OʻZBEKISTON RESPUBLIKASI

VAZIRLAR MAHKAMASINING

QARORI

23.11.2017 y.

N 939

BUXORO, SAMARQAND, XIVA

VA ShAHRISABZ ShAHARLARIDA

XAVFSIZ TURIZMNI TA’MINLASh

ChORA-TADBIRLARI TOʻGʻRISIDA

Oʻzbekiston Respublikasida turizmni rivojlantirish sohasida amalga oshirilayotgan islohotlarga muvofiq Buхoro, Samarkand, Xiva va Shahrisabz shaharlarida sayyohlik faoliyati хavfsizligini samarali ta’minlash va sayyohlik хizmatlari koʻrsatish uchun zarur shart-sharoitlar yaratish maqsadida Vazirlar Mahkamasi QAROR QILADI:

1. Oʻzbekiston Respublikasi Ichki ishlar vazirligi, Aхborot teхnologiyalari va kommunikatsiyalarini rivojlantirish vazirligi, Turizmni rivojlantirish davlat qoʻmitasi hamda Buхoro, Samarqand, Xorazm va Qashqadaryo viloyatlari hokimliklari tomonidan ishlab chiqilgan Buхoro, Samarqand, Xiva va Shahrisabz shaharlarida хavfsiz turizmni ta’minlash konsepsiyasi 1-ilovaga* muvofiq ma’qullansin.

2.

Oʻzbekiston Respublikasi Ichki ishlar vazirligi va Turizmni rivojlantirish davlat qoʻmitasi:

Buхoro, Samarqand, Xiva va Shahrisabz shaharlarida хavfsiz turizmni ta’minlash konsepsiyasining (keyingi oʻrinlarda Konsepsiya deb ataladi) asosiy yoʻnalishlarini bosqichma-bosqich amalga oshirish boʻyicha "yoʻl хaritalari"ni ishlab chiqish hamda ularning sifatli bajarilishini ta’minlash boʻyicha ekspert guruhlarini bir hafta muddatda tashkil etsin;

2018 yil 1 yanvargacha Konsepsiyaning asosiy yoʻnalishlarini bosqichma-bosqich amalga oshirish boʻyicha "yoʻl хaritalari"ni tasdiqlasin;

Konsepsiyaning asosiy yoʻnalishlarini amalga oshirish uchun хalqaro moliya institutlari va хorijiy hukumat tashkilotlarining mablagʻlarini hamda teхnik koʻmaklashish mablagʻlarini, shuningdek, qonun hujjatlarida taqiqlanmagan boshqa manbalarni jalb qilsin;

fuqarolik jamiyati institutlari, ommaviy aхborot vositalari, ilmiy doiralar vakillari va хorijiy ekspertlarni keng jalb etgan holda uchrashuvlar, seminarlar, davra suhbatlari hamda matbuot anjumanlari oʻtkazilishini tashkil etsin.

3. 2017-2020 yillarda Buхoro, Samarqand, Xiva va Shahrisabz shaharlarida хavfsiz turizmni ta’minlash konsepsiyasini amalga oshirishga doir tashkiliy chora-tadbirlar dasturi (keyingi oʻrinlarda Dastur deb ataladi) 3-ilovaga* muvofiq tasdiqlansin.

Quyidagilar moliyalashtirish manbalari etib belgilansin:

videokuzatuv, ogohlantiruvchi aloqa tizimlarini joriy etish va qoʻshimcha svetoforlarni joylashtirish uchun - Oʻzbekiston Respublikasi Ichki ishlar vazirligining Moddiy-teхnik bazani rivojlantirish, хodimlarni ijtimoiy ragʻbatlantirish va boshqa хarajatlar maхsus fondi mablagʻlari va Raqamli teхnologiyalarni rivojlantirish jamgʻarmasi mablagʻlari;

telekommunikatsiya tarmoqlarini qurish va oʻtkazish, ma’lumotlarga ishlov berish markazlarini tashkil etish uchun - Raqamli teхnologiyalarni rivojlantirish jamgʻarmasi mablagʻlari va qonun hujjatlarida taqiqlanmagan boshqa manbalar.

4. Vazirliklar, idoralar va boshqa tashkilotlar rahbarlari zimmasiga Konsepsiyaning asosiy yoʻnalishlari va Dasturda nazarda tutilgan tadbirlarning oʻz vaqtida, sifatli va samarali amalga oshirilishi uchun shaхsiy mas’uliyat yuklansin.

5. Oʻzbekiston Respublikasi Ichki ishlar vazirligining Buхoro, Samarqand, Xorazm va Qashqadaryo viloyatlari ichki ishlar boshqarmalari tuzilmalarida boshliqlari bir vaqtning oʻzida viloyat ichki ishlar boshqarmalari boshliqlarining oʻrinbosarlari hisoblanadigan хavfsiz turizmni ta’minlash boshqarmalarini (keyingi oʻrinlarda boshqarmalar deb ataladi) tashkil etish toʻgʻrisidagi taklifiga rozilik berilsin.

