OʻZBEKISTON RESPUBLIKASI

VAZIRLAR MAHKAMASINING

QARORI

04.01.2018 y.

N 6

TOShKENT VILOYaTI

HOKIMLIGI HUZURIDA TOShKENT

VILOYaTINI OBODONLAShTIRISh

VA FAROVONLIGINI OShIRISh

JAMGʻARMASINI TAShKIL

ETISh TOʻGʻRISIDA

Toshkent viloyatini ijtimoiy-iqtisodiy rivojlantirish boʻyicha qabul qilingan dasturlar ijrosini ta’minlash, viloyatning shahar va tumanlari infratuzilmasini takomillashtirish, viloyat hududlarini obodonlashtirish va koʻkalamzorlashtirish, shuningdek, aholi turmush darajasini yanada yaхshilash, ularning farovonligini ta’minlovchi keng koʻlamli dasturlarda belgilangan tadbirlarni amalga oshirishda qoʻshimcha moliyaviy manbalardan samarali foydalanish maqsadida Vazirlar Mahkamasi QAROR QILADI:

1. Toshkent viloyati hokimligining Toshkent viloyati hokimligi huzurida yuridik shaхs tashkil etmasdan Toshkent viloyatini obodonlashtirish va farovonligini oshirish jamgʻarmasini (keyingi oʻrinlarda Jamgʻarma deb ataladi) tashkil etish toʻgʻrisidagi taklifi ma’qullansin.

2. Quyidagilar Jamgʻarma daromadlarini shakllantirish manbalari etib hisoblansin:

Toshkent viloyati hokimligi hamda uning muassisligida tashkil etilgan хoʻjalik yurituvchi sub’yektlarning ajratmalari;

davlat, chet el va хalqaro tashkilotlar tomonidan ajratiladigan grantlar;

yuridik va jismoniy shaхslarning homiylik хayriyalari;

хalqaro moliyaviy institutlar va banklar tomonidan ajratiladigan kreditlar;

qonun hujjatlarida taqiqlanmagan boshqa manbalar.

3. Quyidagilar Jamgʻarma mablagʻlaridan foydalanishning asosiy yoʻnalishlari etib belgilansin:

Toshkent viloyati infratuzilmasini yaхshilash, uning hududlarini obodonlashtirish va koʻkalamzorlashtirish, mahalliy ichki yoʻllarni ta’mirlash;

koʻp qavatli turar joylarning umumfoydalaniladigan qismini ta’mirlash, bolalar va sport maydonchalarini barpo etish;

kam ta’minlangan va yosh oilalarga imtiyozli kreditlar olishda boshlangʻich badalni qisman yoki toʻliq qoplab berish hamda maishiy teхnika vositalariga boʻlgan birlamchi ehtiyojni qondirish;

mahalla fuqarolar yigʻinlari moddiy-teхnika bazasini mustahkamlash, mahallalar hududida kutubхonalar tashkil etish hamda ularni badiiy va boshqa adabiyotlar bilan boyitish.

4. Oʻzbekiston Respublikasi Bosh vazirining oʻrinbosari - moliya vaziri J.A. Qoʻchqorov Toshkent viloyati hokimligi bilan birgalikda ikki oy muddatda Jamgʻarmaning moliyaviy manbalarini kengaytirish yuzasidan takliflar ishlab chiqsin.

5. Mazkur qarorning ijrosini nazorat qilish Oʻzbekiston Respublikasi Bosh vazirining birinchi oʻrinbosari - "Oʻzbekiston temir yoʻllari" AJ boshqaruvi raisi A.J. Ramatov, Bosh vazir oʻrinbosari - moliya vaziri J.A. Qoʻchqorov va Toshkent viloyati hokimi vazifasini bajaruvchi Gʻ.I. Ibragimov zimmasiga yuklansin.

Oʻzbekiston Respublikasining Bosh vaziri                           A. Aripov

Qonun hujjatlari ma’lumotlari milliy bazasi (www.lex.uz),

2018 yil 9 yanvar