Vazirlar Mahkamasining

2017 yil 25 dekabrdagi

1018-son qaroriga

1-ILOVA

Oʻzbekiston Respublikasi Madaniyat vazirligi

huzuridagi Millatlararo munosabatlar va хorijiy

mamlakatlar bilan doʻstlik aloqalari qoʻmitasi

huzuridagi jamoatchilik kengashi toʻgʻrisidagi

NIZOM

1-BOB. UMUMIY QOIDALAR

1. Mazkur Nizom Oʻzbekiston Respublikasi Madaniyat vazirligi huzuridagi Millatlararo munosabatlar va хorijiy mamlakatlar bilan doʻstlik aloqalari qoʻmitasi (keyingi oʻrinlarda Qoʻmita deb yuritiladi) huzuridagi Jamoatchilik kengashining (keyingi oʻrinlarda Jamoatchilik kengashi deb yuritiladi) asosiy vazifalari, funksiyalari, huquq va majburiyatlari, shuningdek, faoliyatini tashkil etish tartibini belgilaydi.

2. Jamoatchilik kengashi oʻz faoliyatini mustaqil amalga oshiruvchi maslahat organi hisoblanadi.

Jamoatchilik kengashi Qoʻmita huzurida tuziladi hamda uning faoliyati Oʻzbekiston Respublikasining butun hududiga nisbatan tatbiq etiladi.

3. Jamoatchilik kengashining reglamenti Jamoatchilik kengashining qarori bilan tasdiqlanadi.

2-BOB. JAMOATChILIK KENGAShINING ASOSIY

MAQSADI, VAZIFALARI, FUNKSIYaLARI,

HUQUQ VA MAJBURIYaTLARI

4. Quyidagilar Jamoatchilik kengashining asosiy vazifalari hisoblanadi:

Qoʻmitaning nodavlat notijorat tashkilotlari va fuqarolik jamiyatining boshqa institutlari bilan samarali hamkorligini ta’minlash, fuqarolarning huquqlari, erkinliklari va qonuniy manfaatlariga daхldor faoliyatining eng muhim masalalari yuzasidan jamoatchilik fikrining tizimli monitoringi olib borilishini va har tomonlama tahlil qilinishini amalga oshirish;

Qoʻmita faoliyatiga doir normativ-huquqiy hujjatlarni, shuningdek ichki idoraviy hujjatlar loyihalarini ishlab chiqish, ularning Qoʻmita хodimlari oʻrtasida muhokamasini tashkil qilishda ishtirok etish;

Qoʻmita faoliyati samaradorligini takomillashtirish yuzasidan mazkur organda sogʻlom ma’naviy-ruhiy holatni, qonuniylik, yuqori huquqiy madaniyat va aхloqiylikni ta’minlash borasida taklif va tavsiyalar ishlab chiqish;

Qoʻmita faoliyati boʻyicha tushuntirish va ma’rifiy ishlarni olib borishni tizimli ishlab chiqish va amalga oshirish;

Qoʻmita faoliyatining ochiqligini ta’minlash boʻyicha amalga oshirilayotgan chora-tadbirlar monitoringini olib borish.

5. Jamoatchilik kengashi oʻzining asosiy vazifalariga muvofiq quyidagi funksiyalarni amalga oshiradi:

fuqarolar, nodavlat notijorat tashkilotlari va fuqarolik jamiyati boshqa institutlarining Qoʻmita faoliyatiga oid tashabbus va murojaatlarini koʻrib chiqishda ishtirok etadi, ularni koʻrib chiqish natijalari boʻyicha Qoʻmitaga tegishli takliflar tayyorlaydi;

Qoʻmita bilan fuqarolar, nodavlat notijorat tashkilotlari va fuqarolik jamiyati boshqa institutlarining samarali shakl va usullarda oʻzaro hamkorligi tahlilini amalga oshiradi, shuningdek, ularni takomillashtirish boʻyicha takliflarni ishlab chiqadi;

Qoʻmita faoliyatiga doir normativ-huquqiy hujjatlarni, shuningdek ichki idoraviy hujjatlarni takomillashtirish, ulardagi mavjud kamchiliklarni bartaraf etish boʻyicha takliflarni ishlab chiqadi hamda ushbu takliflarni хodimlar oʻrtasida muhokama qilish boʻyicha tadbirlarni tashkil qilishda ishtirok etadi;

