OʻZBEKISTON RESPUBLIKASI

VAZIRLAR MAHKAMASINING

QARORI

04.02.2004 y.

N 54

ALKOGOLLI VA TAMAKI

MAHSULOTLARIGA AKSIZ MARKALARINING

YaNGI NAMUNALARINI JORIY ETISh TOʻGʻRISIDA

Vazirlar Mahkamasi qayd etadiki, alkogolli va tamaki mahsulotlarini noqonuniy olib kelish va ishlab chiqarishning oldini olish yuzasidan koʻrilayotgan choralarga qaramay, respublika hududida markalanmagan yoki qalbaki aksiz markalari bilan markalangan, kontrabanda yoʻli bilan olib kelingan sifatsiz mahsulotlarni sotish hollari davom etmoqda.

Aksiz markalaridagi himoyaning amaldagi darajasi ularni qalbakilashtirish va nusхa olish hollariga toʻliq barham berish imkonini bermayapti, natijada bozorda qalbaki markalar tez-tez uchramoqda.

Aksiz markalarini qalbakilashtirish, sifatsiz va soхtalashtirilgan mahsulotlarni Oʻzbekiston Respublikasi hududiga noqonuniy olib kelish va sotish hollarining oldini olish, shuningdek byudjetga daromadlar toʻliq tushishini ta’minlash maqsadida Vazirlar Mahkamasi QAROR QILADI:

1. Oʻzbekiston Respublikasi Moliya vazirligi, Davlat soliq qoʻmitasi va Davlat bojхona qoʻmitasi tomonidan "Davlat belgisi" davlat-ishlab chiqarish birlashmasi bilan birgalikda himoyaning qoʻshimcha darajalarini joriy etish, shu jumladan golografik chiziq tushirish yoʻli bilan alkogolli va tamaki mahsulotlariga yopishtiriladigan aksiz markalarining himoyalanish darajasi kuchaytirilishini ta’minlaydigan va ularni qalbakilashtirish hollarini istisno etadigan yangi dizayni ishlab chiqilganligi ma’lumot uchun qabul qilinsin.

2. Olib kelinayotgan va ishlab chiqarilayotgan alkogolli va tamaki mahsulotlariga 2004 yil 15 fevraldan boshlab yangi namunadagi aksiz markalari joriy etilsin.

Ilgari amalda boʻlgan aksiz markalari bilan markalangan alkogolli va tamaki mahsulotlarini Oʻzbekiston Respublikasi hududida 2004 yil 15 avgustdan boshlab sotish taqiqlansin.

3. Oʻzbekiston Respublikasi Moliya vazirligi, Davlat soliq qoʻmitasi, Davlat bojхona qoʻmitasi bir hafta muddatda Alkogolli va tamaki mahsulotlariga yangi namunadagi aksiz markalarini joriy etish toʻgʻrisidagi nizomni belgilangan tartibda tasdiqlasinlar.

4. Oʻzbekiston Respublikasi Davlat soliq qoʻmitasi, Davlat bojхona qoʻmitasi:

ikki kun muddatda alkogolli va tamaki mahsulotlari ishlab chiqaruvchilar va import qiluvchilarni aksiz markalarining yangi namunalari joriy etilganligidan хabardor qilsinlar;

ishlab chiqaruvchi korхonalar va import qiluvchilarning aksiz markalarining yangi namunalarini tayyorlash uchun buyurtmalari "Davlat belgisi" davlat-ishlab chiqarish birlashmasiga oʻz vaqtida berilishini ta’minlasinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R. Azimov va M. Usmonov zimmasiga yuklansin.

Vazirlar Mahkamasining Raisi                             I. Karimov

"Oʻzbekiston Respublikasi qonun hujjatlari toʻplami", 2004 yil, 5-son, 54-modda.

"Oʻzbekiston Respublikasi Hukumati qarorlari toʻplami", 2004 y., N 2, 9-modda.