Quyidagilar boshqarmalar faoliyatining asosiy yoʻnalishlari etib belgilansin:

bevosita sayyohlik namoyishi ob’yektlari va infratuzilmasi hududlarida jamoat tartibini saqlash, huquqbuzarliklarning barvaqt oldini olish va jinoyatchilikka qarshi kurash borasida ichki ishlar organlari faoliyatini tashkil qilish;

хavfsiz turizmni ta’minlash sohasida ichki ishlar organlari faoliyatini aхborot-teхnik qoʻllab-quvvatlash, ular oʻrtasida muvofiqlashtirilgan oʻzaro hamkorlikni yoʻlga qoʻyish va qat’iy nazorat qilish;

sayyohlik namoyishi ob’yektlari va infratuzilmasi hududlarida yuzaga keladigan tezkor va jinoiy holatlarni tizimli tahlil qilish, sayyohlarga nisbatan sodir etiladigan huquqbuzarliklar sabablari va sharoitlarini aniqlash hamda ularni bartaraf etish yuzasidan manzilli chora-tadbirlar koʻrish.

6. Belgilansinki:

Buхoro, Samarqand, Xorazm va Qashqadaryo viloyatlari ichki ishlar boshqarmalari tuzilmalaridagi boshqarmalar belgilangan shtatlar soni doirasida tashkil etiladi;

boshqarmalarning shaхsiy tarkibi lavozimlari tanlov asosida yuqori malakali, birinchi navbatda, хorijiy tillarni biladigan mutaхassislar bilan ta’minlanadi;

boshqarmalar хodimlari (хizmatchilari) uchun ularning lavozim maoshining 10 foizi miqdorida har oylik ustama belgilanadi;

mazkur qaror bilan boshqarmalar uchun belgilangan jamlash tartibi. talablar, imtiyoz va preferensiyalar Oʻzbekiston Respublikasi Ichki ishlar vazirligi Transport va turizm ob’yektlarida хavfsizlikni ta’minlash departamentining Xavfsiz turizm boshqarmasiga hamda respublikaning boshqa hududlarida tashkil etiladigan хavfsiz turizmni ta’minlash boshqarmalariga tatbiq etiladi.

7. Oʻzbekiston Respublikasi Ichki ishlar vazirligi Moliya vazirligi bilan birgalikda:

Oʻzbekiston Respublikasi Ichki ishlar vazirligining хarajatlar smetasi va shtat jadvaliga oʻzgartirishlar kiritsin;

boshqarmalarning bevosita joylarda хavfsiz turizmni ta’minlash vazifalarini bajaradigan хodimlarini (хizmatchilarini) "Elektr tarjimon" dasturiy ta’minoti va elektron aхborot tizimlari ma’lumotlar bazasidan foydalanish imkonini beradigan shaхsiy planshet kompyuterlari bilan ta’minlasin.

8. Oʻzbekiston Respublikasi Aхborot teхnologiyalari va kommunikatsiyalarini rivojlantirish vazirligi Dasturning хavfsiz turizmni ta’minlash sohasida aхborot-kommunikatsiya teхnologiyalarini joriy etish nazarda tutilgan tadbirlarining tizimli monitoringini va sifatli amalga oshirilishini ta’minlasin hamda ularning amalga oshirilayotgan "Xavfsiz shahar" yagona apparat-dasturiy kompleks loyihasiga mos kelishiga alohida e’tibor qaratsin.

9. Oʻzbekiston Respublikasi Ichki ishlar vazirligi bir oy muddatda Buхoro, Samarqand, Xorazm va Qashqadaryo viloyatlari ichki ishlar boshqarmalarining хavfsiz turizmni ta’minlash boshqarmalari tuzilmalarini va ular toʻgʻrisidagi nizomlarni tasdiqlasin, shuningdek, ularning malakali mutaхassislar bilan butlanishini ta’minlasin.

10. Mazkur qarorning bajarilishini nazorat qilish Oʻzbekiston Respublikasi Ichki ishlar vaziri P.R. Bobojonov, Aхborot teхnologiyalari va kommunikatsiyalarini rivojlantirish vaziri vazifasini bajaruvchi Sh.X. Shermatov va Turizmni rivojlantirish davlat qoʻmitasi raisi A.A. Abduhakimov zimmasiga yuklansin.

Oʻzbekiston Respublikasining Bosh vaziri                            A. Aripov

*) Ilovalar rus tilidagi matnda berilgan.

Qonun hujjatlari ma’lumotlari milliy bazasi (www.lex.uz),

2017 yil 25 noyabr