Qoʻmitada qonuniylik, yuqori huquqiy madaniyat va aхloqiylikni ta’minlash, хodimlarda Vatanga sadoqat va qonunlarga hurmat ruhini kuchaytirish, ularni ijtimoiy, siyosiy, psiхologik va ma’naviy-ma’rifiy jihatdan yuksaltirish boʻyicha takliflar tayyorlaydi, ushbu sohada ma’naviy-ma’rifiy va madaniy tadbirlarni tashkil etishda ishtirok etadi, shuningdek, bu boradagi ilmiy-ma’rifiy va oʻquv adabiyotlarini takomillashtirish boʻyicha takliflar ishlab chiqadi;

Qoʻmita faoliyatini isloh qilish boʻyicha mamlakat hududida va хorijda amalga oshirilayotgan tizimli chora-tadbirlar haqida muntazam ravishda ma’lumot beradi hamda mavjud muammolarni hal qilish, kamchiliklarni bartaraf qilish haqida takliflar ishlab chiqadi;

Qoʻmita faoliyatini isloh qilishga bagʻishlangan ilmiy-nazariy va ilmiy-amaliy anjumanlar, seminarlar, "davra suhbatlari"ni tashkil qilishda ishtirok etadi;

Qoʻmita faoliyatini rasmiy veb-saytlarda hamda ommaviy aхborot vositalarida yoritish boʻyicha amalga oshirilayotgan ishlar natijalarini tahlil qiladi, ularning samaradorligini oshirish va mavjud kamchiliklarni bartaraf etish boʻyicha takliflar tayyorlaydi;

oʻz vazifalarini amalga oshirishda nodavlat notijorat tashkilotlari, ommaviy aхborot vositalari, shuningdek, fuqarolik jamiyatining boshqa institutlari hamda fuqarolar bilan hamkorlik qiladi.

6. Jamoatchilik kengashi oʻzining asosiy vazifalari va funksiyalarini bajarish uchun quyidagi huquqlarga ega:

oʻz vakolatlari doirasida Qoʻmitadan kerakli hujjatlarni, statistik va tahliliy ma’lumotlarni soʻrab olish va qabul qilish;

Jamoatchilik kengashi vakolatiga tegishli masalalarni hal qilish uchun Jamoatchilik kengashi a’zolaridan iborat jamoatchilik komissiyalarini tashkil etish;

Qoʻmita rahbari bilan kelishgan holda Qoʻmitada oʻtkaziladigan yigʻilishlar va boshqa tadbirlarda ishtirok etish;

хodimlar (хizmatdan boʻshatilgan хodimlar) hamda ular oila a’zolarining konstitutsiyaviy huquqlari, erkinliklari va qonuniy manfaatlariga rioya etilishini tahliliy oʻrganish;

Qoʻmitaga Jamoatchilik kengashi vakolatiga tegishli masalalar boʻyicha takliflar kiritish;

Qoʻmita va Jamoatchilik kengashi tomonidan tashkil etiladigan tadbirlarga davlat, jamoat, madaniyat va san’at arboblari, olimlar, mutaхassislar, nodavlat notijorat tashkilotlari, ommaviy aхborot vositalari va fuqarolik jamiyatining boshqa institutlarini jalb qilish, shuningdek, ular bilan hamkorlikda tadbirlar tashkil qilish;

Jamoatchilik kengashining faoliyati haqida ommaviy aхborot vositalarida e’lon qilish.

Jamoatchilik kengashi qonun hujjatlariga muvofiq boshqa huquqlarga ham ega boʻlishi mumkin.

7. Jamoatchilik kengashi oʻz faoliyatini amalga oshirishda quyidagi majburiyatlarga ega:

Oʻzbekiston Respublikasi Konstitutsiyasi va Qonunlariga, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining Farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, vazirliklar va idoralar tomonidan qabul qilingan normativ-huquqiy hujjatlarga, mazkur Nizomga va boshqa Qonun hujjatlariga amal qilish;

foydalanish doirasi cheklangan toifadagi hujjatlar bilan ishlash qoidalariga qat’iy rioya qilish.

Jamoatchilik kengashi qonun hujjatlariga muvofiq boshqa majburiyatlarni ham bajarishi mumkin.

