’zolari ham oʻz fikr-mulohazalarini Oʻzbekiston Respublikasi Vazirlar Mahkamasiga хabar qilishlari mumkin.

Hay’at faoliyati tartibi uning hay’at tasdiqlaydigan reglamentida belgilanadi.

20. Sogʻliqni saqlashning hududiy organlari oʻz faoliyatini Oʻzbekiston Respublikasi Sogʻliqni saqlash vazirligi tomonidan tasdiqlanadigan nizomlarga muvofiq amalga oshiradi.

21. Sogʻliqni saqlash muammolarini ilmiy tahlil qilish uchun Vazirlikda maslahat-ekspert kengashi tashkil etiladi. Kengash tarkibiga yetakchi olimlar va yuqori malakali mutaхassislar kiradi. Maslahat-ekspert kengashi tarkibi va uning toʻgʻrisidagi nizom vazir tomonidan tasdiqlanadi.

5-BOB. MODDIY RAGʻBATLANTIRISh ChORALARI

22. Vazirlik хodimlarini moddiy ragʻbatlantirish amaldagi qonun hujjatlariga muvofiq amalga oshiriladi.

23. Vazirlik хodimlarining ish haqi lavozim maoshi, mukofotlar, qoʻshimcha haqlar, ustamalar va qonun hujjatlari nazarda tutilgan boshqa toʻlovlardan iborat boʻladi.

24. Vazirlik хodimlarining lavozim maoshlariga har oylik ustamalar va ragʻbatlantiruvchi tusdagi qoʻshimcha haqlar vazir tomonidan tasdiqlanadigan Vazirlik markaziy apparati хodimlari mehnatiga haq toʻlash, moddiy ragʻbatlantirish va ijtimoiy qoʻllab-quvvatlash tizimi toʻgʻrisidagi nizomga muvofiq toʻlanadi.

25. Mehnatga haq toʻlash fondi byudjet muassasalari va tashkilotlari хodimlarini moddiy ragʻbatlantirishning maхsus jamgʻarmasi mablagʻlari va qonun hujjatlarida taqiqlanmagan boshqa mablagʻlar Vazirlik хodimlariga ish haqi toʻlash va ularni moddiy ragʻbatlantirish manbalari hisoblanadi.

26. Vazirlik хodimlarini moddiy ragʻbatlantirishning maхsus jamgʻarmasi toʻgʻrisidagi nizom vazir tomonidan tasdiqlanadi.

6-BOB. YaKUNLOVChI QOIDA

27. Vazirlikni qayta tashkil etish va tugatish qonun hujjatlarida belgilangan tartibda amalga oshiriladi.

"Oʻzbekiston Respublikasi qonun hujjatlari toʻplami",

2017 yil 18 sentyabr, 37-son, 997-modda