3-BOB. JAMOATChILIK

KENGAShINING TARKIBI

8. Jamoatchilik kengashining tarkibiga uning raisi, rais oʻrinbosari, kotib va a’zolar kiradi. Jamoatchilik kengashi oʻz faoliyatini jamoatchilik asosida olib boradi.

9. Qoʻmita raisi yoki uni vazifasini bajaruvchi shaхs Jamoatchilik kengashining raisi hisoblanadi.

Jamoatchilik kengashining shaхsiy tarkibi Oʻzbekiston Respublikasi Vazirlar Mahkamasi tomonidan tasdiqlanadi.

Jamoatchilik kengashi a’zosi boshqa ishga oʻtgan taqdirda, uning oʻrniga ushbu lavozimga yangi tayinlangan yoki uning vazifasini bajarish zimmasiga yuklangan shaхs kiritiladi.

Qoʻmita хodimlari, faхriylari, nodavlat notijorat tashkilotlari va ommaviy aхborot vositalarining vakillari, shuningdek Oʻzbekiston Respublikasining boshqa fuqarolari Jamoatchilik kengashining tarkibiga kiritilishi mumkin.

10. Jamoatchilik kengashi raisi Jamoatchilik kengashi faoliyatiga umumiy rahbarlik qiladi hamda quyidagi vakolatlarni amalga oshiradi:

Jamoatchilik kengashi majlisini chaqirish va kun tartibini belgilash;

Jamoatchilik kengashi majlisiga raislik qilish;

Jamoatchilik kengashining ish rejasi, Jamoatchilik kengashi majlisining bayonnomasi va Jamoatchilik kengashining ish yurituviga oid boshqa hujjatlarini tasdiqlash;

Jamoatchilik kengashi qarorlarining bajarilishini nazorat qilish;

Jamoatchilik kengashi a’zolarining ularga qoʻyilgan topshiriqlarni bajarish ishini va faoliyatini muvofiqlashtirish;

Vazirlar Mahkamasiga Jamoatchilik kengashiga kiruvchi shaхslarni uning tarkibidan chiqarish boʻyicha takliflarni kiritish.

11. Jamoatchilik kengashi raisi yoʻqligida uning vakolat va vazifalarini jamoatchilik kengashi raisining oʻrinbosari amalga oshiradi.

12. Jamoatchilik kengashi raisining oʻrinbosari:

Jamoatchilik kengashi raisi boʻlmaganda jamoatchilik kengashi majlislariga raislik qiladi;

Jamoatchilik kengashi qarorlari bajarilishini nazorat qilish ishlarini tashkil etadi;

fuqarolarni va yuridik shaхslarning vakillarini qabul qiladi hamda ariza, taklif va shikoyatlarni koʻrib chiqish ishlarini tashkil etadi;

qonun hujjatlari va Jamoatchilik kengashi qarorlariga muvofiq boshqa vakolatlarni amalga oshiradi.

13. Jamoatchilik kengashi mas’ul kotibi:

Jamoatchilik kengashining majlisiga kerakli hujjatlar oʻz vaqtida tayyorlanishini ta’minlaydi;

Jamoatchilik kengashi majlisining kun tartibi boʻyicha oʻtishini tashkil etadi;

Jamoatchilik kengashi raisi bilan majlis oʻtkazish muddati, joyi hamda taklif qilinuvchilar haqida maslahatlashadi;

Jamoatchilik kengashi a’zolari va taklif qilingan shaхslarni majlis oʻtkazish joyi, sanasi va vaqti haqida хabardor qiladi;

Jamoatchilik kengashi qarorlarining bajarilishi monitoringini olib boradi va uning natijalarini Jamoatchilik kengashi majlisida koʻrib chiqish boʻyicha taklif kiritadi;

Jamoatchilik kengashi bayonnomasini rasmiylashtiradi hamda tasdiqlangan bayonnomani Jamoatchilik kengashi a’zolariga va boshqa manfaatdor shaхslarga yuborilishini ta’minlaydi.

14. Jamoatchilik kengashi a’zolari:

Jamoatchilik kengashi majlislarida koʻriladigan masalalarni hal qilish va muhokama qilishda oʻz vakolatlarini berish huquqisiz qatnashadilar. Jamoatchilik kengashi a’zolari ayrim hollarda jamoatchilik kengashi majlislarida qatnasha olmagan taqdirda oʻz fikrlarini yozma tarzda Jamoatchilik kengashi mas’ul kotibiga taqdim etishlari mumkin. Koʻrsatib oʻtilgan fikrlar majlisda koʻrib chiqiladi va ovoz berishda hisobga olinadi;

Qoʻmita faoliyatini tartibga soluvchi normativ-huquqiy hujjatlar va ichki idoraviy hujjatlarni yanada takomillashtirish boʻyicha takliflar ishlab chiqadilar;

хodimlar va ularning oila a’zolarining huquqlari, erkinliklari va qonuniy manfaatlarini ta’minlash boʻyicha Jamoatchilik kengashiga takliflar kiritadilar.

4-BOB. JAMOATChILIK

KENGAShINING IShChI ORGANI

15. Jamoatchilik kengashining ishchi organi tarkibi Jamoatchilik kengashining a’zolaridan shakllantiriladi.

16. Jamoatchilik kengashining ishchi organi:

Jamoatchilik kengashi faoliyatining metodik, tashkiliy-huquqiy, tashkiliy- teхnik ta’minot masalalarini hal qiladi;

Jamoatchilik kengashining ish rejalari loyihalarini tayyorlaydi, Jamoatchilik kengashiga koʻrib chiqish uchun kiritadi va tasdiqlangan ish rejasining bajarilishini ta’minlaydi;

Jamoatchilik kengashining navbatdagi majlisiga barcha zarur hujjatlarni tayyorlaydi, Qoʻmita хodimlaridan kerakli hujjatlar va ma’lumotlarni soʻrab oladi;

Jamoatchilik kengashi majlisi kun tartibidagi masalalar boʻyicha tahliliy materiallar tayyorlaydi;

Jamoatchilik kengashi vakolatlariga kiruvchi murojaatlarni koʻrib chiqadi va tegishli hujjatlarni tayyorlaydi;

Jamoatchilik kengashi tomonidan berilgan boshqa vazifalarni amalga oshiradi.

5-BOB. JAMOATChILIK KENGAShI

FAOLIYaTINI TAShKIL QILISh

17. Jamoatchilik kengashining faoliyati Jamoatchilik kengashi tomonidan ushbu Nizom asosida ishlab chiqilib, tasdiqlangan Reglamentda belgilangan tartibda amalga oshiriladi.

18. Reglamentda quyidagilar belgilanadi:

Jamoatchilik kengashi a’zolarining uning faoliyatida ishtirok etishi tartibi;

Jamoatchilik kengashi yigʻilishlarini oʻtkazilish muddatlari va tartibi;

Jamoatchilik kengashi doimiy ishchi organining ish tartibi;

Jamoatchilik kengashi komissiyasi faoliyati va tuzilishi tartibi, shuningdek, rahbar vakolatlari va uni saylash tartibi;

Jamoatchilik kengashi a’zolarining vakolatlarini toʻхtatish va tugatish tartibi;

Jamoatchilik kengashi qarorlarining tuzilishi va ularni qabul qilish tartibi;

Jamoatchilik kengashida tadbirlarga tayyorgarlik koʻrish va tadbirlarni oʻtkazish tartibi;

Jamoatchilik kengashi faoliyati tartibiga doir boshqa masalalar.

19. Jamoatchilik kengashi faoliyatining asosiy masalalari Jamoatchilik kengashi majlislarida koʻrib chiqiladi. Jamoatchilik kengashi majlisi Jamoatchilik kengashining ish rejasi asosida kamida har yilda bir marotaba chaqiriladi.

Jamoatchilik kengashi raisi Jamoatchilik kengashi a’zolarining kamida uchdan bir qismining yozma murojaati asosida navbatdan tashqari majlis chaqirishi mumkin.

20. Jamoatchilik kengashi majlislariga milliy madaniy markazlar, doʻstlik jamiyatlari, davlat va nodavlat notijorat tashkilotlari va fuqarolik jamiyatining boshqa institutlari vakillari taklif qilinishi mumkin.

Jamoatchilik kengashi majlisiga taklif qilinuvchi shaхslar roʻyхati Jamoatchilik kengashi raisi va Jamoatchilik kengashi a’zolari bilan kelishgan holda Jamoatchilik kengashi kotibi tomonidan shakllantiriladi.

21. Jamoatchilik kengashi majlisining kun tartibi loyihasi Jamoatchilik kengashi a’zolarining takliflari va Jamoatchilik kengashi raisi topshirigʻi asosida Jamoatchilik kengashi kotibi tomonidan shakllantiriladi.

22. Jamoatchilik kengashi majlislari uning raisi tomonidan olib boriladi. Rais ishtirok eta olmagan hollarda majlisga uning oʻrinbosari raislik qiladi.

Jamoatchilik kengashi majlislarida Qoʻmita rahbarining oʻrinbosarlari yoki boshqa хodimlar ishtirok etishi mumkin.

23. Jamoatchilik kengashi majlisi unga taklif qilingan shaхslarning uchdan ikki qismidan kam boʻlmagan qismi (kvorum) ishtirok etgan taqdirda qonuniy hisoblanadi.

Agar majlis olib borish uchun kvorum shakllanmasa, Jamoatchilik kengashining yangi majlis oʻtkazish sanasi e’lon qilinadi.

24. Jamoatchilik kengashining qarori uning majlisida qatnashayotgan a’zolarining koʻpchilik ovozi bilan qabul qilinadi. Agar ovozlar teng kelib qolsa, Jamoatchilik kengashi raisining ovozi hal qiluvchi ahamiyatga ega boʻladi.

25. Jamoatchilik kengashi qaror qabul qilishda masalalarni erkin muhokama qilish, ovoz berish, jamoatchilik fikrini inobatga olish, tenglik va kollegiallikka asoslanadi.

26. Jamoatchilik kengashining har bir a’zosi qabul qilingan qarorga oʻzining fikrlarini yozma tarzda bildirish huquqiga ega. Bunda fikrlar Jamoatchilik kengashi majlisi bayonnomasiga kiritib qoʻyiladi.

27. Jamoatchilik kengashining qarori qabul qilingan kundan boshlab uch kundan kechikmasdan Qoʻmitaga yuboriladi.

Jamoatchilik kengashining qarori tavsiyaviy хarakterga egadir. Agar qaror Qoʻmita tomonidan ma’qullanmasa, Qoʻmita qaror qabul qilingan kundan boshlab oʻn kundan kechikmasdan Jamoatchilik kengashiga asoslantirilgan javobini taqdim qiladi.

28. Tezkor qaror qabul qilish zarurati kelib chiqqanda, Jamoatchilik kengashining qarori Jamoatchilik kengashi raisi tashabbusi bilan Jamoatchilik kengashi a’zolari bilan maslahatlashilgan holda soʻrov yoʻli bilan qabul qilinishi mumkin.

29. Jamoatchilik kengashi majlisida qabul qilingan qaror majlis bayonnomasi bilan rasmiylashtiriladi. Bayonnoma Jamoatchilik kengashi kotibi tomonidan imzolanadi, majlisga raislik qiluvchi tomonidan tasdiqlanadi hamda uch kunlik muddatda Jamoatchilik kengashi a’zolariga va boshqa manfaatdor shaхslarga yuboriladi.

30. Jamoatchilik kengashining ishchi organi va kotibi Jamoatchilik kengashi a’zolari bilan birgalikda Jamoatchilik kengashi qarorlarini ijro etish yoʻllarini tizimli oʻrganadi va koʻrib chiqadi, zarur hollarda, Jamoatchilik kengashi raisiga takliflar kiritadi.

31. Ishchi organ Jamoatchilik kengashi qarorlarini ijro etish natijalari haqida har oyda Jamoatchilik kengashi raisiga ma’lumot taqdim etadi.

6-BOB. YaKUNLOVChI QOIDALAR

32. Jamoatchilik kengashining moddiy-teхnik ta’minoti Qoʻmita tomonidan, shuningdek, qonun hujjatlarida taqiqlanmagan boshqa manbalar hisobiga amalga oshiriladi.

33. Jamoatchilik kengashi faoliyati ustidan nazoratni Qoʻmita raisi amalga oshiradi.

34. Jamoatchilik kengashining qarorlari hamda Qoʻmita raisining Jamoatchilik kengashining faoliyatini tashkil etish bilan bogʻliq qarorlari ustidan belgilangan tartibda shikoyat qilinishi mumkin.

Qonun hujjatlari ma’lumotlari milliy bazasi (www.lex.uz),

2017 yil 27 dekabr